Hebreos 4 - Dios Iwene

—Dioskwö do̧'wo̧ luwo̧nö ö'wachö bamatö dö̧jobö jo̧be— jö̧ba̧lö, yöawina wene

¹ Isabenö chömöledö, yötawaduwakwö. Ina babebi Diosma ösödobe jo̧bakwö ö'wachö döbamatobö, do̧'wo̧ luwo̧nö. Jo̧ba iwene, da'dödöminenö yöbawö ujunina wenema, Ötjökwö ö'wachö bamataduwi, jö̧ba̧lö, ina 'dö̧ibajinokobe. Ökwödönö babe ju̧kwadönöbi Diosma yöbawö ujuninobe ja̧ wene, jo̧bakwö do̧'wo̧ luwo̧nö ö'wachö döbamati̧ wenema. Jo̧kwaobetjö̧ tjöbeba̧lö̧jönö omukwatö di̧'yaduwo, Diosnö ösödö. Jau chömöledö, Diosma ökwödötjö bakwo̧nö edö, Chedemi ötjökwö ö'wachö bamatö jö̧kö̧ja, jö̧a̧lapji jö̧ba̧lö, jo̧banö ösödö tjöbeba̧lö̧jönö omukwatö di̧'yaduwo.

² Isabenö chömöledö, Dios damötjö yöbawö ujuninama, Ötjönö ösödadöma tjo̧'wo̧ luwo̧ okwa ötjökwö ö'wachö tjöbamatobö jo̧be, jö̧ba̧lö, ökwödönöbi yöbawö ujuninobe. Ökwödöbi Dios iwene, otiwi̧ jawa wene a̧ja̧kwadödobetjö̧, ja̧ yöbawö ujunina wenema ökwödönöbi yöbawö ujuninobe chömöledö. Da'dödömine Dios iwene tja̧ja̧kwinadanö ökwödöbi da̧ja̧kwijatö. Ja̧danö, ja̧ wene a̧ja̧kwö dösödijatö, Isabenö ja̧ wenema otiwi̧ jwei̧ wene, jö̧ba̧lö. Jo̧kwaijayonö da'dödöminema Dios iwene tjöpöjödinobe, otiwi̧ jawa wene yöawinama. Tjöpöjödobetjö̧ ja̧ otiwi̧ jawa wene yöawi̧ma pjaatinokobe jobadönöma, tjo̧'wo̧ luwo̧ okwanöma. Jo̧kwaobetjö̧ Dioskwö ö'wachö bamatinöködö.

