Hebreos 9 - Dios Iwene

Dios ajayinö yöbawö ujuninatjö wei̧ yöawina wene

¹ Chömöledö tupakwö yötawaduwakwö, Dios jojodönö ajayinö yöbawö ujunina wei̧ma, jo̧banö ösödö ja̧tji̧bi, jo̧banö tjösödeju jawabi. Ja̧danö, Dios ajayinö yöbawö ujuninatjö iteda wei̧ laebobe, baikwö: Diosma weinobe iteda böjȩtjö eju tjotidobö, jo̧banö tjösödejuma. Jejuma kwebatiatjineju jojodö deobe ja̧nö kwetjachenama. Ja̧danö, Diosma iteda wei̧danö tjotidobö weinobe.

² Ja̧danö jejuma, okwi'iju junabinö, isa̧di̧ju debatö tjotidineju. Ja̧danö, dȩko̧lataja ji̧nö tjöekwineju. Ajayisȩko̧, Inesösȩko̧, jö̧ba̧lö, ötjabinȩko̧. Jȩko̧nö la̧pa̧la̧yu̧ junawa ji̧nobe. Ja̧danö, mesasötebi ji̧nobe, pan ö̧pji̧ya tjöwanöte, Diosnö tjiyi̧ pan. Jȩko̧, inesösȩko̧nöma okobe deinö teachakwawökȩko̧. Sule Diostjö jojodötjö ö'weje pjabatadöda tebachiatjinobe.

³ Ja̧danö, okwasȩko̧bi ji̧nobe. Jȩko̧ teachakwawemi tjöekwado̧ tjötjebinado̧ma 'diinö tjöekwinobe. Jȩko̧ okwasȩko̧ma, Jwiinö inesösȩko̧, jö̧ba̧lö, ötjabinȩko̧. Jȩko̧ma Dios ö̧jinȩko̧. Jȩko̧, jwiinö inesösȩko̧ ö̧tjabinȩko̧ma okobe deinö tetjachobö weinokobe. Sule bakwo̧da, Diosnö la'aka iyo̧da, bakwöta o̧bakwenada tebachiainobe okwasȩko̧nö.

⁴ Ja̧danö isapjo ji̧nobe, Diosnö iyawemima. Japjo wamenö söinö nöekwi̧ jawa juwiatjinobe, okwasȩko̧tjö Diosnö iyö. Japjoma, towi ötebiatjö tjotidinapjo. Ja̧danö, japjoma orosapitjö pötjebinapjo okwakwöchobenöbi, wamekwöchobenöbi. Ja̧danö okwasȩko̧, jwiinö inesösȩko̧nö jelepjo ji̧nobe. Japjobi orosapitjö pötjebinapjo, okwakwöchobenöbi, o̧pekwöchobenöbi. Japjoma Dios jojodönö ajayinö yöbawö ujunina wanekwachinapjo. Japjo okwa orotjö otikwa'do̧ a̧jinobe, Dios Israel jojodönö iyina kwakwawa maná mikwi̧ a̧ja'do̧ma. Ja̧danö, Aarón kwebachö otokwawina'obi, pokwa'o a̧jinobe ja̧pjo okwa. Ja̧danö inabiyabi, Dios jojodönö ajayinö yöbawö junö iwȩyudina öbiyama japjo okwa a̧jinobe.

⁵ Japjo muchekwapi wamenö du̧ju̧taja otikwedö ángelesdödanö ichejekwadö tjö̧wajinobe, tjo̧wa̧ja̧pi̧ya juna̧ladö. Jobadöma Dios jwiinö dejatinö ö̧jemi 'da̧denö wa̧nö tjö̧wa̧ja̧pi̧ya jelo̧ o̧wo̧ja̧pa̧kwö badekwakwanö ja̧pjo muchekwapikwö eda̧lö tjö̧wajinobe. Japjo isapjo muchekwapi wamenöma pakaya itji̧ kwabö tjiyökwe ökwösobubi, chiwo kwabö tjiyökwe ökwösobubi lilinemi. Japjo muchekwapi wamema Dios jojodönö lȩlö̧jino edi̧ wanekwachinemi. Dios jojodönö lȩlö̧jino edi̧ wanekwachobetjö̧, japjo muchekwapi wamenöda tjökwösobuma liliinobe Diostjö jojodötjö ö'weje la'aka pjabato̧ma. Chömöledö, ja̧ jawa nöinö ji̧jayonö, babema ja'yubeda yötawa, okobe jwiinömaökö.

