Isaías 22 - Dios Iwene

Dios Jerusalen comunidad lȩebakwa̧ Isaias yöawina jawa

¹ Baikwö laebobe Dios yöawi̧, Jerusalen comunidad, tji̧'wi̧didanö baledakwa̧ edawemi wabeko jö̧ba̧lö ötjabemi baledakwa̧ jawa: —Ökwödö Jerusalennö ju̧kwadö, tajawedö okobe deinö kwejuduwi mö kwönöchaduwaja̧daja?

² Kwiteboduwi comunidadma labinö ökwöobe, jojodö ba'ali tjukwobe ökwöi̧danö ökwöobe, tajawedö kwo̧'duwi ösöwanö kwö̧jaduwobedaja? Kwo̧'woduwi ösöwanö kwö̧jaduwobö jwibadöja chömöledö. —Ökwödönö baledaja̧ma, baikwö yöta̧la: Ökwödötjö ö'wö babibajadöma, tjöpöjojodökwö ölakwabikwawö ja̧nö, tjöpöjojodö dȩdȩbö lotjajawö̧ ö'wö babibajöködö.

³ Ja̧danö ökwödötjö la'aka luwedöbinadöma, bakobe jelobekwö dötjibajinobe. Kwiteboduwitjö ödö ja̧nö tjö̧jibakobetjö̧, ödö dötjibajinobe. Jo̧kwaijayonö, dötjibajinajayonö, kwöpöjojodöduwima jobadö kwiteboduwi comunidadtjö döbibajadönö do̧tjatinobe, nayunu bakwanubi 'böbökönö, okobe deinö comunidadtjö döbibajadönö do̧tjatinobe, isabenö kwo̧'woduwi ösöwanö kwö̧jaduwoböma jwibadöja.

⁴ —Jobekwö baledinobetjö̧, jwiinö o̧'wo tjo̧acho̧sa, ja̧danö cho̧'wo ösöwachibobö pjatjatotö jö̧ba̧ladönö yöba̧lo̧sa: –Ötjönö edökönö, jelobekwö jalachibi. Jwiinö o̧'wo tjo̧achö cho̧'wo suli̧ budekwo̧sa, cho̧'wo ösöwachiboböma pjabatökönui. Jau, chömöledö, tjöekwa jwibadönö söbebö lotjajabe, jo̧kwajabetjö̧ 'wainö chubudekwobö jo̧be, –jö̧ba̧lö yöba̧lo̧sa.

⁵ —Jau, isabenö jobekwö baledakobe, inesö la'aka luwo̧, Isabenö Jo̧ Okobe Jwiinö Juluwo̧ Diosma ja̧ baledakwa̧ omukwatö ujuninobetjö̧. Jau, –Dakwö ja̧dakwajö, –jö̧ba̧lö o̧'wo tjo̧achö ja̧tjakwedö, jadanö tjöpöjojodö kwetjachobe labinö ökwöi̧ tja̧ja̧kwakwedö, ja̧danö tjöpöjojodö tjujuluwajawö̧ tjö̧jakwedö. Ja̧ möle Jerusalen tjöekwemi 'dobö lotjakwedö, ja̧danö Jerusalennö ju̧kwadöma yebabinö jwötjeba̧lakwedö, jwötjeba̧li̧ma mösa'ijutjö tjaja̧kwenanö baibanö.

⁶ —Ja̧ möle baledakwa̧ma baikwö yöta̧la: Elam niji jojodöma, nayunu a̧ja̧pjo do̧batajadö, kolukiyanöbi, kabayudönö wanöbi 'böbö tjichakwedö, jadanö Kir niji jojodöma tjöekwapi e'ewö tjichibakwedö, Jerusalen comunidad metjibakobetjö̧.

⁷ Ja̧ möle inesö otiwi̧, Jerusalen ö'öbö ji̧ wabekijuma, kolukiyatjö su̧'be baibakobe, ja̧danö kwöpöjojodöduwi kabayudönö wa̧nö ölakwabikwawadöma, comunidad apjude a'o yebabökönö tjö̧jakwedö, Jerusalen comunidad metjibakobetjö̧.

⁸ —Ja̧ möle Jerusalen comunidad tjöekwemi söbebö lotjakobe, ja̧danö jobekwö tjöekwemi söbebö lotjiawö̧, Libano niji teboseju ötjabejube 'ya̧nö, ölakwabikwawa jawa kwisakwaduwakwedöja, tjöekwemi okwa tebachajadö kwöpöjojodöduwikwö kwölakwabikwawaduwakobetjö̧.

