Hebreos 13 - Dios Iwene

—Ju'wedönö pjabatö kwö̧jaduwo— jö̧ba̧lö, yöawina wene

¹ Chömöledö yötawaduwakwö. Babe kwö̧ja̧wo̧döduwinö ösödabikwawö kwö̧jaduwi̧danö jemi tupakwöbi jwaikwöda ösödabikwawö kwi̧'yaduwo.

² Ja̧danö, jelobetjö ichadönöma otiwanö te'ada̧lö tekataduwo, tjukwa iyö, tjabemibi webö. Ja̧danö damötjö ji̧nadötjö ju'wedöma, Jojodönöda pjabatö tedata, jö̧ba̧lö, tjomukwatijayonö ángelesdönöda tjetjatinobe. Jo̧kwaobetjö̧ chömöledö, Bidö jelobetjö ichadönö pjadatawö̧ma ángelesdöena, jö̧ba̧lö, otiwanö pjabatö kwite'ada̧laduwo.

³ Ja̧danö, kwö̧ja̧wo̧döduwi ka̧lena ba̧kwawejunö ba̧jadönö pjakataduwo. Jobadönö kwo̧'wo̧duwi tjo̧bekwö edö, Ökwödöbi domajade okwanö jobadökwö bakobe usula emawö tjö̧baji̧danö ka̧lena ba̧kwawejunö ba̧jadösa, jö̧ba̧lö. Ja̧danö, ju'wedö usula emawadönöbi jejenö kwomukwataduwo, Jobadökwö bakobe usula tjemawi̧danö usula emawadösa domajade okwanö, jö̧ba̧lö. Chömöledö, ökwödöbi jojodököbaduwobetjö̧ kwöwaisaduwa, ja̧ usula emawakwawama jwiinö nii̧, jö̧ba̧lö.

—Yebabinö omukwatö otiwanö kwuju̧kwaduwo kwilekwokwö, ja̧danö kwilekwekwö— jö̧ba̧lö, yöawina wene

⁴ Ja̧danö chömöledö, ju'wibi yötawaduwakwö. Ökwödötjö kwilekwonö kwemobö, ja̧danö kwilekwenö kwemobö omukwatadönö yötawa. Yebabinö omukwatö kwemaduwo kwilekwonö, ja̧danö kwilekwenö. Ja̧danö, eminadönöbi yötawa. Yebabinö omukwatö kwuju̧kwaduwo kwilekwokwö, ja̧danö kwilekwekwö. Ja̧danö, okobe deinö yötawaduwakwö. Emökönöma kwalewaduwa, Diosma emökönö alewadönö lȩebakobetjö̧. Ja̧danö, Diosma jeluju jilekwenö alewujunö, jelo̧ ilekwonö alewo̧nö lȩebakwo̧.

—Jwiinö mikwawinö ji̧ kwujuna̧laduwi̧ omukwatö kwuju̧kwaduwo— jö̧ba̧lö, yöawina wene

⁵ Ja̧danö, ju'wibi yötawaduwakwö. Balada kwujuna̧laduwi̧dama omukwatö kwö̧jaduwoko chömöledö. Otiwanö omukwataduwi tjo̧wi̧ kwujuna̧laduwi̧ma, ju'wi jawabi, ju'wi jawabi, kabatökönö kwemaduwobö omukwatökönö. Chömöledö, ökwödöma jwiinö mikwawinö ji̧ juna̧ladöja, Diosma ökwödönö ile niebobetjö̧. Kwomukwataduwo Dios ökwödönö yöawina. Baikwö laebobe Dios iwenetjöma, iteda yöawina: Ökwödönö la'akatjöda le'dedibö chȩwa̧jökakwo̧sa. La'akatjöda ökwödönö katatibökakwo̧sa. Jejenö laebobe Dios iwenetjö, Diosma ba̧kwȩlö̧jatebö ökwödökwö jo̧, jö̧ba̧lö.

⁶ Ja̧danö, Diosma ökwödökwö ba̧kwȩlö̧jatebö ö̧jobetjö̧ yebabökönö dö̧jobö jo̧be. Baikwö laebobe Dios iwenetjö: Ötjönö pjabato̧ma Duluwo̧da. Jo̧bama ötjönö pjaatobetjö̧ yebabökönö jo̧sa. Ja̧danö pjaatobetjö̧ jojodö ötjö inia tjötobö ja̧tjijayonö yebabökönö jo̧sa. Jejenö laebobe Dios iwenetjö. Ja̧danö chömöledö, ökwödöma domajadenö isabenö döwaisobö jo̧be, Chuluwo̧ma ötjökwö ba̧kwȩlö̧jatebö ötjönö pjabatö ö̧jobetjö̧ ötjönö baledi̧ yebabökönö jo̧sa, jö̧ba̧lö.

