Isaías 16 - Dios Iwene

¹ Tupakwö laebobe Moabitas jojodönö yöa̧lakwawama: —Jobekwö balediawö̧, tjuluwo̧nö midawa baibanö obejadönö weköbaduwo, Juda niji la'aka luwonö, ökwödönö tjöbeba̧lö pjaatakobetjö̧. Sela comunidadtjö labebö, jojodö deobe baledö öbejadönö iyö kwi̧'yaduwo, Jerusalenbe, inesö otiwa'o Sion mikwa'obe.

² —Isabenö tjo̧'wo tjo̧bekwö tjö̧jakwedö, Moabitas jojodöma. Pji̧yu tja̧'do̧tjö tja'dewajawö̧danö̧, tjitebo bakwachobesödö Arnon mikwödötjö budekwö tjö̧jakwedö Moabitas jojodötjö ya̧döma,

³ –Pjabataduwi, otiwanö ja̧dakwa̧ yöbawaduwi. Ökwödönö kwabö lotjapji jö̧ba̧lö pjabataduwi. Towi jawo̧ dejatemi tjöa̧lemi isadanö tjö'wachobö pjaati̧danö, döpöjojodö ökwödönö tjöbadekwapji jö̧ba̧lö otiwanö tjöbeba̧lö pjakataduwobö adebaduwakwö. Döpöjojodö tjöba a'o döbibadösa, döpöjojodönö iyö lobökönaduwi, ökwödönö kwabö lotjapji jö̧ba̧lö.

⁴ Ökwödö Moab niji a'dewö lotjajawö̧nö weköbaduwo, ökwödö Juda jojodö tjö̧'dade dö̧jobö, ja̧danö tjöbeba̧lö pjabataduwi, söbebö lobadö ökwödönöbi söbebö lotjapji jö̧ba̧lö, –budekwö atjebakwedö Moabitas jojodötjö ya̧döma. —Isabenö ju'winö usula tjemawinö webo̧ma deakobe ditebotjöma, ja̧danö isabenö ju'winö söbebö loawama 'dö̧ibakobe, ja̧danö jojodönö ja̧tö lobo̧ma tjitebotjö laebakobe.

⁵ Ja̧danö, jemi ikenama, Diosma Davidmine itji̧mu tupadanö jojodötjö bakwo̧nö ujunakobe, inesö la'aka luwo̧ baibanö, Dios jwaikwöda kabatibökönö ile niebökwenö. Ja̧danö, joba Dios ujunajökwema, otiwanö jweinö webö ö̧jo jö̧a̧lidanö webö ö̧jakwo, jweinö lȩekwa yöawakwo̧, ja̧danö jweinö lȩebo jö̧a̧li̧danö lȩebobö isakwakwo̧, ja̧danö Dios wei̧danö a̧ja̧kwö juluwanö wei̧danö jabö ö̧jakwo̧, jo̧ba David itji̧mu tupadanö jojodötjö Dios ujunakwoma.

⁶ —Ökwödöma Moabitas jojodönö da̧ja̧kwajabe, –Moabitas jojodö tjedemi, ju'wedötjö bajalekwönönöbedösa jö̧ba̧lö omukwatadötö, –jö̧ba̧lö. Jau, Moabitas jojodöma tjomukwatobe, –Ökwödödasa mikwawadöma, ökwödö Moabitas jojodöma Ju'wedötjö bajalekwönönöbedösa, –jö̧ba̧lö, jadanö ju'wedönö öpöjödadö, –Mikwawöködö, –jö̧ba̧lö. Jo̧kwaijayonö jobekwö omukwatö yötja̧lijayonö, jweinöma omukwatöködö, ja̧danö Dios lȩebakwa̧wö̧ jobadönö.

⁷ Jo̧kwajabetjö̧, ju'wi möle okobe deinö Moabitas jojodöma tjubudekwobö ja̧kobe, Moabitas jojodönö baledaja̧ omukwatö, tjubudekwobö jakobe. Jau, jwiinö tjo̧'wo tjo̧bekwö tjubudekwakwedö, Kir-haresettjö uba köködakwawatjö dalö isa'o baibanö tjotidinama jwiakobetjö̧.

