Hebreos 6 - Dios Iwene

—Ajayinö Jesúsnö ösödadönö tjöba̧ja̧di̧ döwaisachinatjö tupakwö di̧'yaduwo— jö̧ba̧lö, yöawina wene

¹ Jo̧kwaobetjö̧ chömöledö, jamatiböma kwö̧jaduwa, da̧peachökönöma. Ida̧ökö döwaisa Jesúsnö ösödadönö la'aka ba̧ja̧dakwawa, ajayinö tjöba̧ja̧dinama. Chömöledö ja̧ tjöba̧ja̧dinama jwiinö inesö ba̧ja̧dakwawa. Jo̧kwaijayonö babema ja̧ tjöba̧ja̧dina omukwatö tupakwö do̧'wo̧ luwo̧ okwa da̧peachö di̧'yobö jo̧be. Ja̧danö, yemidanöbi yemidanö ja̧ la'aka tjöba̧ja̧dina döwaisachoböma jwiobe. Tjo̧wi̧, ja̧ ajayinö tjöba̧ja̧di̧ döwaisachinatjö tupakwö da̧peachö di̧'yaduwo, chömöledö. Ja̧danö, ja̧ ajayinö tjöba̧ja̧dinama ¿tajida? Bakwöta jawama biya̧ chömöledö: Domukwati̧ balewachö wame jawa ja̧di̧ kadatibobö jo̧be, wame jawama dö̧jibinö pjaatökö, jö̧ba̧lö. Jejenö domukwati̧ balewachö, Dios yöawina ösödö dö̧jobö jo̧be. Ja̧ ajayinö la'aka tjöba̧ja̧dinama döwaisa.

² Ja̧danö ju'wi la'aka ba̧ja̧dakwawama, ojwe okwa bu̧datakwawa tjöba̧ja̧dinama. Ja̧danö ju'wima, Diosnö ösödadönö tjömamu 'bieba̧lakwawa. Ja̧danö ju'wima, jojodö woawatjö yemidanö tjeachajakwawa. Ja̧danö ju'wima, Dios jojodönö lȩebakwa̧, ba̧kwȩlö̧jatebö lȩebakwa̧ma. Okobe jwiinö ja̧ ba̧ja̧dakwawama la'aka ba̧ja̧dakwawa. Yemidanöbi yemidanöbi ja̧ jawa döwaisachoböma jwiobe chömöledö.

³ Ja̧danö, ja̧ ajayinö tjöba̧ja̧di̧ döwaisachinatjö tupakwö di̧'yobö jo̧be. Ja̧danö chö̧möledö, sule Dios pjaati̧nöda jejenö da̧peachö di̧'yakwedösa.