⁶ Jejenö Diosma weinobe böjȩtjö ejubi, eju okwa jawabi tjotidobö. Ja̧danö, okobe jwiinö okwa jawa otidö katjataja̧ ikena, Diostjö jojodötjö ö'weje pjabatadöma jamatö tjotidinobe. Ba̧kwȩlö̧jatebö ajayi sȩko̧nö tebachiatjinobe, Diosnö ösödö, Dios eju tjotidi̧ otidö, Dios wei̧danö. Ja̧danö okobe deinö jojodö, jo̧kwadabedöma tebachiatjinokobe Dios eju okwama. Diostjö jojodötjö ö'weje pjabatadöda tebachiatjinobe.

⁷ Jo̧kwaijayonö Diostjö jojodötjö ö'weje pjabatadö okobe deinöma tebachiatjinokobe okwasȩko̧nö, jwiinö inesösȩko̧nöma. Ö'weje pjabatadötjö sule bakwo̧da, Diostjö jojodötjö ö'weje la'aka pjabato̧da, bakwöta o̧bakwenada tebachiainobe okwasȩko̧nöma. Ja̧danö, Dios wei̧ma jo̧banö weinobe okwasȩko̧nö tebachö Diosnö tjökwösobu iyobö. Jo̧bama jejenö jojodö sulabenö ja̧tji̧ midö iyinobe, sulabenö ja̧tji̧ wajwitjobetjö̧ jelobekwö 'ya̧dö ja̧tji̧ma. Jo̧kwaijayonö jojodö tjusuli̧ midö iyawa iyakwa̧ abönö jo̧ba, Diostjö jojodötjö ö'weje la'aka pjabato̧ma iteda usuli̧ midö Dios söbebö loobö tjökwösobu iyinobe. Jejenö iteda usuli̧ midö iyinobe Dios öba a'o suli̧ jwibo̧danö ö̧jobö. Ikenama jojodö tjusuli̧ midö tjökwösobu iyinobe. Jejenö bakwöta o̧bakwenada, Diostjö jojodötjö ö'weje la'aka pjabato̧da Dios eju okwasȩko̧, jwiinö inesösȩko̧nö tebachiainobe Diosnö iyö. Ju'wedötjö bakwo̧bi deobe jȩko̧, okwasȩko̧, Dios ö̧jȩko̧nö tebachinama.

⁸ Chömöledö, jejenö Diostjö jojodötjö ö'weje la'aka pjabato̧ma tebachiainobe okwasȩko̧nö. Jo̧bada, bakwöta o̧bakwenada, pakaya itji̧, chiwo tjökwösöbu iyö tebachiainobe tjöekwemi tupakwösȩko̧nö. Jejenö Diosma weinobe jo̧banö böjȩtjö eju okwasȩko̧nö teachobö. Ja̧danö, jejenö ji̧nama Dios O̧'wo̧ Luwo̧ma ökwödönö i̧sebobe, Diostjö jojodötjö ö'weje pjabatadöma Dios böjȩtjö eju kweatakweju okwatjö juwö iyö ina tjotidayi bakwo̧da, ö'weje la'aka pjabato̧da tebachiainobe Dios ö̧jobekwö. Diostjö jojodötjö ö'weje pjabatadöma Dios ajayinö yöbawö junö wei̧ a̧ja̧kwö tjotidayi jojodö jo̧kwadabedöma Dios ö̧jobekwö tjetjachoböma ina tjöekwatinobe.

