Isaías 2 - Dios Iwene

Isabenö yadakwö ba̧jȩkwadö Jerusalenbe ichibö Diosnö tjösödakwedö, Isaias yöawina jawa

¹ Baikwö laebobe Dios Isaiasnö i̧'wi̧didanö i̧sȩbina jawa, yadakwö Juda niji baledakwa̧bi, Jerusalen comunidad baledakwa̧bi:

² —Yadakwö löji möle baibenama, Isabenö Jo̧ eju ja̧'o mösa'oma, isabenö nöinö mikwawa'o ja̧kobe, okobe jwiinö mösa'ijutjö, Dios eju ja̧'o mösa'oda inesö la'aka mösa'o ja̧kobe. Jau, ja̧ mösa'oda kabebö ujunakobe Diosma, okobe jwiinö jele'otjö bajalekwönönö inesö mikwawa'o mösa'o baibanö, ja̧danö bö̧jȩ bakwemeachibanö ju̧kwadö tjitebokwena jojodöma ja̧'o jo̧bekwö tji̧'yakwedö.

³ Jau, ba̧jȩkwadö tjitebokwena jojodöma yöba̧lakwawö yötja̧lakwedö, –Isabenö Jo̧ itea mösa'obe di̧'yaduwo, ajayinö ji̧na Jacob ösödinökwe Dios ejube di̧'yaduwo. Jobe di̧'yaduwo, Diosma ökwödönöbi iteda wei̧ ö̧ba̧ja̧dakobetjö̧, ja̧danö ökwödöbi Dios wei̧ a̧ja̧kwö dö̧jakobetjö̧, –jö̧ba̧lö yötja̧lakwedö. —Jau, Sion mösa'otjö laebakobe Dios wei̧ma, Jerusalen comunidadtjö Isabenö Jo̧ yöawi̧ laebakobe, bö̧je ba̧kwemeachibanö tja̧ja̧kwobö.

⁴ Ja̧ möle tjitebokwena jojodö ju'wedö tjitebo jojodökwö wene tjujuna̧lenama, Isabenö Jo̧ Diosda lȩekwa yöawakwo̧. Ja̧danö tjitebokwena jojodö ölakwabikwawö tjö̧jenama, jo̧bada jwebebö lȩekwa yöawakwo̧. Ja̧danö jobekwö lȩekwa yöawiawö̧, ölakwabikwawökönö tjö̧jakwedö bö̧jȩ jojodöma, jo̧kwajabetjö̧ ölakwabikwawa jawa tjiteama, balewö lobö tjotidakobe, batjo otikwa jawa baibanö. Kwölöte'ijuma, niji soawa ökiya baibanö balewö lotjakobe, ja̧danö tokwötebiyama, towibiya bajale ötjebiya 'wiawaka baibanö balewö lobö tjotidakobe. Ja̧ mölema ju'wedö tjitebo jojodöma, ju'wedö tjitebo jojodökwö tjölakwabikwawökakwedö, ja̧danö ölakwabikwawa jawa tjöwaisachökakwedö, okobe deinö bakobe wene jwiinö tjö̧jakwedö, —jö̧ba̧lö yadakwö baledakwa̧ jawa i̧sȩbinobe Diosma.

⁵ Jobekwö ja̧kobe chömöledö Jacob itji̧mu tupadanö jojodö, jo̧kwajabetjö̧ baikwö yöta̧laduwakwö, —Ichaduwi, Isabenö Jo̧ idejatama mananö otiwanö kwebachö dö̧jaduwo, —jö̧ba̧lö.

Isabenö Jo̧ lȩebakwa̧ möle Isaias yöawina jawa

⁶ Isabenö Jo̧, ökwö kwömöledö Jacob itji̧mu tupadanö jojodöma sulabenö jabö ju̧kwadö. Jawo̧ laebobekwö ju̧kwadö sulabenö ja̧bö tjö̧ji̧ jawama, kwömöledöbi sulabenö jabö ju̧kwadö. Ja̧danö Filisteo jojodö tupakwö baledakwa̧ tjöwaisotö jö̧ba̧lö mea botji̧danö sulabenö jabadö. Ja̧danö ju'wedö tjitebokwena jojodökwö bakobe tjotidakwa̧ yöbawö junadö, sulabenö. Jo̧kwaiökwe, ökwöda kwömöledö israel jojodönö le'dedö loköbajabe chuluwo̧.

⁷ Jau, israel jojodöma nöinö plata jawabi, oro jawabi, ju'wi nöinö mikwawi̧ jawabi tjemajabe, tjitebo ja̧ jawatjö su̧'be baibenanö. Ja̧danö ba̧jȩkwadö kabayudönöbi tjemajabe, tjitebo su̧'bȩ baibenanö, ja̧danö kolukiya ba̧ja̧dakwawökenanö, nöinö tjemajabe.

⁸ Ju'wibi nöinö o̧'wo jawa tjemajabe, tjitebo o̧'wo jawatjö su̧'be baibenanö kabatö, ja̧danö idöda tjotidinawö̧, idöda tjömamunö, idöda tjötö'iyanö tjodidinawö̧nö bȩbachibö ösödadö, sulabenö.

⁹ Jobekwö sulabenö ja̧tjiökwe, mikwawöködö batjibanö webo̧ Diosma, okobe deinö nijakwönönö meatö lobo̧ jobadönö, taba lö̧jawö̧ tjö̧jakobetjö̧. Chuluwo̧ Dios, jobekwö o̧'wo jawa ösödadönö meatö loköbobö otiwa, jobadöjayedönö lȩlöjinö edökönö, jweinö lȩkebodönö chuluwo̧ Dios.