^4-6 Isabenö chömöledö, ja̧ la'aka ba̧ja̧dakwawa yemidanöbi yemidanö döwaisachobö jwiobe, tjo̧wi̧ döwaisobetjö̧. Da̧peachobö di̧'yobö jo̧be. Jo̧kwaijayonö ökwödötjö ju'wedöma ajayinö la'aka ba̧ja̧dakwawa a̧ja̧kwö tjösödijayonö jemi ikenama tjöpöjödinobe, Jesúsnö kabatibö. Chömöledö, jobadöma ajayinö Jesúsnö do̧batö tjemena yȩa'wotjö labebö dewa'wonö kwebachadö babibinadö tjo̧'wo̧ luwo̧ okwanö. Ja̧danö, Dios iyinökwe Jesúsnö, tjö̧jibinö pjabato̧nö tjösödinobe. Jwiinö tjösödinobe jo̧banö, Diosma ökwödönö lȩlö̧jino edobetjö̧ ba̧kwȩlö̧jatebö mölejȩbe dö̧jakwedösa, jö̧ba̧lö. Ja̧danö, jobadöma Dios O̧'wo̧ Luwo̧ jobadö tjo̧'wo̧ luwo̧ okwanö tebachibö öjamatinawö̧. Ja̧danö Dios iwene, otiwa jawa wenema ösödinadö. Jobadöma Dios ujulu i̧sebi̧ edinadö, ju'wi möle, 'dö̧ibaji̧ möle jwiinö ujulu i̧sebakwa̧danö. Yelösöda jobadöma edöbi, waisöbi tjö̧jijayonö jelobekwö omukwatö Jesústjö 'da̧bachibö tji̧'yinobe. Jau chömöledö, jobadö dewa'wonö kwebachinadöma yemidanö yȩa'wo okwa söbibö tji̧'yobedanö 'ya̧dö. Ja̧danö chömöledö, jobadöma yemidanöbi yemidanö la'aka ba̧ja̧dakwawama ¿tja̧ja̧kwobö jo̧beji̧? Jejenömaökö ida̧ökö tjöwaisobetjö̧. Ja̧ la'aka ba̧ja̧dakwawa tjöwaisijayonö Jesúsnö öpöjödö kabatibadö. Chömöledö, Dios jobadö jelobekwö tjomukwati̧ tjöbalewachinö ¿pjaatobö jo̧beji̧, yemidanö Jesúsnö tjösödobö? Jejenömaökö chömöledö. Jobadö Jesúsnö jwiinö kabatibö jelobekwö omukwatö 'ya̧döma isabenö tjomukwati̧ tjöbalewachobö jwiobe. Chömöledö, jobadöma Jesúsnö towisa'onö bȩbö tjujunobö webinadödanö ja̧dö. Jesúsnö obinadödanö ja̧dö, jojodö tjöba a'o tjujunajökwenö edö obinadödanö. Jobadöma Jesúsnö jwiinö katjatibinobe, Sulabo̧, jö̧ba̧lö. Jo̧kwaobetjö̧ yelösöda, tjomukwati̧ balewachö yemidanö Jesúsnö ösödö tjetjachajobö waiyobe chömöledö.

⁷ Chömöledö, wanedö yötawaduwakwö, batjonö wanedö, bakwo̧ Jesúsnö kabatibö 'yo̧ma yemidanö tjeachajoböma jwiobe, jö̧ba̧lö: Ja̧danö, bakwo̧ omukwati̧ balewachökönö tjebachajö̧kö̧ma batjonö pokwi̧nö wanekwachobe. Ju'wedöma batjo tjujuwinobe. Ikenama tjujuwinayu tjö'dawödinobe. Jemi ikenama tjö'dawödajayu sotjinobe tjujunobö. Jemi ikenama, jayu otiwanö tjujuninayunö ojwiyo nöinö o̧binobe. Ja̧danö, jemi tupakwö otiwanö pokwinobe, jojodö tjukwakwa̧ma. Ja̧danö Diosma, jayu otiwanö pokwayu edö ösödo̧, Biyu batjoma otiwa, jö̧ba̧lö.

⁸ Jo̧kwaijayonö chömöledö, jayu batjoma abönö juwökönö, ja̧danö 'dawödö, sobö tjotidökötjö̧ma tjujunaja̧ma otiwanö pokwökena. Sȩi̧da ötjebiyada pokwena. Ja̧danö, Diosma jemi edö lȩebobe, Sula, sȩa'woda. Juwö lotocha, jö̧ba̧lö. Chömöledö jejenö yötawajökwe, jelobekwö omukwatö, Jesústjö 'da̧bachibö 'yo̧ ö̧ji̧ma. Jo̧ba ö̧ji̧tjö suli̧da laebobe, batjo sula'wo pokwayudanö. Ja̧danö Diosma, jo̧banö lȩbebö ö̧ji̧tjö suli̧ma juwö loakwo̧.

—Kwö̧ja̧wo̧dönö dösölö̧jinö pjakataduwi̧danö kwo̧'wo̧ luwo̧duwi okwanö dösölö̧jinö kwi̧'yaduwo Diosnö kwo̧'wo̧duwi wana̧lö— jö̧ba̧lö,yöawina wene

⁹ Chösödawö̧ chö̧ja̧wo̧dö, ja̧ wanedö yötawijayonö jö̧ta̧lökö, Aaa ökwödöma jelobekwö omukwatö 'yi̧nadödanö kwi̧'yaduwobe, Dios lȩebakwawö̧danö, jö̧ba̧lö. Jejenömaökö chö̧ja̧wo̧dö. Chomajade okwanö chöwaisa, Isabenö ökwödöma otiwanö kwi̧'yaduwakwedöja, jö̧ba̧lö. Chöwaisa. Dios yöbawö junö otiwi̧ iyakwa̧, tjö̧jibinö pjaatawö̧nö iyakwa̧ma kwemaduwakwedöja.

