Isaías 10 - Dios Iwene

¹ Isabenö Dios lȩebakwawö̧ja, ökwödö la'aka luwedötjö tjömöayedö usula tjemawinö webadöma, kwömöayedöduwi usula tjemawinö weawa sulabenö wȩyudö weköbaduwobetjö̧.

² Jwibadönö pjakataduwo jö̧ka̧laduwenama, sulabenö pjabatöködöja, jadanö lȩekwa luwedö chömöledö israel jojodötjö usula jojodönö pjatjato jö̧tja̧lenama, pjatjatapji jö̧ba̧lö tjöbeba̧ladöja. Jau, tjilekwamu wobekwinadönöbi, löyödönöbi pjakataduwo jö̧ka̧laduwijayonö, pjabatökönö tjitea sulabenö 'döbebö tjö̧naukwobö webadöja, sulabenö.

³ Jobekwö sulabenö ja̧köbaduwobetjö̧, ¡ökwödöwe! Dios lȩebakwa̧ mölȩ badekwachenama, dakwö kwö̧ji̧baduwakwajö? Ödötjö ichadö ökwödönö söbebö lobö tjichenama, dakwö kwö̧jibaduwakwajö? Dios yöawi̧ kwöpöjödaduwobema, dite tjöbeba̧lo̧ ö̧jobekwö dökibaduwakwajö? Ja̧danö nöinö kwujuna̧laduwi̧ma, dai kwujunibaduwakwajö, 'dötebapji jö̧ba̧löma?

⁴ Isabenö ji̧ikwa jwiköbaduwakwedöja, sule dötölataja jawada kwöbaledaduwobö ja̧kobe, tjujuluwajawö̧, jelobekwö ökwödönö töbö ötjibawö̧ kwi̧'yaduwoböö̧kö̧, kwabö lotjawö̧ debö kwi̧'yaduwoböö̧kö̧, isabenö ji̧ikwa jwiakobe ökwödönö. Ja̧danö jobekwö ökwödönö lȩebijayonö, ina iteda ömamu kabebö i̧sȩba̧lö ö̧jakwo̧ Diosma, tupakwönönö ökwödönö kwaakobetjö̧, ¡ökwödöwe!

Asiria jojodönö Dios lȩebakwa̧ Isaias yöawina jawa

⁵ Baikwö yöawobe Diosma: —Isabenö lȩtebakwawö̧ Asiria jojodönö. Jobadö Asiria jojodöma, ö̧sö̧'a inesö chödameakwi̧ ichejekwö̧'adanöbedö, ja̧danö jobadönötjö̧ lȩtebobe chödameakwawö̧nöma.

⁶ Jobadönö wetajabe, israelsaso Diosnö tjösödököso jojodönö metjibobö. Jwiinö chödameakwawö̧nö metjibobö wetobe Asiria jojodönö, israel jojodönö juluwajadö, söbebö lobö tjitea 'döbebö tjemakobetjö̧, ja̧danö manatjö lete'o ja̧tö lotji̧danö, jobadönö ja̧tö lotjakobetjö̧.

⁷ Jo̧kwaijayonö ötjöda weti̧danö metjibijayonö, weti̧ tja̧ja̧kwotö jö̧ba̧lö mebiböködö, ja̧danö Asiria niji la'aka luwo̧ma omukwatö̧kö̧, –Ötjöma sule Dios ömöayo̧sa, –jö̧ba̧löma, jo̧kwajabetjö̧ isabenö lȩtebakwawö̧, Asiria la'aka luwo̧nöbi, ömöledönöbi. —Ötjö weti̧ a̧ja̧kwobö omukwatökönö, iteda söbebö loobö omukwato̧ Asiria luwo̧ma, –Ba̧jȩkwaso tjitebosaso jojodönö söbebö lotakwo̧sa, tjitebo deamachibanö, –jö̧ba̧lö omukwato̧.