^3-4 Jo̧kwaijayonö ökwödö, Dios yöawi̧ ösödadöma, Jweinö yöbawo̧, jö̧ba̧lö, jo̧bakwö do̧'wo̧ luwo̧ okwanö ö'wachö bamatadösa. Jo̧kwaijayonö da'dödöminema Dios yöawi̧ tjöpöjödiökwe Diosma jwiinö ölabinobe jobadönöma. Jo̧kwaobetjö̧ jobadönö yöawinobe, Bidöma tjo̧'wo̧ luwo̧ okwanö ö'wachö tjöbamatökakwedö, jö̧ba̧lö. Chömöledö, baikwö laebobe Dios iwenetjö, Dios iteda yöawi̧ öpöjödadönö yöawinama: Ja̧danö, jwiinö chölabobetjö̧ jobadönö isabenö baledakwa̧ yöbawö lȩtebijatö, Isabenö ökwödöma kwiteboduwinö tekachaduwökakobe, otiwemi chiyemima, jö̧ba̧lö. Ja̧danö, yöbawö lȩtebijatö, Ötjökwö kwo̧'wo̧ luwo̧duwi kwanö ö'wachö kwöbamataduwökakobe, jö̧ba̧lö. Jejenö laebobe Dios iwenetjö, Bidöma tjo̧'wo̧ luwo̧ okwanö ötjökwö ö'wachö tjöbamatökakwedö, jö̧ba̧lö. Isabenö chömöledö, Diosma ajayitjöda jojodö jo̧bakwö tjo̧'wo̧ luwo̧nö ö'wachö tjöbamatobö ösödinobe. Ja̧danö jo̧ba otidawatjö, böjȩbi, mölejȩbi okobe jwiinö kaatakwawi̧ möletjö jemi tupakwöbi jojodö jo̧bakwö ö'wachö tjöbamatobö ösödinobe. Jejenö ösödö böjȩ otidinobe. Ja̧danö döwaisa chömöledö. Diosma iteda otidawatjö kaatakwawinobe, Dios iwene jejenö yöawobetjö̧. Baikwö laebobe Dios iwenetjö: Jelemutjö dötölataja mölema ida̧ökö otidijökötö Diosma, iteda otidawatjö okobe jwiinö kaatakwawobetjö̧. Ja̧danö, iteda otidawatjö okobe jwiinö kabatakwawajo̧ ö'wachö bamatijetö Diosma. Jejenö laebobe Dios iwenetjö. Chömöledö, ja̧ möletjö baikwö ichibö Diosma ösödobe jo̧banö ösödadö jo̧bakwö ö'wachö tjöbamatobö. Jojodö Dioskwö tjo̧'wo̧ luwo̧nö ö'wachö bamatö tjö̧jemima la'akatjöda ji̧nobe. Isabenö chömöledö, Diosma ajayitjöda jejenö ösödinajayonö da'dödöminema Dios yöawi̧ tjöpöjödobetjö̧ Dioskwö ö'wachö tjöbamatinokobe.

⁵ Jo̧kwaobetjö̧ Dios iwenetjö laebobe, Isabenö bidöma tjo̧'wo̧ luwo̧ okwa ötjökwö ö'wachö tjöbamatökakwedö, jö̧ba̧lö.

⁶ Chömöledö, Dios yöbawö ujuninama babebi badekwachobetjö̧ jojodötjö ju'wedöma Dioskwö ö'wachö tjöbamatobe. Jo̧kwaijayonö da'dödömine, Dios iwene, otiwi̧ jawa wene waisinadöma, ja̧ iwene öpöjödö tja̧ja̧kwokobetjö̧ Dioskwö tjo̧'wo̧ luwo̧nö ö'wachö tjöbamatinokobe.

^7-8 Jo̧kwaijayonö kwöwaisaduwa, da'dödöminetjö ba̧jekwadö, Moisés ömöayo̧ Josué öibinawö̧ma Dios otiwemi yöbawö junö iyemima tetjachinobe. Jobe böjȩtjö tjitebonö tetjachijayonö Dioskwö tjo̧'wo̧ luwo̧ okwanö ina ö'wachö tjöbamatinokobe. Jejenö Dios iwene i̧sebobe, Ötjökwö ö'wachö tjöbamati̧ma böjȩtjö tjitebonö tetjachinadamaökö, jö̧ba̧lö. Chömöledö, Diosma ju'wi möle, ja̧ Josué teachina möletjö lekwinemi baikwö mölema yöawinobe jojodö Dioskwö tjo̧'wo̧ luwo̧ okwanö ö'wachö tjöbamatakwa̧ mölema. Baikwö laebobe Dios iwenetjö, Dios da'dömine Davidnö yöawinama: Babema ötjö yötawi̧ kwa̧ja̧kwaduwena kwomajadeduwinö öpöjödö jökönaduwi. Jejenö laebobe Dios iwenetjö, Davidnö itebonö jo̧nö yöawinama. Chömöledö, ja̧ laebi̧ma ökwödönö yöawobe Dioskwö ö'wachö bamatö ja̧kwawama. Dioskwö ö'wachö tjöbamati̧ma tjitebonö ja̧nö tjuju̧kwinadamaökö. Tjo̧'wo̧ luwo̧ jawada. Böjȩnö ja̧nö Dioskwö tjo̧'wo̧ luwo̧nö ö'wachö bamatakwawama Dios yöawaja̧kwö, tjomajadenö ösödö ja̧kwawa chömöledö.

