Isaías 1 - Dios Iwene

Isaias iwȩyudina ajayi jawa

¹ Baikwö laebobe Dios yöawi̧, Amos itji̧ Isaias mikwo̧nö i̧sȩbö yöawina jawa. Juda niji inesö la'aka luwedö Uzias mikwo̧bi, Jotan mikwo̧bi, Acaz mikwo̧bi, Ezequias mikwo̧bi bakwo̧nökwena webö tjö̧jonö, Diosma iteda yöawi̧ i̧sȩbö yöawinobe Isaiasnö, Jerusalen comunidad baledakwa̧ jawabi, ju'wi Juda niji baledakwa̧ jawabi. Jadanö ja̧ yöawinama baikwö laebobe:

Dios wei̧ a̧ja̧kwökönö tjö̧jobetjö̧, Juda niji ju̧kwadö usula tjemawakwa̧ jawa

² Bö̧jenö ju̧kwadöbi, mölejenö ju̧kwadöbi kwa̧ja̧kwaduwo, Isabenö Jo̧ yöawaja̧ jawama, baikwö: Tjemu chö̧da̧pedinawö̧ma, ötjönö öpöjödö katjatibajabe.

³ Isabenö ötjönö tjösödo jö̧tja̧lajabe Juda jojodöma, baikwö yötawa, Pakayadöma idöda tjuluwo̧nö waisadö, ja̧danö bu̧lu̧döma idöda tjuluwo̧ kwakwawa iyajiemi waisadö, jö̧tö? Ja̧danö, jobadö tjöwaisi̧danö, chömöledö israel jojodöma ötjönö tjöwaiso jö̧tja̧lajabe, Isabenö Jo̧ Diosda duluwo̧bo̧ma, jö̧ba̧lö, jo̧kwaijayonö wajwibadö. Jau, chömöledö israel jojodöma okwa jawa ja'yubebi omukwatöködö, pakayadötjöbi, buludötjöbi baikwönönö wajwibadö israel jojodöma.

⁴ Ayö, chömöledö israel jojodöwe! Isabenö nöinö sulabenö ja̧badö israel jojodöma. Jobadöma bakobe sulabenö ja̧badö, chi̧tji̧mu otiwadö tjö̧jo jö̧tja̧lijayonö, suli̧ waedö ja̧bö ju̧kwadö, sulabenö. Jau, ötjö Isabenö Jo̧nö tjösödo jö̧tja̧lijayonö, öpöjödö, ötjö Sulabe Jwibo̧ Israel jojodö tjuluwo̧ Diosnö kabatibö, 'da̧bachibö ju̧kwadö israel jojodöma, sulabenö.

⁵ Chömöledö israel jojodö, tajawedö yemidanö ökwödönö lȩtebobö ja̧badöja? Tajawedö jwaikwöda weti̧ a̧ja̧kwökönö kwö̧jaduwobedaja? Ida̧ökö nöinö inia tjöbadöja chömöledö, baikwö wanedö yötawa: Kwuuduwi inia tjököbaduwinö labinö kwatjawö̧danö ichejekwadöja, ja̧danö kwomajadeduwi ida̧ökö me'dawadödanö ichejekwadöja.

⁶ Jau chömöledö, kwiteba'oduwi bakwemeachibanö inia tjöbadöja, kwuuduwitjö kwömasapaduwi ichibanö. Kwiteba'oduwi bakwemeachibanö kwatjaja̧bi, dȩdȩtjaja̧bi, wale'debiyabi samawö̧ja, ja̧danö jobekwö kwö̧jaduwijayonö, otidö lotjökö̧wö̧ja. Jau, inia tjököbaduwijayonö, suli̧tenia dichökönö, ja̧danö jwabawökönö, ja̧danö olivo o̧te 'do̧bökönö, otidö lotjökö̧wö̧ja.

⁷ —Kwiteboduwibi ja̧danö chömöledö. Jwiinö suli̧ tjöwaedajabe kwiteboduwima, ja̧danö kwiteboduwi comunidadbiyama, ökwölanö juwö lotjajabe. Ja̧danö kwöbajaleduwi a'otjö, kwöbatjoduwi suli̧ tjöwaedajabe, kwöpöjododöduwi jelobetjö ichajadöma. Jau chömöledö, jelobetjö ichajadö suli̧ waedö tjichajobetjö̧, jwiinö suli̧ waekwajabe kwiteboduwi israel nijima.

