Isaías 11 - Dios Iwene

David itji̧ tupadanö jojonö Isaias yöawina jawa

¹ Isabenö Dios lȩebakwawö̧ israel jojodönö, ja̧danö wanedö yötawa, David abe'do Isai itji̧mu tupadanö jojodö tjö̧ji̧danö wanekwachowi towi jubö loakobe, sule towi la'akada ji̧binö. Jo̧kwaijayonö, jemi ikenama, ja̧ Isainö wanekwachowi towi la'akatjö, yayinö pokwö laebakobe, ja̧danö pokwaja̧ ikenama, yemidanö otiwanö wa̧ja̧kobe.

² Jau, Isai itji̧ David itji̧ tupadanö jojoma yemidanö israel la'aka luwo̧ ö̧jakobe, ja̧danö Isabenö Jo̧ O̧'wo Luwo̧ma isabenö jo̧bakwö ö̧jakwo̧. Ja̧danö, Dios O̧'wo Luwo̧ jo̧bakwö ja̧nö, okwa jawa waisanö omukwatobö pjaatakobe, ja̧danö otiwanö otidakwa̧ yöbawö, inesö ujulu jo̧banö iyakobe, ja̧danö otiwanö Isabenö Jo̧nö öwaisobö pjaatakobe, otiwanö yebabinö Isabenö Jo̧nö ösödakobetjö̧.

³ Ja̧danö jo̧ba David itji̧ tupadanö jojoma, Isabenö Jo̧nö yebabinö ösödakwawama öpöjödökakwo̧, jwaikwöda o̧'wo ösöwachibanö ösödakwo̧, —Otiwa, —jö̧ba̧lö. Ja̧danö israel jojodötjö lȩekwa luwo̧ ja̧nö, isabenö jweinö lȩebo jö̧a̧li̧danö lȩebakwo̧. Wame jawada edajo̧ lȩebökakwo̧, ja̧danö wame jawada a̧ja̧kwajo̧ lȩebökakwo̧.

⁴ Jo̧ba lȩebakwa̧ma, jojodönö wainökwena edöma lȩebökakwo̧, jweinö Dios wei̧danö lȩebakwo̧. Jweinö bakweminö lȩekwa yöawakwo̧, jwibadöbi, ju'wedö sulabenö ja̧tja̧jawö̧bi öba a'o tjichibenama, mikwawöködö jö̧ba̧löma öpöjödökakwo̧, jojodönö bakweminö edö, isabenö lȩekwa yöawo jö̧a̧li̧danö lȩebakwo̧. Isabenö otiwanö lȩebakwo sulabedönöma, jweinö lȩekwa yöbawö, sulabenö ja̧badönö kwabö lotjobö weakwo̧, debö tji̧'yakobetjö̧.

⁵ Wanedö yöta̧la otiwanö ö̧jo jö̧a̧lidanö ö̧jakwa̧ma, koleasö̧je 'dutjawi̧danö Dios wei̧ a̧ja̧kwakwawa 'duawakwo̧, ja̧danö tja̧do 'dutjawi̧danö, jwaikwöda ja̧bö ö̧jo jö̧a̧li̧danö ja̧kwawa 'duawakwo̧.

⁶ Ja̧danö jo̧ba la'aka luwo̧ ö̧jenama, okobe deinö bö̧jȩnö ju̧kwadöma wene jwiinö tjö̧jakwedö, baikwö yötawa: Tebo awilidöma, obejadökwö wene jwiinö tjö̧jakwedö, ja̧danö yawima, chivo itji̧kwö wene jwiinö abobö öbamatakwo̧, ja̧danö pakaya itji̧bi, 'dilibabi, o̧tewo̧ baibanö tjukwejebinökwe pakayaso̧bi bakobe wene jwiinö tjö̧jakwedö, ja̧danö tjemu ja'yuwo̧ wene jwiinö öibakwo̧ jobadönö.

⁷ Ja̧danö pakayadöbi, ojwe ya̧wi̧döbi bakobe meje'ye tjukwakwedö, ja̧danö tji̧tji̧muma bakobe tjabobö tjö̧bamatakwedö, ja̧danö 'dilibama, pakaya ukwi̧danö meje'ye ukwakwo̧.

⁸ Ja̧danö tjemu ja'yuwo̧, ina o̧do'bi̧ owo̧ma, inesö nibo̧ a̧ko'da ö̧jeju laju ö'öbönö alewakwo̧, ja̧danö ida̧ökö o̧do'bi̧ 'döjebökwe tjemuma ömamu yutebakwo̧ inesö nibadö a̧ko̧'dö tjö̧jaju okwa, wene jwiinö.

⁹ Jobekwö ja̧tjijayonö, wene jwiinö tjö̧jakwedö, ja̧danö okobe jwiinö Dios itea'o Jerusalen mösa'o ju̧kwadötjö, bakwo̧bi jelo̧nö suli̧ öwaedökakwo̧, jadanö bakwo̧bi jȩlo̧nö kwabö loökakwo̧. Jau, bö̧jȩ ba̧kwemeachibanö okobe deinö bö̧jȩnö ju̧kwadöma Isabenö Jo̧nö tjöwaisakwedö ja̧ möle, wanedö yötawa, jwaibalawa wame ba̧kwemeachibanö ojwiyo li̧danö, bö̧jȩ ba̧kwemeachibanö Isabenö Jo̧nö waisadöda tju̧ju̧kwakwedö.

