Hebreos 2 - Dios Iwene

—Dios Itji̧ yöawina tjöbeba̧lö̧jönö omukwatö, do̧'wo̧ luwo̧ okwanö do̧tjati̧danö do̧batö di̧'yobö jo̧be— jö̧ba̧lö, yöawina wene

¹ Isabenö chömöledö, döwaisa. Ökwödöma Dios Itji̧ yöawinatjöda da̧ja̧kwijatö Dios yöawina ökwödönöma. Jau, Dios Itji̧, jwiinö inesö jo̧, ángelesdönötjöbi o̧penönö inesö jo̧ yöawinatjöda da̧ja̧kwijatö Dios yöawinama. Ja̧danö, Dios yöawina jejenö da̧ja̧kwobetjö̧ Dios Itji̧ yöawina tjöbeba̧lö̧jönö omukwatö di̧'yobö jo̧be chömöledö. Isabenö, tjöbeba̧lö̧jönö omukwatö di̧'yobö jo̧be, Ökwödöma Dios Itji̧ otiwa jawa wene, dö̧jibinö pjabatö yöawina wene ösödadösa, jö̧ba̧lö. Chömöledö, ja̧ Dios Itji̧ yöawina dösödi̧ma do̧'wo̧ luwo̧ okwanö do̧tjati̧danö do̧batö di̧'yaduwo jö̧ta̧la. Isabenö chömöledö, Dios Itji̧ yöawina do̧'wo̧ luwo̧ okwa do̧batö di̧'yaduwo, jo̧batjö 'da̧bachibö jelobekwö omukwatö di̧'yapji jö̧ba̧lö, jo̧ba yöawina öpöjödö.

^2-3 Ja̧danö chömöledö, Diosma jweinö omukwatö lȩebakobe jo̧batjö 'da̧bachibö, jo̧ba yöawina öpöjödö 'ya̧dönö. Omukwataduwi damötjö da'dödöminenö baledina, Dios yöawi̧ öpöjödinadönöma. Baikwö baledinobe: Diosma iteda iwene yöawinobe ángelesdönö, Moisésnö yötjawobö. Jemi ikenama Moisésma yöawinobe jojodönö, da'dödöminenöma. Ja̧ wenema Dios weina wene, jojodö a̧ja̧kwö tjö̧jobö wei̧. Ja̧danö, ja̧ wenema isabenö ji̧ jawa wene. Ja̧danö, Diosma iteda weina wene a̧ja̧kwöködönö sulabenö ja̧tji̧ mikwa baibanö lȩebinobe. Chömöledö, Diosma lȩebinobe iteda weinatjö ja̧'yubebi a̧ja̧kwö̧kö̧nöma. Ja̧danö, jo̧ba weina a̧ja̧kwökönö, ja'yube sulabenö ja̧bo̧nöbi, ja̧danö jwiinö sulabenö ja̧bo̧nöbi bakwainö edö lȩebinobe Diosma. Isabenö chömöledö, Dios wei̧, Moisés yöawina ja'yubebi a̧ja̧kwöködöma, Dios lȩebi̧tjö dötjibajoböma yelösöda jwiinobe. Jo̧kwaobetjö̧ ¿ökwödöja chömöledö, babe ju̧kwadöma? Dios yöawi̧, iteda Itji̧ yöawina, ökwödö dö̧ji̧ da̧ja̧kwinama jwiinö otiwa jawa wene, Dios dö̧jibinö pjaati̧ wenema. Ja̧ yöawina jwiinö mikwawi̧ yöawinama, ángelesdö Moisésnö yötjawinatjö o̧penönö mikwawi̧ yöawina. Jo̧kwaobetjö̧ Dios Itji̧ yöawina ösödö di̧'yobö jo̧be chömöledö. Ja̧danö ¿dakwö baledenada ökwödönöma, Dios dö̧jibinö pjaati̧ otiwa jawa wene da̧ja̧kwijayonö döpöjöditjö̧ma? ¿Dios lȩebi̧tjö dödibajenaji̧ iteda Itji̧ dö̧jibinö pjaati̧ yöawina öpöjödö di̧'yitjö̧ma? Chömöledö döbibajöködösa. Diosma ökwödönö lȩeboböda jo̧be, jo̧batjö 'da̧bachibö di̧'yitjö̧ma. Da'dödömine, Dios wei̧ a̧ja̧kwöködönö lȩebi̧ ji̧nadanö isabenö ökwödönöbi lȩebobö jo̧be, Dios Itji̧ yöawina döpöjöditjö̧ma. Ja̧danö chömöledö, Dios Itji̧ yöawina, ökwödö dö̧ji̧ da̧ja̧kwi̧ma, jwiinö otiwa jawa wene, Dios dö̧jibinö pjaati̧ma wene. Ökwödöma ¿dakwö da̧ja̧kwinada ja̧ dö̧jibinö pjaati̧ wenema? Ja̧ wenema Duluwo̧ Jesús ajayinö yöawinobe iteda ö̧jinena ju̧kwinadönö. Ja̧danö, ju'wi möle jobadö Duluwo̧ Jesús yöawi̧ a̧ja̧kwinadötjö ju'wedöma ökwödönö yötjawinobe, Dios otiwa jawa wene, dö̧jibinö pjaati̧ wenema. Jweinöda yötjawinobe, Isabenö chömöledö, Jesúsma ökwödö dö̧jibinö pjabato̧, jö̧ba̧lö.