—Ju'wedö jelobe omukwatö yötjawi̧ma öpöjödö ajayinö yöbawinadö Jesúsnö isabenö ji̧ yötjawinada omukwatö kwuju̧kwaduwo— jö̧ba̧lö, yöawina wene

⁷ Chömöledö, kwomukwataduwo ökwödönö ajayinö Jesús yöawina wene yöbawinadönö, kwöwaisachibaduwinö pjabatinadönöma. Jobadö Diosnö tjo̧'wo̧ wana̧lö tji̧'yina kwomukwataduwo. Jobadöma okobe jwiinö tjö̧ji̧ma, wotjenanö baibanö, Diosnö tjo̧'wo̧ wana̧lö tji̧'yinobe. Chömöledö, jobadö tjö̧jinadanö ökwödöbi kwö̧jaduwo, Diosnö kwo̧'wo̧duwi wana̧lö. Ja̧danö, jobadö yöbawinadöma jweinö yötjawinobe Jesucristonöma.

⁸ Ja̧danö, jo̧ba Jesucristoma la'akatjöda balewachökönö bakwo̧da jo̧, damötjöbi, babebi, ja̧danö ba̧kwȩlö̧jatebö.

⁹ Isabenö, chömöledö ajayinö Jesúsnö, bakwo̧danö yöbawinadö yötjawina kwomukwataduwo. Babe mölema ju'wedö ba̧jekwadö jelobekwö omukwatö yötjawi̧ma jo̧be, ju'wi jawabi, ju'wi jawabi. Ja̧danö, jelobekwö omukwatö yötjawobe, Moisésnö weina a̧ja̧kwö dö̧jobö jo̧be, dukwobö wei̧ma, jö̧ba̧lö. Ja̧danö, Moisésnö weina kwukwaduwobö a̧ja̧kwö kwö̧jaduwitjö̧ma juluwachibanö kwi̧'yaduwena kwo̧'wo̧ luwo̧duwinö, jö̧ba̧lö, jelobekwö omukwatö yötjawobe. Chömöledö, kwakwawamaökö ökwödönö do̧'wo̧ luwo̧nö juluwachibanö kwi̧'yaduwoböma, Dios jawada. Diosma ökwödönö pjabatö lȩlö̧jino edobetjö̧ do̧'wo̧ luwo̧nö juluwachibanö di̧'yobe. Chömöledö ju'wedö jelobe omukwatö yötjawi̧ma öpöjödaduwi. Ajayinö yöbawinadö Jesúsnö isabenö ji̧ yötjawinada omukwatö kwuju̧kwaduwo.

¹⁰ Chömöledö yötawaduwakwö. Diosnö iyawa, isabenö ökwödönö pjaati̧ iyawama jo̧be. Ja̧ iyawama dumusidi̧ midawina Jesúsda. Jo̧bama itedada iyawinobe Dios 'yayi̧ balekwa yöbawö ujuni̧ma jamatö 'yo̧bö. Jo̧kwaijayonö Dios ajayinö yöbawö ujunina wei̧ ina a̧ja̧kwö ju̧kwadöma ¿dakwö tjemobö Jesús itedada iyawina pjaati̧tjö? Emöködö, Dios ajayinö yöbawö ujunina wei̧ ina a̧ja̧kwö tjuju̧kwobetjö̧.

¹¹ Döwaisa, Dios ajayinö yöbawö ujuninatjö wei̧ma jojodönö weokobe tjusuli̧ midö iyajökwe itebiya tjukwobö, bakwöta o̧bakwena iyajökwe itebiyatjöma, jö̧ba̧lö. Dios wei̧ Moisés iwȩyudina Diostjö jojodötjö ö'weje la'aka pjabato̧nö weinobe kwabö iyajökwe ökwösobu, okwasȩko̧nö tebachö, jobe isapjo muchekwapi̧ wamenö liliobö. Jo̧kwaijayonö iyajökwe, itebiya kwökönö, a̧tjȩo̧nö Diostjö jojodötjö ö'weje pjabatadö juwö lobö tji̧'yobö weinobe, jojodö tjö̧jemi tupakwö.

