Hebreos 7 - Dios Iwene

Melquisedecnö yöawina wene

^1-3 Chömöledö, Melquisedec, bi'yenö yötawökwenö jemi tupakwö yötawaduwakwö. Jo̧bama Salém jojodö tjuluwo̧ bi̧na. Ja̧danö, Melquisedecma böjȩbi mölejȩbi La'aka Dios kabebö ujuninökwe, Diostjö jojodötjö ö'weje pjabato̧ baibanö. Ja̧danö döwaisa, ökwödö diwenenö Melquisedec, jö̧ba̧lö, Jojodö tjuluwo̧, jweinö omukwatö jo̧, jö̧ba̧lö, wanekwachobe. Ja̧danö, jo̧ba Melquisedecma Salém jojodö tjuluwo̧. Jejenö, Salém jojodö tjuluwo̧, jö̧ba̧lö, diwenenö, Jojodönö ösödö webo̧, jö̧ba̧lö, wanekwachobe. Ja̧danö, ju'wibi yötawaduwakwö. Melquisedecma ojo'dobi abe'dobi debina. A'dödöbi debina. Jo̧bama emöbi jemökökwe. Ja̧danö, la'akatjöda wobinö̧kö̧. Isabenö, Melquisedecma Dios Itji̧danö ba̧kwȩlö̧jatebö Diostjö jojodötjö ö'weje pjabato̧. Ja̧danö, Melquisedec da'dömine Abrahamnö damötjö öbadekwajina yötawaduwakwö. Damötjö Melquisedecma Abrahamnö öbadekwajinobe, öpöjojodö la'aka luwedönö 'böbabikwawö lobö ȩwa̧jo̧nö. Ja̧danö Melquisedecma, Abrahamnö badekwajö yöawinobe, Diosma ökwönö otiwanö pjaatakobe, jö̧ba̧lö. Ja̧danö, Abrahamma Melquisedecnö iyinobe öpöjojodötjö emaja̧, domulataja jawa o'wotjö bakwa'wo.

⁴ Ja̧danö chömöledö, omukwataduwi. Da'dömine Abrahamma inesö ji̧na ¿jö̧tö? Jo̧kwaijayonö, Melquisedec Abrahamnö öbadekwajena baledina edö, döwaisobö jo̧be, Jo̧ba Melquisedecbi jwiinö inesö ji̧na, Abrahamnötjö o̧penönö inesö jo̧, jö̧ba̧lö. Ja̧danö ¿dakwö baledinada jejenö domukwati̧ma? Biya̧ chömöledö: Abrahamma Melquisedecnö iyinobe öpöjojodötjö emaja̧, domulataja jawa o'wotjö bakwa'wo. Ja̧ iyinama i̧sebobe, Melquisedecma Abrahamnötjö o̧penönö inesö jo̧, jö̧ba̧lö, Abrahamma Melquisedecnö iyinobetjö̧.

⁵ Jo̧kwaijayonö ¿tajawedö iyinada Abrahamma Melquisedecnöma? Chömöledö döwaisa. Dios weina wene, Moisés iwȩyudina wenetjö baikwö laebobe: Levítjö tupadanö jojodönö, Diostjö jojotjö ö'weje pjabatadönöma Diosnö iyö, jojodönö te'ada̧lö tjotidobetjö̧, tjömöledö jobadönö tjiyoböma weinobe. Jejenö, jojodö, tju̧kwa tea domulataja jawa bakwa'wo iyiatjinobe Diostjö jojodötjö ö'weje pjabatadönöma. Bakwaibedö ömöledö, Abrahamtjö tupadanö jojodötjijayonö, tjömöledö Levítjö tupadanö jojodönö tjiyoböma weinobe.

