Isaías 19 - Dios Iwene

Dios Egipto jojodönö lȩebakwa Isaias yöawina jawa

¹ Baikwö laebobe Dios Egipto jojodönö yöawinama: —A̧ja̧kwaduwitjö, ötjö Isabenö Jo̧ma, ojwiyo'wo juluwanö kweacha'wonö wa̧nö, Egipto nijibe chichibakwo̧sa. Jobekwö chichibiawö̧, okobe deinö Egipto jojodö tjösödawö̧ o̧'wo jawama, chöba a'otjö tjö̧bawö tjö̧jakwedö, ja̧danö okobe deinö Egipto jojodöma, tjomajadenö jwiinö yetjaibakwedö.

² —Ja̧danö, Egipto jojodö ju'wedö Egipto jojodökwö wene tjujuna̧lobö wetocha, ja̧danö idöda tjömöledökwö tjölakwabikwawakwedö, baikwö yöta̧la: Jojodö idöda yöne tjömöledökwö ölakwabikwawö tjö̧jakwedö, ja̧danö tjipjeanö jukwadökwö ölakwabikwawö tjö̧jakwedö. Ja̧danö ju'wi comunidad jojodöma, ju'wi comunidad jojodökwö ölakwabikwawö tjö̧jakwedö, ja̧danö Egipto jojodötjö bakwo̧ la'aka luwo̧ ömöayedöma, jelo̧ la'aka luwo̧ ömöayedökwö ölakwabikwawö tjö̧jakwedö.

³ —Egipto jojodö waisanö omukwatö tjujunaja̧ma waekwobö wetocha, ja̧danö waekwiawö̧, tjo̧'wo tjo̧bekwö tjö̧jakwedö, –Ayö, dakwö ja̧dakwajö, –jö̧ba̧lö. Ja̧tjakwa̧ tjöwaisachibotö jö̧ba̧lö, o̧'wo jawa tjösödawö̧nöbi atjebakwedö, jadanö ö'wö babibinadö tjo̧'wo luwo̧nö abebö tja̧ja̧kwotö jö̧ba̧lö, mea boawa otidadönöbi, ju'wedö ö'wö babibinadö tjo'wo luwo̧nö yöbaladönöbi abebö tja̧ja̧kwakwedö.

⁴ Jemi ikenama tjöpöjojo labinö webo̧nö wetocha, Egipto jojodötjö inesö la'aka luwo̧ baibobö, ja̧danö inesö la'aka tjuluwo̧ ja̧nö, labinö webö ö̧ja̧kwo̧ jobadönö, —jö̧ba̧lö yöawobe Isabenö Jo̧ Okobe Jwiinö Juluwo̧ Diosma.

⁵ Tupakwö yöawobe Diosma: —Ja̧danö Jwaibalawama kököachibakobe, ja̧danö ojwema jwiinö kököachibakobe.

⁶ Inesö nöödö Nilo ojwebi, ju'wi Egipto niji ojwebiyabi tjo̧'omanö öbibajö kököachibakobe, ja̧danö ojwenö pokwi̧ isa'yetenia wobö 'doloakobe, ojwebiyama jwiinö woinö sulabenö 'dö̧ekwenanö baibanö.

⁷ Nilo ojwe yöne pokwi̧bi, a̧dekwanö ojwe ö'öbö pokwi̧bi kököbachibö woakobe, okobe jwiinö tjöbatjiju Nilo ö'öbö tjotidi̧bi kököbachibö woakobe, ja̧danö jwa̧le'epjo jelobekwö e'ewibakobe.

⁸ —Okobe deinö ba̧i̧ lö̧a̧wö̧ otidinadö, ajayinö a̧jwa̧sopjanö Nilo ojwetjö ba̧i̧ lö̧a̧winadöma budekwabinö tjo̧'wo tjo̧achakwedö, ja̧danö ba̧i̧ jwobö otidinadöbi tjomajadenö tjo̧'wo tjo̧achakwedö, ojwe kököiawö̧, ba̧i̧ tjemobö jwiobetjö̧.

⁹ —Linotjö kamiji̧do̧ otidajibadö jojodöbi tjo'wo tjo̧achakwedö, –Taji dotidakwajö, –jö̧ba̧lö, okobe jwiinö lino pokwi̧ woiawö, lino jawa opjijutjö 'dö̧tjobö jwiobetjö.

¹⁰ Ju'wedö kamisi otidajibadöbi tjo'wo tjo̧bekwö tjö̧jakwedö, jadanö okobe deinö ju'wedö tjotidobö tjimidinawö̧bi o̧'wo tjo̧achö tjö̧jakwedö.

