Hebreos 8 - Dios Iwene

—Jesús Diostjö jojodötjö ö'weje pjabatadö tjotidena tebachinama mölejȩbetjö iyo̧— jö̧ba̧lö, yöawina wene

¹ Chömöledö, ötjö yötawi̧tjö inesö ji̧ma biya̧: Ida̧ökö dujuna̧lobe ökwödönö pjabato̧nö, Diostjö jojodötjö ö'weje la'aka pjabato̧ baibanö jo̧nöma. Ja̧danö, jo̧bama suli̧ jwibo̧. Ja̧danö, ba̧kwȩlö̧jatebö ökwödönö pjabato̧. Jo̧bama mölejȩbekwö kabekwajo̧ Jwiinö Otiwo̧ Dios ö̧bemi öwaisobekwöchobe öbamatinobe. Jo̧bama Jesúsda.

² Ja̧danö, jobe ja̧nö, Jesús, Diostjö jojodötjö ö'weje la'aka pjabato̧ baibanö jo̧ma Dios eju okwatjö otidobe, jwiinö otiweju, Diosnö inesö ösödakwawejutjöda. Ja̧danö, jejuma jojodö tjotidinökeju, damötjö Moisés ö̧jinena tjotidinejudanö, Dios böjȩtjö eju kwebatiatjinejuma. Jejuma wanekwachöda wanekwachinobe Dios mölejȩbe eju, Diosnö inesö ösödakwaweju. Jejutjöda, jojodö tjotidinökeju, Duluwo̧ Diosda otidinejutjö otidobe, Diostjö jojodötjö ö'weje la'aka pjabato̧ baibanö jo̧ma.

³ Ja̧danö chömöledö, döwaisa böjȩtjö Diostjö jojodötjö ö'weje la'aka pjabato̧ otidinama. Dios wei̧ Moisés iwȩyudina ö'weje la'aka pjabato̧nö weinobe jojodö tjusuli̧ midö ajikwakwawedönö kwabö iyobö, kwaajökwe ökwösobu liliobö. Jejenö lilibö iyobe ö'weje la'aka pjabato̧ma Diosnö, Dios jojodö sulabenö ja̧tji̧ söbebö loobö. Ja̧danö, ju'wi jojodö Diosnö ösödö tjiyi̧bi iyobö weinobe ö'weje la'aka pjabato̧nöma. Jejenö böjȩnö ja̧nö iyö otidiainobe ö'weje la'aka pjabato̧ma. Jo̧kwaobetjö̧ mölejȩbe Diostjö jojodötjö la'aka pjabato̧ baibanö jo̧ Jesús, ajayinö ö'weje pjabatadö tjotidena tebachinama jo̧babi iteda Diosnö iyi̧ ujuna̧lobö jo̧be.

⁴ Jo̧kwaijayonö chömöledö, Jesús, mölejȩbe Diostjö jojodötjö ö'weje la'aka pjabato̧ baibanö jo̧ma böjȩnö ja̧nö Diosnö iyö otidö̧kö̧. Jo̧bama mölejȩbeda ja̧nö otido̧. Böjȩnö ina ö̧jitjö̧ma ö'weje pjabato̧ iyi̧danö otidökena, Dios wei̧ Moisés iwȩyudina jejenö otidobö weokobetjö̧. Ja̧danö, ida̧ökö böjȩnö ju̧kwadötjö Diostjö jojodötjö ö'weje pjabatadö tjiyobö 'da̧batö tjujuninawö̧ tjuju̧kwobetjö̧, Jesúsma otidökena ö'weje pjabato̧danö böjȩnö ja̧nö. Jo̧kwaijayonö jo̧bama Diostjö jojodötjö ö'weje pjabatadö tjotidena tebachö mölejȩbetjö Diosnö iyö otido̧ Dios inesö eju okwatjöda.

