Hebreos 5 - Dios Iwene

Böjȩtjö Diostjö jojodötjö ö'weje la'aka pjabato̧ baibanö jo̧ ö̧jina yöawina wene

¹ Jo̧kwaobetjö̧ chömöledö, Dios ö̧jobekwö, jo̧banö abebö ichakwa̧ma yekabiduwa. Jesús, ökwödönö lȩlö̧jino edo̧, ökwödönö pjaatobö waiso̧ma jobeda, Dios öba a'o jo̧. Chömöledö, jo̧bama Diostjö jojodötjö ö'weje la'aka pjabato̧. Jo̧kwaobetjö̧ yekabiduwa Diosnö abeböma. Ja̧danö ¿böjȩtjö Diostjö jojodötjö ö'weje la'aka pjabato̧ ö̧jinaja? Jo̧ba otidinama ¿tajida? Chömöledö, böjȩtjö Diostjö jojodötjö ö'weje la'aka pjabatinama jojo. Diosma jojodötjö 'da̧batö ujuninökwe, ö'weje la'aka pjabato̧ baibanö. Jo̧bama Diosnö iyiainobe, jojodö Diosnö ösödö tjiyi̧bi, jojodö tjumusidi̧ midö iyawabi.

² Ja̧danö, jo̧ba böjȩtjö Diostjö jojodötjö ö'weje la'aka pjabato̧ma me'dawadönö pjaatobö öwaisina, sulabenö ja̧tji̧ wajwitjobetjö jelobekwö 'ya̧dönöma. Ja̧danö, böjȩtjö Diostjö jojodötjö ö'weje la'aka pjabato̧ma ösödö jwebebö pjabatina, jobadö me'dawadönöma. Itedabi jojo. Ja̧danö, jo̧babi ju'wikwenama ime'dawachibinö ji̧nö jo̧obetjö̧ waisö pjabatiainobe ömöledönö, me'dawadönöma, juluwachibö tji̧'yobö.

³ Ja̧danö, jo̧ba böjȩtjö Diostjö jojodötjö ö'weje la'aka pjabato̧ma ömöledö tjusula tjumusidi̧ midö otidina, Diosnö iyö. Jo̧kwaijayonö, ¿jo̧ba umusidi̧ja? Jo̧babi suli̧ juna̧lina ¿jö̧tö? Jau, jojoobetjö̧ jo̧babi suli̧ juna̧lina. Jo̧kwaobetjö̧ iteda Diosnö iyi̧bi iyobö weinobe, iteda usula umusidi̧ midö. Jojodö tjusuli̧ tjumusidi̧ midö iyinadanö, itedada usuli̧bi midö iyina.

⁴ Ja̧danö, böjȩtjö Diostjö jojodötjö ö'weje la'aka pjabato̧ma, itedada 'da̧batakwawö chujunawa la'aka iyo̧ chö̧jobö, jö̧ba̧lö, ¿ujunawinaji̧? Itedadamaökö. Diosda 'da̧batö ujuninobe ö'weje la'aka pjabato̧nö. Jejenö Diosma da'dömine Aarónnö 'da̧batö ujuninobe, Diostjö jojodötjö ö'weje la'aka pjabato̧ baibanö ö̧jobö.

⁵ Ja̧danö chömöledö, Cristobi, itedadama 'da̧batakwawö ujunawinokobe, ö'weje la'aka pjabato̧ baibanö ö̧jobö. Diosda Cristonö, iteda Itji̧nöma 'da̧batö ujuninobe Diostjö jojodötjö ö'weje la'aka pjabato̧ ö̧jobö. Ja̧danö, Dios iteda Itji̧nö yöawina baikwö laebobe Dios iwenetjö: Chitji̧, babe möle yötawa, ökwöma ötjö Chitji̧ja, jö̧ba̧lö. Ja̧danö ökwö Kwabe'dosa, jö̧ba̧lö, yötawa babe mölema. Jejenö laebobe Dios iwenetjö.

⁶ Ja̧danö ju'wibi baikwö laebobe Dios iwenetjö: Ökwöma ötjötjö jojodötjö ö'weje la'aka pjabato̧ baibanö jo̧ja. Ja̧danö, ba̧kwȩlö̧jatebö ö'weje la'aka pjabato̧ kwö̧jakwo̧ja. Ja̧danö ökwöma, Abraham ö̧jina ötjötjö jojodötjö ö'weje la'aka pjabato̧ Melquisedec mikwo̧danö ö'weje la'aka pjabato̧ baibanö jo̧ja. Jejenö laebobe Dios iwenetjö, Diosma iteda Itji̧nö, ö'weje la'aka pjabato̧ baibanö 'da̧batö ujunajökwenö yöawina. Jejenö laebobe, Ökwöma Melquisedec ö'weje la'aka pjabato̧ ö̧jinadanö ö'weje la'aka pjabato̧ baibanö kwö̧jakwo̧ja, jö̧ba̧lö.