⁴ Ja̧danö, Diosma iteda ujulu i̧sebinobe jobadönötjö jojodö tjöwaisachibobö, Bidö yötjawi̧ma isabenö ji̧ jawa wene, jö̧ba̧lö. Yelösöda jojodö la'akatjöda edajitjökö jawabi i̧sebinobe Diosma, iteda ujulu, jobadö Jesús yöawina yöbawadö yötjawonö. Isabenö, Jesús yöawina yötjawonö Diosma iteda ujulu i̧sebinobe, ju'wi jawabi, ju'wi jawabi i̧sebö, iteda jwiinö ujuluma, jobadö yöbawadönötjö. Ja̧danö, Diosma jobadö Jesús yöawina yöbawadönöma iteda O̧'wo̧ Luwo̧ ujulutjö iyabinobe jobadö yöbawadönö, bakwo̧nökwena jojodönö pjatjatobö. Ja̧danö, okobe jwiinö Dios iteda ujulu i̧sebi̧ma iteda ösödi̧danöda baledinobe jojodö tjöwaisachibobö, Bidö yötjawi̧ma isabenö ji̧ wene, jö̧ba̧lö. Chömöledö, Diosma iteda ujulu i̧sebobetjö̧, Jesús yöawina isabenö ji̧ wene, jö̧ba̧lö, Jesús yöawina tjöbeba̧lö̧jönö omukwatö di̧'yobö jo̧be. Jo̧ba yöawina wenema jwiinö otiwa jawa wene, dö̧jibinö pjaati̧ wene. Jo̧kwaobetjö̧ ja̧ yöawinama, do̧'wo̧ luwo̧ okwanö do̧tjati̧danö do̧batö di̧'yobö jo̧be jelobekwö omukwatö di̧'yapji jö̧ba̧lö, Jesús yöawina öpöjödö. Chömöledö jelobekwö omukwatö 'ya̧dönöma, Dios lȩebakwawö̧.