⁶ Jo̧kwaijayonö chömöledö, Melquisedecma Levítjö tupadanö jojobinö̧kö̧, Levíma ina öbötjachinokobetjö̧. Jo̧kwaobema Abrahamma ¿tajawedö iyinada Melquisedecnöma? Yötawaduwakwö. Melquisedecma Abrahamnötjö o̧penönö inesö ö̧jiökwe Abrahamma Melquisedecnö iyinobe. Chömöledö, ja̧ iyinama ökwödönö i̧sebobe, Melquisedecma Abrahamnötjö o̧penönö inesö ji̧na, jö̧ba̧lö. Ja̧danö ju'wi jawabi baledinobe. Melquisedecma Abrahamnö yöawinobe, Dios ökwönö otiwanö pjaatakobe, jö̧ba̧lö. Chömöledö, Melquisedecma jejenö yöawinobe Abrahamnö, Dios yöbawö junö jö̧a̧linökwenöma.

⁷ Chömöledö, ökwödöma okobe deinö döwaisa, jo̧kwadabo̧ma iteda uluwo̧nö yöawinokobe, Diosma ökwönö otiwanö pjaatakwo̧, jö̧ba̧lö. O̧penönö jo̧da, jejenö yöa̧lobe jo̧banötjö baikwönönö jo̧nö. Bakwo̧bi deobe, jejenömaökö, jö̧ba̧lo̧ma. Jo̧kwaobetjö̧ döwaisa, Melquisedecma Abrahamnötjö o̧penönö inesö jo̧obetjö̧ jejenö yöawinobe, Diosma ökwönö otiwanö pjaatakwo̧, jö̧ba̧lö. Ja̧ yöawinama i̧sebobe ökwödönöma, Melquisedecma Abrahamnötjö o̧penönö jo̧, jö̧ba̧lö.

⁸ Ja̧danö chömöledö, ju'wibi yötawaduwakwö. Melquisedecma isabenö inesö ji̧na, Levítjö tupadanö jojodönötjöbi o̧penönö ji̧na. Jobadö Levítjö tupadanö jojodö, tjömöledö tjiyi̧ eminadöma woba jojodöbinadö. Jo̧kwaijayonö Dios iwenetjö Melquisedecnö yöawobe edö döwaisobe, Melquisedecma la'akatjöda wobinö̧kö̧, jö̧ba̧lö. Jo̧bama Levítjö tupadanö jojodanöbö̧kö̧. Wainö ji̧na. Jo̧ba Melquisedecma jwiinö inesö ji̧na.

⁹ Ja̧danö, ju'wi jawabi yötawaduwakwö chömöledö. Abraham iteda u̧kwa teatjö Melquisedecnö iyenama, Leví mikwo̧, Diostjö jojodötjö ö'weje pjabatadö tja'döma, jo̧babi Melquisedecnö iyobedanö iyinobe.

¹⁰ ¿Dakwö yöta̧la̧jö chömöledö? Labebö lobö yötawaduwakwö. Levíma, ina öbötjachinököjayonö Abraham Melquisedecnö iyenama, Leví iyobedanö iyinobe, Levíma Abrahamtjö tupadanö jojoakobetjö̧. Levíma ida̧ökö Abraham okwanö ö̧jinobe, ju'wi möle öbötjachakwo̧ma. Jo̧kwaobetjö̧ Abraham iyenama Leví iyobedanö iyinobe. Isabenö chömöledö, böjanö Melquisedecnö yötawi̧ma i̧sebobe, Melquisedecma Abrahamnötjöbi, Levítjö tupadanö jojodö, Diostjö jojodötjö ö'weje pjabatadötjöbi o̧penönö inesö ji̧na, jö̧ba̧lö. Isabenö jo̧bama wainö, jwiinö inesö ji̧na.

