Isaías 13 - Dios Iwene

Dios Babilonia jojodönö lȩebakwa̧ Isaias yöawina jawa

¹ Baikwö laebobe Dios ötjö, Isaiasnö yöbawö i̧sȩbina jawa, Babilonia comunidad baledakwa̧ jawama:

² —Mösa'o öwaetjöda öwawa'o wame banderasa̧do̧ kabebö kwujuno, edö Babilonia comunidad metjibakwa̧ tjöwaisakobetjö̧. Labinö jwöbeba̧li metjibakwedönö, ja̧danö kwömamu kabebö kwi̧sȩbo, Babilonia luwedö tjitebo comunidad apjude tebachö metjibakobetjö̧.

³ —Baikwö yöawobe Diosma: –Ötjödasa 'da̧batö chujuninawö̧nö webinama, jobekwö metjibobö. Chömöayedötjö juluwadönö jwötajabe, ötjö chödameakwi̧ jobadönötjö lȩtebobö, ja̧danö weti̧danö tjujuluwenama, tjösödakwedö, -Otiwanö juluwadösa, -jö̧ba̧lö, –yöawobe Diosma.

⁴ —Mösa'ijutjö ökwöi̧ kwa̧ja̧kwaduwo, ba̧jȩkwadö ölakwabikwawadö kwetjachobe ökwöobe. Jau, ba̧jȩkwadö tjitebokwena jojodö jwöbeba̧lö tjo̧ko̧ko̧kwobe ökwöobe, Isabenö Jo̧ Okobe Jwiinö Juluwo̧ Diosma Babilonia jojodökwö tjölakwabikwawakwedönö o̧ko̧kodobetjö̧.

⁵ Ja̧danö jobekwö o̧ko̧kodajawö̧, ödö tjitebo, bö̧jȩ bajale ji̧ tjitebotjö ichadö. Jau, ja̧ ökwöi̧ kwa̧ja̧kwaduwi̧ma, Isabenö Jo̧ lȩebakwa̧ tjotidakwedö tjichobe ökwöobe, ja̧danö weawö̧, jwiinö söbebö lotjakwedö Babilonia nijima.

⁶ —Ökwödö Babilonia jojodöma yebabinö kwubudekwaduwo, Isabenö Jo̧ lȩebakwa̧ möle yöneawachibobetjö̧. Ja̧danö badedö ujunina möle badekwachenama, Okobe Jwiinö Juluwo̧ Dios söbebö loakwa̧ badekwachakobe.

⁷ Jobekwö badekwachenama, yebabinö okobe deinö tjö̧mamijuma 'waakobe, ja̧danö okobe deinö tjomajadenö jwiinö yetjaibakobe.

⁸ —Jwiinö yetjaibakwedö ja̧ möle, baikwö wanedö yöta̧la: Jojosuju jitji̧nö jemena, jo̧'wo tjo̧bekwö inia tjöbö jö̧ji̧danö tjö̧jakwedö, ja̧danö tjöba duwamachibanö, yebabinö ju'wedö tjöbabiyakwena tjeda̧lakwawakobe, –Dakwö ja̧dakwajö? –jö̧ba̧lö.

⁹ —Jau, isabenö yötawaduwakwö, Isabenö Jo̧ lȩebakwa̧ mölema yöneawachibobe, ja̧danö badekwachenama, dameakwö, lȩlöjinö edökönö, labinö lȩebakwo̧, tjitebo niji jwiinö söbebö loakobetjö̧, ja̧danö sulabenö ja̧badönö ja̧ niji̧tjö kwabö loakobetjö̧.

¹⁰ Jau, isabenö jwiinö labikobe ja̧ mölema, sasokwena lö̧jadö si̧li̧'idöbi, okobe deinö ju'wedö si̧li̧'idöbi tjidejati̧ katjatibakwedö, ja̧danö möle jawo̧ laebenama, dejatökönö laebakwo̧, ja̧danö yöte jawo̧bi idejatökakwo̧.

¹¹ —Ja̧ möle baledakwa̧ baikwö yöawobe Diosma: –Ja̧ möle bö̧jȩ jojodö sulabenö ja̧tjobetjö̧, bö̧jȩ lȩtebakwosa, ja̧danö sulabenö ja̧badönö lȩtebakwo̧sa, sulabenö ja̧tji̧na mikwa baibanö. Ja̧ möle otiwadösa, ju'wedötjö bajalekwönönöbedösa jö̧ba̧lö omukwatadönö lȩtebakwo̧sa, otiwadösa jö̧ba̧lö tjomukwati̧ 'dö̧ibakobetjö̧. Ja̧danö la'aka luwedö sulabenö tjö̧möayedönö inia tjöbö, usula tjemawinö tjö̧jobö webö tjö̧ji̧ 'dö̧ibakobetjö̧.

