Hechos 4 - Dios Iwene

Pedro Juan la'aka luwedö tjöba a'o tjöjamatina wene

¹ Ja̧danö, Pedro, Juan, ina jojodönö yötjawonö, Diostjö jojodötjö ö'weje pjabatadöbi, saduceosbi, Dios eju te'ada̧ladö guardia tjuluwo̧bi Pedro, Juan yötjawobekwö 'yi̧jadötö.

² Jobadöma Pedro, Juan yötjawi̧ma öpöjödijadötö. Ja̧danö, Pedro, Juan yötjawi̧ baikwö yöbawijadötö: Jesúsma yemidanö 'yaibajinobetjö̧, jojodöbi isabenö yemidanö 'yatjibajakwedö, jö̧ba̧lö, yöbawijadötö. Pedro, Juan, ja̧ wene yötjawiawö̧ tjo̧'wo̧ sulinö edijadötö la'aka luwedöma.

³ Jo̧kwaobetjö̧ Pedronöbi, Juannöbi do̧batö e'ewijadötö ka̧lena ba̧kwaweju okwa tjödobö. Ida̧ökö yi̧ibobetjö̧ yada ka̧lena ba̧kwaweju okwa abijadötö Pedro, Juan, ju'wi dewachö la'aka luwedö abebö tja̧ja̧kwakwawö̧ma.

⁴ Ja̧danö, jobadönö ka̧lena ba̧kwaweju okwa tjödobö tje'ewaja̧ okobema, ba̧jekwadö Pedro, Juan yötjawaja̧ a̧ja̧kwajadöma Jesúsnö ösödijadötö, Jesúsma dö̧jibinö pjabato̧, jö̧ba̧lö. Ja̧danö, jobadökwö Jesúsnö ösödadöma, ömadöma, cinco mil jenanö babibijadötö.

⁵ Ja̧danö, ju'wi dewachö israel jojodö tjuluwedöbi, israel jojodötjö damöbi, Moisés iwȩyudina ba̧ja̧dadöbi Jerusalénnö ko̧ko̧kwachibijadötö, Pedronö, Juannö abebö tja̧ja̧kwakwedö.

⁶ Anás, Diostjö jojodötjö ö'weje la'aka pjabato̧bi jobema ji̧jetö. Caifásbi, Juanbi, Alejandrobi, ju'wedö Diostjö jojodötjö ö'weje la'aka pjabato̧tjö tupadanö jojodöbi jobema ji̧jadötö.

⁷ Ja̧danö, jobadöma webijadötö öbibö tjichejebobö Pedronö, Juannö, idöda la'aka luwedö tjöba a'o tjöjamatobö. Tjichejebawö̧ jamatadönö abebö a̧ja̧kwijadötö: —Kwebachö̧kö̧ otiwanö baibaja̧ma ¿Taji kwujuluduwinö kwotidijaduwija? ¿Ti iminö kwotidijaduwija?— abeba̧lijadötö.

⁸ Jejenö atjeba̧lökwe Pedroma, iteda o̧'wo̧ luwo̧ okwanö Dios O̧'wo̧ Luwo̧ öba̧ja̧da̧lonö atadijetö: —Jojodö tjuluwedöbi, israel jojodötjö damöbi,

⁹ ökwödöma akeba̧laduwobe yödawobö kwebachö̧kö̧nö otiwanö pjadatinama. ¿Dakwö kwotidijaduwija kwebachö̧kö̧nöma otiwanö baibobö? jö̧ba̧lö, akeba̧laduwobe.

¹⁰ Jejenö akebaduwitjö̧ yötawa ökwödönöbi, okobe deinö israel jojodönöbi kwöwaisachibaduwobö. Jesucristo, Nazaretnö da̧peachina ujulunöda otiwanö baibinobe jo̧ba kwebachö̧kö̧nöma. Ökwödö bȩbö tjujunobö weköbaduwinökwe ö'wöchajo̧ yemidanö 'yabibajina, jo̧ba ujulunöda baibinobe— atadijetö—.

¹¹ Baikwö laebobe Dios iwenetjö, damötjö Dios yöawi̧ yöbawina iwȩyudina: Inawiyatjö o̧do otidadöma, biwama sulabawa, jö̧ba̧lö, lobijadötö. Jo̧kwaijayonö, öpöjödö lotjinawada otiwawa, la'aka junawawa baibijetö, jö̧ba̧lö laebobe.

¹² Ja̧danö, jojodö tjö̧jibinö pjabato̧ma jo̧bada. Jelo̧ma deobe. Dios böjȩnö ju̧kwadönö tjö̧jibinö pjaatobö weinökwema bakwo̧da, Jesúsda— jejenö yöbawö atadijetö Pedroma.