⁹ Ju'wibi tjöekwemi 'dobö lotjaja̧ kwedaduwakwedöja, –Ayö, Jelobebi, jelobebi nöinö 'dobö lotjajabeta, –jö̧ba̧lö. Ja̧danö nijakwöchobe ji̧ o̧pesobu tjöbeba̧lö kwö̧jaduwakwedöja, kwowaduwakwa̧ kwujuna̧laduwakobetjö̧.

¹⁰ Ja̧danö ju'wibi Jerusalen comunidad ejubiya ba̧ja̧dö kwedaduwakwedöja, –Dejutjö inawiya demakwa̧da, tjöekwemi yöyö dotidakobetjö̧, –jö̧ba̧lö. Jobekwö omukwatö edajadö, ju'wedö tjejubiya pjolö loköbaduwakwedöja, ja̧danö pjolö lobajadö, tjöekwemi yöyö kwotidaduwakwedöja.

¹¹ Ja̧danö a̧petukwöchobe tjöekwemi, okwakwöchobe tjöekwemi 'da̧de, ojwiyo junawemi soköbaduwakwedöja, ajayi tjotidina junawemi ji̧nobu ojwiyo jobe kwöwa'yaduwakobetjö̧. —Jobekwö otiwanö kwölakwabikwawaduwakwa̧ otiwanö kwomukwataduwakwedöja, jo̧kwaijayonö inesö kwomukwataduwo jö̧ka̧laduwi̧ma kwomukwataduwökakwedöja. Ajayitjö jobekwö baledobö omukwatö juninanö kwo̧'wo kwö̧wa̧na̧laduwökakwedöja. Jau, Diosda ja̧ baledakwa̧ damötjö̧ omukwatö ujuninobe, jo̧kwajabetjö̧ jo̧banö o̧'wo wa̧na̧lö, jo̧bada pjaatobö akebaduwobö jö̧ba̧ladöja, jo̧kwaijayonö jobanö o̧'wo wa̧na̧lökönö, sule ökwödöda waisanö kwotidaduwi̧da kwo̧'woduwi kwöwa̧na̧laduwakwedöja.

¹² —Inesö la'aka luwo̧, Isabenö Jo̧ Okobe Jwiinö Juluwo̧ Diosma sulabenö kwomukwataduwi̧ kabatibö, kwöbalewachaduwobö webo̧, ja̧danö o̧'wo tjo̧achö, kwubudekwaduwobö webo̧, ja̧danö kwuuduwi jwobawö, kamiji̧do̧ epju̧yunö kaluka̧ado̧ 'dukawaduwobö webo̧, –Dios öba a'ötjö sulabenö ja̧dinobetjö̧ o̧'wo tjo̧achadösa, –jö̧ba̧lö.

¹³ Jo̧kwaijayonö, jobekwö omukwatökönö, kwo'woduwi ösöwanö ba'ali junadöja. Jau, Dios wei̧ a̧ja̧kwökönö, baikwö yöba̧ladöja: –Pakayadönöbi, obejadönöbi kwabajadö, itebia kwanö, ubasobu o̧'dobu owö, ba'ali dujunaduwo. Jau, itekwai möle debö di̧'yakwedösa, jo̧kwajabetjö̧ babe möle kwanöbi, owöbi ba'ali dujunaduwo, –jö̧ba̧lö, Dios wei̧ a̧ja̧kwökönö sulabenö yöba̧ladöja, —jö̧ba̧lö laebobe Dios Jerusalen jojodönö yöawi̧ma.

¹⁴ Jau chömöledö, isabenö jobekwö Dios lȩebakwawö̧ja, baikwö yöawinobe Isabenö Jo̧ Okobe Jwiinö Juluwo̧ Diosma ötjönö: —Bi̧ya Jerusalennö ju̧kwadö sulabenö ja̧tjima, isabenö lȩtebakwo̧sa. Ö'wö batjibenanö baibanö, la'akatjöda sulabenö ja̧tja̧ja̧ söbebö lotökakwo̧sa, isabenö jobadönö lȩtebakwosa, —jö̧ba̧lö yöawajabe inesö la'aka luwo̧, Isabenö Jo̧ Okobe Jwiinö Juluwo̧ Diosma.

Dios Sebna mikwo̧nö lȩebakwa̧ Isaias yöawina jawa

¹⁵ Baikwö yöawobe inesö la'aka luwo̧, Isabenö Jo̧ Okobe Jwiinö Juluwo̧ Diosma: —La'aka luwo̧ eju teada̧lakwawa luwo̧ Sebna mikwo̧nö yöbawaji, baikwö:

¹⁶ –Ökwöma taji kwöwaeda baima? Ökwöma tajawedö, -Isabenö mikwawo̧sa, -jö̧ba̧lö bemi möemitjö ilȩdo̧ ökwönö tjo̧tja̧kwa̧do̧ sotjobö weköbobeda? Jau Sebna inesö la'aka luwedönö o̧tja̧welö, yalikwawobetjö ilȩdo̧ sotjobö webo̧ja, jo̧kwaijayonö ökwöma mikwawö̧kö̧ja, jobekwö kwotidoböma.

