Isaías 14 - Dios Iwene

Dios yemidanö israel jojodönö pjaatakwa̧ Isaias yöawina jawa

¹ Jobekwö baledakobe, Isabenö Jo̧ma Jacob itji̧mu tupadanö jojodönö lȩlöjinö edakobetjö̧, jadanö yemidanö israel jojodönö omudawö ujunakobe idöda tjitebo nijinö tjö̧jakobetjö̧. Ja̧danö, jobekwö tjitebonö tjö̧jenama, jelobetjö ichajadö israel jojodö tjitebonö ju̧kwadöma, bakobe dötewinö tjö̧jakwedö Jacob itji̧mu tupadanö jojodö israel jojodökwö.

² Dios israel jojodönö pjaatobetjö̧, tjitebokwena jojodöma israel jojödönö öbibö tjetjatajakobe, yemidanö israel nijinö tjö̧jobö, ja̧danö jobadö tjitebokwena jojodöma, israel jojodö tjömöayedö batjibakwedö, ömadöbi, ya̧döbi. Jau, ajayinö israel jojodönö juluwinadönö balekwa mikwa tjujuluwakwedö israel jojodöma, ja̧danö ajayinö jobadönö usula tjemawobö webinadönö webö tjö̧jakwedö, israel jojodöda.

Israel jojodö Babilonia niji la'aka luwo̧nö otjakwa̧ jawa Isaias yöawina jawa

³ Jau chömöledö, isabenö ju'wi möle inia tjöbö, usula emawö, 'diinö kwotidaduwelö kwö̧jibaduwinö pjaatakwo̧ Isabenö Jo̧ma,

⁴ ja̧danö jobekwö pjaatawö̧, baikwö obö yöka̧laduwakwedöja ajayinö usula kwemawaduwinö webina Babilonia la'aka luwo̧nö: —Edaduwi, jojodönö usula tjemawinö webinanö, dameakwö ölabi̧ma ida̧ökö 'dö̧ibajabe.

⁵ Jau, Isabenö Jo̧ma jo̧badö sulabedö tjitea tjotokwa'o 'debatö loajabe, ja̧danö inesö la'aka luwedö tjitea la'aka luwo̧ do̧a̧lö'a ö̧sö̧'a 'debatö loajabe.

⁶ Ajayinö dameakwö tjotokwa'onö kabatakwawökönö kwakwatjinobe jojodönö, jadanö dameakwö ja̧nö, tjitebokwena jojodönö labinö webö tjö̧jinobe, ba̧kwelöjateböda usula tjemawinö, jokwaijayonö katjatibinö weajabe Isabenö Jo̧ma.

⁷ —Katjatibinö weiawö̧, bö̧jȩ ba̧kwemeachibanö jukwadöma ö'wachö wi̧inö ba̧jadö, ja̧danö tjo'wo ösöwachibanö lo̧badö.

⁸ Towibiyabi o̧'wo ösöwowi babema, cipre towibiyabi, Libano nijinö pokwi̧ cedro towibiyabi. Towibiyama baikwö yöa̧lobedanö jo̧be, Babilonia niji la'aka luwo̧binanö: –Dios ökwönö meatö loaja̧ baikwöma, towi jubö lobadöma baikwö ichöködö, ökwödö towibiya jubö lotjoböma, –jö̧balö.

⁹ —Jau, wobadö tjö̧jemi jukwadöma tjo'wo ösöwanö tjiteada̧lobe ökwö Babilonia la'aka luwo̧bina jobe kwichibakwa̧ma. Ajayinö la'aka luwedöbinadö tjo̧'wo luwo̧ma a̧la̧ibö kwichibakwa̧ teada̧ladö, ina tjö̧jayi inesö la'aka luwedöbinadöma a̧la̧ibö, –Otiwanö ö'wö babibö kwichibajabe, –jö̧ba̧lö yötja̧lakwedö.