⁹ Ja̧danö, Dios ajayinö yöbawö ujunina jawama, Dios böjȩtjö eju ji̧nejubi, okobe jwiinö jeju okwa ö'weje pjabatadö tjotidinabi ökwödönö wanedö yöawobe chömöledö. Ja̧ wanedi̧ jawama ökwödönö öba̧ja̧dobe babe dö̧ji̧. Isabenö ökwödönö öba̧ja̧dobe, Diostjö jojodötjö ö'weje pjabatadö tjiyinama mikwawokobe jojodö Dioskwö, wene jwiinö tjichibobö, jö̧ba̧lö. Ja̧danö, ö'weje pjabatadö tjiyi̧, jojodö tjiyökwe, ökwösöbu lilibö, ja̧danö ju'wi Diosnö ösödö tjiyi̧bi pjaatinokobe jojodönö, tjo̧'wo̧ luwo̧ okwanö. Diostjö jojodötjö ö'weje la'aka pjabato̧ma bakwöta o̧bakwena tebachiainobe Dios eju, okwasȩko̧nö Diosnö iyö. Jo̧kwaijayonö jo̧ba iyi̧ma la'akatjöda pjaatinokobe jojodö tjöwaisobö, Tjo̧wi̧ Dioskwö ichibadösa wene jwiinö, jö̧ba̧lö. Jojodöma ina tjo̧'wo̧ tjo̧bekwöda tjö̧jinobe, Ina wene juna̧ladösa. Dioskwö ichiböködösa, jö̧ba̧lö.

¹⁰ Chömöledö, Dios ajayinö weinama wame jawada tjotidobö jo̧betjö̧ pjaatinokobe Dioskwö tjichibobö. Wame jawada, kwanö, owö, dichawö pjaatokobe otiwanö tjichibobö Dioskwö. Ja̧ wame jawama jojodö tjo̧'wo̧ luwo̧ okwanö balewachökö jawa, otiwadö, Dioskwö ichibadö batjibinö. Jo̧kwaijayonö chömöledö yötawaduwakwö. Ja̧ ajayinö weinama lekwe otidö tjö̧jobö jwiinöbe. Diosma ajayinö ja̧ wame jawama weinajayonö sule 'yayi̧ balekwa yöbawö ujunina badekwachenanöda weinobe. Ja̧danö, ja̧ 'yayi̧ balekwa yöbawö ujuni̧ma yelösöda ajayinö yöbawö ujuninatjö o̧penönö mikwawi̧. Jo̧kwaobetjö̧ chömöledö, Dios O̧'wo̧ Luwo̧ma ökwödönö i̧sebobe baikwö: Dios ajayinö yöbawö junö weinama pjaatokobe Dioskwö suli̧ jwibadö, ja̧danö wene jwibadö dichibobö.

—Cristo ökwödö dusuli̧ dumusidi̧ imidawinobe, ba̧kwȩlö̧jatebö dö̧jibinö pjabatö— jö̧ba̧lö, yöawina wene

^11-12 Ja̧danö chömöledö, Cristo ichenama, Diostjö jojodötjö ö'weje la'aka pjabato̧ baibanö jo̧ma, Dios ajayinö yöbawö junö weinama otidinokobe, böjȩnö ju̧kwadötjö ö'weje pjabatadö tjotidi̧danö. Cristo iyinama wainö ji̧na. Cristo, Diostjö jojodötjö ö'weje la'aka pjabato̧ baibanö jo̧ma itedada iyawö imidawinobe. Jejenö itedada iyawö midawö ökwödönö pjaatinobe, okobe jwiinö Dios otiwi̧ iyi̧tjö dujuna̧lobö. Cristoma woinobe dusula dumusidi̧ midawö, iteda ökwösobu ebawinö. Jemi ikenama mölejȩbekwö kabekwachajo̧ Dios eju okwa teachinobe, jojodö otikwökejunö, Dios mölejȩbe ejunöda. Chömöledö jejuma jwiinö mikwaweju, jojodö jo̧ba eju tjotidinejutjö o̧penönö mikwaweju. Ja̧danö, Cristoma Dios mölejȩbetjö ejunö tebachö, jwiinö inesösȩko̧, Dios ö̧jȩko̧kwö teachinobe. Ja̧danö, Cristoma bakwöta o̧bakwena, jelebabi jeleba böjȩnö Diostjö jojodötjö ö'weje la'aka pjabato̧ teachi̧danö teachinokobe. Cristoma bakwötanöda tebachö ba̧kwȩlö̧jatebö jojodö tjusula tjumusidi̧ imidawinobe. Ja̧danö, böjȩtjö Diostjö jojodötjö ö'weje la'aka pjabato̧ iyinadanö iyö teachinokobe Cristoma, pakaya itji̧, chiwo tjökwösobu iyö jojodö Diosnö tjumusidi̧ tjimidinadanö. Cristoma okwasȩko̧, jwiinö inesösȩko̧nö teachinobe, iteda ökwösobuda iyö, dö̧jibinö ba̧kwȩlö̧jatebö pjaatinobuma. Chömöledö, Cristo itedada iyawö, dusula dumusidi̧ imidawinawö̧ ökwödö Dios ömöledö babibinadöma isabenö Dios otiwi̧ iyi̧tjö demakwedösa.