¹⁰ Chömöledö ja̧ baledakwa̧ma chöwaisa, Dios, jweinö omukwato̧ma, ökwödö otiwanö jo̧banö ösödö kwuju̧kwaduwi̧ omukwato̧obetjö̧. Chömöledö, jo̧banö kwösödaduwi̧ma wajuwanö kwi̧sebaduwobe ju'wedö jo̧ba i̧tji̧mu babibinadönö pjakataduwobetjö̧. Ajayitjö Jesúsnö do̧batö kweminaduwa baikwö kwö̧ja̧wo̧dönö dösölö̧jinö pjakataduwobe, jo̧ba i̧tji̧mu babibinadönöma.

¹¹ Chömöledö, kwö̧ja̧wo̧dönö dösölö̧jinö pjakataduwi̧danö Jesúsnö do̧batö kweminaduwa baikwö, babebi kwo̧'wo̧ luwo̧duwi okwanö dösölö̧jinö kwi̧'yaduwo, jwaikwöda Diosnö kwo̧'wo̧duwi wana̧lö. Chömöledö, jwaikwöda kwi̧'yaduwobö chösöda, Diosnö kwo̧'wo̧duwi̧ wana̧lö, Okobe jwiinö Dios yöbawö ujuninama isabenö baledakobe, jö̧ba̧lö. Jejenö te'ada̧lö jwaikwöda kwi̧'yaduwo chömöledö, okobe jwiinö Dios yöbawö ujuninama badekwachenanö kabatö.

¹² Chömöledö, jejenö jwaikwöda kwi̧'yaduwobö chösöda, kwu'du̧wekwachibaduwapji jö̧ba̧lö, da̧peachökönö kwo̧'wo̧ luwo̧duwi̧nö. Ja̧danö, da'dödöminetjö ju'wedöma Diosnö tjo̧'wo̧ wana̧lö tjö̧jinobe. Jobadöma Diosnö tjo̧'wo̧ wana̧lö tjite'ada̧linobe jo̧ba iyakwa̧, Chiyakwo̧sa, jö̧ba̧lö, yöbawö ujunina iyakwa̧ma. Te'ada̧lö tjö̧jinobe, Isabenö Dios yöbawö ujuninadanö iyakobe, jö̧ba̧lö. Chömöledö ökwödö jejenö kwö̧jaduwobö chösöda, Diosnö kwo̧'wo̧duwi wana̧lö, jo̧ba yöbawö ujunina badekwachakwa̧ te'ada̧lö.

—Abraham Diosnö o̧'wo̧ wana̧lö ö̧jinadanö ökwödöbi do̧'wo̧ wana̧lö dö̧jobö jo̧be— jö̧ba̧lö, yöawina wene

^13-14 Ja̧danö chömöledö, jejenö baledinobe da'dö Abrahamnö. Abrahamma Diosnö o̧'wo̧ wana̧lö, Dios yöawi̧ ösödö ite'ada̧linobe, Dios yöbawö ujuninadanö isabenö baledakobe, jö̧ba̧lö. Döwaisa. Diosma jweinöda yöba̧lo̧ ¿jö̧tö? Ja̧danö Abrahamnö yöbawö junö jö̧a̧linobe, Isabenö ökwötjö tupadanö jojodö tjöba̧jekwachinö batjibobö pjatatocha, jö̧ba̧lö. Ja̧danö chömöledö, Diosma ju'wi jawabi jö̧a̧linobe Abrahamnö yöbawö junö jö̧a̧lena. Diosma Abrahamnö wanedakwawö yöawinobe, Abraham, ötjö yöbawö junö jö̧ta̧li̧danö badekwachökötjö̧ma ötjöda jawa, jö̧ba̧lö. Ja̧danö ötjödada lȩtebakwawakwo̧sa, jö̧ba̧lö, wanedakwawö yöawinobe Diosma Abrahamnöma. Chömöledö Diosma jelo̧, jo̧banö lȩebakwo̧ deobetjö̧, Ötjödada lȩtebakwawakwo̧sa, jö̧ba̧lö, wanedakwawö yöawinobe. Chömöledö Dios jejenö yöbawö junö jö̧a̧lina omukwatö döwaisachibobö jo̧be, Dios yöbawö junö jö̧a̧li̧danö isabenö badekwachakobe, jö̧ba̧lö.