¹⁰ Isabenö iteda dejatinö ujulu i̧sȩbö lȩebakwo̧ Isabenö Jo̧ma, isabenö iteda inesö la'aka luwo̧ ö̧ji̧ otiwanö dewinö i̧sȩbakwo̧. Jo̧kwajabetjö̧ ökwödö sulabenö ja̧badöma Dios öba a'otjö kwuju̧kwawaduwobö ja̧kobe, inawa ötöla okwa tebachö, ja̧danö nijiso̧pja̧nö ju̧kwawö kwö̧jaduwobö ja̧kobe, inesö juluwo̧ lȩebakobetjö̧.

¹¹ Ja̧ möle Isabenö Jo̧ Diosnöda otiwanö tjomukwatakwedö, —Isabenö Jo̧ Diosda inesö la'aka luwo̧ juluwo̧ma, —jö̧ba̧lö. Babe möle bö̧je jojodöma ju'wedönö edö omukwatadö, —Idöma mikwawöködö, —jö̧ba̧lö, ja̧danö, —Ju'wedötjö bajalekwönö mikwawo̧sa, —jö̧ba̧lö omukwatadö babema. Jo̧kwaijayonö, löji möle okobe deinö jobekwö omukwatadöma tabakwö tjö̧jakwedö, sule Isabenö Jo̧ Diosnöda otiwanö tjomukwatakwedö, —Diosda mikwawo̧ma, —jö̧ba̧lö.

¹² Jau, Isabenö Jo̧ okobe jwiinö juluwo Diosma iteda lȩebakwa̧ möle omudawö ujunajabe, okobe deinö otiwadösa, juluwadösa jö̧ba̧lö omukwatadönö lȩebakwa̧ mölema. Ja̧danö ja̧ möle okobe deinö jobadöjayedönö meatö loakwo̧, tabakwö tjö̧jakobetjö̧.

¹³ Babe möle ju'wedöma idödada tomukwatobe, —Ötjöma isabenö mikwawo̧sa, Libano niji towibiya cedro towibiya jelowitjö bajalekwönönö otiwi̧danö, jadanö Basan niji towibiya encina towibiya otiwi̧danö,

¹⁴ ja̧danö inesö möa'o mösa'iju otiwi̧danö, jadanö ju'wi mösa'iju otiwi̧danö, ju'wedö jojodötjö bajalekwönönö otiwo̧sa, —jö̧ba̧lö tjomukwatobe.

¹⁵ Ja̧danö ju'wibi tjomukwatobe, —Inesö möaka tjöekwaka ji̧danö, ja̧danö 'diinö tjöekwi̧danö, ju'wedötjö bajalekwönönö isabenö juluwo̧sa, —jö̧ba̧lö.

¹⁶ Ja̧danö ju'wibi tjomukwatobe, —Jwaibalawa bakwachödö Tarsis nijibe kweachakwawowi isowibiya chujuna̧lobetjö̧, ja̧danö ju'wi isowibiya otiwowi chujuna̧lobetjö̧, isabenö ju'wedötjö bajalekwönönö nöinö juna̧lo̧sa, —jö̧ba̧lö tjomukwatobe.

¹⁷ Jobekwö omukwatadö bö̧je jojodöma, jo̧kwaijayonö Dios omudawö ujunina möle badekwachenama, okobe jwiinö ja̧jaye tjomukwati̧ma söbebö loakwo̧ Isabenö Jo̧ma. —Ju'wedötjö bajalekwönönö otiwo̧sa, bajalekwönönö juluwo̧sa, —jö̧ba̧lö tjomukwati̧ma söbebö loakwo̧ Diosma. Ja̧danö ja̧ möle sule Isabenö Jo̧ Diosnöda omukwatö tjösödakwedö, —Isabenö Jo̧ Diosda okobe deinö ju'wedötjö bajalekwönönö bo̧ma, —jö̧balö.

¹⁸ Ja̧ möle, okobe jwiinö o̧'wo jawa söbebö loakobe Diosma,

¹⁹ ja̧danö Isabenö Jo̧ öba a'otjö bö̧je jojodöma inawa ötöliyanö tebachö tjuju̧kwawakwedö, ja̧danö laju okwa söbibö tju̧ju̧kwawakwedö, yebabinö. Jobekwö baledakobe, löji möle Isabenö Jo̧ iteda inesö dejatinö ujulunö bö̧jȩ jojodönö lȩebobö a̧la̧ibenama.

²⁰ Jobekwö iteda ujulu i̧sȩbiawö̧, bö̧jȩ jojodöma platatjö otikwawö̧ o̧'wo jawabi, orotjö otikwawö̧ o̧'wo jawabi, idöda tjösödobö tjotidinawö̧nö ikwö lotjakobe, duwö̧döbi, kwesuwabi tjö̧jemi inawiya ötöla okwa ikwö lotjakobe, Isabenö Jo̧ Diosnö yetjabobetjö̧.

²¹ Ja̧danö bö̧jȩ jojodönö lȩebobö, iteda inesö dejatinö ujulunö, Isabenö Jo̧ a̧la̧ibenama, yebabinö inawa ötöla okwabi, yalikwaobe laju okwabi tju̧ju̧kwawakwedö, jwiinö Isabenö Jo̧nö yetjabobetjö̧.

²² Jobekwö isabenö baledakobe chömöledö, jo̧kwajabetjö̧ bö̧jȩ jojodönö omukwatö kwö̧jaduwi̧ma kabatibö, Dios ösödi̧ jawada omukwatö kwö̧jaduwo. Jau chömöledö, bö̧jȩ jojodöma Dios öba a'otjö isabenö mikwawöködö, bö̧jȩ jojodöma sule tjo̧'wo emöda ju̧kwadö, juluwöködö bö̧jȩ jojodöma, jo̧kwajabetjö̧ Diosnöda omukwatö kwö̧jaduwo.