—Dios jojodönö 'da̧batö ujuninobe webö tjö̧jakwedö batjibobö— jö̧ba̧lö, yöawina wene

⁵ Chömöledö yemidanö, jemi tupakwö yöta̧la ángelesdönö, Dios jojodönö pjatjatobö weinawö̧nöma. Abebö cha̧ja̧kwaduwakwö. Diosma jobadö ángelesdönöma ¿'da̧batö ujuninaji̧ ju'winö böjȩ balekwöjȩ, böjanö yötawajö̧jȩ baibajena la'aka luwedö tjuju̧kwobö? Jejenömaökö. Sule jojodönö, Jesúsnö ösödadönöda 'da̧batö ujuninobe Diosma, böjȩ balekwöjȩ baibajena la'aka luwedö tjuju̧kwobö, ángelesdönömaökö.

⁶ Isabenö chömöledö, jejenö döwaisa Dios iwenetjö laebobetjö̧, Diosma jojodönö 'da̧batö ujuninobe la'aka luwedö batjibobö, jö̧ba̧lö. Baikwö laebobe: Dios, ökwödö jojodöma, jo̧kwadabedösa. Inesö jö̧ködösa. Jejenöijayonö ökwöma ökwödönö edö, Bidöma inesö jojodö, jö̧ba̧lö, omukwatö jo̧ja. Ja̧danö, ökwödöma jo̧kwadabedödijayonö ökwöma kwite'ada̧lobe ökwödö jojodötjöda tupadanö ju̧kwadönöma.

⁷ Yelösöda ökwödönö omukwatö otiwanö te'ada̧lo̧ja. Ja̧danö, ökwödöma jo̧kwadabedödijayonö ökwödönö 'da̧batö kwujuninobe ju'wi möle webö dö̧jobö. Ja̧ mölema yökawakobe, Bidö jwiinö otiwadönö kabebö chö̧wana la'aka luwedö batjibanö, okobe jwiinö webö tjö̧jobö, jö̧ba̧lö. Jo̧kwaijayonö babema jejenömaökö. Babema böjȩnö dö̧jena ángelesdötjö ja'yubeda baikwönöda dö̧jobö weköbinobe. Jo̧kwaijayonö ju'winö kabebö kwö̧wanakobe inesö la'aka luwedö dö̧jinö.

⁸ Dios, ökwödö jojodöma, ju'winö böjȩnö ja̧nö wedena okobe jwiinö wedakwedösa, ja'yubebi ji̧bökönö, ökwöda 'da̧batö kwujuninobetjö̧, böjȩ okobe jwiinö la'aka luwedö dö̧jobö. Jejenö laebobe Dios iwenetjö, Jojodönöda, ángelesdönömaökö Dios 'da̧batö ujuninawö̧ma, ju'winö okobe jwiinö webadö tjuju̧kwobö, jö̧ba̧lö. Jo̧kwaijayonö chömöledö ökwödö, Dios la'aka luwedö badibobö 'da̧batö ujuninawö̧ma ina böjȩnö dö̧jena böjȩma webö dö̧jokobe. Ina inesöma weböködösa.

—Dios iteda Itji̧nö, imidawakwo̧nö weinobe jojoda baibanö öbötjachobö— jö̧ba̧lö, yöawina wene

⁹ Jo̧kwaijayonö döwaisa, Ida̧ökö bakwo̧ inesö jo̧ ö̧jobe, jö̧ba̧lö, Jesúsda, Dios Itji̧. Ja̧danö, Diosma jo̧banö weinobe böjȩkwö jojo baibanö öbötjachobö. Jejenö Jesúsma böjȩnö ja'yubeda lekwe ö̧jinobe, ángelesdönötjö ja'yubeda baikwönöda ja̧nö, jojodö tjö̧ji̧danö. Isabenö chömöledö, Dios ökwödö jojodönö lȩlö̧jino edobetjö̧ iteda Itji̧ Jesúsnö weinobe usula emawobö, dumusidi̧ midawö. Jejenö Jesúsma jojodö tjowobalema balekwo̧da woinobe, jojodö tjo̧'wo̧ luwo̧nö wotjokobö. Ja̧danö, Jesús usula emawö midawö ö'wö baibiökwe Diosma jo̧banö edinobe, Bitema jwiinö otiwo̧, ötjö chö̧bemi chöwaisobekwöchobe inesö ö̧bena öbamatakwo̧, jö̧ba̧lö. Isabenö chömöledö, ökwödö jojodö böjȩnö inesö jojodöböködö dö̧jijayonö do̧'wo̧ luwo̧ okwanö döwaisa bakwo̧nö, jwiinö inesö jo̧nöma. Jo̧bama Jesúsda, midawö wobinama. Isabenö, jo̧bama inesö la'aka luwo̧.