^13-14 Chömöledö, damötjö Diostjö jojodötjö ö'weje pjabatadö tjotidina döwaisa. Jobadöma, pakaya, chiwo tjökwösobu lilibiatjinobe jojodö wamenö dichawedö batjibanö. Jo̧kwaijayonö Cristo ökwösöbuma do̧'wo̧ luwo̧ okwanö dichobu, dö̧jibinö ba̧kwȩlö̧jatebö pjaatobuma. Ja̧danö Dios ajayinö yöbawö ujunina, Dios wei̧ Moisés iwȩyudinama baikwö weinobe: Bakwo̧ Dios öba a'otjö sulabo̧ma Diosnö ösödobö jö̧a̧litjö̧ma, la'aka pjabato̧ma pakaya, chiwo tjökwösobu liliena, jo̧ba sulabo̧nö. Ja̧danö pa̧ka̧yö̧ iwe'ijuso̧pja̧tjöbi liliobö weinobe, jo̧ba sulabo̧nö. Jejenö ja̧nö sulabo̧ma Diosnö ösödobö ichibinobe, wamenö sulabo̧ma Diosnö ösödobö ichibinobe, wamenö usuli̧tjö dichawo̧danö baibobetjö̧. Ja̧danö pakaya, chiwo tjökwösobutjö lilii̧ma wamenöda dichawedö batjiboböma pjaatinobe. Jo̧kwaijayonö chömöledö, Cristo ökwösöbuma isabenö pakaya, chiwo tjökwösobutjö o̧penönö mikwawobu. Cristo ökwösobuda isabenö okwanö dichobu, do̧'wo̧ luwo̧ okwanöbi domukwati̧bi balewachinö. Jo̧ba ökwösobutjöda ökwödöma okwanö balewachadösa. Cristoma, Dios O̧'wo̧ Luwo̧, ba̧kwȩlö̧jatebö jo̧ ujulunö itedada iyawö dusula dumusidi̧ imidawinobe Diosnö. Ja̧danö chömöledö Cristo, jwiinö otiwo̧, suli̧ jwibo̧ma, iteda ökwösobu ebawinö iyawinobe Diosnö. Jejenö itedada iyawinobe ökwödö jo̧banö ösödadöma okwanö balewachadöda badibobö. Jejenö wame jawa, mikwawökö jawada ja̧bö ju̧kwöködösa. Ökwödöma domajade okwanö domukwati̧ dichawedöda duju̧kwobe, 'yaba̧lo̧ Diosnö ösödö, jo̧bakwö otiwanö 'ya̧nö, jo̧ba wei̧da a̧ja̧kwö.

¹⁵ Chömöledö Cristoma iteda ökwösöbu iyawö imidawinobe ökwödöma okwa dichawedö badibobö. Jo̧kwaobetjö̧ jo̧bama Diostjö jojodötjö ö'weje ja̧nö itedada iyawinobe, Dios 'yayi̧ balekwa yöbawö ujuni̧ma jamatö 'yo̧bö. Isabenö chömöledö, jojodöma Dios ajayinö yöbawö ujuni̧tjö weina okobe jwiinö tja̧ja̧kwoböma jwiobe. Jo̧kwaobetjö̧ jobadöma Dios lȩebakwawö̧da ja̧dö. Jo̧kwaijayonö Cristo woena Dios lȩebi̧tjö tjö̧jibinö pjaatinobe, Dios ajayinö yöbawö junö wei̧ söbebö loinobetjö̧. Isabenö, Cristoma woinobe jojodö tjusula tjumusidi̧ midawö. Jejenö midawö woinobetjö̧ okobe deinö Dios yöa̧lawö̧, Ötjö chömöledö, jö̧ba̧lö, Dios otiwi̧ iyakwa̧ tjemakwedö. Isabenö, jobadöma Dios iyakwa̧ tjemakobe, Dios damötjö, Chiyocha, jö̧ba̧lö, jö̧a̧linadanö.

