Isaías 17 - Dios Iwene

Siria niji comunidad Damasco baledakwa̧ Isaias yöawina jawa

¹ Baikwö laebobe Dios ötjönö yöawina, Siria niji comunidad Damasco baledakwa̧ jawama: —Baikwö yötawa: Damasco comunidadma ja'yubenö lekwajabetjö söbebö lotjakwemi, comunidad jwiemi, pjolö loawemida baibakobe.

² —Ja̧danö Aroer comunidad pjeanö ji̧ comunidadbiyama, jojodö deobe baibakobe, sule tjajwi̧mu obejadö abawemi baibakobe. Ja̧danö, jojodö deiawö̧, jobe bamatö otiwanö tjabakwedö obejadöma, ja̧danö bakwo̧bi obejadönö yetjaibanö ja̧ökakwo̧, jobe ju̧kwadö deobetjö̧.

³ —Efrain niji comunidadbiyama, bakwainö tjöekwi̧ jwiemi comunidadbiyada baibakobe, ja̧danö Siria niji la'aka luwedö Damasco comunidadtjö webö tjö̧ji̧ma 'dö̧ibakobe, siria niji la'aka luwo̧ deemi baibanö. Jau, israel jojodönö baledinadanö baledakobe Siria niji jojodönöbi. Ajayinö inesö otiwadö juluwadö tjö̧jinajayonö, ja'yubenö lekwajabetjö̧ o̧bukwedö juluwöködöda tjö̧jibakwedö siria jojodöma, —jö̧ba̧lö laebobe Isabenö Jo̧ Okobe Jwiinö Juluwo̧ Dios yöawi̧ma.

Dios israel jojodönö lȩebakwa̧ Isaias yöawina jawa

⁴ Tupakwö yötawa, Dios israel jojodönö yöawi̧ma: —Ja̧ möle Jacob itji̧mu tupadanö jojodö israel jojodö otiwanö tjujuna̧li̧ma 'dö̧ibakobe, jwibadö batjibanö. Wanedö yötawa israel jojodönö baledakwa̧ma: Nöbo̧ o̧tewo̧ ö'dalukachobedanö baledakobe israel jojodönö.

⁵ Jau, okobe jwiinö israel niji trigo batjosayuma, ida̧ökö waji̧ 'wibö tjemajobedanö ichejekwakobe. Jau, tjöbatjo waji̧ tjemotö jö̧ba̧lö tji̧'yenama, sule ja'yubeda tjemakwedö, Refaim wabekotjö waji̧ tjemaja̧ ikena usula jojodö u'yukwaja̧ isakwö tjemi̧danö tjemakwedö.

⁶ —Jau, sule ja'yubeda tjemobö jakobe, israel jojodö tjöbatjijutjöma u'yukwaja̧ tjemidanö ichejekwi̧nö. Jau, towi ida̧ökö 'ya̧bö waji̧ tjemajowidanö ichejekwakobe, baikwö wanedö yöta̧la: Olivo towi 'ya̧tjaja̧ ikenama, mötjö dopolatajaö̧kö̧, wapöpokwaö̧kö̧ u'yukwena, jö̧tö? Ja̧danö inesö nöinö wa̧jo̧wima, ö'wejemu jawapoö̧kö̧, bakwamu jawapoö̧kö̧ u'yukwena, jö̧tö̧? Jobekwö wa̧ja̧kobe israel jojodö tjöbatjijuma, sule ja'yubeda wa̧ji̧nö, —jö̧ba̧lö labebobe Isabenö Jo̧ Israel jojodö tjuluwo Dios yöawi̧ma.

⁷ Tupakwö yötawa, Dios israel jojodönö yöawi̧ma: —Ja̧danö, ja möle bajaliyanö israel jojodöma yemidanö jobadönö otidina Diosnö tjomukwatakwedö, israel jojodö tjösödökwe Suli̧ Jwibo̧nö edö tjomukwatakwedö.