⁸ Ja̧danö kwiteboduwi inesö la'aka comunidad Jerusalenma, ajayinö jalemi la'aka comunidad ji̧najayonö, jo̧dawemi baibajabe, bakobe kwöpöjojodöduwi ölakwabikwawö tjötjösawemi baibajabe. Jau, löwöte uba batjo ö'wejenö jö̧tedanö, ja̧danö pepinos mikwi̧ batjo ö'wejenö jö̧tedanö ichejekwemi baibajabe Jerusalen comunidadma, bakwachobetenia kwöpöjojodöduwi ölakwabikwawö tjötjösawobetjö̧, jö̧ba̧lö laebobe Dios Israel jojodönö yöawaja̧ma.

⁹ Jau chömöledö, ökwödö israel jojodöma, Sodoma comunidaddanö, ja̧danö Gomorra comunidaddanö badibo jö̧da̧linobe, Dios lȩebi̧tjö okobe deinö bakobe debö di̧'yo jö̧da̧linobe chömöledö. Jo̧kwaijayonö, okobe deinö debö di̧'yapji jö̧ba̧lö, Isabenö Jo̧ okobe jwiinö juluwo̧ Diosma ökwödö israel jojodötjö o̧bukwedönö tjöbeba̧lö pjaatajabe, Sodomadanö, ja̧danö Gomorradanö badibapji jö̧ba̧lö.

¹⁰ Isabenö Sodoma jojodödanö, ja̧danö Gomorra jojodödanö, jwiinö sulabenö ja̧badöja chömöledö israel jojodö. Jo̧kwajabetjö̧ ökwödö Sodoma luwedödanö wanekwachadönö baikwö yötawaduwakwö, Isabenö Jo̧ yöawi̧ kwa̧ja̧kwaduwo jö̧ba̧lö. Ja̧danö ökwödö Gomorra jojodödanö wanekwachadönö baikwö yötawaduwakwö, Dios jwebebö lȩebi̧ma, otiwanö omukwatö kwa̧ja̧kwaduwo, jö̧balö.

¹¹ Baikwö yöawobe Isabenö Jo̧ma ökwödönö: —Mikwawokobe ötjönöma, nöinö iyawa kwabö juwö kwiyaduwii̧ma. Ida̧ökö chöpöjödachibajabe, obejadönö kwabö juwö jwiinö ubinö kwiyaduwi̧ma, ja̧danö pakayadö o̧tewadö batjibanö tjukwejebinawö̧ tjo̧te kwiyaduwi̧bi chöpöjödachibajabe. Ja̧danö pakayadöbi, obejadöbi, chivodöbi kwiyaduwawö̧ tjökwösobu edö, –Otiwanö iyadöja, –jö̧balöma chösödökö.

¹² —Tajawedö kabatökönö cheju a̧petube ichiba̧lö, chöba a'o ichibö cheju a̧petu ba̧kwemeachibanö ja̧takwö kwichiba̧laduwobeda?

¹³ Ja̧ mikwawökö ji̧ kwiyaduwi̧ma, kabatibaduwi. Jau, okobe jwiinö –Diosnö ösödadösa, –jö̧balö ja̧köbaduwi̧ma chöpöjöda, baikwö yöta̧la: Omewi̧ jawa kwujuwaduwi̧ma chöpöjöda, inesö suli̧, jö̧ba̧lö. Ja̧danö ju'wibi yö̧te jawo̧ yabayo̧ jawa ba'ali junadöja, ja̧danö otikwökö möle ba'alibi junadöja, ja̧danö bakobe ko̧ko̧kwö kwö̧jaduwobö jwöbadöja, –Otiwanö Diosnö ösödadösa, –jö̧ba̧lö. Jo̧kwaijayonö, sulabenö jabö kwö̧jaduwonö jobekwö ko̧ko̧kwö kwö̧jaduwobetjö̧, chome 'dibachibökönö chöpöjöda, tjo̧wita, jö̧ba̧lö.

¹⁴ —Jau, jwiinö chöpöjödobe chöba a'o ba'ali kwujunaduwi̧bi, ju'wi ko̧ko̧kwö kwö̧jaduwi̧bi, ida̧ökö yelösöda ömökinö baibajabe ichejekwa, jwiinö chöpöjödinö baibajabe.

¹⁵ Jo̧kwajabetjö̧, ötjönö abebö kwa̧ja̧kwaduwakobetjö̧, kwömamijuduwi kabebö dekataduwenama, jalachibö jelobekwö edo̧sa, ja̧danö nöinö abeba̧lö ötjönö akebaduwenama, a̧ja̧kwö̧kö̧sa, jojodönö sulabenö kwabö lobajadö, kwömamuduwi̧ tjökwösobu 'yoliwinö kwö̧jaduwobetjö̧.