¹² —–Ja̧ möle jwiinö lȩtebobetjö̧, bö̧jȩ jojodötjö o̧bukwedöda tjö̧jibakwedö, wanedö yötawa: bakwai̧ oro ja'yubeda ji̧tjö, inesö otiwi̧ Ofir niji oro ja'yubeda ji̧tjö baikwönönö o̧bukwedöda batjibanö lȩtebakwosa bö̧jȩ jojodönö.

¹³ Ja̧danö ötjö Isabenö Jo̧ Okobe Jwiinö Juluwo Dios jwiinö chödameakwobetjö̧, ja dameakwö lȩtebi̧ mölema mölejȩ tjö̧awakobe, ja̧danö bö̧jebi tjö̧awakobe, jo̧ jö̧a̧lelö pjolachibenanö.

¹⁴ Ja̧danö jobekwö lȩtebiawö̧, okobe deinö Babilonia nijitjö dötjibajobö tjisakwakwedö. Wanedö yötawa, yama lutjökwe döibaji̧danö, ja̧danö obejadö teada̧lo̧ debadö tjipjelekwachi̧danö, okobe deinö idöda tjömöledö tjö̧jobekwö dötjibajobö tjisakwakwedö, ja̧danö okobe deinö idöda tjitebobe döbibajö tjetjachajobö tjisakwakwedö, lȩtebi̧tjö dötjibakobetjö̧.

¹⁵ Isabenö ba̧jȩkwadönö kwabö lotjakobe ja̧ möle, Babilonia niji metjibobö wetakwawö̧ma. Okobe deinö tjöbadekwawö̧nö tibatö lotjakobe, okobe deinö do̧tjatajawö̧nö kwölöte'onö dȩdȩbö lotjakobe.

¹⁶ Tjemunöbi kwabö lotjakobe, tjabedo tjöbajale a'otjö nijakwö inawiya jȩna ikwö, 'dabebö lotjakobe, ja̧danö tjejubiyanö tjujuna̧li̧ tjö̧naukwakobe, ja̧danö tjilekwamunö 'da̧'da̧bö lotjakobe.

¹⁷ —–Jau, medo jojodönö wetocha, Babilonia jojodönö metjibakwa̧ tjomukwatobö, ja̧danö jwaikwöda Babilonia jojodönö söbebö lotjobö tjösödakwedö. Jobadö medo jojodöma platabi, orobi ösödöködö, jo̧kwajabetjö̧ midö tjö̧jibobö jö̧ba̧ladöbi ji̧kwawa jwitjakwedö.

¹⁸ Jwaikwöda lȩlöjinö edökönö, kwabö lotjakwedö medo jojodöma, ömadö ina juluwadönö 'böbö lotjakwedö, ja̧danö lȩlöjinö edökönö, tjemunöbi, iyanö tjemawö̧nöbi kwabö lotjakwedö.

¹⁹ Ja̧danö, jobekwö söbebö lotjobetjö̧, Sodoma comunidaddanö, ja̧danö Gomorra comunidaddanö baibakobe Babilonia comunidadma. Jau, Babilonia comunidadma, ju'wi tjitebotenia comunidadtjö inesö otiwi̧ comunidad ji̧najayonö, Dios Sodomabi, Gomorrabi söbebö loinadanö baibakobe Babilonia comunidadma.

²⁰ —–Ja̧danö, söbebö lotjaja̧ ikenama, jemi tupakwö tju̧ju̧kwökakwedö Babilonia comunidadnö, ba̧kwelöjatebö jojodö deobeda ja̧kobe. Arabe jojodöbi sabana'wotjö otikweju jobe tjujunökakwedö, ja̧danö obejadönö teada̧ladöbi tja̧jwimu jobe tjabobö wetjökakwedö.

²¹ Sule tebonö ju̧kwadöda jobe tjabakwedö, ja̧danö Babilonia jojodö tjejubiyanö, tebonö ju̧kwadö labinö budekwadö su̧'bȩ baibakweju. Jau, nöbo̧patu jobe tjö̧jakwedö, jadanö tebonö jukwadö chivodö jobe tjalewakwedö.

²² Hienas ötjabawö̧ma tjöbeba̧lö tjotidinejubiyanö jwöbeba̧lö tjö̧jakwedö, ja̧danö chacales ötjabawö̧ma la'aka luwedö tjö̧jinejubiya otiwejubiyanö ja̧nö jwötjeba̧lakwedö. Jau, Babilonia jojodö tjö̧ji̧ma juluwanö 'dö̧ibakobe, jobadönö söbebö loakwa̧ mölema ida̧ökö yöneawachibobe, –jö̧ba̧lö yöawobe Diosma, —jö̧ba̧lö laebobe ötjö Isaias Babilonia comunidad laebakwa chedinama.