⁸ Ötjö Diosnö omukwatökönö, baikwö yöba̧lo̧ Asiria la'aka luwo̧ma, itedada: –Okobe deinö chömöayedö ölakwabikwawa jojodö tjuluwedöma, inesö la'aka luwedöbedö, isabenö juluwo̧ inesö la'aka luwo̧sa.

⁹ Ja̧danö isabenö inesö jalemi juluwemi comunidadbiya juluwinasa, Carquemis comunidad chujuluwinadanö, Calno comunidadbi chujuluwijatö. Ja̧danö Arfad comunidad chujuluwinadanö Jamat comunidadbi chujuluwijatö. Ja̧danö Damasco comunidad chujuluwinadanö, Samaria comunidadbi chujuluwijatö. Okobe jwiinö ja̧ comunidadtenia juluwemi jalemi comunidad ji̧najayonö, yayonö chujuluwijatö.

¹⁰ Isabenö juluwo̧sa, tjösödawö̧teniama juluwöködö, chujuluwökönö tjötjeba̧loböma. Jau, Samariatjö bajalekwönönö, ja̧danö Jerusalentjö bajalekwönönö, ja̧ chujuluwinemi comunidadbiyama inesö juluwadö tjo̧'wo jawa webö tjö̧jemi comunidadbiya ji̧nobe, jo̧kwaijayonö yayonö chujuluwijatö, ja̧danö juluwajo̧ comunidadbiyabi, tjösödawö̧ o̧'wo jawabi söbebö lotijatö.

¹¹ Jo̧kwajabetjö̧ isabenö Jerusalen jojodöma chujulutjö tjö̧jibobö jwitjakwedö. Ötjöma ida̧ökö Samaria comunidad juluwajo̧, comunidadbi, tjösödawö̧ o̧'wo jawabi söbebö lotijatö, jo̧kwajabetjö̧ isabenö Jerusalen comunidadbi, tjösödawö̧ o̧'wo jawabi söbebö lotakwo̧sa, chujuluwökönö tjötjeba̧loböma jwiakobe la'akatjöda, –jö̧balö yöba̧lo̧ Asiria la'aka luwo̧ma.

¹² —Jo̧kwaijayonö, jobekwö omukwatö yöa̧lijayonö, ötjö Isabenö Jo̧ma baikwö yöta̧lobe jo̧ba Asiria la'aka luwo̧nö: Babema jo̧banötjö Jerusalennö ja̧'o Sion mösa'onö ju̧kwadönöbi, ju'wedö Jerusalennö ju̧kwadönöbi lȩtebobe. Ja̧danö, jo̧banötjö̧ lȩtebo jö̧ta̧li̧ jawa katatibenama, jo̧ba Asiria la'aka luwo̧nö lȩtebakwo̧sa. Jau, iteda omajadenö, Juluwo̧sa jö̧ba̧lö jwiinö sulabenö yöba̧lo̧, ja̧danö sulabenö ju'wedönö nijakwönönö edo̧, idötjö bajalekwönönö jo̧sa, jö̧ba̧lö, ja̧danö jobekwö omukwatö ö̧jitjö̧ jo̧banö lȩtebakwo̧sa.

¹³ Jau, isabenö sulabenö omukwatö yöba̧lo̧ Asiria la'aka luwo̧ma, ötjöda jo̧ba ujuluwobö chiyinajayonö, ötjönö omukwatökönö iteda jawa yöba̧lo̧, baikwö: –Ötjöda juluwo̧chobetjö̧, chujuluwajabe, ja̧danö ötjöda waisanö omukwatö, okwa jawa waisanö chomukwatobetjö, chujuluwajabe. Ötjöda chujulunö sasokwena jojodö tjitebotenia bakwachobema söbebö lotajabe, ja̧danö nöinö mikwawi̧ jawa 'da̧batö tjujunina jawa 'döbebo̧sa, ja̧danö pakayaso̧ juluwo̧ ichejekwinö, inesö la'aka luwedö tjiteakanö ba̧jadönö töbö meatö lobo̧sa.