¹⁵ Ja̧danö Abrahamma, Diosnö o̧'wo̧ wana̧lö, te'ada̧löda ite'ada̧linobe, Dios jö̧a̧lina badekwachenanö kabatö. Ime'dawachibinokobe, Tjo̧wi̧, chite'ada̧lökö. Chedemi Dios yöbawö ujuninama badekwachökena, jö̧ba̧lö. Jejenömaökö chömöledö. Abrahamma te'ada̧löda ite'ada̧linobe, 'du̧wekwachibökönö. Ja̧danö Diosma jweinöda yöbawö junö jö̧a̧linobetjö̧, Abraham, te'ada̧lo̧ma Dios yöbawö ujunina iyi̧ eminobe. Isabenö chömöledö, Abraham ite'ada̧linama ökwödönö i̧sebobe, Dios yöbawö junö jö̧a̧li̧danö isabenö badekwachakobe, jö̧ba̧lö.

¹⁶ Chömöledö ökwödö jojodöbi yöbawö junö jö̧da̧lena jejenö jö̧da̧lobe. Wanedö yötawaduwakwö, ökwödö dö̧jinö wanedöma: Ökwödötjö bakwo̧ yöbawö junö jö̧a̧lobe, Yöbawö junö jö̧ta̧li̧danö isabenö ja̧tocha, jö̧ba̧lö. Ikenama yöbawö junö jö̧ba̧lo̧ma, jo̧banötjö o̧penönö jo̧nö weobe, Ötjö jö̧ta̧li̧danö ja̧tökötjöma lȩkebotjö, jö̧ba̧lö. Jejenö jö̧a̧liawö̧ jojodöma waisadö, Isabenö ite jö̧a̧li̧danö ja̧akwo̧, jö̧ba̧lö. Waisadö, Omönama yöba̧lökö, jö̧ba̧lö.

¹⁷ Ja̧danö Diosbi jejenö i̧sebobö jö̧a̧linobe, jojodö tjöwaisachibinö, Isabenö Dios yöbawö ujuninadanö badekwachakobe, jo̧ba omukwati̧ balewachökönö, jö̧ba̧lö. Jo̧kwaobetjö̧ Diosma da'dödöminenö, Chiyakwo̧sa, jö̧ba̧lö, yöbawö junö jö̧a̧lena ju'wibi jö̧a̧linobe,Yöbawö junö jö̧ta̧li̧danö badekwachökötjö̧ma ötjödada lȩtebakwawakwo̧sa, jö̧ba̧lö. Jejenö Diosma i̧sebinobe, Yöbawö chujuni̧ma isabenö badekwachakobe, jö̧ba̧lö.