⁹ Jo̧kwaobetjö̧, Dios iwenetjö jweinö yöawobe, babebi ökwödö Dios ömöledöma, Dioskwö do̧'wo̧ luwo̧ okwanö ö'wachö bamatö duju̧kwi̧ma jo̧be, jö̧ba̧lö. Chömöledö, Dios ajayinöma, jelemutjö bakwöta möle böjȩ otidö kaatakwawaja̧ ikena jelemutjö dötölajata möle ö'wachö öbamatinadanö ökwödöbi ba̧kwȩlö̧jatebö jo̧bakwö do̧'wo̧ luwo̧ okwanö ö'wachö bamatö duju̧kwi̧ma jo̧be. Jo̧kwaobetjö̧ jwaikwöda di̧'yaduwo chömöledö, Diosnö do̧'wo̧ wana̧lö, jo̧bakwö ö'wachö bamatö duju̧kwökapji jö̧ba̧lö.

¹⁰ Chömöledö Dioskwö ö'wachö bamatö duju̧kwi̧ma ¿dakwöda? Yötawaduwakwö. Dioskwö ö'wachö bamatadöma idöda tjujulunö Dioskwö tjichibobö isakwöködö. Ja̧danö idöda tjujulunö, Otiwanö ja̧bö ju̧kwadösa, jö̧ba̧lö, Dios jobadönö ösödobö isakwöködö. Chömöledö, Dios iteda otidawatjö okobe jwiinö kaatakwawinadanö, Dioskwö ö'wachö bamatadöma idöda tjujulunö tjotidawatjö kabatibö ju̧kwadö, Ökwödöda dujulunö Dioskwöma dichibökakwedösa, jö̧ba̧lö.

¹¹ Jo̧kwaobetjö̧ chömöledö, ökwödöda dujulunö Dioskwö dichibobö domukwati̧ma kadatibaduwo. Ja̧danö Diosnö do̧'wo̧ wana̧lö, jo̧bakwö jwaikwöda di̧'yaduwo, jo̧bakwö ö'wachö bamatö dö̧jobö. Isabenö, jejenö di̧'yobö jo̧be chömöledö Diostjö 'da̧bachibö dö̧japji jö̧ba̧lö, jo̧bakwö ö'wachö bamatökönö. Jau chömöledö, jwaikwöda Dios wei̧ a̧ja̧kwö di̧'yaduwo da'dödömine tji̧'yinadanö di̧'yapji jö̧ba̧lö, jojodö deobetjö wobinadö, Dioskwö ö'wachö bamatinöködödanö.

—Dios iwene domajadenöbi do̧'wo̧ luwo̧nöbi tebachö pjaatobe— jö̧ba̧lö, yöawina wene

¹² Isabenö chömöledö, Dios wei̧ a̧ja̧kwö jwaikwöda di̧'yaduwo Dioskwö ö'wachö döbamatakobetjö̧ do̧'wo̧ luwo̧ okwanö. Dios iwene, Jesúsnötjö yöawinama yelösöda juluwobetjö̧ Dios wei̧ da̧ja̧kwobö jo̧be. Ja̧danö chömöledö, Dios iwene, 'yaba̧lo̧ iweneobetjö̧ 'yaa̧lakwawa wene, Dios ökwödökwö ja̧nö yöawi̧ma. Ja̧danö Dios iwenema, do̧'wo̧ luwo̧ okwanö teachobe, ökwödönö öbibö. Chömöledö wanedö yötawaduwakwö: Dios iwenema isa̧pi̧ bakwachekwadanö sȩi̧, jwiinö sȩapi̧danö ji̧. Ja̧danö, Dios iwenema isa̧pi̧ jwiinö sȩapi̧tjö o̧penönö sȩapi̧. Ja̧danö, isa̧pi̧ jwiinö sȩapi̧ tju̧yu̧ju̧ko̧emibi tjiwe'onöbi ichibinö 'wiibi̧danö Dios iwenema teachobe do̧'wo̧ luwo̧ okwanö. Jejenö Dios iwene do̧'wo̧ luwo̧ okwanö teachena ökwödö domukwati̧ma wajuwanö i̧sekwobe. Ja̧danö, Dios iwenema do̧'wo̧ luwo̧ okwanö tebachö Dios yöawi̧danö ökwödönö jweeba̧lobe, Kwomukwati̧ma biya̧ sula, jö̧ba̧lö.