—Jesús ajayinö Diostjö jojodötjö ö'weje pjabatadö tjotidena teachobö ichinobe— jö̧ba̧lö, yöawina wene

¹¹ Ja̧danö chömöledö, Dios iwenetjö laebobe, Dios iteda Itji̧nö yöawinama, Ökwöma Melquisedec ötjötjö jojodötjö ö'weje la'aka pjabato̧ ö̧jinadanö ö'weje la'aka pjabato̧ baibanö kwö̧jakwo̧ja, jö̧ba̧lö. Ja̧danö, Diosma ¿tajawedö jejenö yöawinada, Itji̧ma Melquisedecdanö ö̧jakobe, ju'wedö ö'weje pjabatadö, Levítjö tupadanö jojodödanöbö̧kö̧? jö̧ba̧lö. Jobadö Levítjö tupadanö jojodönöda Diostjö jojodötjö ö'weje pjabatö tjotidobö wetjinawö̧. Chömöledö döwaisa, Dios wei̧ Moisés iwȩyudinatjö baikwö laebobe: Diosma Levítjö tupadanö jojodönöda 'da̧batö ujuninobe Diostjö jojodötjö ö'weje pjabatö tjotidobö. Ja̧danö, jobadö, Diostjö jojodötjö ö'weje pjabatadöma otidiatjinobe, Dios wei̧ Moisés iwȩyudinatjö wei̧danö, jojodö tjiyi̧ Diosnö iyö. Jejenö otidiatjinobe jojodö Diosnö tjiyi̧ iyö, jojodö Dioskwö tjichibobö suli̧ jwibadödanö. Jo̧kwaobetjö̧ ¿tajawedö jelo̧, wainö Diostjö jojodötjö ö'weje pjabato̧ baibanö jo̧ ichobö ji̧nada? Yötawaduwakwö chömöledö. Jobadö Diostjö jojodötjö ö'weje pjabatadö tjotidi̧, Dios wei̧ Moisés iwȩyudinatjö wei̧danö tjiyi̧ma pjaatinokobe jojodönö, Dioskwö suli̧ okobe jwiinö jwibadödanö tjichiboböma. Jobadö ö'weje pjabatadö tjotidi̧ma okobe jwiinö pjaatitjö̧ma jojodö Dioskwö suli̧ jwibadödanö tjichibobö, Diosma jelo̧ ö'weje pjabato̧ baibanö jo̧nö, iteda Itji̧nö yötawokoinena, Ökwöma ötjötjö jojodötjö ö'weje la'aka pjabato̧ kwö̧jakwo̧ja, jö̧ba̧lö. Ajayinö Diostjö jojodötjö ö'weje pjabatadö tjotidi̧ mikwawitjö̧ma jelo̧ ö'weje pjabato̧ baibanö jo̧ ichobö jwitoinena. Isabenö, jelo̧ wainö jo̧, Levítjö tupadanö jojo Aaróndanöbö̧kö̧ ichoböma jwitoinena ajayinö Diostjö jojodötjö ö'weje pjabatadö tjotidi̧ mikwawitjö̧ma. Isabenö chömöledö, ajayinö Diostjö jojodötjö ö'weje pjabatadö tjotidi̧ pjaatokobetjö̧ jojodö Dioskwö suli̧ jwibadödanö tjichibobö, Diosma jelo̧nö yöawinobe. Isabenö jelo̧nö yöawinobe, Melquisedec, emöbi jemökökwedanö, ja̧danö la'akatjöda wobinö̧kö̧danö wainö jo̧nöma. Jau chömöledö, jelo̧ wainö jo̧nö yöawinobe Diosma, ajayinö Diostjö jojodötjö ö'weje pjabatadö tjotidena teachakwo̧nöma.

