Hechos 9 - Dios Iwene

Saulo Jesúsnö ösödina wene

¹ Sauloma ina sulabenö ja̧biabijetö Duluwo̧nö ösödadönöma. Jobadönö yetjaibobö labinö yöbawö, Ökwödönöma kwabö lotjobö wetocha, jö̧ba̧lö, yöbawiabijetö. Ja̧danö, jo̧bama Diostjö jojodötjö ö'weje la'aka pjabato̧ ö̧jobekwö 'yi̧jetö.

² Ichibö ö'weje la'aka pjabato̧nö abebijetö öjiya iwȩyudobö, jo̧ba imikwö, jelobe, Damascobe e'ewotö jö̧ba̧lö. Ja̧ öjiyama Sauloma Damascobe e'ewö 'ya̧jo̧ ichibö judío jojodö ba̧nö tja̧ja̧kwa̧leju te'ada̧lakwawa jojodönö i̧sebobö jö̧ba̧lijetö. Ja̧danö, Jesúsnö ösödadönö, ji̧bakwawa mananö kwebachadö ötjabiwö̧nö, ömadönöbi ya̧dönöbi do̧batö nu'yajo̧ Jerusalénbe öbibö ȩwa̧jobö jö̧ba̧lijetö Sauloma.

³ Ikenama Sauloma ja̧ wȩyukwa öjiya emajo̧ 'yi̧jetö Damascobe. Ja̧danö, ja'ö i̧'yemi, Damasco comunidad ichibakwa̧ yöneawachibena omönanö mölejȩbetjö dewinö dejati̧ salöi̧ma tjösawibijetö Saulo i̧'yena.

⁴ Jejenö salöi̧ tjösawibiökwe Sauloma nijakwö mebijetö. Ikenama iwene a̧ja̧kwijetö, baikwö abebö a̧ja̧kwobe: —Saulo, Saulo, ¿tajawedö sulabenö ja̧köbatjö ötjönöma?— jö̧ba̧lö.

⁵ Jejenö abebö a̧ja̧kwiökwe Sauloma abebö a̧ja̧kwijetö: —Chuluwo̧, ökwöma ¿tida?— abebö a̧ja̧kwiökwe: —Ötjöma Jesússa, ökwö sulabenö ja̧köbökwema— yöbawijetö—.

⁶ Ja̧danö, a̧laibö 'ya̧wi Damascobe. Jobe jo̧ma yöawakobe ja̧köbakwa̧ma— yöbawijetö Jesúsma Saulonöma.

⁷ Ja̧danö, Saulokwö 'ya̧jadöma ¿Tijö? jö̧ba̧lö, ja̧nö eda̧lijadötö, yöba̧lökönö. Jobadöma iwene yöa̧li̧ tja̧ja̧kwijayonö jojonö edijöködötö.

⁸ Ikenama Sauloma a̧laibö öbajalebiya 'boebijayonö edijökötö. Ikenama öbajale tjewawiawö̧ jo̧bakwö 'ya̧jadöma ömamunö do̧ba̧lö tötöbö öbibö 'yi̧jadötö Damasco comunidadbe.

⁹ Ikenama Sauloma wa̧pötakwa möle jenanö öbajale tjewawinö ji̧jetö. U̧kwabi kwijökötö, ja̧ wa̧pötakwa möle jenanö.

¹⁰ Ja̧danö, jobe Damasconö Jesúsnö ösödo̧ma, Ananías mikwo̧, ji̧jetö. Duluwo̧ma jo̧banö yöbawijetö i̧'wi̧di̧danö, baikwö: —Ananías— jwöbijetö Duluwo̧ma. Ananías atadijetö: —Chuluwo̧— atadijetö.

¹¹ Ikenama Duluwo̧ma yöbawijetö: —A̧laibö 'ya̧wi mana, jweinö la̧ma mikwama lo̧bekwö. Ja̧ma ö'öbö jȩju, Judas ejube 'ya̧wi. Jobetjöma akebo Saulo mikwo̧nö, Tarso jojo kwedobö. Jo̧bama yada ja̧nö ötjönö aebobe—yöbawijetö—.

