Isaías 12 - Dios Iwene

Dios paatiawö̧, israel jojodö tjösödakwa̧ Isaias yöawina jawa

¹ Ja̧danö, ja̧ möle Dios jwiinö otiwanö pjaatiawö̧, baikwö yöka̧laduwakwedöja: —Duluwo̧ Isabenö Jo̧, otiwanö pjabato̧ja jö̧ba̧lö yöda̧lakwö. Jau Duluwo̧, ajayinö ökwödönö kwödameakwijatö, jo̧kwaijayonö ajayinö kwödameakwinajayonö, kwödameakwi̧ma kakatibajabe, ja̧danö do̧'wo ösöwachibanö pjakatajabe.

² —Jau, edaduwi, Diosda ökwödönö dö̧jibinö pjabato̧ma, jo̧kwajabetjö̧ jo̧banö do̧'wo wa̧nalö ja̧nö, yebabökönö dö̧jakwedösa. Jau, Isabenö Jo̧ Diosda dujuluwachibanö pjabato̧ma, jo̧bada dö̧jibinö pjabato̧ma, ja̧danö döpöjojodötjö dö̧jibobö pjaatinobetjö̧, jo̧banö ösödö lo̧badösa, —jö̧balö yöka̧laduakwedöja.

³ Ojwese'do otiwe'dotjö owö kwo̧'woduwi ösöwachibi̧danö, kwö̧jibaduwinö pjabato̧kwö dötewinö ja̧nö kwo̧'woduwi ösöwachibanö kwö̧jaduwakwedöja.

⁴ Ja̧danö ja möle baikwö yöka̧laduwakwedöja: —Isabenö Jo̧nö dösödaduwo, jo̧ba imi yöba̧lö dösödaduwo, –Isabenö Jo̧ Diosda ökwödönö pjabato̧ma, –jö̧ba̧lö. Tjitebotenia jojodönö yödawaduwo, Dios otiwanö pjaatina wenema, tjöwaisachibanö yödawaduwo, –Isabenö Jo̧ Diosda bajalekwönönö bo̧ma, –jö̧ba̧lö.

⁵ Isabenö Jo̧nö ösödö lo̧daduwo, isabenö iteda dejatinö ujulu i̧sȩbö ökwödönö pjaatinobetjö̧. Okobe deinö bö̧jenö ju̧kwadö tjöwaisachibakobetjö̧ lo̧daduwo.

⁶ Ökwödö Jerusalennö ju̧kwadöma labinö jwöbeba̧lö yökawaduwo, ja̧danö kwo̧'woduwi ösöwachibanö lo̧köbaduwo, ökwödö kwö̧'da̧deduwi jo̧, Inesö Suli̧ Jwibo̧ Israel jojodö tjösödökwema isabenö juluwo̧obetjö̧, —jö̧ba̧lö yöka̧laduwakwedöja.