⁵ Ja̧danö jeju, Dios mölejȩbe ejuma Dios inesö eju. Böjȩtjö jo̧ba eju tjotidinejudanö jö̧keju. Jeju, böjȩtjö tjotidinejuma wanedöda wanekwachinobe Dios inesö eju, mölejȩbe ejuma. Böjȩtjö Dios ejuma Dios inesö ejuinökeju. Ja̧danö, jeju böjȩtjö ejutjöda ajayinö Diostjö jojodötjö ö'weje pjabatadö, Dios wei̧ Moisés iwȩyudi̧ weawö̧ma iyö otidiatjinobe. Ja̧danö chömöledö döwaisa, Diosma Moisésnö weena, iteda böjȩtjö eju, kweatakwaweju tjotidobö weenama iteda wei̧danö tjotidobö weinobe, jö̧ba̧lö. Baikwö laebobe Dios iwenetjö, Dios Moisésnö weina, iteda böjȩtjö eju tjotidobö weinama: Moisés, ötjö cheju okobe jwiinö tjotidi̧ma ökwönö i̧sebö yötawinadanöda tjotido webi, mö'ösa'onö kwö̧jena i̧sebö yötawina. Jejenö laebobe Dios iwenetjö. Ja̧danö, jeju tjotidinejutjö, Dios böjȩtjö ejutjöda otidiatjinobe Diostjö jojodötjö ö'weje pjabatadöma, Levítjö tupadanö ju̧kwadöma, jojodönö te'ada̧lö. Ja̧danö, jobadö böjȩtjö Diostjö jojodötjö ö'weje pjabatadöma Dios wei̧ Moisés iwȩyudina wei̧ iyö otidiatjinobe.

⁶ Jo̧kwaijayonö Diosnö mölejȩbe la'aka iyo̧ Jesús otidi̧ma böjȩtjö Diostjö jojodötjö ö'weje pjabatadö tjotidinatjö jwiinö o̧penönö mikwawobe. Chömöledö döwaisa, Dios ajayinö da'dödöminenö yöbawö ujuninatjö wei̧ma, Ötjökwö bakwainö omukwatö, weti̧ a̧ja̧kwöda kwuju̧kwaduwo, jö̧ba̧lö, weinobe. Ja̧danö, Diostjö jojodötjö ö'weje pjabatadöma babebi Dios ajayinö yöbawö ujuninatjö wei̧danö otidö tjiyobe, Dios wei̧ Moisés iwȩyudinadanö. Jo̧kwaijayonö Jesús, jojodötjö Diostjö ö'weje pjabato̧ma Dios 'yayi̧ balekwa yöbawö ujunina otidobe. Ja̧danö chömöledö, Dios 'yayi̧ balekwa yöbawö junö jö̧a̧li̧ma ajayinö yöbawö junö jö̧a̧linatjö o̧penönö mikwawi̧, jojodönö pjabatö. Ja̧danö, ja̧ 'yayi̧ balekwa yöbawö ujuni̧ma Dios ajayinö yöbawö ujuninatjö o̧penönö mikwawobetjö̧, jojodönö pjabatö, Jesús otidi̧bi ajayinö Diostjö jojodötjö ö'weje pjabatadö tjotidinatjö o̧penönö mikwawobe.

⁷ Chömöledö, Dios ajayinö yöbawö ujuninama ¿tajawedö mikwawinokobeda? Yötawaduwakwö. Dios ajayinö yöbawö ujuninama ja'öda ichibobe chömöledö, jojodönö pjaatökönö. Mikwawinokobe Dioskwö dichibobö okobe jwiinö suli̧ jwibadödanö. Isabenö chömöledö, Dioskwö okobe jwiinö suli̧ jwibadödanö dichibobö pjaatitjö̧ma Diosma söbebö lotokoinena, 'yayi̧ balekwa yöbawö junö ¿jö̧tö? Chömöledö, ajayinö yöbawö ujuninama ja'öda ichibobetjö̧ Diosma 'yayi̧ balekwa yöbawö ujuninobe.

⁸ Ja̧danö chömöledö, jojodöma Dios ajayinö yöbawö ujuninatjö wei̧ tja̧ja̧kwoböma waekwinobe. Jau chömöledö. Dios ajayinö yöbawö ujuninatjö wei̧, Ötjökwö bakwainö omukwatö weti̧ a̧ja̧kwöda kwuju̧kwaduwo, jö̧ba̧lö, jojodö okobe jwiinö tja̧ja̧kwobö yelösöda waekwinobe. Jo̧kwaobetjö̧ jobadöma Dioskwö suli̧ jwibadödanö tjichibinokobe. Jo̧kwaiökwe Diosma 'yayi̧ balekwa yöbawö ujunobö omukwatinobe. Baikwö laebobe Dios iwenetjö, Dios damötjö yöawina: A̧ja̧kwaduwitjö. Ju'wi möle Israelnö ju̧kwadötjö tupadanö jojodönöbi, Judánö ju̧kwadötjö tupadanö jojodönöbi 'yayi̧ balekwa yöbawö chujuni̧ma chujunakwo̧sa.