⁸ Jau, ja̧ möle idöda tjotidina jawa iyawemibi, tjösödoko Asera ötjaboko tjotidinokonöbi, omewi̧ jawa juwawemibi edö tjomukwatökakwedö, pjaatakwawa ji̧ jö̧ba̧löma, sule Diosnöda edö tjomukwatakwedö.

⁹ —Isabenö jojodö o̧bukwedöda tjö̧jemi ja̧kobe israel niji ja̧ mölema, 'diinö tjöbebö tjotidinemi comunidadbiyabi jojodö deobe jakobe. Ayayinö israel jojodö canaan jojodönö a'dewö lotjina möle ji̧nadanö, jojodö deakobe, baikwö yötawa: Ajayinö Canaan nijibe israel jojodö tjichibiawö̧, canaan jojodöma tebotjöbi, möemiteniatjöbi dötjibajinobe, jojodö deemi baibanö, jö̧tö? Jobekwö israel nijitjö̧ inesö juluwemi comunidadbiyama, jojodö deobeda ji̧bakobe, Diosnö ösödökönö kwö̧jaduwobetjö̧.

¹⁰ —Jau, jobekwö baledakobe, kwö̧jibaduwinö pjabatina Diosnö kwo̧'woduwi jwikibinaduwobetjö̧. Inesö tjöeba̧lakwawa inawadanöbo̧ ökwödönö tjöbeba̧lo̧nö omukwatöködöja, jo̧kwajabetjö̧ isabenö kwöwaekwaduwakwedöja, ökwödö israel jojodöma. Jo̧banö omukwatökönö kwö̧jaduwobetjö̧, ökwödönö baledakwa̧ baikwö yötawaduwakwö: Ubasa'ba otiwa'ba junadöja, ja̧danö ju'wedö tjitebotjö kwichejebina'ba otiwa'babi junadöja.

¹¹ Ja̧danö kwujunaduwi̧ möle otiwanö otidadöja, otiwanö pokwobö, ja̧danö otiwanö kwiteda̧laduwobetjö̧, i̧yada möleda otiwanö pokwobe. Jo̧kwaijayonö, jobekwö kwotidaduwijayonö, wa̧jökakobe kwujunaduwaja̧ma, wajo̧ jö̧a̧li̧ma jelobekwö döibajobedanö ja̧kobe, ja̧danö kwemaduwakwa̧ma, sule inesö o̧'wo tjo̧achakwawada, ja̧danö inia tjöawada kwemawaduwakwedöja, —jö̧ba̧lö laebobe Dios yöawi̧ma.

Dios ju'wedö tjitebotenia jojodönö lȩebakwa̧ Isaias yöawina jawa

¹² A̧ja̧kwaduwi chömöledö, ba̧jȩkwadö tjitebokwena jojodö tjichi̧ma, böba ökwöi̧danö ökwöobe, ja̧danö jwaibalawa labinö ökwöi̧danö ökwöobe. Isabenö labinö ökwöobe ju'wedö tjitebokwena ölakwabikwawa jojodö tjichi̧ma, jwaibalawa labinö lobö ökwöi̧danö.

¹³ Jau, inesö nöobu jwaibalawa labinö ökwöi̧danö labinö ökwöobe tjitebokwena ölakwabikwawa jojodö tjölakwabikwawobö tjichi̧ma, jo̧kwaijayonö katjatibobö weakwo̧ Diosma, ja̧danö weiawö̧, ödö dötjibajakwedö. Jau, mösa'ijutjö jwa̧le'epjo trigo jawa sula'wo e'ewi̧danö, ja̧danö jwa̧lȩ'epjo labinö jwa̧le'ewö nijiso̧pja̧ jalawö jwa̧lȩ'ewi̧danö, katjatibobö weiawö̧ dötjibajakwedö.

¹⁴ Jau chömöledö, yi̧benakwö jobadönö edö, jwiinö yekabiduwijayonö, ikena yȩayi dewachakwa̧ abönö, ida̧ökö deakobe. Jobekwö baledakwawö̧ döpöjojodönö, ökwödö israel jojodö ditea naukwabidönö, ökwödönö juluwajadö, ditea 'döla̧nö emadönöma.