¹⁰ Ja̧danö, ja̧ möle bandera ötjabi̧ jawa öwawi̧danö, Isai itji̧ tupadanö jojo la'aka luwo̧ma öwawinö öjamatakwo̧, okobe deinö bö̧jȩnö ju̧kwadöma joba ö̧jobekwö ko̧ko̧kwö tji̧'yakobetjö̧. Ja̧danö, öba a'o ichibajadö, tjitebotenia jojodöma jo̧banö abebö tja̧ja̧kwakwedö, otiwanö ja̧bö tjö̧jakwa̧ tjöwaisakobetjö̧. Ja̧ mö̧le, isabenö okobe deinö jojodöma jo̧ba itebo comunidad ösödö otiwanö tjomukwatakwedö, —Duluwo̧ itebo comunidadma dejatinö salöi̧ comunidad, —jö̧ba̧lö.

¹¹ Ja̧danö, damötjö iteda ömöledö israel jojodönö pjaatinadanö, ja̧ möle chuluwo̧ Diosma yemidanö iteda ömamu deatakobe, iteda ömöledö israel jojodötjö ina 'yaba̧ladönö ko̧ko̧dibö israel nijibe tjeatakobetjö̧. Jau, Dios lȩebinatjö ji̧binadö Asiria nijinö ju̧kwadönöbi, Egipto nijinö ju̧kwadönöbi, Patros nijinö ju̧kwadönöbi, Etiopia nijinö ju̧kwadönöbi, Elam nijinö ju̧kwadönöbi, Sinar nijinö ju̧kwadönöbi, Hamat nijinö ju̧kwadönöbi, jwaibalawa ö'öbötenia niji ju̧kwadönöbi o̧ko̧ko̧dakobe, yemidanö tjitebo israel nijinö tjö̧jakobetjö̧.

¹² Iteda itea bandera kaebakobe, tjitebotenia jojodö öwawinö tjedobö, ja̧danö israel jojodö, ajayinö tjitebotjö a'dewö loinawö̧nö o̧ko̧kodakobe, ja̧danö Juda jojodö tjipjelekwachinö ju̧kwadönöbi o̧ko̧ko̧dakobe, bö̧jȩ bajale ju̧kwadönöbi o̧ko̧kodakobe, a̧dekwanö tjitebobe tjetjachajakobetjö̧.

¹³ Jobekwö ko̧ko̧dö ichejebiawö̧, israel jojodökwö, Juda jojodökwö wene jwiinö tjö̧jakwedö. Israel jojodöma, Juda jojodönö tjome suli̧nö tjedi̧ma katjatibakobe, ja̧danö tjome sulinö edökönö, otiwanö Juda jojodökwö dösölö̧jinö tjö̧jakwedö. Ja̧danö Juda jojodöma, Israel jojodönö tjölabi̧ma katjatibakobe, jadanö ölakwabikwawökönö, Israel jojodökwö dösölö̧jinö tjö̧jakwedö.

¹⁴ Ja̧danö bakobe pjabatakwawö ja̧nö, Israel jojodöbi, Juda jojodöbi tjöpöjojodö jawo̧ meajobekwö ju̧kwadö filisteo jojodönö metjibakwedö, jadanö tjöpöjojodö jawo̧ laebobekwö ju̧kwadönö juluwajadö, bakobe tjiteaja̧ma 'döbebö tjemakwedö. Ja̧danö Edom niji jojodönöbi, Moab niji jojodönöbi tjujuluwakobe, tjömöayedö batjibakobetjö̧, ja̧danö Amonitas jojodöbi tjömöayedö ja̧nö, wetji̧ a̧ja̧kwö tjö̧jakwedö.

¹⁵ Ja̧danö Isabenö Jo̧ma jwiinö söbebö loakobe Egipto niji jwaibalawa bajalema, ja̧danö iteda ujulunö, jwa̧le'epjo inesö tubapjo weakobe, inesö jalödö Eufrates ojwema ja'yuwödöda baibakobetjö̧. Jobekwö weobetjö̧, inesö jalödöma ja'yuwödöbiya baibanö 'da̧achibakobe, da̧kwöködö jelemutjö dödölataja ojwebiya baibanö. Ja̧danö Diosma jojodönö öibakobe wene jwiinö kwebachöda jalödö ji̧nemi petjibakobetjö̧.

¹⁶ Jau, damötjö israel jojodö Egipto nijitjö latjebena, jwaibalawa ö'wejenö jalama po̧ebinadanö, Asiria nijitjö jalama baibanö ujunakobe Diosma, iteda ömöledö israel jojodötjö ina 'yaba̧ladöma jweinö tjitebobe tjetjachajakobetjö̧.