⁷ Ja̧danö, Jesúsma, böjȩnö jojo babibö bötjachajo̧ma yelösöda usula emawinobe. Ja̧danö Diosnö, woawatjö ö̧jibinö juluwo̧ Diosnöma budekwabinö aebinobe woawatjö ö̧jibinö pjaatobö. Jo̧kwaijayonö Diosma, ö̧jibinö pjabatökönö weinobe usula emawö woobö. Chömöledö ¿Diosma a̧ja̧kwinököji̧ iteda Itji̧ ubudekwi̧ma? Isabenö a̧ja̧kwinobe, Jesúsma Diosnö yebabinö edö jo̧ba wei̧ a̧ja̧kwöda ö̧jinobetjö̧.

⁸ Jo̧kwaijayonö ¿tajawedö Jesús usula emawobö weinada? Yötawaduwakwö chömöledö. Diosma Jesúsnö weinobe Jesús öwaisachibobö, Dios wei̧ cha̧ja̧kwobö jo̧be, jwiinö labi̧ wei̧bi, jö̧ba̧lö. Jesúsma, Dios Itji̧jayonö öwaisachibinö ichibinobe, Dios wei̧ jwiinö a̧ja̧kwi̧ i̧sebö, towisa'onö la̧nö wobö.

⁹ Ikena Jesúsma, usula emawö okobe jwiinö Dios wei̧ a̧ja̧kwö kaatinobe, ja'yubebi junibökönö. Chömöledö, Jesús jejenö okobe jwiinö Dios wei̧ a̧ja̧kwö kaati̧ma i̧sebinobe, Tjo̧wi̧, Jesúsma okobe deinö jojodö, jo̧banö ösödadö tjö̧jibinö pjabato̧ baibajabe, jö̧ba̧lö.

¹⁰ Ja̧danö, Diosma iteda wei̧ a̧ja̧kwö kabatajo̧nö, Jesúsnöma kabebö öwaninobe Diostjö jojodötjö ö'weje la'aka pjabato̧ baibanö. Jo̧kwaijayonö Jesúsma böjȩtjö ö'weje la'aka pjabato̧danöbö̧kö̧, Aaróntjö tupadanö jojodödanö. Diosma Jesúsnö jö̧a̧linobe, Ökwöma Melquisedec mikwo̧ ötjötjö jojodötjö ö'weje la'aka pjabato̧ ö̧jinadanö ö'weje la'aka pjabato̧ baibanö kwö̧jakwo̧ja, jö̧ba̧lö.

—Tjemu o̧do'bi̧ owadödanö tjö̧jobö jwiinö, kwakwawa kwadödanö tjö̧jobö jo̧be— jö̧ba̧lö, yöawina wene

¹¹ Ja̧danö, jo̧ba Melquisedecnö nöinö yötawo jö̧ta̧lijayonö jwiinö waiya ökwödönöma. Do̧kataduwökena kwo̧'wo̧ luwo̧duwi okwanö kwöda̧peachaduwokobetjö̧.

¹² Isabenö chömöledö, ökwödöma ida̧ökö kwömöledöduwinö Dios iwene ba̧ja̧dadöda kwö̧jaduwobö jo̧be, lekwe a̧yo̧ Jesúsnö do̧katinaduwa baledinobetjö̧. Jo̧kwaijayonö ina ju'wedö ökwödönö la'aka jawa tjöba̧ja̧dobö jo̧be. Wanedö yötawaduwakwö: Ina tjemu o̧do'bi̧ owadödanöbedöja ökwödöma. Ina kwakwawabi kwöködöja.

¹³ Ja̧ wanedö yötawaja̧, tjemu ina da̧peachöködödanö da̧peachöködöja, jö̧ba̧lö, wanekwachobe. Ina Dios iwene kwa̧ja̧kwaduwijayonö waisachiböködöja. Ja̧danö, ina Dios iwene a̧ja̧kwö kwö̧jaduwi̧ ö'wiawakwawö̧jö̧nö kwomukwataduwobö wajwibadöja, Biya̧ma otiwa, biya̧ma sula, jö̧ba̧lö.

¹⁴ Jo̧kwaijayonö da̧peachadöma kwakwawa kwadödanö ja̧dö. Jobadöma Dios iwene a̧ja̧kwö ja̧kwawa ö'wiawakwawö̧jö̧nö omukwatadö, Biya̧ma otiwa, biya̧ma sula, jö̧ba̧lö. Waisachibadö. Jo̧kwaijayonö ökwödöma ina, jobadö da̧peachadödanöböködöja.