^16-17 Ja̧danö Cristoma ¿tajawedö woinada, Dios 'yayi̧ balekwa yöbawö ujuni̧ma jamatö 'yo̧bö? Wanedö yötawaduwakwö chömöledö: Böjȩnö jojo bakwo̧ ösöja iwȩyudobe, ju'winö ö'wö baibaja̧ ikena u̧kwa itea emakwo̧ iminö wȩyudö, Biteda emakwo̧, jö̧ba̧lö. Ja̧danö, webö juno̧ma ina 'yaayi itea emakwo̧ma emokobe. Webö junö iwȩyudi̧ma mikwawokobe webö juno̧ ina 'yaa̧lobetjö̧. Jo̧bama ö'wö baibaja̧ ikenada webö ujunina jamatö 'yo̧be.

¹⁸ Ja̧danö chömöledö, jo̧ba itea webo̧ woobö jo̧be, jo̧ba wei̧ma jamatö 'yo̧bö. Jejenö Dios ajayinö yöbawö ujuninabi. Ja̧ yöbawö ujuninama weobe tjiyajökwe ökwösobu ebawinö woobö. Jejenö ökwösobu ebawinö woböda woinobe, Dios ajayinö yöbawö ujuni̧ma jamatö 'yo̧bö.

¹⁹ Jejenö döwaisa, Dios iwenetjö laebobetjö̧, Moisés yöawina wene. Damötjö Moisésma okobe deinö jojodönö ko̧ko̧dö yöawinobe okobe jwiinö Dios wei̧, yöbawö junö wei̧ma. Yöawaja̧ ikena pakaya, chiwo tjökwösobu ojwiyokwö pjabatö iwiwodinobe. Ja̧danö obeja öwö'ye, duwi̧ duwebaja'yema, ösötje hisopo mikwötje öjasötje ja'yuwötjenö jwainobe. Ikena jötjema tjökwösobu ojwiyokwö pjaatajobunö ubu̧datinobe. Jemi ikenama, jobu tjökwösobu liliinobe jojodönöbi öjiya Dios wei̧ iwȩyudina öjiyanöbi.

²⁰ Moisésma lilibö yöawinobe, Bobu tjökwösobuma wanekwachobe Dios ökwödönö yöbawö ujuninama, iteda wei̧ ökwödö a̧ja̧kwö dö̧jobö, jö̧ba̧lö.

²¹ Ja̧danö Dios ejunöbi, okobe jwiinö Dios eju okwa jawanöbi tjökwösobutjö liliobö weinobe.

²² Jejenö Diosma weinobe, Okobe jwiinö, ja'yubeda u'yukwinö, tjökwösobuda liliobö, suli̧ dichö loinö. Chömöledö ja̧ baledinama ökwödönö i̧sebobe, Sule bakwo̧ ökwösobu ebawinö woi̧tjöda tjusuli̧ söbebö loobe, jö̧ba̧lö. Chömöledö jejenö, itea webo̧ma jo̧ba woobö ji̧danö wei̧ jamatö 'yo̧bö, Dios ajayinö yöbawö ujuni̧tjö wei̧bi, ökwösobu ebawinö woi̧tjöda jamatö 'yi̧nobe.

—Cristo bakwötanöda ökwösobu ebawinö woinobe jojodö tjusuli̧ söbebö loawö̧ batjibobö— jö̧ba̧lö, yöawina wene