¹⁷ Isabenö mikwawö̧kö̧ja Sebna, sule bö̧jȩ jojoja. Jo̧kwajabetjö̧ Isabenö Jo̧ma ökwönö ikwö loakobe, belö ödö bakibanö ikwö loakwo̧. Ökwönö 'diinö do̧ba̧tajo̧,

¹⁸ pelotapodanö bakibanö ödadakwo̧ja, ja̧danö ökwönö ikwö loakwo̧, jalemi niji jo̧bekwö. Ja̧danö, jobekwö ikwö loajökwe, jobetjö ö'wö bakibakwoja, jobe kwitea kolukiya, inesö otiwi̧ kolukwiyakwö ja̧nö, jelö ö'wö bakibakwo̧ja. —–Isabenö kwuluwo̧ la'aka luwo̧ tabakwö ö̧jobö sulabenö ja̧bo̧ja Sebna, kwuluwo̧bi ömöledöbi tabakwö tjö̧jobö sulabenö jwöbebo̧ja.

¹⁹ Jo̧kwajabetjö̧ kwotidelö lakebinö wetocha, ökwönö jibebö lotakwo̧sa, kwotidelö lakebakobetjö̧.

²⁰ —–Ja̧danö ökwönö labebajo̧, ötjöda chömöayo̧nö jwötocha, ökwö kwotidinemi jo̧bada otidakobetjö̧. Chömöayo̧ Jilquias itji̧ Eliaquin mikwo̧nö chujunocha, ökwö kwotidinemi otidobö.

²¹ Ökwö o̧do la'aka luwo̧ kwökamisi, jo̧banöda 'dutatocha, jadanö kwitea koleasö̧jȩ jo̧banöda 'dutatocha, ja̧danö ökwö o̧do la'aka luwo̧ kwö̧ja̧ja̧ma, jo̧bada la'aka luwo̧ baibobö chujunakwo̧sa. Ja̧danö jo̧ba Eliaquinda Jerusalennö ju̧kwadöbi, ju'wedö Judasaso jojodöbi tjabe'dodanö babibö, jobadönö iteada̧lakwo̧.

²² —–Jo̧ba Eliaquin öböbe'onöda chöwanakwo̧sa, David itji̧mu tupadanö jojodö la'aka luwedö tjeju yawepima, ja̧danö Eliaquin apjude po̧ebenama, bakwo̧bi jade utumatobö jwiakwo̧, jadanö apjude utumatitjö̧ma, bakwo̧bi ujutamajade po̧ebobö jwiakwo̧.

²³ Isabenö 'diinö chujunocha Eliaquinnö, 'diinö ja̧nö kwotidinelö jo̧bada otidakobetjö. Wanedö yötawa, puasö'i bȩbö, 'diinö baibanö bȩtji̧danö, 'diinö jobe ö̧jobö chujunakwo̧sa, ja̧danö otiwanö otidö ö̧jiawö̧, okobe deinö otiwanö tjomukwatakwedö jo̧ba abe'do ömöledönö, -Bidöma Eliaquin ömöledötjobetjö̧, isabenö otiwadö, -jö̧ba̧lö.

²⁴ Isabenö jo̧ba Eliaquinnö tjösödakwedö, okobe deinö jo̧ba ömöledöbi, iteabi otiwanö tjomukwatenanö baibanö. Jwiinö jo̧banö tjösödobetjö̧, okobe deinö jojodöma otiwanö tjomukwatakwedö jo̧ba abe'do itji̧mu tupadanö jojodönö, jobadötjö mikwawöködönöbi otiwanö tjomukwatakwedö, –jö̧ba̧lö Sebnanö yökawajo, —jö̧balö weinobe Isabenö Jo̧ma.

²⁵ Jau chömöledö, baledakwa̧ yöawajabe Isabenö Jo̧ Okobe Jwiinö Juluwo̧ Diosma: —Ja̧ baledakwa̧ möle, baikwö wanedö yötawa: puasö'i 'diinö bȩtjinö'ima 'deawakobe. puasö'i 'witjebakobe, jadanö puasö'ibi okobe jwiinö jö'inö tjö̧naja̧ jawabi nijakwö meakobe, —jö̧ba̧lö yöawobe. Jobekwö yöawajabe Isabenö Jo̧ma, jadanö isabenö jobekwö yöawaja̧danö baledakobe.