Isaías 20 - Dios Iwene

Asiria jojodö Egipto jojodönöbi, Etiopia jojodönöbi tjujuluwakwa̧ Isaias yöawina jawa

¹ Asiria jojodötjö inesö la'aka luwo̧ Sargon mikwo̧ma, iteda ömöayedö ölakwabikwawa jojodötjö la'aka luwo̧nö weinobe, ömöayedönö öbibö, filisteo jojodö tjitebo comunidad Asdodbe ölakwabikwawö tji̧'yobö. Weökwe, ölakwabikwawö tji'yinobe, ja̧danö Asdod comunidad jojodönö tjujuluwinobe. Ja̧ baledina o̧bama, Isabenö Jo̧ma iteda yöawi̧ i̧sȩbinobe, tupakwö baledakwa̧ jawama.

^2-3 Ja̧ möle jenanö, Isabenö Jo̧ma ötjö Amoz itji̧ Isaiasnö weinobe baikwö: —Isaias, kwö̧kamijido̧ epju̧yunö kalukaado̧ 'dukawado̧ 'yobekwi, ja̧danö sapatubi 'yobekwi, —jö̧ba̧lö. Wei̧tjö̧, chökamisibi jwibö, sapatubi jwibö, o̧ba wapöbakwa baledibanö kwebachö chö̧jijatö. Jemi ikenama, Isabenö Jo̧ma baledaja̧ wanekwachi̧ labebö lobö yöawinobe, baikwö: —Chömöayo̧ Isaiasma o̧ba wapöbakwa baledibanö kamisi jwibö, sapatu jwibö kwebachö ö̧jajabe, Egipto jojodönöbi, Etiopia jojodönöbi baledakwa̧ i̧sȩkwakobetjö̧.

⁴ Jau, Isaias i̧sȩkwaja̧danö baledakwawö̧ jobadönö, Asiria la'aka luwo̧ma jobadönö ujuluwakobe, ja̧danö juluwajo̧, ujuluwajawö̧nö Egipto jojodönöbi, Etiopia jojodönöbi öbibö e'ewakobe, tjitebötjö labebö jelobe tjö̧jakobetjö̧. Ja̧danö, jobadötjö damönöbi, ina möayedödanöbedönöbi öbibö, kamisi jwibö, sapatu jwibö, tjoto'o öwawinö kwetjachobö weakwo̧. Jobekwö okobe deinö tjöba a'otjö jwiinö taba lö̧jawö̧da tjö̧jakwedö, Egipto jojodöma.

⁵ Jobekwö balediawö̧, okobe deinö ajayinö Egipto jojodönöbi, Etiopia jojodönöbi tjo̧'wo wana̧linadöma, isabenö yebabinö ja̧nö, tabakwö tjö̧jakwedö.

⁶ Babema belö jwaibalawa ö'öbö ju̧kwadötjö ba̧jȩkwadö jobadönö tjo̧'wo wana̧lö ja̧dö, —Egipto jojodöbi, Etiopia jojodöbi dö̧jibinö pjatjatakwedö, Asiria jojodö ökwödönö tjujuluwapji, —jö̧ba̧lö. Jo̧kwaijayonö Asiria luwo̧ jobadönö öbibö ȩwa̧jenama, tabakwö yebabinö jö̧tja̧lakwedö: —Ayö, idö do̧'wo döwana̧linawö̧nö baledina edaduwi. Jobadönö do̧'wo wana̧lö, tjö̧jobekwö dödibajijatö, isabenö Asiria la'aka luwo̧tjö dö̧jibinö pjatjatakwedö, jö̧ba̧lö. Jo̧kwaijayonö jobadönö ujuluwajabe Asiria luwo̧ma, ökwödöwe, dakwö dö̧jibakwajö Asiria luwo̧ ujulutjöma, dö̧jibobö jwiena, —jö̧ba̧lö yebabinö jö̧tja̧lakwedö.