¹⁰ Ja̧danö chömöledö, döwaisa. Diosma okobe jwiinö otidina. Ja̧danö, okobe jwiinö otidinama iteda otiwi̧, ja̧danö iteda ujulu i̧sebobö otidinobe. Ja̧danö, Diosma iteda otidinawö̧nö itekwöda ba̧kwȩlö̧jatebö tjö̧jobö ösödo̧, jwiinö otiwobe ö̧jobema. Jo̧kwaijayonö Diosma ökwödönö, suli̧ juna̧ladönöma ¿dakwö teatoböda jobekwö? Teatokobe chömöledö. Jo̧kwaijayonö jweinö omukwatö Diosma badedö ujuninobe iteda Itji̧ Jesúsnöma, ökwödönö pjaatobö. Jejenö omukwatö weinobe Itji̧ Jesúsnö böjȩkwö usula emawö woobö, ökwödö dumusidi̧ midawö. Jejenö Jesús, Dios weinökwema ökwödö dö̧jibinö okobe jwiinö pjabato̧ baibinobe. Chömöledö, okobe jwiinö dö̧jibinö pjaatinobe Jesúsma, ja'yubebi ji̧bökönö. Ja̧danö, Jesús ökwödö dö̧jibinö pjabatinama ökwödö, Dios ju'wedö i̧tji̧munö bakwo̧ öibi̧danö öibakwo̧ Dios jwiinö otiwemi ö̧jobekwö, iteda otiwi̧ dewinö idejati̧ i̧sebemima. Isabenö chömöledö, Diosma jweinö omukwatö badedö ujuninobe okobe deinö i̧tji̧mu jo̧bakwö tjö̧jobö jwiinö otiwobema. Itji̧ Jesúsbi, ju'wedö i̧tji̧mubi okobe deinö jo̧bakwö tjö̧jobö jweinö omukwatö badedö ujuninobe Diosma.

¹¹ Isabenö chömöledö, Jesús Abe'do, ja̧danö ökwödö, Dios ju'wedö i̧tji̧mubi mölejȩbe Dabe'doma bakwo̧da. Jo̧kwaobetjö̧ Diosma ajayinöma otiwanö badedö ujuninobe iteda i̧tji̧muma bakobe dö̧jobö Dios jwiinö otiwi̧ ö̧jobema, okobe deinö, Jesúsbi, ökwödö Dios ju'wedö i̧tji̧mubi. Ja̧danö chömöledö, ökwödöda ju'wedö Dios i̧tji̧muma, Jesúsnö ösödadö. Ja̧danö, ökwödö mölejȩbe Dabe'dobi Jesús Abe'dobi bakwo̧da, Diosda. Isabenö chömöledö, Jesús, ökwödö dusuli̧ dichö lobinabi, ja̧danö ökwödö dichö loinawö̧bi Dabe'doma bakwo̧da. Ja̧danö, Dabe'do bakwo̧daobetjö̧ Jesúsma o̧'wo̧ ösöwanö, tabakwökönö öabobe ökwödönö, Chö̧ja̧wo̧dö, jö̧ba̧lö.