¹³ Chömöledö ¿Diosma okobe jwiinö edokobeji̧? Edo̧. Ja̧danö ¿okobe jwiinö baledi̧ma wajwiobeji̧? Waiso̧, chömöledö. Jo̧kwaobetjö̧ Diosma isabenö okobe jwiinö domukwati̧ma waiso̧. Ja̧danö, domukwati̧ma jo̧banö i̧sekwi̧danö i̧sekwobe. Ökwödö domukwati̧ ja'yubebi dötabada̧loböma jwiobe chömöledö. Ja̧danö chömöledö, ju'wi möle, Dios öba a'o ja̧nö, ökwödöma datadakobe okobe jwiinö ja̧bö dö̧ji̧, do̧'wo̧ luwo̧tjö laebi̧ ja̧bö dö̧ji̧ma. Isabenö ökwödöma Dios wei̧ da̧ja̧kwinököbi, da̧ja̧kwinabi datadakwedösa. Isabenö chömöledö Dios wei̧, Jesúsnötjö yöawi̧ma a̧ja̧kwö dö̧jobö jo̧be.

—Jesús Diostjö jojodötjö ö'weje la'aka pjabato̧ baibanö jo̧, ökwödönö te'ada̧lö— jö̧ba̧lö, yöawina wene

¹⁴ Jo̧kwaobetjö̧ chömöledö, jwaikwöda di̧'yaduwo, domajadenö 'diinö do̧tjati̧danö, Ökwödöma Jesúsnö ösödadösa, dö̧jibinö pjabato̧nö, jö̧ba̧lö. Jejenö di̧'yobö jo̧be chömöledö, Jesúsda Diostjö jojodötjö ö'weje la'aka pjabato̧ baibanö ö̧jobetjö̧. Jo̧ba mölejȩbekwö kabekwachajinama Dios öba a'o jo̧.

¹⁵ Ja̧danö Jesús, Diostjö jojodötjö ö'weje la'aka pjabato̧ baibanö jo̧ma, jojodö tjime'dawi̧ baledi̧ma waiso̧. Ja̧danö jo̧banöbi, böjȩnö ö̧jena ime'dawinö baledijayonö la'akatjöda sulabenö ja̧inokobe. Chömöledö, Jesúsma jojodö tjime'dawi̧ma öwaisobetjö̧ ökwödönö pjaatobö waiso̧. Jejenö Jesúsda ökwödönö lȩlö̧jino edö Diostjö jojodötjö ö'weje la'aka pjabato̧ baibanö jo̧ma.

¹⁶ Jo̧kwaobetjö̧ Jesúsma, Diostjö jojodötjö ö'weje la'aka pjabato̧ baibanö jo̧obetjö̧ Diosnö yöbawö, abebö yebabökönö dichibaduwo chömöledö. Isabenö, Diosma ökwödönö lȩlö̧jino edobetjö̧, ökwödönö pjabato̧ do̧'wo̧ tjo̧bekwö dö̧jenama. Chömöledö, Dios, lȩlö̧jino edö pjabato̧nö do̧'wo̧ luwo̧ okwanö dichibenama, jo̧bakwö ö'wachö döbamatobe.