¹⁶ —Isabenö ötjönö kwösödaduwobö jö̧ka̧laduwitjö̧ma, kwidichawaduwo, chöba a'otjö sulabe jwibadö kwö̧jaduwakobetjö̧. Chöba a'otjö sulabenö ja̧köbaduwi̧ kakatibaduwo.

¹⁷ Otiwa jawa ja̧bö ja̧kwawa kwöwaisachibaduwo, ja̧danö jweinö lȩekwa weköbaduwo. Ju'wedö sulabenö ja̧tja̧wö̧nö pjabatö, tjo̧'wo ösöwachibanö pjakataduwo. Löyödöbi, tjilekwamunö wobekwinadöbi lȩekwa luwedö tjöba a'o tjö̧jenama, tjöbeba̧löjönö pjakataduwo, jobadönö suli̧ tjöwaedapji jö̧ba̧lö, yöawobe Diosma.

¹⁸ Tupakwö yöawobe Isabenö Jo̧ma ökwödö israel jojodönö: —Chömöledö, bakobe omukwatakwawö yöda̧lakwawaduwo, otiwanö kwö̧jaduwakobetjö̧. Ökwödöma sulabenö ja̧badö kwö̧jaduwobetjö̧, isabenö yȩbekwadöja chömöledö, wanedö yöta̧la, nöinö sulabenö ja̧köbaduwi̧ma, jwiinö duwinö yȩkekwachibaduwinö ja̧ajabe ichejekwa. Jo̧kwaijayonö, yayonö otiwanö dichawadö bakibaduwobö jo̧be chömöledö, wanedö yöta̧la, obeja öwö'ye dewi̧danö bakwainö dewadö bakibaduwobö ina jo̧be.

¹⁹ Jau chömöledö, isabenö otiwanö omukwatö, –Dios wei̧ a̧ja̧kwö dö̧jo, –jö̧ba̧lö weti̧ a̧ja̧kwö kwö̧jaduwitjö̧ma, isabenö otiwanö pjatatakwo̧sa, jadanö yemidanö kwiteboduwi batjo jawa otiwanö kwukwaduwakwedöja.

²⁰ Jo̧kwaijayonö, a̧ja̧kwökönö, weti̧ öpöjödö kwö̧jaduwitjö̧ma, isabenö ju'wedö dȩdȩbö lotjakwawö̧ja. Jau chömöledö, ötjö Isabenö Joma jobekwö yötawajabe, ja̧danö isabenö yötawaja̧danö baledakobe, —jö̧balö laebobe Isabenö Jo̧ yöawi̧ma.

Jerusalen ju̧kwadö sulabenö ja̧tjobetjö̧, Dios lȩebakwawö̧, jö̧ba̧lö Isaias yöawina wene

²¹ Jerusalen comunidadwe! Ajayinö Jerusalennö ju̧kwadöma, otiwanö Diosnö ösödö tjö̧jinobe, jo̧kwaijayonö babema bakwuju jilekwebö̧kö̧kwö sulabenö 'da̧'da̧bakwawuju jalewi̧danö, ju'wedö tjösödawö̧nö sulabenö ösödö tjö̧jobe. Ja̧danö ajayinö Dios wei̧ otiwanö a̧ja̧kwadö Jerusalennö tjö̧jinajayonö, babema jojodönö kwabawö lobadöda Jerusalennö tju̧ju̧kwobe.

²² Jau Jerusalennö ju̧kwadö, baikwö wanedö yöta̧la sulabedö bakibinaduwama: Ajayinö bakwa̧i̧ plata otiwi̧danö kwö̧jinaduwobe chömöledö. Jo̧kwaijayonö, sula'wodanö kwöbalewachaduwajabe chömöledö, plata tubedö tjedena, sula'wo kaama'wo bakibaduwinö kwöbalewachaduwajabe ichejekwa. Ja̧danö ajayinö ubasobu o̧'do̧bu, bakwai̧ otiwobu ubasobudanö kwichejekwinaduwijayonö, babema sulabenö ojwiyokwö pjabacha̧lobudanö bakibaduwajabe.

²³ Ja̧danö kwuluwedöduwima, tjuluwedö wetji̧ sulabenö kabatibö ölakwabikwawadö ja̧nö, naukwabidökwö pjabacha̧lö ju̧kwadö. Jau, okobe deinö kwuluwedöduwima, sulabenö ja̧tja̧kwa̧ midawa ösödadö, jadanö kabatökönö ju'wedö sulabenö jobadönö tjimidobö isakwadö. Ju'wibi, tjilekwamunö wobekwinadönöbi, löyödönöbi tjöbeba̧lö pjatjato jö̧tja̧lijayonö, tjöbeba̧löködö ju'wedö jobadönö suli̧ tjöwaedenama.