¹² Ja̧danö, jo̧ba Sauloma i̧'wi̧di̧danö edatö ökwönö, Ananías. Jo̧ba ö̧jobekwö kwi̧'yobe edatö. Ikenama kwömamiju jo̧banö 'bikeba̧lemi öbajalebiya otiwanö baibanö kwotidobe edatö, i̧'wi̧di̧danö— yöbawijetö Duluwo̧ma Ananíasnöma.

¹³ Jejenö jö̧a̧liökwe Ananíasma jö̧ba̧lijetö: —Chuluwo̧ ba̧jekwadö yötjawobe cha̧ja̧kwijatö, jo̧ba Saulo ja̧inama. Jo̧bama yelösöda sulabenö ja̧inobe Jerusalénnö ju̧kwadö ökwö kwömöledö babibinadönöma— jö̧ba̧lijetö—.

¹⁴ Babema baikwö ichajabe, Diostjö jojodötjö ö'weje la'aka pjabatadö wetjina ja̧obö, ökwönö ösödadönöma do̧atobö— jö̧ba̧lijetö Ananíasma.

¹⁵ Jejenö jö̧a̧liökwe Duluwo̧ma jö̧ba̧lijetö: —Yayonö jo̧ba ö̧jobekwö 'ya̧wi Ananías. Jo̧banö ötjö jawa wene yöbawo̧ baibanö 'da̧batö chujunökweobetjö̧ 'ya̧wi. Jo̧bama Israel jojodöböködönöbi, Israel jojodöböködö tjuluwedönöbi yöawakwo̧ ötjö jawa wenema. Ja̧danö, Israel jojodönöbi yöawakwo̧ jo̧bama ötjö jawa wenema.

¹⁶ Jo̧bama ötjö jawa wene yöawobetjö̧ yelösöda usula emawakwo̧. Ja̧ usula emawakwa̧ öwaisachibobö chi̧sebocha jo̧banöma— jö̧ba̧lijetö Duluwo̧ma Ananíasnöma.

¹⁷ Jejenö jö̧a̧liökwe Ananíasma labebö 'yi̧jetö Saulo ö̧jejube. Tebachö ömamiju 'bibeba̧lijetö Saulo uunö. 'Bibeba̧lö jö̧ba̧lijetö: —Saulo, chömöledöso̧, Duluwo̧ Jesúsma, ökwö mananö kwichena öwawachinama ötjönö weatö. Kwöbajalebiya tjewawökönö yemidanö otiwanö baibanö chotidobö weatö. Ju'wibi, Dios O̧'wo̧ Luwo̧ ökwö kwo̧'wo̧ luwo̧nö tebachibö öjamatobö weatö Duluwo̧ma— jö̧ba̧lijetö Ananíasma Saulonöma.

¹⁸ Jejenö yöa̧laja̧ ikena, Saulo öbajalebiyatjö ba̧i̧so itelijudanö ichejekwi̧ tjoduwaibijetö. Ikenama otiwanö edinö baibijetö. Ikenama Ananíasma a̧laibajo̧nö ojwenö bu̧datijetö.

¹⁹ Ikenama Sauloma kwakwawa kwijetö. Kwajo̧ma juluwijetö. Ikenama Sauloma ja'yubeda lekwe ji̧jetö Damasconö, Jesúsnö ösödadökwö.

Saulo ajayinö Jesús ö̧jina yöawina wene

²⁰ Ikenama Sauloma te'ada̧lökönö jobetjö judío jojodö yötjaweju okwa Jesús jawa yöbawijetö. Jo̧ba Jesúsma, Dios Itji̧, jö̧ba̧lö, yöbawijetö.

²¹ Okobe deinö Saulo yöawi̧ a̧ja̧kwö: —¿Dakwö Jesús jawama yöbawo̧jö?— jö̧ba̧lö eda̧lijadötö—. Bitema Jerusalénnö ju̧kwadö Jesúsnö ösödadönö usula tjemawinö sulabenö webina. Baikwö ichinobe Jesúsnö ösödadönö nu'yajo̧ Jerusalénbe öbibö e'ewobö, Diostjö jojodötjö ö'weje la'aka pjabatadö tjuju̧kwobekwö—yöba̧lakwawijadötö.

²² Ja̧danö, ja̧ möletjö tupakwö 'ya̧nö Sauloma ajayinö yöawinatjö o̧penönö juluwachibö yöbawijetö. Damasconö ju̧kwadö judío jojodönö jweinö yöbawijetö, Dios jojodönö tjö̧jibinö pjaatobö yöbawö ujuninökwema, Jesúsda, jö̧ba̧lö. Jweinö yöawawö̧ jobadöma atadakwawa jwiinö ba̧jijadötö.