⁸ Jau, Hesbon comunidad jojodö tjöbatjijuma, kököachibakobe, ja̧danö Sibma comunidad jojodö tjitea uba batjijubi kököachibakobe. Ju'wedö tjitebokwena la'aka luwedöma, ölakwabikwawö tjichakwedö, ja̧danö tjöbatjiju uba jawa suli̧ waedö ja̧tö lotjakwedö. Ajayinö tjöbatjiju pokwi̧ma, jalobe pokwinobe, Jazer comunidadbe ichibanö, ja̧danö jojodö deobe ichibanö. Jwiinö jalayu baibanö, jwaibalawa bakwachobebi ichibanö jalayu baibajabe, moabitas jojodö tjöbatjijuma, jokwaijayonö bakobe söbebö lotjakobe.

^9-10 —Jobekwö Sibma comunidad tjöbatjiju söbebö lotji̧tjö̧, ötjöbi chubudekwakwo̧sa, Jazer jojodö tjubudekwi̧danö. Jau, jwiinö chubudekwakwo̧sa, Hesbon nijibi, Eleale nijibi chubudesobutjö yoliwenanö baibanö. Ajayinöma batjo̧ wa̧ji̧ emajitja möle baibenama, tjo'wo ösöwachibanö tjö̧jinobe, –Otiwanö wa̧jobetö, –jö̧ba̧lö. O̧ba ja'ö waji̧ tjemenabi, emajitja möle wa̧ji̧ tjemenabi, tjo'wo ösöwachibanö jwöbeba̧liatjinobe, ja̧danö uba batjotjö tjo̧'wo ösöwanö lo̧tjinobe. Jo̧kwaijayonö, ja̧ möle tjo̧wo ösöwanöma tjö̧jökakwedö jobekwöma, ja̧danö bakwobi o̧'wo ösöwanöma jwöökakwo̧, –Otiwa, –jö̧ba̧löma. Jobadönö lȩbebö, jobekwö tjo̧'wo ösöwanö tjö̧ji̧ katjatibobö wetakwosa, ja̧danö ubasobu otidö ja̧tö tjotidi̧ katjatibobö wetakwo̧sa, bakobe o̧'wo tjo̧achadö batjibanö.

¹¹ Ja̧danö ja baledakwa̧ omukwatö, chomajadenö jwiinö o̧'wo tjo̧acho̧sa jobadönö, ja̧danö lo̧awa jawa arpa o̧'wo tjo̧a̧chi̧ lo̧awa ökwöi̧danö, ötjö chubudekwi̧bi ökwöobedanö jo̧be, jwiinö cho̧'wo tjo̧achobe Kir-hareset jojodönö.

¹² —Ja̧danö, Moab jojodöma, idöda tjösödökwe o̧'wo jawanö abebö möemi atjebobö tji̧'yenama, tjime'dawachibenanö baibanö kabatökönö nöchö atjeba̧lijayonö, waekwakobe, tjösödökwenö iyawejube ichibö atjeba̧lijayonö, waekwakobe,

¹³ —jö̧ba̧lö laebobe Isabenö Jo̧ Moabitas jojodönö yöa̧linama. Jau, belö jobekwö yöawinobe,

¹⁴ ja̧danö babema 'yayi jawa yöawajabe jobadönö, baikwö yöawajabe Isabenö Jo̧ma ja̧ baledakwa̧ma: —Ida̧ökö ja̧ möle badekwachakwa̧ma yöneawachibobe. Kwöwaisaduwa, midö wetjökwema, tupakwö otidakwa̧ mölebiyama, otiwanö ba̧ja̧do̧, Ja̧ möleda chotidaja̧ mikwa chemakwo̧sa, jö̧ba̧lö, jö̧tö? Ja̧danö, jo̧banö tjimidakwa̧ möle öwaisi̧danö, Moabitas jojodönö baledakwa̧ möle kwöwaisaduwobö jo̧be, baikwö: O̧ba wapöbakwa baledakwa abönö, yötawinadanö baledakobe. Jau, babe Moabitas jojodöma juluwadö, jwiinö ba̧jȩkwadö tjö̧jijayonö, wapöbakwa o̧biya 'dö̧ibakwa̧ abönö, ida̧ökö jobekwö baledakobe, ja̧danö Moabitas jojodötjö ji̧badöma, sule o̧bukwedö juluwöködöda tjö̧jibakwedö, —jö̧ba̧lö yöawobe Isabenö Jo̧ma, ja̧ baledakwa̧ möle jawama.