¹⁴ Jojodö pji̧yu̧ tja̧'do̧tjö iyabiya 'döbebö tjemi̧danö, tjitebokwena jojodö tjitea nöinö mikwawi̧ jawa 'döbebö chemajabe. Ja̧danö, jobekwö 'döbebö chemenama, bakwo̧bi tjöeba̧linokobe chemapji jö̧ba̧lö. Wanedö yöta̧la, chömamunö tja̧'do̧tjö chemenama, teada̧luju dea'do̧tjö cheminobedanö ichejekwa, ja̧danö tjö̧wa̧ja̧pi̧ya yebeabinö ja̧tji̧nokobe, ja̧danö jwötjinokobe, chemapji jö̧ba̧löma. Ötjödasa inesö juluwo̧chobetjö̧, jobekwö wene jwiinö eminasa̧, –jö̧ba̧lö omukwatö yöba̧lo̧ Asiria luwo̧ma.

¹⁵ —Jobekwö ötjö Diosnö omukwatökönö sulabenö yöa̧li̧tjö̧, baikwö yöta̧lanö Asiria la'aka luwo̧nö: Bakwo̧ o̧tomo'anö towibiya juenama, o̧tomo'a jö̧a̧lenaji̧, –Ötjö o̧tomo'ama ötjönö do̧ba̧lö jubo̧tjö bajalekwönönö juluwo̧sa, –jö̧ba̧lö jö̧a̧lenaji̧? Ja̧danö löawakama, –löbo̧tjö bajalekwönönö mikwakasa, –jö̧ba̧lö yöa̧lenaji̧? Kwöwaisaduwa, ja̧maökö, jö̧tö? Jojoda ö̧sö̧'a kabebo̧ kwabo̧ma, ö̧sö̧'ama la'akatjöda jojodönö kabebö kwaö̧kö̧'a, towitjö otikwö̧'a ö̧sö̧'ama la'akatjöda towitjö otikwöködönö kaebö̧kö̧'a, jö̧tö? Jo̧kwaijayonö, ite Asiria la'aka luwo̧ma, sule chitea ö̧sö̧'adanö ichejekwijayonö, ötjönö omukwatökönö, –Ötjöda juluwo̧sa, –jö̧ba̧lö sulabenö omukwato̧.

¹⁶ —Jo̧kwajabetjö̧, ötjö Isabenö Jo̧ Okobe Jwiinö Juluwo̧ Diosma lȩtebakwosa jo̧banö. Inesö labi̧ tjö'wöchi̧ jawa wetocha, ömöayedö ölakwabikwawa jojodö inesö juluwadöma tjujulu jwitjakobetjö̧. Ja̧danö babe salöinö juluwo̧danö ichejekwijayonö, wanedö yöta̧la: Ujulu teebe ökwöla chönötedocha, jo̧ba ujulu söbebö lotakobetjö̧.

^17-18 Jau, ötjö Israel jojodönö inesö dejato̧ma, ökwöladanö batibakwo̧sa, Ötjö inesö Suli̧tjö 'Da̧bachibö Jo̧ma ökwöla ubi̧danö batibakwo̧sa, ja̧danö ökwöla ubi̧danö jwiinö söbebö lotocha jo̧banö. Wanedö yöta̧la, bakwöta möle towibiya otiwemi tebobi, batjo otiwanö pokwemibi, sȩötjebiyabi, ju'wi sȩi̧ jawabi juwö lotocha, jwiinö jo̧banö söbebö lotakobetjö̧. Jojo jwiinö 'dö̧bacho̧ 'dalökachibö ö'wö baibi̧danö baibakobe jo̧banö.