¹³ Ja̧danö, Pedro, Juan otiwanö yebabökönö yötjawiawö̧ la'aka luwedöma a̧ja̧kwö jö̧ba̧lijadötö, idödada: —¿Tajijö? Bidöma jo̧kwada jojodö, waisachöködö. ¿Dakwö waisinö yötjawajö?—jö̧ba̧lijadötö. Ikenama jobadönö edö omukwatibijadötö, Aaa, Jesúskwö kwebachö ju̧kwiabinadö, jö̧ba̧lö.

¹⁴ Ikenama Pedro yöawaja̧ tjöpöjödijayonö yötja̧loböma jwibijadötö. Kwebachö̧kö̧, Pedrokwö Juankwö jo̧ma, otiwanö baibajökwema tjö'da̧denö ji̧jetö. Otiwanö baibajiawö̧, Jejenö baledinokobe, jö̧ba̧lö, tjo̧'wo̧ sulinö yötja̧loböma jwibijadötö.

¹⁵ Jo̧kwaobetjö̧ Pedronö Juannö a̧petubekwö latjebobö webijadötö, jobadö la'aka luwedöda yötja̧lakwawobö.

¹⁶ Latjebajabe okobe jobadöma yöba̧lakwawijadötö: —¿Dakwö ja̧dakwa̧jö jobadönöma? Okobe deinö Jerusalénnö ju̧kwadöma tjöwaisa jobadö juluwi̧ jawa tji̧sebinama. Jo̧kwaobetjö̧, Ja̧ baledinama baledinokobe, jö̧ba̧lö, yöda̧loböma ökwödöma jwidobe.

¹⁷ Jejenöijayonö jobadönö lȩdebodönö, Jesús jawama yökawaduwoko, jö̧ba̧lö. Ja̧danö, Jesús ujulunö otiwanö baibinobe kwebachö̧kö̧nöma, jö̧ba̧lö, yökawaduwoko, lȩdebodönö, ba̧jekwadö tja̧ja̧kwapji jö̧ba̧lö— yöba̧lakwawijadötö.

¹⁸ Jemi ikenama jwöbijadötö Pedronö Juannö yemidanö tjichejebobö. Tjichejebajawö̧nö lȩbebijadötö la'akatjöda yökawaduwoko, jö̧ba̧lö, Jesús jawama.

¹⁹ Jejenö lȩtjebijayonö Pedro, Juan jö̧ba̧lijadötö: —Dios öba a'otjö, jweinö ja̧dakwa̧ma ¿diya̧da? ¿Dakwö kwomukwataduwa? Ökwödöma, Jesús jawama yökawaduwoko, jö̧ba̧lö, weköbaduwobe, jo̧kwaijayonö Diosma wainö webo̧, yödawobö. Kwomukwataduwena ¿diya̧tjö ja̧dakwa̧da?

²⁰ Ökwödöma döwaisa otiwanö ja̧dakwa̧ma. Jo̧kwaobetjö̧, ökwödö dedina, da̧ja̧kwina jojodönö yöbawökönö kadatiboböma jwidobe—jö̧ba̧lijadötö.

^21-22 Jejenö jö̧tja̧liawö̧, la'aka luwedöma Pedronö, Juannö, Inia tjötjobö wedo, jö̧ba̧lö, omukwatijadötö. Jo̧kwaijayonö jejenö wetjobö jwibijadötö, jojodöma tjöpöjödobetjö̧. Okobe deinö jobe ju̧kwadöma kwebachö̧kö̧nö otiwanö baibanö otidinobetjö̧ Diosnö ösödijadötö. Jo̧bama, ömasapiya otiwanö baibajökwema, cuarenta o̧biya tupakwö juna̧lijetö. Lekwe kwebachökönö ji̧nanö otiwanö baibinobetjö̧ jojodöma Diosnö ösödijadötö. Jo̧kwaobetjö̧ la'aka luwedöma inia tjötjobö webökönö, labebijadötö Pedronö, Juannö. Jobadönö yemidanö, Jojodönö yökawaduwoko, jö̧ba̧lö, lȩbebö labebijadötö.

Pedro Juan tjȩwa̧jaja̧ ikena ju'wedö Jesúsnö ösödadökwö Diosnö atjebina wene

²³ Ja̧danö, latjebajawö̧ma tjömöledö Jesúsnö ösödadö tjuju̧kwobekwö ȩwa̧jijadötö. Jobadönö yöbawijadötö okobe jwiinö Diostjö jojodötjö ö'weje la'aka pjabatadö yötjawaja̧bi, damö yötjawaja̧bi.

²⁴ Yötjawiawö̧ okobe deinö bakwainö omukwatö abebijadötö Diosnö. Baikwö abebijadötö: —Duluwo̧ Dios, ökwöda otidinaja mölejȩbi, mölejȩnö köba̧ladönöbi, ojwe nöödöbi, ojwe okwa ju̧kwadönöbi, böjȩbi böjȩnö ju̧kwadönöbi.