²³ Ja̧danö, lekwe möle baledajena, judío jojodö, Ite Saulonöma kwabö lodonö, jö̧ba̧lö, omukwata̧lijadötö.

²⁴ Mölebi, yö̧tebi Damasco teachakwawemi apjudenö te'ada̧lijadötö, Saulonö kwabö lotjotö jö̧ba̧lö, jobetjö laebena. Jo̧kwaijayonö Sauloma jojodö yötja̧lobe a̧ja̧kwö waisijetö jobadö tjomukwati̧ma.

²⁵ Jo̧kwaobetjö̧ Saulo yöawawö̧ Jesúsnö ösödadöma, ju'wi yö̧te Saulonö, wi̧lȩyu̧ a̧jo̧nö, mönö, inawiyatjö otikwa tjöekwemi ja'ösa'donö a̧petukwöchobe jwibatijadötö Saulonöma, wi̧lȩyu̧ okwa a̧jo̧nö.

²⁶ Ikenama Jeruslalénbe ȩwa̧jijetö Sauloma. Ichibö jobe Jesúsnö ösödadökwö ö̧jo jö̧a̧lijayonö jobadöma yebabijadötö Saulonöma. Jo̧ba Saulonöma, Jesúsnö o̧'wo̧ wana̧lö̧kö̧, jö̧ba̧lö, yebabijadötö.

²⁷ Jo̧kwaijayonö bakwo̧, Bernabé mikwo̧ma Saulonö öbibö 'yi̧jetö Jesús webawedö tjuju̧kwobekwö. Jobadönö yöbawijetö Saulonö baledina wene. Ja̧danö, Jesús Saulonö mananö öwawachö yöawina yöbawijetö. Ja̧danö, Damasconö ja̧nö, Saulo yebabökönö Jesús jawa yöawina yöbawijetö Bernabéma Jesús webawedönö.

²⁸ Jo̧kwaobetjö̧ jobadöma ösödijadötö Saulonöma. Ikenama Sauloma Jesús webawedökwö ji̧jetö. Ja̧danö, Jerusalénnö kwebachiabö ji̧jetö. Yebabökönö yöbawijetö jojodönö Duluwo̧ Jesúsnöma.

²⁹ Ja̧danö, Sauloma ju'wedökwöbi yöba̧lakwawijetö. Jobadöma judío jojodöjayonö griego tjiwene yöba̧ladö. Jobadöma Saulo, Jesús jawa yöawi̧ öpöjödö labinö yöba̧lijadötö. Öpöjödö jwiinö labijadötö, Saulonö kwabö lotjobö omukwatö.

³⁰ Jo̧kwaijayonö, ju'wedö Jesúsnö ösödadöma ja̧ tjomukwati̧ yötjawi̧ a̧ja̧kwö Saulonö öbibö 'yi̧jadötö Cesareabe. Jobetjö Tarsobe i̧'yobö webijadötö Saulonö.

³¹ Ja̧ mölema okobe deinö Jesúsnö ösödadöma Judeanö ju̧kwadöbi Galileanö ju̧kwadöbi Samarianö ju̧kwadöbi otiwanö ju̧kwijadötö, usula emawökönö. Ja̧danö, Dios O̧'wo̧ Luwo̧ pjaatobetjö̧ Diosnö omukwatö tjo̧'wo̧ luwo̧nö ösödö juluwijadötö, tjo̧'wo̧ luwo̧ jawama. Ja̧danö, Diosnö otiwanö yebabinö omukwata̧lö ju̧kwijadötö. Ja̧danö, Dios O̧'wo̧ Luwo̧ pjaatobetjö̧ ba̧jekwachijadötö Jesúsnö ösödadöma.

Kwebachö̧kö̧nö, Eneas mikwo̧nö, otiwanö baibanö baledina wene

³² Ja̧danö, Pedroma jelobebi jelobebi 'ya̧nö Jesúsnö ösödadönö tebachö edijetö. Techawiabö comunidakwena Lida comunidadnö ichibö

³³ bakwo̧nö, Eneas mikwo̧nö, edijetö. Jo̧bama kwebachiabinö̧kö̧. Ja̧danö, lekwe jelemutjö wa̧pötakwa o̧biya kwebachiabinö̧kö̧. Kamapjonöda bo̧, a̧laibökönö.