¹⁹ Isabenö jwiinö söbebö lotocha Asiria la'aka luwo̧ iteboma, itebotjö inesö otiwemi towibiya jȩmi babe ji̧jayonö, söbebö lotaja̧ okobe ja'yubeda ji̧bakobe towibiyama, ji̧baja̧ towibiyama tjemu ja'yuwo̧bi ö̧ba̧ja̧denanö baibanö, —jö̧ba̧lö laebobe Dios Asiria la'aka luwo̧nö yöawi̧ma.

Dios yemidanö israel jojodönö pjaatakwa̧ Isaias yöawina jawa

²⁰ Yadakwö, israel jojodötjö o̧bukwedöda tjö̧jibakwedö, Jacob itji̧mu tupadanö jojodötjö sule o̧bukwedöda ina 'ya̧baladö tjö̧jakwedö. Ajayinö jobadöma jobadönö ujuluwina Asiria la'aka luwo̧nö tjo̧'wo tjöwana̧linobe, —Asiria luwo̧ ömöayedösa, —jö̧ba̧lö. Jo̧kwaijayonö ja̧ möle jo̧banö o̧'wo wa̧nalökönö, Israel jojodö tjösödökwe Inesö Sulabe Jwibo̧ Isabenö Jo̧ Diosnöda ösödö, isabenö Diosnöda tjo̧'wo wana̧lö tjö̧jakwedö.

²¹ Jau, Jacob itji̧mu tupadanö jojodötjö o̧bukwedöda tjö̧jibijayonö, jobadö ji̧badöma, sulabenö tjomukwati̧ kabatibö, yemidanö juluwo̧ Diosnö tjösödakwedö, ja̧danö yemidanö tjitebo israel nijibe tjetjachajakwedö.

²² Jau, babe israel jojodöma, idöda tjitebonö ja̧nö, jwaibalawa ö'öbösa̧pu̧ so̧biapu̧ ba̧jȩkwi̧danö ba̧jȩkwadö, jo̧kwaijayonö Diosma jobadönö söbebö loakwa̧ omudawö ujunajabe, tjitebotjö a'dewö loakwa̧ma. Diosma inesö sulabe jwibo̧obetjö̧, jobadö sulabenö ja̧badönö lȩebakwa̧ omudawö ujunajabe, ja̧danö lȩebaja̧ ikenama jobadö inesö ba̧jȩkwadötjö sule o̧bukwedöda tjetjachajakwedö.

²³ Jau, iteda yöbawö ujuninadanö, Isabenö Jo̧ Okobe Jwiinö Juluwo̧ Diosma jwiinö lȩebakwo̧ israel jojodönö, israel niji ba̧kwemeachibanö isabenö yöawinadanö badekwachinö lȩebakwo̧. Ja̧danö jemi ikenama, badekwachinö lȩebaja̧ ikenada israel jojodötjö ina 'yaba̧ladöma tjitebobe tjetjachajakwedö.

²⁴ Jo̧kwajabetjö̧ baikwö yöawobe Isabenö Jo̧ Okobe Jwiinö Juluwo̧ Diosma: —Chömöledö Jerusalennö ju̧kwadö, Asiria jojodönö yekabiduwoko. Damötjö Egipto jojodö ö̧sö̧'anö kwakwatjinadanö, ja̧danö ökwödönö kwatjotö jö̧ba̧lö tjotokwa'o katjebinadanö idö Asiria jojodöbi ja̧tjijayonö, jobadönö yekabiduwoko, baikwö yötawa:

²⁵ Ja'yubenö lekwajabetjö ökwödö israel jojodönö inesö chödameakwi̧ma seachibakobe, ja̧danö ökwödönö chödameakwi̧ seachibenama, jobadö Asiria jojodönöda chödameakwi̧ chi̧sȩbakwo̧sa, jobadönö söbebö lotakobetjö̧.