²⁴ Ja̧danö, ökwödö Jerusalennö ju̧kwadöbi, kwuluwedöduwibi jobekwö sulabenö ja̧köbaduwiökwe, isabenö lȩebakwo̧ Diosma. Baikwö yöawobe inesö la'aka luwo̧, Okobe Jwiinö Juluwo̧ Isabenö Jo̧, Israel jojodö tjösödökwe juluwo̧ Diosma: —Ökwödö Jerusalennö ju̧kwadötjö chöpöjojodö ötjökwö ölakwabikwawadönö lȩtebobö chisakwocha, ja̧danö sulabenö ja̧badö chöpöjojodönö balekwa mikwa suli̧ chöwaedocha.

²⁵ Jau ökwödö Jerusalennö ju̧kwadönö metibocha, kwusuladuwi söbebö lotakobetjö̧, baikwö wanedö yöta̧la: Bakwai̧ plata jawa tjujuna̧lakobetjö, plata jawa otidadöma tubedö otidadö, sula'wotjöbi, ju'wi pjabacha̧lö ji̧tjöbi böjö, bakwai̧ plata tjemakobetjö, jö̧tö? Jobekwö tjotidi̧danö ja̧takwo̧sa ökwödönö, ökwödönö böjö lȩtebocha, ji̧badö bakwainö otiwadö kwö̧jaduwakobetjö̧.

²⁶ —Jemi ikenama, damötjö̧ tjö̧jinadanö, yemidanö lȩekwa luwedö otiwanö yöbawadönö chujunocha, ja̧danö waisanö tjomukwatobö pjabatadönöbi chujunocha. Ja̧danö jejenö chujuniawö̧, kwiteboduwi comunidad Jerusalen otiwanö ötjabikwobe, –Dios wei̧ a̧ja̧kwadö tjitebo comunidad, -jö̧ba̧lö, ja̧danö, -Jwaikwöda Diosnö ösödö ju̧kwadö tjitebo comunidad, –jö̧ba̧lö ötjabikobe kwiteboduwi Jerusalen comunidadma, —jö̧ba̧lö yöawobe Diosma, Jerusalennö ju̧kwadönöma.

²⁷ Jau, Jerusalennö ju̧kwadö otiwanö jabö tjö̧jo jö̧tja̧lidanö ja̧bö tjö̧jobetjö̧, tjitebo yemidanö otiwemi baibakwemi, ja̧danö sulabenö tjomukwatina kabatibö balewachö, Dios wei̧ a̧ja̧kwö ja̧döma, isabenö tjö̧jibakwedö.

²⁸ Jo̧kwaijayonö okobe deinö Dios wei̧ öpöjödö, sulabenö ja̧badöma, isabenö Dios söbebö loakwawö̧, ja̧danö okobe deinö Isabenö Jo̧nö kabatibadöma, debö tji̧'yakwedö.

²⁹ Isabenö tabakwö kwö̧jaduwakedöja, ökwödö tjo̧'wo jawa ösödadöma. Babe inesö encina towi teebe ja̧nö, o̧'wo jawa kwösödaduwobö ösödadöja, –bowi ösödakwowima inesö otiwowi, –jö̧ba̧lö. Ja̧danö towibiya jȩmi o̧'wo jawa kwösödaduwobö ösödadöja babema, jo̧kwaijayonö ja̧ babe kwösödaduwi̧ma, tupakwö tabakwö kwomukwataduwakwedöja.

³⁰ Jau, isabenö tabakwö kwö̧jaduwakwedöja, baikwö wanedö yötawa: Inesö otiwowi öjiya tjoduwenama, ja̧danö towibiya jȩmi kököachibenama, towibiyama öjiya jwiowi tabakwö ji̧danö jo̧be, jö̧tö? Jobekwö baledakwawö̧ja, ökwödö o̧'wo jawa ösödadönöma.

³¹ Ökwödötjö inesö juluwo̧bi ja̧danö, ökwöla tjönötedobö öjiya ji̧danö juluwö̧kö̧ baibakwo̧, ja̧danö otidina jawama ökwöla 'dö̧tekwajö juluwanö tiibi̧danö baibakobe. Ja̧danö, wanedö yöta̧la, Dios lȩebenama, o̧'wo jawa ösödo̧ juluwo̧nöbi, otidina jawabi, bakobe juwö loakokobe, ja̧danö jobekwö juwö loenama, bakwo̧bi Dios önötedajola tiebobö jwiakobe.