^12-14 Chömöledö, jo̧ba Dios yöawinökwe ö'weje la'aka pjabato̧ baibanö jo̧ma Duluwo̧ Jesúsda. Ja̧danö Jesús, Diostjö jojodötjö ö'weje la'aka pjabato̧ baibanö 'da̧batö ujuninökwema da'dömine Judátjö tupadanö jojo. Ja̧danö döwaisa, Dios wei̧ Moisés iwȩyudinatjö bakwo̧bi deobe Judátjö tupadanö jojo Diostjö jojodötjö ö'weje pjabatö otidobö weinökwema. Yayonö Jesúsma ajayinö ö'weje pjabatadö tjotidena teachinobe, jobadönö balewö lobö, jobadö tjotidi̧ okobe jwiinö pjaatokobetjö̧. Jo̧kwaobetjö̧ chömöledö, Jesús, wainö jo̧ Dios wei̧ Moisés iwȩyudinatjö weökökwema ajayinö ö'weje pjabatadö tjotidena teachinobetjö̧, Dios wei̧, ju'wi wei̧ma yöawinobe, 'yayi̧ balekwa wei̧da. Chömöledö, ajayinö ö'weje pjabatadö tjotidi̧ söbebö loi̧danö, Dios ajayinö wei̧bi söbebö loinobe. Ja̧danö, Dios 'yayi̧ balekwa wene yöbawö ujuninobe.

¹⁵ Chömöledö, Jesús, wainö Diostjö jojodötjö ö'weje pjabato̧ baibanö jo̧, Dios wei̧ Moisés iwȩyudinatjö weökökweda ichinobetjö̧ wajuwanö i̧sebobe, Diosnö ajayinö ö'weje pjabatadönö balewö loinobetjö̧ Dios ajayinö wei̧bi, Dios wei̧ Moisés iwȩyudinama söbebö loinobe, jö̧ba̧lö.

¹⁶ Isabenö chömöledö, Dios wei̧ Moisés iwȩyudinama weinokobe Jesúsnö, Diostjö jojodötjö ö'weje la'aka pjabato̧ baiboböma. Jo̧bama Levítjö tupadanö jojobö̧kö̧obetjö̧ weinokobe. Jesús ö'weje la'aka pjabato̧ baibanöma jejenöma ji̧nokobe. Jesúsma, Melquisedec mikwo̧ ba̧kwȩlö̧jatebö ö̧ji̧danö, iteda ba̧kwȩlö̧jatebö ö̧ji̧ ujulunöda Diostjö jojodötjö ö'weje la'aka pjabato̧ baibinobe.

¹⁷ Jejenö jö̧ba̧lö laebobe Dios iwenetjö, baikwö, Dios iteda Itji̧ Jesúsnö yöawina: Ökwöma ötjötjö jojodötjö ö'weje la'aka pjabato̧ baibanö jo̧ja. Ja̧danö, ba̧kwȩlö̧jatebö ö'weje la'aka pjabato̧ kwö̧jakwo̧ja. Ja̧danö, ökwöma Abraham ö̧jina ötjötjö jojodötjö ö'weje la'aka pjabato̧ Melquisedec mikwo̧danö ötjötjö jojodötjö ö'weje la'aka pjabato̧ baibanö jo̧ja Jejenö laebobe Dios iwenetjö, Jesúsma ba̧kwȩlö̧jatebö Diostjö jojodötjö ö'weje pjabatö otidakwo̧, Melquisedecdanö, jö̧ba̧lö.

¹⁸ Jo̧kwaobetjö̧ chömöledö, döwaisobö jo̧be, Jelo̧ Diostjö jojodötjö ö'weje la'aka pjabato̧ baibanö ichinobetjö̧, Dios ajayinö weinawö̧danöbö̧kö̧, Dios ajayinö weina wene söbebö loinobe, jö̧ba̧lö. Ja̧ weina wenema tjo̧wi̧ kaatinobe jojodönö pjaatokobetjö̧ Dioskwö suli̧ okobe jwiinö jwibadödanö tjichibobö. Jo̧kwaobetjö̧ söbebö loobö jo̧be, Dios ajayinö weina wenema.