¹⁰ Okobe deinö jobadöma ökwönö obö yötja̧lakwedö: –Ökwöbi dujulu jwibadö dö̧ji̧danö, bakwainö kwujulu jwibo̧ bakibajabe.

¹¹ Inesö otiwi̧ kwi̧sȩbina jawa, ju'wedötjö bajalekwönönöbo̧sa jö̧ba̧lö kwi̧sebina jawabi, kwejutjö lo̧awa jawa ökwöi̧bi 'dö̧ibajabe, bakobenö ö'wö babibinadö tjö̧jemibe kwichibajabe. Ja̧danö inesö otiwapjo camapjo kwabinajayonö, babe kwitea camapjoma sa̧dö tju̧ju̧kwemida bo̧ja, ja̧danö sabana'wodanö kwumuchekwi̧ma, sa̧döda pja̧tja̧kwo̧ja, –jö̧ba̧lö obö yötja̧lakwedö.

¹² —Jau, Yȩayi Dejato̧, dewachena öwawo̧ si̧li̧'idanö kwichejekwinajayonö, mölȩjȩbetjö meköbajabe. Ja̧danö ajayinö tjitebokwena jojodönö söbebö loköbinajayonö, babe ökwönöbi jubö lotjajabe, nijakwö kwakibinö.

¹³ Ökwöma kwomajadenö yöba̧linaja: –Mölȩjȩbe katekwakwo̧sa, Dios ömöayedö si̧li̧'idö tjöwame batibenanö. Ja̧danö kabekwajo̧, chiteaka inesö la'aka luwo̧ ö̧bakama, mö chujunakwo̧sa. U'dakwö ja̧'o mösa'o, diosbedö ko̧ko̧kwö tjö̧ba̧ja̧'otjö, ötjöbi chöbamatakwo̧sa.

¹⁴ Jau, ojwiyo o'wiju möemitjö bajalekwönönö katekwakwo̧sa, ja̧danö Okobe Jwiinö Juluwo̧ Diosdanö batibanö ja̧takwo̧sa, –jö̧ba̧lö yöka̧linobe.

¹⁵ —Jo̧kwaijayonö jobekwö kwomukwatinama waekwajabe, möakwö kabekwökönö, ö'wö bakibajabe, ja̧danö inesö da̧kwobe wobinadö tjö̧jemida tekachajabe.

¹⁶ Ja̧danö okobe deinö ökwönö edadöma, ökwönö eda̧lö omukwatö yötja̧lakwedö, –Isabenö biteda bö̧jȩ tjö̧awobö ja̧inaji̧? Biteda tjitebokwena ya̧bö loinaji̧?

¹⁷ Biteda tjitebo comunidadkwena söbebö lobö, bö̧jȩ ba̧kwemeachibanö jojodö deinö baibanö ja̧inaji̧? Biteda jojodönö juluwö öbibajo̧, ujuluwajawö̧nö tjewa̧jökönö tjö̧jobö ja̧inaji̧? –jö̧ba̧lö yötja̧lakwedö, inesö mikwawö̧kö̧danö kwichejekwakobetjö̧.

¹⁸ Jau, ju'wedö tjitebokwena jojodö tjuluwedö inesö la'aka luwedö ö'wö batjibenama, bakwo̧nökwena wobiako otiwanö tjo̧tjawö̧, inesö otiwobe tjö̧bakobetjö̧.

¹⁹ Jo̧kwaijayonö jobekwö baledökökweja ökwönöma, ökwönö o̧tjö̧könö, ikwö lotjökweja. Töwisötje mikwawökötje ikwö lotji̧danö ikwö lotjökweja, ja̧danö kwölöte'onö dȩdȩbö lotjawö̧kwö, laju okwa inawiya tjikwaju okwa ikwö lotjajabe, ja̧danö ja̧tö lotjinökwe iteba'o ichejekwo̧ja.