²⁶ —Jau, ja̧ möle ötjö Isabenö Jo̧ Okobe Jwiinö Juluwo̧ma jobadönö lȩtebakwo̧sa, kwakwaakwawa jawanö jobadönö kwakwachakwo̧sa, damötjö Oreb mikwawa inawatjö madianitas jojodönö kwatinadanö. Ja̧danö, damötjö Egipto nijitjö lakebaduwenama, chotokwa'o jwaibalawa wamenö i̧sebajo̧, Egipto jojodönö söbebö lotinadanö, Asiria jojodönöbi söbebö lotocha.

²⁷ Jau chömöledö, ja̧ möle Asiria jojodö tjujulutjö kwö̧jibaduwi̧nö ejatö lotakwo̧sa, wanedö yötawa: Ömöki̧ jawa kwe'ewaduwobö wetji̧ kwöböbe'otjö meatö lotocha, ja̧danö kwulume'atjö töawa jawa wetji̧ ejatö lotocha. Jau, jwiinö ökwödönö pjatatobetjö̧, nökamachaduwakwedöja, ja̧ töawa jawa kwulume'aduwitjö 'daenanö kabatö, —jö̧balö yöawobe Diosma, Jerusalennö ju̧kwadönö.

Asiria jojodö Juda niji metjibakwa̧ Isaias yöawina jawa

²⁸ Baikwö yötawa Asiria la'aka luwo̧nö: Juda niji tebachö, Ajat comunidadbe ichibinobe, ja̧danö ichibajo̧ Migron comunidad ö'wejenö öbaledinobe. Ikenama baledajo̧, Micmas comunidadtjö itea ölakwabikwawa jawa ujuninobe.

²⁹ Micmastjö labebajo̧, mösa'iju 'da̧ba̧lanö öbaledinobe, ja̧danö baledajo̧, ömöayedökwö Geba comunidadtjö tjabekwinobe. Jobekwö ichibiawö̧, Rama comunidad jojodöma tjö̧bawö tju̧ju̧kwinobe, ja̧danö la'aka luwo Saulmine itebo comunidad Gabaa jojodöma dötjibajinobe.

³⁰ Ökwödö Galim comunidad jojodöma, labinö jwökeba̧laduwo, ja̧danö ökwödö Lais comunidad jojodöma, otiwanö jwötjeba̧li̧ kwa̧ja̧kwaduwo. Anatot comunidadbe ichibobetjö̧, ¡Ayö, Anatot jojodöwe!

³¹ Asiria luwo̧ ichibiawö̧, Madmena comunidad jojodöma döbibajadö, ja̧danö Gebim comunidad jojodöbi döbibajadö, ju̧kwawö tjö̧jibobö.

³² Babe möle Nob comunidadbe ichibö öjamatakobe, ja̧danö jobetjö Jerusalennö ja̧'o Sion mösa'onö ju̧kwadönö yebeabinö dameakwö 'dootö jö̧balö ömamu kaebakobe, —Isabenö ökwödönöbi chujuluwakwo̧sa, —jö̧ba̧lö.

³³ Jo̧kwaijayonö, jobekwö ichibijayonö, baikwö yötawaduwakwö: Isabenö Jo̧ Okobe Jwiinö Juluwo̧ Diosma iteda inesö ujulunö ujuluwakobe Asiria la'aka luwo̧nö, wanedö yötawa: Iteda ujulunö jobadö towidanö ichejekwadönö jubö loakobe, jobadötjö inesö möbadönöbi jubö loakobe, ja̧danö ajayinö jelowitjö bajalekwönönö möowibiyama, nijakwö meowida ji̧bakobe.

³⁴ Jau, bakwo̧ o̧tomo'anö tebo jubö loi̧danö jubö loakobe jobadönö, ja̧danö inesö towi jalemi Libano towibiyadanö ichejekwadönöbi jubö loakobe inesö juluwo̧ Diosma, jö̧ba̧lö yötawaduwakwö Dios Asiria luwo̧nö ujuluwakwa̧ jawama.