Isaías 18 - Dios Iwene

Etiopia niji jojodönö Dios lȩebakwa̧ Isaias yöawina jawa

¹ Ayö, isabenö Dios lȩebakwawö̧, Etiopia ojwe bakwachödö jojodönö, tjuwuyebia labinö ökwöemi niji jö̧ba̧lö ötjabobe ju̧kwadönö .

² Jobadö tjuluwedöma, idöda tjömöayedö yöbawadönö webadö, isowibiya, papirotjö otikwowibiyanö juluwanö jwaibalawabenö kwetjachobö, ja̧danö jobadö yöbawadönö baikwö yöta̧la: Ökwödö juluwanö kwebachadö yöbawadöma, ju'wedö tjitebobe kwi̧'yaduwo, ödöbaedö tji̧sȩdo sayuwawö̧ tjitebobe. Jobadö tjitebo nijima, ojwebiya 'da̧'yachemi nijinö ju̧kwadö, ja̧danö jwiinö juluwadö, ja̧danö ba̧jȩkwadö ju'wedönö juluwadö, ja̧danö bö̧jȩ ba̧kwemeachibanö jojodö jwiinö yetjabiwö̧. Jobadönö yöbawö kwi'yaduwo, jö̧ba̧lö wetaduwakwö ökwödö yöbawadönö.

³ Okobe deinö ökwödö bö̧jȩnö ju̧kwadö, bö̧jȩ ba̧kwemeachibanö jojodöma, mösa'otjö banderasa̧do̧ kabebö tjö̧ni̧ kwedaduwakwedöja, ja̧danö trompeta pjutji̧ kwa̧ja̧kwaduwakwedöja, —Döpöjojodöma ichibö mebadötö, —jö̧balö.

⁴ Jau, jobekwö isabenö baledakobe, Isabenö Jo̧ma baledakwa̧ ötjönö yöawinobetjö̧, baikwö: —Ötjö Diosma wi̧inö janö, chöjelö edö chö̧jakwo̧sa, möle jawo̧ wi̧inö tjo̧'omanö utubedi̧danö, ja̧danö wa̧ji̧ emajitjena si̧li̧'idö tji'oli wi̧inö yoliwi̧danö, wi̧inö ba̧nö cheda̧lakwo̧sa.

⁵ Jobekwö eda̧lö chö̧jakwo̧sa, jo̧kwaijayonö metjibakwa̧ abönö, tjujuluwakwa̧ badekwachakwa̧ abönö, jobadö mebibadönö söbebö lotocha, baikwö wanedö yötawa: Uba waji̧ emajitja mölȩ ina baibapji, o̧bubiya laebaja̧ ikena, ubapo ina ö̧'du̧winö wa̧jemi ja'ötjö, batjo luwo̧ i̧sa̧pi̧nö pokwi̧ 'wibö loi̧danö, ja̧danö towi ösötjebiya 'wibajo̧ ikwö loi̧danö, jobadö mebibadönö kwabawö lotocha.

⁶ —Ja̧danö, jobekwö kwabawö lotobetjö̧, tjiteba'ijuma nijinö ba̧kobe, mösa'ijunö ju̧kwadö pji̧yuma jobadönö tjukwakobetjö̧, ja̧danö tebonö ju̧kwadö tjiteba'iju tjukwakobetjö̧. Ja̧danö, imiame baledibanö tjiteba'iju tjukwakwedö pji̧yuma, ja̧danö o̧ba baledibanö tjiteba'iju tjukwakwedö tebonö ju̧kwadöma, inesö ba̧jȩkwadönö kwabawö lotakobetjö̧, —Jö̧ba̧lö yöawinobe Isabenö Jo̧ma.

⁷ Ja̧danö, ja̧ möle yötawaja̧ niji jojodöma Diosnö iyö tjichakwedö. Jau, jobadö ödöbaedö tji̧sȩdo̧ sayuwawö̧, bö̧jȩ ba̧kwemeachibanö jojodö yetjabawö̧, juluwadö ba̧jȩkwadö tjitebokwena jojodönö juluwadöma, Isabenö Jo̧nö tjiyakwa̧ tjichejebakwedö. Tjitebo, ojwebiya 'da̧'yachemi nijiitjö iyawa tjichejebakobe, Jerusalennö ja̧'o Sion mösa'obe, Isabenö Jo̧ Okobe Jwiinö Juluwo Dios itebo comunidad ötjabobe, Diosnö tjiyakobetjö̧.