²⁵ Ja̧danö, ökwö yökawinada yöbawijetö ökwödö da'dö Davidminema, ökwö weköbi̧ ja̧binama. Jo̧bama iteda o̧'wo̧ luwo̧ okwanö ökwö Kwo̧'wo̧ Luwo̧ öba̧ja̧da̧lonö yöbawö wȩyudijetö, baikwö: ¿Tajawedö israel jojodöböködöma jwiinö tjölabinajö Diosnöma? ¿Tajawedö israel jojodöma Diosnö tjujuluwotö jö̧ba̧lö tjomukwata̧linajö, waekwi̧ jawama?

²⁶ Böjȩ la'aka luwedöma Duluwo̧nöbi, Duluwo̧ yöbawö ujuninökwenöbi tjujuluwotö jö̧ba̧lö ko̧ko̧kwa̧lö omukwata̧lijadötö, jö̧ba̧lö laebobe, Davidmine iwȩyudinama— jejenö abebijadötö Jesúsnö ösödadöma Diosnöma.

²⁷ Ina abebijadötö: —Dios, döwaisa ja̧ yökawinama tjo̧wi̧ baledinobe. La'aka luwedöma, Herodes mikwo̧, Pilato mikwo̧ benada tjoko̧ko̧kwinobe israel jojodökwöbi, israel jojodöböködökwöbi. Jobadöma Jesúsnö kwabö loawa wetjobö ko̧ko̧kwa̧lö tjomukwata̧linobe. Ökwö weköbina ja̧bo̧nö, suli̧ jwibo̧nö, ökwö yöbawö kwujuninökwe Jesúsnö kwabö loawa wetjobö ko̧ko̧kwa̧lö tjomukwata̧linobe jobadöma.

²⁸ Ja̧danö, jobadöma ökwöda ajayinö kwujulunö badedö kwujuninada baledobö ja̧tjinobe— abebijadötö Diosnö.

²⁹ Ina abebijadötö: —Duluwo̧ Dios, babema, jobadöma ökwödönö, Usula kwemawaduwobö wedakobe, jö̧ba̧lö, yötja̧li̧ma a̧ja̧kwi. Ökwödönö, kwömöayedönöma pjabati, tabada̧lökönö yödawobö ökwö yökawinama.

³⁰ Ö'wöchadö otiwanö batjibinö dotidonö kwujulu i̧sebö pjabati. Ja̧danö, ökwödönö pjabati, Jesús ujulunö jojodö edajitjökö jawa di̧sebonö. Ja̧danö, pjabati jojodönö di̧sebobö, Ökwödöma Jesús ujulunö i̧sebadösa, jö̧ba̧lö. Ökwö suli̧ jwibo̧ weköbinökwe, ökwö weköbina ja̧bo̧ Jesús ujulunö di̧sebonö pjabati ökwödönöma— abebijadötö Diosnö.

³¹ Ja̧danö, abebö katjatena jobadö tjoko̧ko̧kwejunöma tjö̧ebijetö. Ikenama bakwo̧nökwena, iteda o̧'wo̧ luwo̧ okwanö Dios O̧'wo̧ Luwo̧ öba̧ja̧da̧lonö tabada̧lökönö yöbawijadötö Dios yöawi̧ma.

Jesúsnö ösödadöma tju̧kwa teakwena ö'wiawökönö tjuju̧kwina wene

³² Okobe deinö Jesúsnö ösödadöma tjomajadenö tjo̧'wo̧ luwo̧nö otiwanö bakwainö omukwatijadötö. Tju̧kwa teatjöbi ö'wiawökönö ju̧kwiabijadötö, okobe jwiinö dujuna̧li̧kwenama, Okobe deinö bakwainö du̧kwa tea, jö̧ba̧lö.

³³ Ja̧danö, Duluwo̧ Jesús yöawina yötjawobö webawedöma jwiinö juluwi̧ i̧sebö yöbawiabijadötö, Jesús yemidanö 'yaibajina wenema. Ja̧danö, Diosma otiwanö ösödö pjabatijetö okobe deinö Jesúsnö ösödadönöma.

^34-35 O̧do niji juna̧ladöma mikwanö jö̧ba̧lö iyijadötö ju'wedönö. Ja̧ midö tjemaja̧ baladama Jesús webawedönö pjabatö iyijadötö, usulasedönö jobadöda tjiyobö. Jo̧kwaobetjö̧ Jesúsnö ösödadötjö bakwo̧bi deijetö u̧kwa tea jwibo̧ma.

³⁶ Jejenö pjabatijetö bakwo̧, levita jojo, José mikwo̧, Chipre ö'wejesa'onö jo̧ma. Jesús webawedöma jo̧banö öbabijadötö Bernabé. Bernabé jö̧ba̧löma, Ömöledönö tjo̧'wo̧ ösöwanö tjomukwatobö pjabato̧, jö̧ba̧lö.

³⁷ Jo̧bama iyijetö u̧kwa nijima. Ja̧danö, iyaja̧ mikwa baladama iyijetö Jesús webawedönö, jwibadönö tjiyobö.