¹⁹ Isabenö chömöledö, Dios ajayinö wei̧, Dios wei̧ Moisés iwȩyudinama, jojodönö pjaatokobe Dioskwö suli̧ okobe jwiinö jwibadödanö tjichibobö. Jo̧kwaobetjö̧ Diosma yöbawö ujuninobe ju'wi wene, jwiinö mikwawi̧ wene, ajayinö weinatjö o̧penönö mikwawi̧ wenema. Ja̧ balekwa yöbawö ujuninatjö Diosma yöawobe, Tjo̧wi̧, jojodö ötjökwö suli̧ okobe jwiinö jwibadödanö tjichibobö jo̧be, jö̧ba̧lö. Isabenö chömöledö, Dios balekwa yöbawö ujuni̧ma ajayinö yöbawö ujuninatjö o̧penönö mikwawi̧, ökwödönö okobe jwiinö pjabatö.

^20-21 Ja̧danö chömöledö, ju'wi jawabi ökwödönö i̧sebobe döwaisachibobö, Dios 'yayi̧ balekwa yöbawö ujuni̧ma ajayinö yöbawö ujuninatjö o̧penönö mikwawi̧, jö̧ba̧lö. Biya̧da: Diosma wanedakwawö yöbawö, Jö̧ta̧li̧danö badekwachökötjö̧ma ötjöda jawa, jö̧ba̧lö, iteda Itji̧ Jesúsnö 'da̧batö ujuninobe. Jejenö wanedakwawö yöbawö 'da̧batö ujuninobe Itji̧ Jesúsnö, Ökwöma ba̧kwȩlö̧jatebö ötjötjö jojodötjö ö'weje la'aka pjabato̧ kwö̧jakwo̧ja, jö̧ba̧lö. Jo̧kwaijayonö jejenö la'akatjöda yöawinokobe Diosma jo̧banö böjȩtjö ö'weje pjabatadönö, ajayinö yöbawö ujunina weina otidadönöma. Itji̧nöda jejenö wanedakwawö yöbawö 'da̧batö ujuninobe, 'yayi̧ balekwa yöbawö ujunina otidakwo̧nöda. Baikwö laebobe Dios iwenetjö, Dios iteda Itji̧nö yöawinama: Ötjö jojodö tjuluwo̧ma, chiminö 'da̧batö chujunakwö, ba̧kwȩlö̧jatebö ötjötjö jojodötjö ö'weje pjabato̧ kwö̧jobö. Ja̧ jö̧ta̧li̧ma balewachökakobe. Ötjö jö̧ta̧li̧danö isabenö baledakobe. Jejenö Diosma, wanedakwawö yöbawö iteda Itji̧nö yöbawö ujuninobe, 'yayi̧ balekwa yöbawö ujunina otidakwo̧nöma.

²² Chömöledö Dios, wanedakwawö yöbawö Jesúsnö otidobö 'da̧batö ujuninobetjö̧ döwaisa, 'Yayi̧ balekwa yöbawö ujuninama ajayinö yöbawö ujuninatjö o̧penönö mikwawi̧ ökwödönö pjabatö, jö̧ba̧lö.

^23-24 Ja̧danö chömöledö, ju'wi jawabi yötawaduwakwö, Jesúsma ajayinö Diostjö jojodötjö ö'weje pjabatadötjö o̧penönö inesö jo̧, jö̧ba̧lö. Jesúsma ba̧kwȩlö̧jatebö jo̧obetjö̧ jo̧ba bakwo̧da ökwödönö ba̧kwȩlö̧jatebö pjabatö jo̧. Jo̧kwaijayonö ajayinö Diostjö jojodötjö ö'weje pjabatadö, Levítjö tupadanö jojodöma, woba jojodötjobetjö̧ ba̧kwȩlö̧jatebö tjotidoböma jwibinadö. Jo̧kwaobetjö̧ ba̧jekwadö, lekwe o̧biya balewanö jelo̧, jelo̧ tjotidinobe. Jejenömaökö Jesús otidi̧ma. Jo̧bama ba̧kwȩlö̧jatebö Diostjö jojodötjö ö'weje la'aka pjabato̧ ö̧jakwo̧.