¹¹ —Egipto niji comunidad Zoan luwedöma, waisanö omukwatöködö, ja̧danö Egipto niji la'aka luwo̧ Faraon ömöayedötjö waisanö omukwatobö pjabatadöma, jwiinö suli̧ lȩekwa yöbawadö, –Bejenö ja̧bö kwö̧jo duluwo̧, –jö̧ba̧lö. Jobadö Faraon ömöayedönö baikwö yöta̧la: Ökwödö Faraonnö yöka̧laduwi̧ma, –Ötjöma waisanö omukwatakwawa ba̧jadö yöbawo̧sa, ajayinö ji̧nadö la'aka luwedöbinadö tjöwaisina jawa otiwanö waiso̧sa, –jö̧ba̧lö yöka̧laduwi̧ma, wajwibadö kwö̧jaduwonö tajawedö jobekwö yöka̧laduwobeda? –jö̧ba̧lö.

¹² —Faraon, ökwö kwömöayedötjö isabenö waisanö omukwatadöma, didöda? Deobe ichejekwa. Isabenö kwömöayedö waisadö tjuju̧kwitjö̧ma, ötjö Dios omukwatö chujunaja̧ yötjawo jö̧tja̧lena, –Isabenö Jo̧ Okobe Jwiinö Juluwo Diosma, Egipto jojodönö lȩebakwa̧ baikwö omukwatö ujunajabe, –jö̧ba̧lö waisanö yötjawena.

¹³ —Jau, isabenö wajwibö omukwatadö Zoan comunidad la'aka luwedöma, ja̧danö Menfis comunidad la'aka luwedöma, sulabenö tjomukwatobö ötjibinawö̧, ö'öbönö omukwatadö. Egipto jojodötjö sasokwena la'aka luwedöma, jweinö ötjibo jö̧tja̧linobe tjömöayedönö, jo̧kwaijayonö sulabenö öbibadö, tjile'dewenanö baibanö.

¹⁴ Jau, okwa jawa omukwatöködö batjibanö weajabe Isabenö Jo̧ma, ja̧danö okobe jwiinö ja̧bö tjö̧ji̧ma, sulabenö öbibadö Egipto jojodönö, Egipto jojodöma jwiinö 'dukwachökwe etekwawo̧danö tjichejekwenanö baibanö, etekwawaja̧nö sayuwena mebabinö kwebacho̧danö tjichejekwenanö baibanö.

¹⁵ Jo̧kwajabetjö̧ ja'yubebi otiwanö tjö̧jobö jwitjakwedö Egipto jojodöma, nöinö juna̧ladöbi, jwibadöbi, nöinö mikwawadöbi, mikwawöködöbi bakobe otiwanö tjö̧jobö jwitjakwedö, —jö̧ba̧lö yöawobe Diosma.

Egipto jojodötjö ju'wedö Diosnö tjösödakwa̧ Isaias yöawina jawa

¹⁶ Ja̧ möle Egipto jojodöma ya̧dö juluwöködödanö tjö̧jakwedö. Isabenö Jo̧ Okobe Jwiinö Juluwo̧ Diosma, ömamu kaebakwo̧, jobadönö kwaobö, ja̧danö jobekwö ömamu kabebö i̧sȩbiawö̧, jwiinö yebabinö tjötja̧wakwedö Egipto jojodöma.

¹⁷ Ja̧ möle Juda niji jojodönö jwiinö yetjaibakobe Egipto jojodöma, okobe deinö Egipto jojodötjö Juda jojodönö a̧ja̧kwadöma, jwiinö yetjaibakobe, —Ayö, Juda jojodö tjösödökwe Isabenö Jo̧ Okobe Jwiinö Juluwo̧ Diosma isabenö labinö ökwödönö lȩebobö omukwatö ujunajabe, —jö̧ba̧lö.

¹⁸ Ja̧ möle jwiinö Diosnö yetjabobetjö̧, Egipto niji comunidadbiyatjö̧, bakwamu jawa comunidadbiya jojodöma Isabenö Jo̧ Diosnö tjösödakwa̧ wene yöbawö tjujunakwedö, —Isabenö Jo̧ Diosnöda dösödakwedösa, —jö̧ba̧lö, ja̧danö jobekwö yöbawö junö, bemi canaan niji ju̧kwadö diwene, israel jojodö diwene waisachibö, idöda tjiwene baibanö yötja̧lakwedö. Ja̧ comunidadbiyatjö, bakwöta comunidadma, Möle Jawo̧ Comunidad, jö̧ba̧lö ötjabikobe.