¹² Ja̧danö, Dios iwenetjö baikwö laebobe, Jesús iteda Abe'do, Diosnö jö̧a̧lina: Chabe'do ökwönö ösödö okobe deinö chö̧ja̧wo̧dönö ökwö pjakatina yötawakwo̧sa, Diosma pjabato̧, jö̧ba̧lö. Ja̧danö, jobadökwö ko̧ko̧kwa̧lö ökwönö ösödö lo̧takwo̧sa, Jwiinö otiwo̧ja, jö̧ba̧lö. Jejenö laebobe Dios iwenetjö, Jesús ö̧ja̧wo̧dönö Diosnö yöawakwa̧. Chömöledö isabenö, ökwödöma Jesús ö̧ja̧wo̧dösa.

¹³ Ja̧danö, ju'wi Jesús jö̧a̧linabi laebobe Dios iwenetjö, baikwö: Diosnöda cho̧'wo̧ wana̧lö jo̧sa. Jejenö laebobe, Jesúsma iteda ö̧ja̧wo̧dödanö Diosnö o̧'wo̧ wana̧lö jo̧, jö̧ba̧lö. Ja̧danö ju'wibi laebobe baikwö: Bena chö̧ja, Dios i̧tji̧mu, ötjönö iyinawö̧kwö. Jejenö laebobe Jesús jö̧a̧lina iteda ö̧ja̧wo̧dönö. Jo̧kwaobetjö̧ chömöledö, wajuwanö döwaisachibobö jo̧be, Ökwödöma Dios ju'wedö i̧tji̧musa, Jesús ö̧ja̧wo̧dösa, jö̧ba̧lö. Isabenö chömöledö, Dabe'doma bakwo̧da, Diosda, ökwödöbi Jesúsbi do̧'wo̧ döwana̧lökwema.

¹⁴ Ja̧danö chömöledö, ökwödö Dios ju'wedö i̧tji̧mu ötjabiwö̧ma jojodödasa. Diteba'obi dökwösobubi juna̧ladösa. Ja̧danö, woba jojodösa. Jo̧kwaobetjö̧ Jesúsbi, ökwödönö pjaatobö jojoda baibanö öbötjachinobe ökwödö woba jojodödanö. Isabenö Dios Itji̧ma jojoda öbötjachinobe woobö ökwödö dusula dumusidi̧ midawö. Ja̧danö, jo̧bama dumusidi̧ midawö woenama Awetjanö ujuluwinobe. Jo̧ba Awetjama yelösöda juluwo̧ jojodönö Diostjö 'da̧bachibö wotjobö öibobö. Jo̧kwaijayonö Jesúsma jo̧banö ujuluwinobetjö̧ Dios i̧tji̧mu babibinadönö Diostjö 'da̧bachibö wotjobö öbibökö. Chömöledö jo̧ba Awetjama ujulu jwibo̧ ökwödö Jesúsnö do̧batö eminadönö öibobö, Diostjö 'da̧bachibö wodoböma.

¹⁵ Ja̧danö chömöledö, Jesús midawö woenama ökwödönö Awetjatjö 'döbebö pjaatinobe, ba̧kwȩlö̧jatebö Diostjö 'da̧bachibö woawatjö dö̧jibinö. Chömöledö, ökwödöma okobe jwiinö dö̧ji̧ma yebabinöda ji̧abinadösa, wodakwa̧ omukwatö. Ja̧ yedabi̧tjö dö̧jibobö yelösöda jwiinobe. Jejenö yebabinö dö̧jobetjö̧ Awetja ka̧lenasonö yö̧bebö ujuninawö̧da ji̧nadösa chömöledö. Jo̧kwaijayonö Jesúsma, ökwödö dumusidi̧ midawö woena Awetjanö ujuluwinobe, ökwödö jo̧batjö dö̧jibinö pjabatö. Ja̧danö, babema yebabökönöda ju̧kwadösa chömöledö, Jesúsma Awetjanö ujuluwinobetjö̧.

