Isaías 15 - Dios Iwene

Moab niji baledakwa̧ Isaias yöawina jawa

¹ Baikwö laebobe Dios yöawi̧, Moab niji̧ baledakwa̧ma: —Isabenö bakwöta yö̧te Moab niji comunidad Ar mikwobe söbebö lotjakobe, bakobe wi̧i baibanö, jadanö isabenö bakwöta yö̧te Moab niji comunidad Kir mikwobe söbebö lotjakobe, wi̧i baibanö.

² Jobekwö balediawö̧, Moabitas jojodöma tjösödökwenö iyawejube tji̧'yakwedö, Dibon comunidad jojodöma möemi tjösödökwenö iyawemikwenabe tji̧'yakwedö, tjubudekwobö. Jau, Nebo comunidad baledaja̧bi, Medeba comunidad baledaja̧bi, tjubudekwakobe Moabitas jojodöma. Okobe deinö o̧'wo tjo̧achö, tjöwö'ye jwobawajadö tjubudekwakwedö, ja̧danö okobe deinö o̧'wo tjo̧achö tjaasa'ye jwobawajadö tjubudekwakwedö.

³ Comunidad manabenö kwebachö, epjuya̧do̧ kalukaa̧do̧ 'dutjawakwedö, ja̧danö tjejubiya wame ja̧nöbi, jojodö tjo̧ko̧kwelöbi, okobe deinö budekwabinö jwötjeba̧lakwedö.

⁴ Hesbon comunidad jojodöbi, Eleale comunidad jojodöbi budekwö jwötjeba̧lakwedö, jwötjeba̧li̧ma Jahaza comunidadtjöbi tja̧ja̧kwenanö baibanö. Baledaja̧ omukwatö, Moabitas jojodötjö ölakwabikwawa jojodöma labinö tjubudekwakwedö, ja̧danö yebabinö tjö̧bawö tjö̧jakwedö.

⁵ —Moabitas jojodöwe, jobadönö cho̧'wo to̧achobetjö̧, chomajadebi jwöeba̧lobedanö ichejekwa. Moabitas jojodöma ödö dötjibakwedö, Zoar comunidadbebi, Eglat Selisiya comunidadbebi, ja̧danö Luhit comunidadbe nöchawemi nöchö, tjubudekwakwedö. Horanaim comunidadbe 'ya̧kwawamanö kwebachö, o̧'wo tjo̧achö jwötjeba̧lakwedö, –Ayö, jwiinö ökwödönö söbebö lotjajabe, –jö̧ba̧lö.

⁶ —Jwiinö waekwakobe Moab nijima, Nimrim comunidad ojwema, kököachibakobe, ja̧danö meje'ye kököbachibö suli̧ waekwakobe. Okobe jwiinö jobe pokwi̧ma suli̧ waekwakobe, ö̧'du̧wi jawa bakobenö jwieanö baibanö.

⁷ Jobekwö balediawö̧, nöinö otidö tjemaja̧ jawabi, ko̧ko̧dö tjujunaja̧ jawabi tupa tje'ewakwedö Moabitas jojodöma, ojwe Sauces mikwödö tupakwöchobema.

⁸ Jau, Moab niji̧ ba̧kwemeachibanö tjubudekwakwedö, jwötjeba̧li̧ma Eglaim comunidadbe ichibanö ökwöakobe, jadanö Ber Elin comunidadbe ichibanö ökwöakobe, Moabitas jojodö jwötjeba̧li̧ma.

⁹ —Labinö lȩtebobetjö̧, Dibon comunidad ojwema, jojodö tjökwösobutjö su̧'be baibakobe, ja̧danö jemi tupakwö ina tupakwönönö lȩtebakwo̧sa Moabitas jojodönö. Jau, 'dilibadönöbi wetakwo̧sa, Moabitjas jojodötjö ina 'yaba̧ladönö mebibö kwabö lotjobö, Moab nijitjö döbibajadönöbi, okobe Moab nijinö ju̧kwadönöbi, —jö̧ba̧lö laebobe Dios Moabitas jojodönö yöawi̧ma.