Isaías 23 - Dios Iwene

Dios Tiro comunidad lȩebakwa̧ Isaias yöawina jawa

¹ Baikwö laebobe Dios yöawi̧, Tiro comunidad baledakwa̧ jawa: —Ökwödö Tarsis niji isowibiyanö kwebachadöma, o̧'wo tjo̧achö kwubudekwaduwo, tjola lamatajiköbaduwola söbebö lotjinobetjö̧. Jau, ödötjö ichajadö, Tiro comunidad tjolabe kwichibaduwobö jö̧ka̧laduwijayonö, comunidadbi, tjolabi söbebö loawemida jo̧be. Chipre nijitjö ichajadö ökwödönö yötjawinadanö isabenö baledinobe, jo̧kwajabetjö̧ kwubudekwaduwo.

² —Ja̧danö ökwödö Tiro ö'wejesa'o yö̧neawemi jwaibalawa ö'öbö ju̧kwadöbi Sidon jojodötjö tea iyadöbi, wi̧inö ja̧nö kwubudekwaduwo. Ajayinöma ökwödötjö tea iyadöma Tirotjö labebö,

³ jwaibalawanö kwetjachinobe. Egipto nijibetjö ȩwa̧jö, Nilo ojwe ö'öbö pokwi̧, trigo jawa tjichejebinobe, ja̧danö ju'wi bö̧jȩ ba̧kwemeachibanö tjiyi̧ jawabi, kwiteboduwibe ichejebiatjinobe. Bö̧jȩ ba̧kwemeachibanö jojodö kwiteboduwibe ichibiatjinobe, tjitea kwemaduwakobetjö̧, isabenö otiwanö kwö̧jinaduwobe ajayinöma.

⁴ Jo̧kwaijayonö babe tabakwö kwö̧jaduwobö jö̧baladöja ökwödö Sidon niji jojodöma, inesö kwösödaduwemi, ö'wejesa'o comunidad Tiroma söbebö loawemida baibajobetjö̧. Jau, jwaibalawa ö'wejetjö, ajayinö ba̧jȩkwadö tjuju̧kwemi ji̧najayonö, jojodö deobeda baibajabe Tiro comunidadma, jojosuju la'akatjöda jitji̧munö eminökujudanö baibajabe, jitji̧mu möayedönö la'akatjöda da̧pedinökujudanö baibajabe, jwaibalawa ö'wejesa'o Tiro comunidadma.

⁵ —Egipto jojodöbi tjo̧'wo tjo̧bekwö tjö̧jakwedö, Tiro comunidad baledina wene tja̧ja̧kwenama.

⁶ Tarsis nijibebi yöbawö, jwaibalawa pebibö kwi̧'yaduwo, ja̧danö ja̧ wene a̧ja̧kwajadö, kwubudekwaduwo, jwaibalawa ö'öbö jukwadöma.

⁷ —Ayö, bi̧ya söbebö loawemima ajayinö Tiro comunidad, jwiinö tjo̧'wo ösöwanö tjö̧jinemi comunidad ji̧naji̧? Tiro comunidadma damötjö tjujunina comunidad, ja̧danö i̧ya̧da comunidadtjö damötjö jelobekwö latjebinelö, 'yayi comunidadbiya tjujunobö.

⁸ Tiro comunidadda ajayinö la'aka luwedö batjibakwedönö omudawö tjujuninemi comunidad, ja̧danö Tiro comunidad jojodötjö tea iyawa jojodöma, inesö la'aka luwedö tjujuluwi̧danö juluwinadö, ja̧danö bö̧jȩ ba̧kwemeachibanö jojodöma otiwanö tjomukwatinawö̧, Tiro comunidad tea iyawa jojodönö. Bemi söbebö loawemima, isabenö ja̧ Tiro comunidad ji̧naji̧?

⁹ —Isabenö Jo̧ Okobe Jwiinö Juluwo̧ Diosda bejenö baledobö omukwatö juninama. Otiwadösa jö̧ba̧lö omukwatö tjö̧ji̧ 'dö̧ibakobetjö̧, bejenö baledobö weinobe chömöledö. Jau, bö̧jȩ jojodötjö inesö otiwanö tjomukwatawö̧, otiwanö tjomukwatököwö̧ batjibanö meatö loakobetjö̧, bi̧ya inesö suli̧ waekwi̧ baledobö weinobe.

¹⁰ —Lamatö kwichibaduwo jö̧ka̧linaduwemi Tiro comunidadma ida̧ökö jwiobe, jo̧kwajabetjö̧ jwaibalawa pebibö, kwiteboduwibe kwȩwa̧jaduwo, ökwödö Tarsis nijitjö ichinadöma, Nilo ojwe petjibi̧danö, jwaibalawa pebibö kwȩwa̧jaduwo, kwiteaduwi iyawemi Tiro comunidad ida̧ökö jwiobetjö̧.