³⁴ Ja̧danö, Pedroma Eneasnö edö jö̧ba̧lijetö: —Eneas, Jesucristo ökwönö otiwanö bakibanö ja̧ajabe. A̧laibö kamapjo do̧lati— jö̧ba̧lijetö. Jejenö jö̧a̧lemi Eneasma omönanö otiwanö baibajökwema a̧laibijetö.

³⁵ Ja̧danö, okobe deinö Lidanö ju̧kwadöbi Sarónnö ju̧kwadöbi jo̧banö baledaja̧ edö Duluwo̧ Jesúsnö ösödijadötö, Jesúsma dö̧jibinö pjabato̧, jö̧ba̧lö.

Ö'wö babibaju yemidanö tjejachajinö Pedro otidina wene

^36-37 Jobetjö Lidanö jejenö baledonö jelobe, Jope mikwobe, jobe jujuma, Tabita mikwujuma ö'wöchaju ö'wö babibijotö. Ja̧danö, jobujuma Jesúsnö ösöduju. Jobujuma, griego tjiwenenö Dorcas mikwuju. Jobujuma ina 'yajayi otiwanö pjabatö ji̧abijotö. Kabatökönö pjabatiabijotö usula jojodönö. Ja̧danö ö'wö baibajajunö ju'wedöma dichijadötö jobujunöma, wobajadönö dichajitjadanö. Dichajadöma mösȩko̧nö lödijadötö, Jojodö edö tjichakobe, jö̧ba̧lö.

³⁸ Jobema, Jope mikwobema, Lida comunidadtjö ödöokobe, Pedro ö̧jobema. Jo̧kwaobetjö̧ Jesúsnö ösödadöma, ju'wedö yötjawi̧, Pedro Jopenö ö̧jobe, jö̧ba̧lö, a̧ja̧kwö webijadötö du̧ju̧tajanö jobekwö tji̧'yobö. Webijadötö: —Pedronö yöbawajaduwi baikwö icho juluwanö—webijadötö.

³⁹ Jejenö wetjajawö̧ 'ya̧nö Pedronö yötjawiökwe juluwanö 'yi̧jetö Jopebe. Ichibajo̧nö ö'wö babibajaju jömöledöma öbibö nöchijadötö mösȩko̧nö, tjödajȩko̧nö. Ja̧danö, jȩko̧nö tji̧lȩkwa̧munö wobekwinadö budekwabinö ji̧jadötö. Jobadöma Pedronö edö 'ya̧wibö i̧sebijadötö Dorcas iyö pjabatiajinado̧ jobadönöma, ina 'yajayi 'dö̧jinado̧.

⁴⁰ Ikenama Pedroma okobe deinö a'dewö lobijetö a̧petube. A'dewö lobajo̧ma u̧yu̧ju̧ki̧junö bamatö Diosnö abebijetö. Ja̧danö, abebö kabatö wobajajunö edö jö̧ba̧lijetö: —Tabita, a̧laibi—jö̧ba̧lijetö. Jejenö jö̧a̧lioko jöbajale 'bobebö Pedronö edö a̧laibö bi̧jotö kamapjonö.

⁴¹ Ikenama Pedroma jömamunö do̧batö a̧lapedijetö jobujunöma. Ikenama jwöbijetö tji̧lȩkwa̧munö wobekwinadönö, ja̧danö, okobe deinö Jesúsnö ösödadönöbi yemidanö tetjachobö. Tetjachajadönö i̧sebijetö 'yabibajunö.

⁴² Ja̧danö, ja̧ baledi̧ma okobe deinö Jopenö ju̧kwadöma a̧ja̧kwijadötö. Jejenö a̧ja̧kwö ba̧jekwadö Duluwo̧ Jesúsnö ösödijadötö, Jesúsma dö̧jibinö pjabato̧, jö̧ba̧lö.

⁴³ Ikenama Pedroma ji̧bijetö lekwe möle Jopenö, jelo̧ ejunö, Simón mikwo̧ ejunö. Jo̧ba Simónma chi̧wo̧dö o̧bȩja̧dö tji̧sȩdi̧ju jawa otidiabijetö.