²⁰ Jau, ökwöma sulabenö ökwöda kwitebo suli̧ waedinaja, ja̧danö ökwöda kwömöledönö kwabö lobinaja, jokwajabetjö̧ ju'wedö la'aka luwedönö otiwanö o̧tjö̧ tjödi̧danö tjödökökweja, ikwöda lotjökweja. —Jau, ökwödanöbedö sulabedö tji̧tji̧mu tupadanö jojodönö otiwanö tjo̧mukwatobö jwiobe la'akatjöda, ja̧danö la'akatjöda otiwanö yötja̧lökakwedö ökwö kwitji̧mu tupadanö jojodönö.

²¹ Kwitji̧mu tupadanö jojodönö otiwanö yöba̧lökönö, –Bidö jo̧ba itji̧mu tupadanö jojodönö kwabö lododönö, tjabe'dodö jwiinö sulabenö ja̧tjinobetjö̧, bidönö kwabö lodo. Jau, a̧la̧ibö bö̧jȩtjö la'aka luwedö batjibapji jö̧balö, jadanö bö̧jȩ ba̧kwemeachibanö tjitea comunidadbiya tjotidapji jö̧ba̧lö, kwabö lodo bidö sulabo̧ itji̧mu tupadanö jojodönö, – —jö̧ba̧lö obö yöka̧laduwakwedöja Babilonia niji la'aka luwo̧nö, Dios jo̧ba ujulu söbebö loenama.

²² Jau, isabenö Dios lȩebakobe Babilonia jojodönö, baikwö laebobe Isabenö Jo̧, Okobe Jwiinö Juluwo̧ Dios yöawi̧ma: —Ötjöma a̧la̧ibö jobadönö chölakwabikwawakwo̧sa, ja̧danö babe Babilonia comunidad imi a̧ja̧kwö, –Inesö juluwadö tjö̧jemi, –jö̧ba̧lö tjomukwatijayonö, imi söbebö lotajobedanö ja̧kobe, bakobe Babilonia jojodö tjujulu söbebö lotakobetjö̧, ja̧danö ji̧badö deinö jobadönö söbebö lotakobetjö̧. Jau, jobe ju̧kwadö tji̧tjimunöbi, tji̧tji̧mu tupadanö jojodönöbi söbebö lotocha, Babilonia comunidadma bakobe ji̧badö deinö ja̧kobetjö̧.

²³ Ja̧danö, Babilonia comunidad söbebö lobajo̧, tumulu̧'u̧dö tju̧ju̧kwemi baibanö wetakwo̧sa, ja̧danö o̧pesobu sulabobu jȩmi baibanö wetakwo̧sa. Jau, jwodatö lotji̧danö bakobenö söbebö lotocha Babilonia comunidadma, —jö̧ba̧lö yöawobe Isabenö Jo Okobe Jwiinö Juluwo̧ Diosma.

Dios Asiria jojodönö lȩebakwa̧ Isaias yöawina jawa

²⁴ Baikwö yöbawö ujunajabe Isabenö Jo̧, Okobe Jwiinö Juluwo̧ Diosma: —Ötjöma omudawö chujunajabe Asiria jojodönö lȩtebakwa̧ma, jadanö omudawö chujunaja̧danö isabenö baledakobe. Baikwö omudawö chujunajabe, Asiria jojodönö lȩtebakwa̧ma:

²⁵ Asiria jojodötjö ölakwabikwawa jojodö ötjöda chitea nijinö tjö̧jenama, jobadönö 'debatö lotakwo̧sa. Ötjö chitea mösa'ijunö tjö̧jena, ja̧tö lotakwo̧sa jobadönö. Ja̧danö jobekwö söbebö lotobetjö̧, chömöledönö Asiria jojodö tjömöayedö tjö̧jajelö latebakwo̧sa, ja̧danö tje'ewobö wetjinama, tjöböbe'otjö meatö lotakwo̧sa, —jö̧ba̧lö yöbawö ujunajabe.

