Hebreos 3 - Dios Iwene

—Jesús, Diostjö jojodötjö ö'weje la'aka pjabato̧nö omukwata̧lö ju̧kwaduwi— jö̧ba̧lö, yöawina wene

¹ Isabenö, Jesúsma jwaikwöda i̧'yinobe Dios wei̧ a̧ja̧kwö. Jo̧kwaobetjö̧ chö̧ja̧wo̧dö, ökwödönö, Dios mölejȩbe kwö̧jaduwobö 'da̧batö ujuninawö̧nöma yötawaduwakwö. Dios Itji̧ Jesúsnö omukwata̧lö kwö̧jaduwo. Omukwataduwi. Jo̧ba Jesús yödawökweda, Bitema dö̧jibinö pjabato̧, jö̧ba̧lö. Chömöledö, Jesús, Dios yöawi̧ yöawobö weinökwema Diostjö jojodötjö ö'weje la'aka pjabato̧ baibanö jo̧. Jo̧banö omukwata̧lö kwö̧jaduwo chömöledö.

—Jesús Moisésnötjö o̧penönö jo̧— jö̧ba̧lö, yöawina wene

² Isabenö chömöledö, Jesús, Dios ökwödönö pjaatobö weinökwema jwaikwöda, okobe jwiinö Dios wei̧ a̧ja̧kwö ö̧jinobe. Ja̧danö, damötjö da'dömine Moisésbi Dios wei̧ jwaikwöda a̧ja̧kwö ö̧jinobe, iteda ömöledönö te'ada̧lö, Dios jo̧banö ite'ada̧lobö weinawö̧nöma.

^3-4 Jo̧kwaijayonö chömöledö, Jesúsnö domukwatena, Moisésnötjö o̧penönö jo̧, jö̧ba̧lö, domukwatobö jo̧be. Wanedö yötawaduwakwö chömöledö, o̧donö wanedö: Böjȩtjö otiweju edinö jeju otidinanöma domukwatobe, Otiwanö otidinobe, jö̧ba̧lö. O̧doda domukwatokobe, o̧doma jo̧kwadama baibokobetjö̧. O̧do otidinanöda, Jo̧bada, jö̧ba̧lö domukwatobö jo̧be. Isabenö, o̧dotjö o̧penönö otidinanöda dösödobö jo̧be. Ja̧danö, jejenö domukwatobö jo̧be Moisésnö, Jesúsnö. Moisésma o̧do la'aka luwo̧ ömöayo̧danö wanekwachökwe, o̧do okwa otido̧danö. Jo̧kwaijayonö Jesús o̧do otidinadanö jo̧ wanekwachökwe, inesö jojodanö. Jo̧kwaobetjö̧ Jesúsnöda domukwatobö jo̧be, Jesúsma Moisésnötjö o̧penönö jo̧, jö̧ba̧lö. Ja̧danö chömöledö, o̧doma jo̧kwadama baibökeju ¿jö̧tö? Bakwo̧ otidenada o̧do baibeju. Jejenö jo̧be böjȩnö ju̧kwi̧bi, mölejȩnö ju̧kwi̧bi. Böjȩnö, mölejȩnö ju̧kwi̧ okobe jwiinö otidinama Diosda.

⁵ Ja̧danö chömöledö, Moisésma Dios ömöayo̧bina. Jo̧bama Dios wei̧ a̧ja̧kwö, okobe deinö Dios ömöledönö te'ada̧lö ö̧jinobe. Ja̧danö, Moisés yöawina Dios ju'wi möle yöawakwa̧ yöawinobe. Jejenö Moisés, Dios ömöayo̧ma otiwanö ö̧jinobe, Dios wei̧ a̧ja̧kwö.

⁶ Jo̧kwaijayonö Cristoma ömöayo̧nötjö o̧penönö inesö jo̧. Isabenö, jo̧bama Dios Itji̧. Ja̧danö, jo̧bama Dios i̧tji̧mu babibinadö tjuluwo̧. Ja̧danö, jobadönö otiwanö te'ada̧lo̧. Wanedö yötawa: Ökwödö, okobe deinö Cristonö ösödadöma o̧dodanö, Dios otidinejudanö döwanekwachobe. Ja̧danö Cristo, Dios Itji̧ma, Dios otidineju la'aka luwo̧danö jo̧, ökwödö Duluwo̧. Isabenö chömöledö, ökwödöma Dios otidinejuda wanekwachadösa yebabökönö jwaikwöda di̧'yitjö̧ma, Diosnö do̧'wo̧ wana̧lö. Jau chömöledö, ökwödöma Dios otidinejuda wanekwachadösa jwaikwöda Diosnö do̧'wo̧ wana̧lö di̧'yitjö̧ma, do̧'wo̧ luwo̧nö ösöwö, Cristoma dö̧jibinö pjaatinobetjö̧ Dios i̧tji̧mu babibinadösa, ja̧danö Dioskwö ba̧kwȩlö̧jatebö dö̧jakwedösa, jö̧ba̧lö.