²³ Jo̧kwaobetjö̧ chömöledö, Dios böjȩtjö ejubi, eju okwa jawabi suli̧tjö dichawobö weinobe, jojodö tjiyajökwe ökwösobu lilii̧ma. Jejenö da'dödöminema Diosnö ösödö tjö̧jinobe, jo̧ba wei̧ a̧ja̧kwö. Jo̧kwaijayonö okobe jwiinö damötjö da'dödömine Diosnö tjösödina jawama, Dios ejubi, eju okwa jawabi wanedöda wanekwachobe Dios mölejȩbe inesö ö̧jemima. Okobe jwiinö Dios inesö mölejȩbe ö̧jemidanö tjotidinajayonö böjȩda jawa. Ja̧danö, Dios mölejȩbe inesö ö̧jemima böjȩ eju, jojodö tjotidinejutjö jwiinö o̧penönö otiwobe. Ja̧danö, jwiinö o̧penönö otiwobetjö̧, Dios mölejȩbenö inesö eju Cristo tebatö iyi̧bi, böjȩnö Diostjö jojodötjö ö'weje pjabatadö tjiyinatjö o̧penönö mikwawobö jo̧be.

²⁴ Chömöledö, Cristoma böjȩtjö jojodö tjotidinejutjö jwiinö inesösȩko̧nö teachinokobe. Jo̧bama teachinokobe wanekwachejunö, Dios mölejȩbe inesö ejunö wanekwachejunöma. Cristoma, Dios mölejȩbe inesö ejunöda teachinobe, ökwödönö pjaatobö. Ja̧danö, Dios mölejȩbe inesö eju tebachinama, Dios öba a'o ja̧nö Diosnö aebobe ökwödönöma.

²⁵ Isabenö chömöledö, Cristoma Dios mölejȩbe eju okwa teachinobe, jwiinö mikwawi̧ iyawa iyö, iteda ökwösobuda. Ja̧danö, bakwötanöda teachinobe ökwösobunö midö. Jo̧kwaijayonö jejenömaökö böjȩtjö Diostjö jojodötjö ö'weje la'aka pjabato̧ iyinama. Böjȩtjö ö'weje la'aka pjabato̧ma bakwöta o̧bakwena ökwösobu e'ewö tebacho̧ okwasȩko̧nö, jwiinö inesösȩko̧, tjöekwemi o̧pesȩko̧nö. Ja̧danö, ökwösobu e'ewianobuma, iteda ökwösobumaökö, pakaya, chiwo tjökwösobu. Yemidanöbi yemidanö bakwöta o̧bakwena böjȩtjö Diosnö la'aka iyo̧ma tebachiainobe pakaya, chiwo tjökwösobu iyö. Jo̧kwaijayonö jejenömaökö Cristo iyinama. Yemidanöbi yemidanö ökwösobu ebawinokobe. Bakwötanöda midawö woinobe ökwösobu ebawinö, böjȩtjö Diostjö jojodötjö ö'weje la'aka pjabato̧ iyawö̧ wotji̧danömaökö, bakwöta o̧bakwena.

²⁶ Isabenö chömöledö, Cristoma yemidanöbi, yemidanö ökwösobu o̧ba bakwabakwena ebawö woobö ji̧tjö̧ma, yelösöda, böjȩ otidina möletjö babe baibanö usula emawobö jȩna. Jo̧kwaijayonö yemidanöbi yemidanöbi usula emawökönö Cristoma bakwötanöda böjȩkwö ichinobe, Dios ajayinö yöbawö ujunina 'dö̧ibaji̧ mölema. Ja̧danö, böjȩkwö ichinobe woobö, iteda ökwösobu ebawö, iteda bakwötanöda iyawö dusuli̧ söbebö loobö.

²⁷ Ja̧danö chömöledö, ökwödö jojodöma okobe deinö bakwötanöda wodakwedösa. Jemi ikenama, wobajadöma Dios öba a'o ja̧nö Dios ökwödö dö̧jina yöawi̧ da̧ja̧kwakwedösa, otiwanö ja̧bö dö̧jinabi, sulabenö ja̧bö dö̧jinabi.

²⁸ Ja̧danö, Cristobi bakwötanöda woinobe jojodö tjusula tjumusidi̧ midawö. Ja̧danö, ju'wi möle yemidanö ichenama jojodö dusula dumusidi̧ imidawobö ichökakwo̧. Yemidanö ichenama jo̧ba yemidanö ichakwa̧ te'ada̧ladönö mölejȩbekwö öibobö ichakwo̧. Jejenö okobe jwiinö dö̧jibinö pjaati̧ma tjo̧wi̧ kaatakobe.