¹² Ja̧danö chömöledö, jo̧ba iyajökwe a̧tjȩo̧nö jojodö tjö̧jemi tupakwö juwö lotjinökwema Jesúsnö öwanekwachinobe, isabenö jo̧ iyawakwo̧nö. Jo̧kwaobetjö̧ Jesús itedada iyawena, jo̧babi jojodö tjö̧jemi tupakwö usula emawö woinobe. Chömöledö jobetjöda Jesúsma itedada iyawinobe, ökwösobu ebawinö, jojodö tjusula tjumusidi̧ midawö. Jejenö jojodö tjusuli̧ dichö lobö imidawinobetjö̧, jojodöma dichawedö, otiwadöda, Dios öba a'oma ichibadö, Jesúsnö do̧batö emadöma. Chömöledö, ökwödöma Jesús dö̧jibinö pjaatinawö̧sa. Jo̧banö ösödadösa. Ja̧danö, Dios öba a'oma suli̧ dichawedö ichibadösa. Jo̧kwaijayonö ju'wedö, Dios ajayinö yöbawö ujunina wei̧ a̧ja̧kwadöma Jesús pjaati̧tjö tjemoböma jwibadö. Jau chömöledö, jobadöma jojodö tjö̧jemi tupakwö tjujuwobö weinökwe itebiya tjukwobö jwii̧danö Jesús pjaati̧tjö tjemoböbi jwibadö. Jo̧kwaobetjö̧ jobadöma Dios öba a'oma suli̧tjö dichawedödanö ichiböködö.

¹³ Jo̧kwaobetjö̧ chömöledö, ajayinö domukwatina, Dios ajayi wei̧ da̧ja̧kwinama kadatakwawaduwo. Ja̧ domukwati̧ junibö kabatakwawö tupakwö di̧'yaduwo Jesúsnö do̧'wo̧ wana̧lö, jojodö tjö̧jemi tupakwö usula emawö wobinanö. Chömöledö, jwaikwöda di̧'yaduwo, do̧'wo̧ juluwachibanö jojodö ökwödönö öpöjödö otjenabi Jesúsnö dösödobetjö̧.

¹⁴ Isabenö chömöledö, böjȩnö ja̧nö usula emawö ja̧dösa Jesúsnö dösödobetjö̧. Yayonö jwaikwöda tupakwö di̧'yaduwo jo̧bakwö, Böjȩma ba̧kwȩlö̧jatebö ji̧ ditebomaökö, jö̧ba̧lö, döwaisobetjö̧. Jesúsma ökwödö dusula dumusidi̧ itedada imidawinobetjö̧ ba̧kwȩlö̧jatebö dö̧jakwedösa ba̧kwȩlö̧jatebö ji̧ ditebobema. Döwaisa, böjȩma ju'winö 'dö̧ibajakobe. Jo̧kwaijayonö ökwödöma dite'ada̧lobe ba̧kwȩlö̧jatebö ji̧ diteboma, la'akatjöda 'dö̧ibajökemima. Jo̧kwaobetjö̧ chömöledö, böjȩnö ja̧nö Jesús, dumusidi̧ midawö iyawinanöda kwo̧'wo̧duwi wana̧lö kwi̧'yaduwo.

—Babe böjȩnö ja̧nö, Diosnö diyi̧ma jo̧be, jo̧banö abebö, jo̧banö ösödö, ju'wedönö pjabatö— jö̧ba̧lö, yöawina wene

¹⁵ Ja̧danö chömöledö, ju'wi Diosnö iyö dumusidi̧ midawama jwiobe. Jesús iteda iyawinada jo̧be. Jejenö ji̧jayonö babe mölema ökwödöma Diosnö diyi̧danö juna̧ladösa, Jesús imidawinobetjö̧. Ja̧danö ¿tajida babe Diosnö diyi̧ma? Biya̧ chömöledö: Babe böjȩnö ja̧nö, Diosnö diyi̧ma jo̧banö ba̧kwȩlö̧jatebö abebö, ösödö, Dios ökwöma jwiinö otiwo̧ja, jwiinö pjabato̧ja, jö̧ba̧lö, dö̧ji̧.

¹⁶ Ja̧danö ju'wibi yötawa. Babe möle Diosnö diyobedanö diyi̧ma, biya̧: Jojodönö ju'wi jawabi, ju'wi jawa pjadatobö jo̧be chömöledö. Ja̧ pjadati̧ma Diosnö diyobedanö diyi̧. Ja̧danö ju'wibi, ökwödö dujuna̧li̧tjö jwibadönö pjabatö diyaduwo chömöledö. Ja̧ pjadati̧bi Diosnö diyobedanö diyobe. Chömöledö, jejenö, jojodönö pjadatena Diosma jwiinö ösödobe, o̧'wo̧ ösöwanö edö.