—Da'dödömine tjö̧jinadanö kwuju̧kwaduwoko— jö̧ba̧lö, yöawina wene

⁷ Jo̧kwaobetjö̧ chömöledö, jwaikwöda Diosnö do̧'wo̧ wana̧lö di̧'yobö jo̧betjö̧ Dios O̧'wo̧ Luwo̧ yöawina, da'dödöminenö sulabenö tjö̧jina yöawinama tjöbeba̧lö̧jönö domukwatobö jo̧be. Isabenö chömöledö, Dios O̧'wo̧ Luwo̧ yöawina domukwatobö jo̧be, döwaisachibobö, Ökwödöma da'dödömine tjö̧ji̧danö dö̧joböma yelösöda jwiobe, jö̧ba̧lö. Baikwö laebobe Dios iwenetjö, Dios O̧'wo̧ Luwo̧ yöawina: Babema ötjö yötawi̧ kwa̧ja̧kwaduwena

⁸ kwomajadeduwi̧nö ösödö kwö̧jaduwo. Kwa'dödömineduwi, Moisés Egiptotjö laebinawö̧ tjö̧jinadanö kwö̧jaduwoko. Jobadöma tjomajadenö öpöjödö, ötjö weti̧ a̧ja̧kwökönö tjö̧jinobe. Jojodö deobe ja̧nö, ötjö weti̧ a̧ja̧kwökönö, Aaa, Diosma ökwödönö ölabokojobö dedaduwo, lȩebökena, jö̧ba̧lö, tjö̧jinobe.

⁹ Jobadöma, lekwe, cuarenta o̧biya jenanö ediatjinobe ötjö chujulu chi̧sebi̧ma. Jejenö tjedijayonö, ina a̧ja̧kwökönö tjö̧jinobe, Dedaduwo lȩebökena, jö̧ba̧lö.

¹⁰ Jejenö tjö̧jitjö̧ jwiinö chölabijatö jobadönöma, ja̧ möle ji̧nadönöma. Jobadönö edö chöwaisijatö, Bidöma ba̧kwȩlö̧jatebö tjomajadenö jelobekwöda omukwatö tji̧'yobe, jö̧ba̧lö. Ja̧danö, Diosnö waisadösa, jö̧tja̧lijayonö jobadöma tjö̧jobö weti̧ a̧ja̧kwökönö ja̧dö, jö̧ba̧lö, chöwaisijatö.

¹¹ Ja̧danö, jwiinö chölabobetjö̧ jobadönö isabenö baledakwa̧ yöbawö lȩtebijatö, Isabenö ökwödöma kwiteboduwinö tekachaduwökakobe, otiwemi chiyemima, jö̧ba̧lö. Ja̧danö yöbawö lȩtebijatö, Ötjökwö kwo̧'wo̧ luwo̧duwi okwanö ö'wachö kwöbamataduwökakobe, jö̧ba̧lö. Jejenö laebobe Dios iwenetjö. Jejenö laebobe Dios O̧'wo̧ Luwo̧ yöawina da'dödöminenö. Ja̧danö jobadö, lekwe o̧bi̧ya jojodö deobe ja̧nö kwebachadöma tjitebonö tebachökönö Dioskwö ö'wachö tjöbamatinokobe, Dios otiwemi iyemima. Jelobekwö omukwatö Dios wei̧ a̧ja̧kwökönö tji̧'yobetjö̧ tetjachinokobe Dios otiwemi iyemi, jo̧bakwö ö'wachö tjöbamatobö iyemima.

¹² Jo̧kwaobetjö̧ chö̧ja̧wo̧dö, ökwödö bakwo̧nökwena tjöbeba̧lö̧jönö kwite'ada̧laduwo kwo̧'wo̧ luwo̧duwinö, ökwödötjö ju'wedöbi da'dödömine sulabenö tji̧'yinadanö kwi̧'yaduwapji jö̧ba̧lö, kwomajadeduwinö Diosnö jwiinö öpöjödö, yaba̧lo̧ Diosnö kabatibö.

¹³ Isabenö, tjöbebalö̧jönö ökwödödada kwite'ada̧laduwobö jo̧be chömöledö. Ja̧danö, bakwöta mölekwena dö̧ja̧wo̧dönö pjabatö yödawobö jo̧be, ina böjȩnö dö̧jayi. Pjabatö yödawo tjo̧'wo̧ tjujuluwachibanö, ökwödötjö ju'wedöma, tjuubiya 'dibö ja̧nö, jelobekwö idöda sulabenö tjomukwati̧da omukwatö tji̧'yapji jö̧ba̧lö. Chömöledö, wanedö yötawaduwakwö, suli̧ wanedöma: Suli̧ma omöna yöbawo̧ yöa̧li̧danö ji̧, jojodönö öbibö jelobekwö omukwatö tji̧'yobö. Jo̧kwaobetjö̧ kwö̧ja̧wo̧dönö yöbawö pjakataduwobö jo̧be, suli̧ma ökwödötjö ju'wedönö tjo̧'wo̧ luwo̧nö jelobekwö tjomukwatobö öibapji jö̧ba̧lö, Diosnö katjatibobö.