²⁵ Jo̧kwaobetjö̧ Jesúsda jojodö Dioskwö ichibö tjö̧jibinö pjabato̧, Jesúsma dö̧jibinö pjabato̧, jö̧ba̧ladönöma. Ja̧danö, jobadö tjö̧ji̧bi okobe jwiinö pjaatinobe Jesúsma, ja'yubebi ji̧bökönö. Ja̧danö, Jesúsma jo̧banö ösödadönöma ba̧kwȩlö̧jatebö tjö̧jibinö pjabato̧, Jesúsma ba̧kwȩlö̧jatebö Diosnö abebö jobadönö pjaatobö ö̧jobetjö̧.

²⁶ Jo̧kwaobetjö̧ chömöledö, Jesúsda Dios 'da̧batö ujuninökwema Diostjö jojodötjö la'aka pjabato̧ baibanö, ökwödö jojodönö pjaatobö. Ja̧danö, jo̧bama la'akatjöda jojodönö o̧'wo̧ sulinö edö̧kö̧. Ja̧danö chömöledö, jo̧bama la'akatjöda taba̧lö̧ji̧ jawa ja̧bö̧kö̧. Ja̧danö, jo̧bama sulabedökwö pjabacha̧löma jö̧kö̧. Ja̧danö chömöledö, jo̧bama Dios öwaisachobekwöchobe ö̧bemi, inesö la'aka luwo̧ ö̧bena bo̧, mölejȩbe.

²⁷ Isabenö, jo̧bama böjȩnö ju̧kwadö Diostjö jojodötjö ö'weje pjabatinadödanö jö̧kö̧. Jobadöma suli̧ juna̧linadö. Ja̧danö, jobadöma Diosnö tjiyakwa̧ abönö idöda tjusuli̧ midö juwö tjiyinobe, suli̧ juna̧ladötjobetjö̧. Jemi ikenama, idöda tjusuli̧ midajadöma jojodö tjusuli̧ midö juwö tjiyinobe. Jo̧kwaijayonö jejenömaökö Jesús, jwiinö otiwo̧ma. Jesúsma iyinokobe jobadö juwö tjiyinadanö, bakwöta o̧bakwena tjiyi̧danöma. Jo̧bama bakwötanöda ökwösobu ebawinö imidawinobe okobe jwiinö jojodö tjusuli̧ma. Jesúsma jwiinö imidawinobe, yemidanö itedada iyawökönö.

²⁸ Jo̧kwaobetjö̧ döwaisachibobö jo̧be, Isabenö Jesúsma ju'wedö Diostjö jojodötjö ö'weje pjabatinadö, Dios ajayinö webö 'da̧batö ujuninawö̧nötjö o̧penönö mikwawo̧, jö̧ba̧lö. Jobadöma jojodö. Suli̧ juna̧linadö. Jo̧kwaijayonö babema, Dios ajayinö weinatjö baikwöma Dios iteda iminö 'da̧batö ujuninobe iteda Itji̧nö, Jesúsnöma. Diosma iteda iminö Jesúsnö 'da̧batö ujuninobe ajayinö Diostjö jojodötjö ö'weje pjabatadö tjotidena teachobö. Ja̧danö, jo̧ba Jesúsma jwiinö otiwo̧. Suli̧ma yelösöda jwibo̧. Ja̧danö, jo̧banöda Diosma iteda iminö 'da̧batö ujuninobe, ba̧kwȩlö̧jatebö suli̧ jwibo̧nöma, Diostjö jojodötjö ö'weje la'aka pjabato̧ baibanö. Isabenö chömöledö, Jesúsma ajayinö Diostjö jojodötjö ö'weje pjabatinadönötjö o̧penönö mikwawo̧. Ja̧danö, jo̧ba Diostjö jojodötjö ö'weje la'aka pjabato̧ baibanö jo̧ma otidobe Dios 'yayi̧ balekwa yöbawö ujunina, o̧penönö yöbawö ujuninama jamatö 'yo̧bö.