¹⁷ Ju'wi jawabi chömöledö. Dios iwene yöawakwawa jojodönö yötjawi̧ a̧ja̧kwö kwuju̧kwaduwo, Bidöma waisanö te'ada̧ladö do̧'wo̧ luwo̧nö da̧peachö di̧'yobö, jö̧ba̧lö. Chömöledö, bajaleapo möle baibena Diosma jobadönö yöawakobe, tjite'ada̧linawö̧nö otiwanö tjite'ada̧linojobö, otiwanö tjite'ada̧linokojobö, jö̧ba̧lö. Jo̧kwaobetjö̧ ökwödönö otiwanö te'ada̧lö pjatjatobö jö̧tja̧lobe. Jo̧kwaijayonö yötjawi̧ öpöjödö kwa̧ja̧kwaduwökötjö̧ma jobadö ökwödönö otiwanö pjatjatobö, kwöda̧peachaduwobö pjatjatoböma jwiena chömöledö. Jo̧kwaobetjö̧ jobadö yötjawi̧ a̧ja̧kwö kwuju̧kwaduwo chömöledö.

¹⁸ Ja̧danö chömöledö, Diosnö akebaduwi̧ma kakatibaduwoko, ötjönöbi, ötjökwö ja̧dönöbi. Yötawaduwakwö chömöledö. Ötjö, ötjökwö otidadöbi domajadenö otiwanö omukwatö ju̧kwadösa, Okobe jwiinö dö̧ji̧ma jweinö omukwatöda dö̧jobö disakwa, otiwanö pjabatö, jö̧ba̧lö.

¹⁹ Ja̧danö chömöledö, budekwö ateba̧laduwakwö. Diosnö akebaduwo ökwödönö yemidanö edö juluwanö chicho.

Bajaleapo yöawina wene

^20-21 Chömöledö, Duluwo̧ Jesúsma ökwösobu ebawinö iteda Diosnö iyawö midawö ö'wö baibinobe. Ja̧danö, jo̧bama midawö ö'wö baibena, Dios 'yayi̧ balekwa yöbawö ujuni̧ma jamatö 'yi̧nobe. Chömöledö, Jesús ökwösobu ebawinö ö'wö baibiökwe, Dios 'yayi̧ balekwa yöbawö ujuni̧ jamatö 'yo̧bö, Diosma Jesúsnö wobajaletjö yemidanö tjeachajinö ja̧inobe. Ja̧danö, tjeachajinö ja̧inökwenöma ökwödönö la'aka te'ada̧lo̧ baibanö 'da̧batö ujuninobe Diosma, iteda a̧jwi̧mu o̧bȩja̧dödanöbedönö la'aka te'ada̧lo̧ baibanö. Ja̧danö chömöledö Diosnö, do̧'wo̧ luwo̧ okwa wene jwiinö badibobö pjabato̧nö ateba ökwödönöma. Jo̧banö ateba ökwödönö pjaatobö iteda ösödi̧da ja̧bö kwö̧jaduwobö. Ja̧danö, jo̧banö ateba ökwödönö pjaatobö Jesucristo ujulunö kwo̧'wo̧ luwo̧duwi okwanö otiwanö Dios ösödi̧danö balewachinadö bakibaduwobö. Isabenö chömöledö, Diosnö ba̧kwȩlö̧jatebö dösödaduwo, Jo̧bada, jö̧ba̧lö. Ba̧kwȩlö̧jatebö dösödaduwo, Jwiinö juluwo̧, jwiinö otiwo̧, jö̧ba̧lö. Chömöledö, biya̧ yötawi̧ma isabenö ji̧ jawa yötawa.

²² Chömöledö, böja chiwȩyudöjanö yötawi̧ma nöi̧maökö, ja'yubeda. Ja̧danö, böjanö yötawi̧ma 'du̧wekwachibökönö ösödanö kwa̧ja̧kwaduwo. Ökwödönö lȩbebö, kwo̧'wo̧ luwo̧duwinö juluwachibanö kwi̧'yaduwobö yötawa chömöledö.

²³ Ju'wibi kwöwaisaduwobö chösöda, döjawo̧ Timoteonöma. Jo̧banöma latjebinobe ka̧lena ba̧kwaweju okwatjö. Ja̧danö, chö̧jobekwö juluwanö ichitjö̧ma jo̧bakwö chi̧'yena ökwödönö edö.

²⁴ Chömöledö, debawö atebobe, Dokwa, jö̧ba̧lö, okobe deinö jobe ökwödönö Dios iwene yöawakwawa jojodönöbi, okobe deinö Jesúsnö ösödadönöbi. Ja̧danö Italiatjö ichinadöbi, Dokwa, jö̧ba̧lö, debawö atjebobe ökwödönöma.

²⁵ Chömöledö, Diosnö ateba ökwödönö lȩlö̧jino edö pjaatobö. Tjo̧wi̧ta, biya̧da wȩyudö weta.