¹⁴ Isabenö chömöledö, kwö̧ja̧wo̧dönö pjakataduwo ökwödö ökobe deinö jwaikwöda kwi̧'yaduwobö Cristonö ösödö. Jejenö kwi̧'yaduwena Cristokwö dötewi̧danö dötewinö kwi̧'yaduwakobe. Chömöledö, Cristonö ösödö jwaikwöda kwi̧'yaduwena, ajayinö do̧batö kweminaduwena kwösödaduwi̧danö ösödö, isabenö Cristokwö dötewinö kwi̧'yaduwobe, jo̧bakwö bakobe kwö̧jaduwi̧danö. Jo̧kwaijayonö, Cristonö ösödö jwaikwöda kwi̧'yaduwökötjö̧ma da'dödöminenö baledinadanö baledena ökwödönöma. Jo̧kwaobetjö̧ chömöledö 'diinö do̧kataduwi̧danö Cristonö kwösödaduwi̧ma 'diinö do̧batö kwi̧'yaduwo, Ökwödöma tupakwö Cristokwö 'ya̧dösa, dö̧jibinö pjabato̧kwö, jö̧ba̧lö. Chömöledö, jejenö do̧'wo̧ luwo̧nö jemi tupakwö jwaikwöda Cristokwö dötewinö 'ya̧dösa, jo̧bakwö bakobe ja̧nö.

¹⁵ Ja̧danö chömöledö, kwo̧'wo̧ jwibibökönaduwi Dios damötjö yöawina, iteda iwenetjö laebi̧, bena yemidanö chiwȩyudi̧ma: Babema ötjö yötawi̧ kwa̧ja̧kwaduwena kwomajadeduwi̧nö ösödö kwuju̧kwaduwo. Kwa'dödömine, Moisés Egiptotjö laebinawö̧ tjomajadenö öpöjödö tjö̧jinadanöma kwuju̧kwaduwoko, ötjö yötawi̧ a̧ja̧kwökönöma. Jobadöma, jojodö deobe ja̧nö, ötjö weti̧ a̧ja̧kwökönö tjö̧jinobe. Ja̧danö, a̧ja̧kwökönö tjö̧jitjö̧ jwiinö chölabijatö jobadönöma Jejenö laebobe Dios iwenetjö. Chömöledö, ökwödödada pjabatö yöbawö kwö̧jaduwobö jo̧be, Diosnö ösödö jwaikwöda kwi̧'yaduwobö, jo̧ba wei̧ a̧ja̧kwö. Chömöledö, da'dödömine ba̧kwȩlö̧jatebö Dios wei̧ a̧ja̧kwökönö tji̧'yinadanö kwi̧'yaduwoko.

¹⁶ Isabenö chömöledö, kwomajadeduwinö Diosnö ösödö kwö̧jaduwobö jo̧be, da'dödömine, Dios iwene yöawawö̧ tjö̧jinadanömaökö. Ja̧danö da'dödömine, tjomajadenö öpöjödö ji̧nadöma ¿Diosnö wajwibinadöji̧? Waisinadö chömöledö. Jobadöma Dios pjaatinawö̧, Moisés Egiptotjö laebinawö̧ma. Diosnö, jobadönö Egiptotjö latjebobö pjabatinanö tjöwaisijayonö tjomajadenö öpöjödö tjö̧jinobe, Dios wei̧ a̧ja̧kwökönö.

¹⁷ Ja̧danö, Dios cuarenta o̧biya baledinö ölabinawö̧ma ¿ju'wedö, Diosnö wajwibinadöji̧? Jobadöda chömöledö. Diosnö waisinadö. Tjöwaisijayonö tjomajadenö Dios yöawi̧ öpöjödö tjö̧jinobe, sulabenö omukwatö. Jobadöda, jojodö deelö wobinadöma.

¹⁸ Ja̧danö Dios, Chiyemima la'akatjöda tebachökönö ötjökwö ö'wachö tjöbamatökakwedö, jö̧ba̧lö, lȩebinawö̧ma ¿ju'wedöji̧, Diosnö wajwibinadöma? Ju'wedöböködö, jobadöda waisinadö. Chömöledö, jobadöda, Diosnö tjöwaisijayonö tjomajadenö öpöjödö Dios wei̧ a̧ja̧kwökönö tjö̧jinobe.

¹⁹ Jo̧kwaobetjö̧ chömöledö jobadö tjö̧jinama ökwödönö baikwö wajuwanö i̧sebobe: Da'dödöminema, Dios wei̧ öpöjödö tja̧ja̧kwokobetjö̧ Dios jobadönö lȩbebö weinokobe Canaán niji tetjachobö, iteda iyemima. Jejenö jobadö Dioskwö do̧'wo̧ luwo̧nö ö'wachö tjöbamatobö jwiinobe. Chömöledö jobadö Diosnö öpöjödö tjö̧jinadanöma kwuju̧kwaduwoko.