¹⁹ Ja̧danö ja̧ möle Egipto niji ö'wejetjö, Isabenö Jo̧ Diosnö iyawemi tjujunakobe, ja̧danö Egipto nijitjö, Juda nijitjö 'da̧de jȩmi, inawa kabebö tjujunakobe, —Isabenö Jo̧ Diosnö omukwatakwawawa, —jö̧ba̧lö.

²⁰ Ja̧danö, ja̧wa tjujunaja̧wa inawama, Egipto niji jojodö edö tjomukwatibobö ja̧kobe, Isabenö Jo̧ Okobe Jwiinö Juluwo̧ Diosnö, —Bemi niji Egipto nijitjö, Isabenö Jo̧ Diosnö dösödobö jo̧be, —jö̧ba̧lö. Jau, Isabenö Jo̧ Diosma Egipto jojodönöbi tjö̧jibinö pjaatakwo̧. Ju'wedö labinö webö tjö̧jiawö̧, usula emawö tjö̧jelö, Isabenö Jo̧nö budekwö atjebakwedö, ja̧danö atjebökwe, tjö̧jibinö pjaatakwo̧, tjöbeba̧lö̧ ölakwabikwawo̧nö weakobe, tjö̧jibinö pjaatakobetjö̧.

²¹ Jobekwö jobadönö i̧sȩkwakobe Isabenö Jo̧ma, —Isabenö jo̧bada Diosbo̧ma, —jö̧ba̧lö tjöwaisachibobö, ja̧danö waisachibajadö, Isabenö Jo̧nö tjösödakwedö, ja̧danö jo̧banö ösödö, tja̧jwimunö kwabö juwö tjiyakwedö, ja̧danö batjo jawa iyawabi tjiyakwedö, —Duluwo̧ Diosja, —jö̧ba̧lö. Ju'wibi Isabenö Jo̧nö yöbawö tjujunakwedö, isabenö ja̧bö tjö̧jakwa̧ma, ja̧danö yöbawö junajadö, badekwachinö isabenö ja̧bö tjö̧jakwedö Egipto jojodöma.

²² Jau, Egipto jojodönö lȩbeböbi lȩebakwo̧ Diosma, ja̧danö pjabatöbi, tjö̧bibajinö otidö loakwo̧. Ajayinöma Isabenö Joma Egipto jojodönö lȩebakobe, ja̧danö lȩebawö̧ sulabenö tjomukwati̧ kabatibö tjöbalewachakwedö, ja̧danö Isabenö Jo̧nö tjösödakwedö. Jo̧banö ösödö atjebakwedö, ja̧danö atjebökwe a̧ja̧kwakwo̧ Isabenö Jo̧ma, ja̧danö a̧jakwajo̧, tjö̧bibajinö otidö loakwo̧.

²³ Ja̧danö ja̧ mölema, mana otiwama ja̧kobe, Egipto nijitjö Asiria nijibe ichibanö, jojodö juluwanö otiwanö kwetjachobö. Ja̧danö Asiria jojodöma Egipto jojodönö dösölö̧jinö edö tji̧'yakwedö, ja̧danö Egipto jojodöma Asiria jojodönö dösölö̧jinö edö tji̧'yakwedö, ja̧danö Egipto jojodöbi, Asiria jojodöbi bakobe Diosnö tjösödakwedö.

²⁴ Jau, ja möle Asiria jojodöbi, Egipto jojodöbi Diosnö ösödö tjö̧jakwedö, ja̧danö Israel jojodöbi jobadökwö bakobe Diosnö ösödö tjö̧jakwedö, wapösokwa jojodö bakobe Diosnö ösödadö batjibanö. Ja̧danö, jobadö wapösokwa tjitebo jojodöma, Egiptobi, Israelbi, Asiriabi, bö̧jȩ ö'wejenö ja̧nö, Dios otiwanö pjaati̧ emadö tjö̧jakwedö.

²⁵ Jobadö wapösokwa jojodöma Isabenö Jo̧ Okobe Jwiinö Juluwo̧ Dios pjaati̧tjö isabenö otiwanö tjemakwedö. Diosma jobadönö yöawakwo̧, —Isabenö otiwanö pjatatakwawö̧, chömöledö Egipto jojodönöbi, ötjöda chotidinawö̧ Asiria jojodönöbi, ötjöda chömöledö batjibanö 'da̧batö chujuninawö̧ Israel jojodönöbi, —jö̧ba̧lö, jadanö yöawaja̧danö badekwachinö isabenö jobadönö pjaatakwo̧.