²⁶ Jau, jobekwö omudawö ujunajabe Diosma, bö̧jȩ ba̧kwemeachibanö baledobö omudawö ujunaja̧ma. Ja̧danö jo̧ba jobekwö omudawö junajo̧da ömamu kabebö i̧sȩba̧lö jo̧, tjitebokwena jojodönö kwaakobetjö̧.

²⁷ Isabenö Jo̧ Okobe Jwiinö Juluwo̧ Diosda jobekwö omudawö ujunajabe, ja̧danö jobekwö omudawö ujunajobema, bakwo̧bi omudawö ujunaja̧ balewö lobo̧ma ö̧jȩnaji̧? Ja̧danö jo̧ba Diosda ömamu kabebö i̧sȩba̧lö ö̧jobema, bakwo̧bi kwabökönö kaatibobö webo̧ma ö̧jenaji̧? Deobe, isabenö Dios omudawö ujunaja̧danö baledakobe.

Dios filisteo jojodönö lȩebakwa̧ Isaias yöawina jawa

²⁸ Juda jojodötjö inesö la'aka luwo̧ Acaz mikwo̧ ö'wö baibina o̧bama, Diosma baikwö yöawakwawa weinobe:

²⁹ —Ökwödö filisteo jojodönö yöta̧la, Isabenö ökwödönö ajayinö juluwinadöma tjöwaekwinobe, jo̧kwaijayonö kwo'woduwi ösöwanö kwö̧jaduwoböma jwiobe, –Ökwödönö kwakwaakwö̧'a ö̧sö̧'ama 'deawajabe, –jö̧ba̧löma. Jau, wanedö yötawa: Ajayinö ökwödönö juluwinama, a̧ko'da nibo̧danö ichejekwinobe, ja̧danö jo̧ba deijayonö, jelo̧ jo̧bajayo̧, jo̧banötjö bajalekwönönö nibo̧ a̧ko'dama laebakobe, mönö köbo̧ a̧ko'dadanö bo̧ma, ja̧danö isabenö ökwödönö söbebö loakwo̧.

³⁰ —Jau, ötjöda chömöledötjö usula jojodönö otiwanö chiteada̧locha, ja̧danö jobadöma, otiwanö ju̧na̧lö, tjajwi̧mu obejadönö teada̧lö tjö̧jakwedö, ja̧danö chömöledötjö jwibadöma wene jwiinö tjabobö tjö̧bamatakwedö. Jo̧kwaijayonö jobekwö baledökakobe ökwödö chömöledö tjöpöjojodö filisteo jojodönö. Ökwödötjö ina ji̧badönö, a̧wi̧chi̧ löji̧ wetocha, ja̧danö ökwödötjö ina 'ya̧ba̧ladöma a̧wi̧chi̧tjö debö tji̧'yakwedö.

³¹ Jo̧kwajabetjö̧ kwiteboduwi comunidad apjude a'o ja̧nö, kwubudekwaduwo, ökwödö comunidad jojodö yebabinö jwökeba̧laduwo, kwomajadeduwinö yebabinö kwö̧jaduwo, okobe deinö ökwödö filisteo jojodöma. Jau, imiyu'wo ichi̧danö, ökwödönö metjibakwedöma tjichobe, bakwo̧bi ime'dawachibökönö, ökwödönö metji̧bakwedö ölakwabikwawa jojodöma tjichobe, jo̧kwajabetjö̧ yekabiduwo, isabenö ökwödönö söbebö lotjakobetjö̧, —jö̧ba̧lö yöawobe Diosma, filisteo jojodönö.

³² Jau chömöledö, ju'wedö tjitebotjö yöbawadö ichibö, Jerusalennö ju̧kwadönö abebö tja̧ja̧kwitjö̧ma, atadakwawa baikwö tjatadakwedö: —Isabenö Jo̧ma, Sion mösa'o jȩmi comunidad Jerusalen otidö ujunajabe, iteda ömöledönö tjöeba̧lemi comunidad baibanö, ja̧danö iteda ömöledö usula emawö jinadöma, jobe ja̧nö otiwanö tjö̧jakwedö, —jö̧ba̧lö.