¹⁸ Chömöledö, Dios jejenö yöbawö junö jö̧a̧lina omukwatö ökwödönö pjaatobe domajadenö, Dios yöbawö junö jö̧a̧li̧danö isabenö badekwachakobe. Balewachökakobe, jö̧ba̧lö. Ja̧danö dötölataja jawa, balewachökö jawa, laebobe Dios jejenö yöbawö ujuninatjö. Abönö jawa biya̧: Diosma yöbawö ujuninobe, Pjatatocha, jö̧ba̧lö. Döwaisa, Diosma omöna yöba̧lökö ¿jö̧tö? Jo̧kwaobetjö̧ döwaisa, Dios jö̧a̧li̧ma balewachökakobe. Isabenö badekwachakobe, jö̧ba̧lö. Jemi ikenama Dios ju'wi jawabi jö̧a̧linobe, wanedakwawö yöbawö. Ötjö jö̧ta̧li̧danö badekwachökötjö̧ma ötjöda jawa. Ja̧danö ötjödada lȩtebakwawakwo̧sa, jö̧ba̧lö, wanedakwawö yöawinobe. Jejenö a̧ja̧kwö döwaisachiba chömöledö, Dios jö̧a̧li̧ma la'akatjöda balewachökakobe, jö̧ba̧lö. Do̧'wo̧ luwo̧ okwanö ösöwö, juluwachibanö ja̧dösa chömöledö, Dios jö̧a̧li̧danö isabenö badekwachakobe, jö̧ba̧lö. Chömöledö ja̧ dötölataja jawa, Dios yöbawö ujuninabi̧, Dios ja̧ wanedakwawö yöawinabi la'akatjöda balewachökakobe. Jo̧kwaobetjö̧ chömöledö ökwödö, Dios ö̧jobekwö döbibajinadöma, jo̧banö do̧'wo̧ wana̧lö, do̧'wo̧ luwo̧ okwanö ösöwö juluwachibanö di̧'yaduwo, Ökwödöma Dios yöbawö ujunina badekwachakwa̧ te'ada̧ladösa, jö̧ba̧lö. Jelobekwö domukwatobö jwiobe, Aaa, Dios jö̧a̧linadanö badekwachökena, jö̧ba̧lö. Isabenö chömöledö, Diosma omöna yöawoböma jwibo̧. Jo̧ba yöbawö ujuninadanö, wanedakwawö yöawinama isabenö badekwachakobe. Jo̧kwaobetjö̧ ökwödö jo̧banö do̧'wo̧ wana̧lö di̧'yobö jo̧be, do̧'wo̧ luwo̧ okwanö ösöwö juluwachibanö, Dios yöbawö ujuninama balewökönö waekwökakobe, jö̧ba̧lö.

¹⁹ Ja̧danö chömöledö, ökwödöma Diosnö do̧'wo̧ wana̧lö te'ada̧ladösa, Isabenö Dios yöbawö ujuninadanö badekwachakobe, jö̧ba̧lö. Jo̧kwaobetjö̧ Diosnö do̧dati̧danö do̧batö jwaikwöda 'ya̧dösa, jo̧banö do̧'wo̧ wana̧lö. Wanedö yötawa chömöledö. Ökwödö disowima tjolanö nönö nubö dönobe, a̧li̧ isuwokobö. Ja̧danö, a̧lachi'bo nuda'boma otiwa'bo, 'dia'bonöda nudobe. Chömöledö ökwödö jejenö 'dia'bonödanö ja̧dösa Dioskwö, iteda yöbawö ujunina wene do̧'wo̧ wana̧lö. Jejenö do̧'wo̧ wana̧lö döwaisobe, Bakwo̧ ökwödönö pjabato̧ma ö̧jobe, jö̧ba̧lö, Jesúsda. Jejenö döwaisobetjö̧ Diosnö do̧'wo̧ wana̧lö dite'ada̧lobe. Ja̧danö chömöledö, Jesús ökwödönö pjabato̧ma, böjȩtjö Diosnö la'aka iyadö Dios ö̧jineju okwa tupasȩko̧ tetjachinadanö teachinobe Dios mölejȩbe ö̧jobekwö. Jau chömöledö, sawana'wo tjöekwemi o̧pe Diosnö iyö tetjachinadanö Jesúsma teachinobe Dios mölejȩbe ö̧jobekwö.

²⁰ Ja̧danö, Jesús, Diostjö jojodötjö ö'weje la'aka pjabato̧ baibanö jo̧ma jobe abönö teachinobe, ökwödö da̧bönö, ökwödönö pjaatobö. Ja̧danö, Jesúsma ba̧kwȩlö̧jatebö Diostjö jojodötjö ö'weje la'aka pjabato̧, damötjö Diostjö jojodötjö ö'weje pjabatina Melquisedec mikwo̧danö.