¹¹ —Baledaja̧ baikwö wanedö yöta̧la: Isabenö Jo̧ma, jwaibalawa wame iteda ömamu kabebö i̧sȩbajabe, ja̧danö la'aka luwedö tjitebokwena ju̧kwadönö tjö̧bawadö batjibanö ya̧ebajabe. Ja̧danö ju'wibi, Diosma weajabe, Canaan niji tjöekwemikwena söbebö lotjobö.

¹² Jobekwö webö, Sidon jojodönö yöa̧lajabe: –Bemi tupakwö kwo̧'wo ösöwanöma yöka̧lökakwujuja, ökwö Sidon itjiju möayujuma. Usula emawö, jwaibalawa pebibö, Chipre ö'wejesa'obe kwi̧'yo, jo̧kwaijayonö jobe kwichibijayonö, yayonö wene jwiinö kwö̧jökakwujuja, –jö̧ba̧lö yöa̧lajabe, Sidon niji jojodönö, —jö̧ba̧lö laebobe Dios yöawi̧, Tiro comunidad baledakwa̧ jawama.

¹³ Jau chömöledö, Caldeo jojodö tjitebo comunidad Babilonia kwomukwataduwo. Ja̧ comunidad jojodöma debi batjibinobe, Asiria jojodö jwiinö söbebö lotjinobetjö̧. Tjitea comunidad pjolö loawa ökiya isaka junö, comunidad pjolö lotjinobe, ja̧danö la'aka luwedö tjejubiyanö ji̧ mikwawi̧ma, okobe jwiinö 'döbebö tjeminobe. Jwiinö söbebö lotjinobe Babilonia comunidadma, söbebö loawemi, tebonö ju̧kwadö tjö̧jemida baibanö.

¹⁴ Jobekwö baledinadanö baledakobe Tiro comunidadbi, jo̧kwajabetjö Tarsis niji isowibiyanö kwebachadö tjubudekwobö ja̧kobe, tjö̧lamatinola Tiro comunidad tjolama, söbebö loawemida jo̧betjö̧.

¹⁵ Ja̧ möle Tiro comunidad suli̧ waekwakwa̧ möle baibaja̧ ikenama, ja'yubenö lekwe jojodö tjo̧'wo jwitjibakobe Tiro comunidadma. Bakwo̧ la'aka luwo̧ ö̧ji̧ mölebiya lekwi̧danö, setenta o̧biya baledibanö Tiro comunidad tjomukwatökakwedö bö̧jȩ jojodöma. Ikenama, bajaliyanö yemidanö Tiro comunidad tjotidakobe, ja̧danö yemidanö tjomukwatibakobe Tiro comunidadma.

¹⁶ Ju'wedö lo̧awa lo̧tjidanö baibakobe Tiro comunidad. Ju'wedö tjo̧'wo jwitjibinoko, jilekwamuböködökwö 'da̧'da̧bakwawö jinu̧ju̧nö lo̧awama baikwö laebobe: Ökwö tjo̧'wo jwitjibinoko kwilekwamuböködökwö 'da̧'da̧bakwawö ju̧ju̧ma, arpa kwebatö, comunidad ba̧kwemeachibanö lo̧bö kwekacho, arpa waisanö pjebö, jojodö tjösödi̧ lo̧awa nöinö lo̧köbo, jojodö yemidanö ökwönö tjomukwatibakobetjö̧, jö̧ba̧lö lo̧awa laebobe.

¹⁷ Ja̧danö, setenta o̧bia baledibaja̧ ikenama, Isabenö Jo̧ma yemidanö Tiro comunidad jojodönö pjaatakobe. Ja̧danö jobekwö pjaatobetjö̧, yemidanö tea iyö kwetjachakwedö Tiro comunidad jojodöma, tjiteboteniabe kwebachö, emöbi, iyöbi kwetjachakwedö.

¹⁸ Jo̧kwaijayonö, ja̧ möle idöda otiwanö tjö̧joböma tjisakwökakwedö Tiro comunidad jojodöma. Ajayinö idöda tjujuna̧lotö jö̧ba̧lö, emöbi, iyöbi kwebachinadö, jo̧kwaijayonö ja̧ möle tjotidaja̧ mikwama 'da̧batö tjujunakobe, Isabenö Jo̧ itea baibanö. Ja̧danö, jobekwö Dios itea baibanö 'da̧batö tjujunobetjö̧, Isabenö Jo̧ Dios öba a'o ju̧kwadöma otiwanö tjujuna̧lakwedö, tjiyi̧tjö nöinö kwakwawabi, kamisi otiwi̧bi otiwanö tjujuna̧lakwedö.