¹⁶ Ja̧danö chömöledö, ökwödö jojodönöda, ángelesdönömaökö, Dios Itji̧ Awetjatjö dö̧jibinö pjaatinawö̧sa. Ökwödö, Abrahamtjö tupadanö jojodö ötjabiwö̧nö, jojodönöda pjaatinobe, ángelesdönömaökö.

¹⁷ Jo̧kwaobetjö̧ Dios Itji̧ma ökwödö jojodönö pjaatobö jojo babiböda öbötjachinobe. Ángelso̧danö baibinokobe Dios Itji̧ma. Jojoda baibinobe. Jojodanö bakwainö babibö öbötjachinobe. Chömöledö ju'wima jwiinobe Jesús jojodönö pjaatoböma. Jojo babiböda dö̧jibinö pjaatinobe. Ja̧danö, chömöledö Dios Itji̧ma jojoda baibinobetjö̧ Diostjö jojodötjö ö'weje la'aka pjabato̧ baibanö jo̧. Ja̧danö chömöledö, döwaisa. Böjȩtjö Diostjö jojodötjö ö'weje pjabatadöma jojodö Diosnö tjiyi̧ iyadö, tjumusidi̧ midö. Jejenö jobadö Diostjö jojodötjö ö'weje pjabatadö jojodönö tjite'ada̧li̧danö Dios Itji̧, Diostjö jojodötjö ö'weje la'aka pjabato̧ baibanö jo̧ma jojodönö ite'ada̧lobe. Ja̧danö, Dios Itji̧ma jojodaobetjö̧ jojodönö baledi̧ma jo̧banöbi baledinobe. Jejenö baledobetjö̧ Dios Itji̧ma jojodönö baledi̧ öwaisachibinobe. Ja̧danö, jojodönö baledi̧ öwaisobetjö̧ Dios Itji̧ma, Diostjö jojodötjö ö'weje la'aka pjabato̧ jo̧ babibajo̧ma lȩlö̧jino edö jwaikwöda Dios wei̧ a̧ja̧kwö pjaatinobe jojodönöma. Ja̧danö, jo̧ba Dios Itji̧ma, ökwösobu ebawinö itedada iyawinobe. Ja̧danö, itedada iyawö dumusidi̧ midawö woinobe, Diosma ökwödö dusuli̧ söbebö loobö.

¹⁸ Isabenö chömöledö, Dios Itji̧ jojo baibanö öbötjachinobetjö̧ ökwödönö okobe jwiinö waisö pjaatobe. Ökwödönö lȩlö̧jino edö, Dios wei̧ okobe jwiinö a̧ja̧kwö dö̧jibinö pjaatinobe. Ja̧danö, dö̧jibinö pjaati̧damaökö chömöledö. Böjȩnö ja̧nö usula demawena jo̧bama ökwödönö pjabato̧ jelobekwö omukwatö, Dios yöawi̧ öpöjödö di̧'yapji jö̧ba̧lö. Yelösöda Dios Itji̧ma jwiinö waiso̧, usula demawena jelobekwö omukwatö di̧'yobö domukwati̧ma. Isabenö waiso̧ jo̧banöbi jejenö baledinobetjö̧. Jo̧bama böjȩnö ja̧nö usula emawinobe. Ja̧danö, usula emawobetjö̧ jo̧babi omukwatinobe, Jelobekwö omukwatö chi̧'yo, jö̧ba̧lö, usula emawökönö. Jo̧kwaijayonö jelobekwö omukwatö i̧'yinokobe. Dios Itji̧ma jwaikwöda jemi tupakwö i̧'yinobe, Dios wei̧ a̧ja̧kwö. Chömöledö, jejenö jo̧banö baledinobetjö̧ Dios Itji̧ma ökwödö jojodö usula emawö domukwati̧ öwaisobe. Ja̧danö, jejenö öwaisobetjö̧ jo̧bama ökwödönö jwiinö pjabato̧ jemi tupakwö jwaikwöda Dioskwö di̧'yobö.