⁹ Ja̧danö, ja̧ 'yayi̧ balekwa yöbawö chujunakwa̧ma wainö ja̧kobe, ajayinö yöbawö chujunina, tja'dödömine Egiptotjö labebinadönö yöbawö chujuninadanömaökö. Jobadöma ötjöda pjatatinawö̧, tjömamunö do̧batö tjötöbö Egiptotjö latjebobö öbibö. Ja̧danö, Egiptotjö latjebobö pjatatinajayonö ötjö weti̧ a̧ja̧kwökönö tjuju̧kwinobe. Isabenö jobadöma ötjö ajayinö yöbawö chujuninatjö weti̧ tja̧ja̧kwinokobe. Ja̧danö, a̧ja̧kwökönö tjuju̧kwitjö̧ katatibijatö jobadönöma, jelobekwö jalachibö 'ya̧nö. Jo̧kwaijayonö jobadötjö tupadanö ju̧kwadönöma 'yayi̧ balekwa yöbawö chujuni̧ma chujunakwo̧sa, wainö ji̧ma. Jejenö laebobe Dios iwenetjö.

¹⁰ Ina laebobe Dios iwenetjö, Dios iteda 'yayi̧ balekwa yöbawö ujunina badekwachakwa̧ möle yöawi̧: Jo̧kwaobetjö̧ ju'wi möle ajayinö yöbawö chujunina söbebö lobö, 'yayi̧ balekwa yöbawö chujunina yötawakwo̧sa Israelnö ju̧kwadötjö tupadanö jojodönö. Ja̧danö, ja̧ 'yayi̧ balekwa yöbawö chujunina chiwenema chömöledö tjomukwati̧ okwanö a̧jakobe. Ja̧danö, jobadö tjomajade okwanöbi chiwȩyudi̧danö wȩyukwachakobe, ötjö 'yayi̧ balekwa yöbawö chujunina chiwenema. Jobadöma ötjönö ötjabikobe, Duluwo̧ Dios, jö̧ba̧lö, ja̧danö, ötjöma jobadönöma ötabikobe, Chö̧möledö, jö̧ba̧lö.

¹¹ Ja̧ balekwa yöbawö chujunina möle ju̧kwadöma, tjömöledönö yötjawobö jwiakobe, Duluwo̧nö kwöwaischibaduwo, jö̧ba̧lö, okobe deinö ida̧ökö ötjönö tjöwaisobetjö̧. Okobe deinö tjemubi, damöbi, juna̧ladöbi, jwibadöbi, okobe deinö tjöwaisakobe ötjönöma.

¹² Ja̧ mölema jojodönö lȩlö̧jino edö, sulabe tjujuna̧li̧ chomukwatobö jwiinö söbebö lotakobetjö̧, okobe deinö tjöwaisakobe ötjönöma. Jejenö laebobe Dios iwenetjö, damötjö iteda 'yayi̧ balekwa yöbawö ujunina badekwachakwa̧ möle yöawinama.

¹³ Chömöledö, Dios, 'Yayi̧ balekwa yöbawö junö chiyakwo̧sa, jö̧ba̧lö, yöa̧linobetjö̧ döwaisachibobö jo̧be, Dios ajayinö yöbawö ujunina, iteda yöawi̧ Moisés iwȩyudinama ida̧ökö mikwawokobe, jö̧ba̧lö. Ja̧danö mikwawokobetjö̧, kamijido̧ damösado̧, kȩ'achajinado̧ lotji̧danö, Dios ajayinö yöbawö ujuninama söbebö loobö jo̧be. Chömöledö, ja̧ ajayinö yöbawö ujuninama lekwema jinökö. Juluwanö 'dö̧ibajina.