Hebreos 12 - Dios Iwene

—Jwaikwöda di̧'yobö jo̧be, Jesúsnö omukwata̧lö— jö̧ba̧lö, yöawina wene

¹ Jo̧kwaobetjö̧ chömöledö, jobadö da'dödömine Diosnöda tjo̧'wo̧ wana̧lö tjö̧jina edö domukwatobö jo̧be, Ökwödöbi jejenö Diosnöda do̧'wo̧ wana̧lö di̧'yaduwo, jö̧ba̧lö. Ja̧danö, babe ökwödö dö̧ji̧ma jobadöma ba̧jekwadö ökwödö böjȩnö dö̧jobekwö tjeda̧lobe, böjȩnö Dioskwö di̧'yobe eda̧lö. Wanedö yötawaduwakwö, ö'öa̧lakwawa jawanö wanedö: Ökwödö böjȩnö di̧'yi̧ma ö'öa̧lakwawadanö wanekwachobe. Ja̧danö da'dödöminema, ba̧jekwadö, ö'öba̧ladönö ösödö eda̧lö tjö̧bi̧danö, ökwödö böjȩnö ö'öda̧lobe eda̧ladö, Otiwanö ö'ököba̧laduwi, jö̧ba̧lö. Jo̧kwaobetjö̧ chömöledö, otiwanö di̧'yaduwo, da'dödömine Diosnö omukwata̧lö tji̧'yinadanö. Döwaisa. Ö'öba̧ladöma ömöki̧ jawama kalekwö lobadö, juluwanö, jwaikwöda ö'ötjakwawobö. Ja̧danö, ökwödöbi ö'öba̧ladö ömöki̧ jawa kalekwö lotji̧danö lodaduwo pjaatökö jawa, ökwödö jwaikwöda di̧'yobö. Ja̧danö, suli̧ ja̧awatjö 'da̧bachibö jwaikwöda di̧'yobö jo̧be chömöledö. Jwibö, ejeinö ö'ötja̧li̧danö jwaikwöda di̧'yaduwo chömöledö, me'dawachibökönö, Diosnö omukwata̧lö.

² Ja̧danö jwaikwö 'ya̧nö, me'dawachibökönö, Jesús, dö̧jibinö pjabato̧nö eda̧löda di̧'yobö jo̧be. Chömöledö, Jesúsma ökwödönö pjaatinobetjö̧ Diosnö do̧'wo̧ wana̧ladö babibinadösa, Jesúsnö do̧batö emö. Ja̧danö, Jesús ökwödönö pjaatinobetjö̧ ba̧kwȩlö̧jatebö Diosnö do̧'wo̧ wana̧ladösa, jo̧banö kabatibökönö, jwaikwöda 'ya̧nö. Jo̧kwaobetjö̧ chömöledö, Jesúsnöda omukwata̧lö, jo̧ba i̧'yinadanö di̧'yobö jo̧be. Jo̧ba ö̧jina omukwataduwi. Yelösöda usula emawö woinobe towisa'onö bȩtjajökwema. Isabenö, ja̧ jo̧banö lȩtjebi̧ma yelösöda jwiinö taba̧lö̧ji̧ jawanö lȩtjebinobe. Jo̧kwaijayonö Jesúsma omukwatinokobe itenöda taba̧lö̧ji̧ jawanö lȩtjebi̧ma. Usula emawijayonö ju'wi möle baibakwa̧ omukwatinobe, jwiinö o̧'wo̧ ösöwanö ö̧jakwa̧ma. Ja̧danö, Jesús towi sötenö bȩtjajökwema ö'wö baibinobe. Jemi ikenama ö'wö babibajo̧ma wobajaletjö tjeachajinobe. Ja̧danö, yemidanö tjebachajo̧ma mölejȩbe kabekwachajö ȩwa̧jinobe. Ȩwa̧jo̧ma Abe'do Dios ö̧bemi öwaisobekwöchobe öbamatinobe. Chömöledö, Jesúsma jwiinö usula emawijayonö kaatibinokobe ju'wi möle baibakwa̧ omukwatobetjö̧, jwiinö o̧'wo̧ ösöwanö ö̧jakwa̧da. Jo̧kwaobetjö̧ chömöledö, jwaikwö 'ya̧nö, kabatibökönö, Jesús, dö̧jibinö pjabato̧nö eda̧löda di̧'yaduwo.

³ Isabenö chömöledö, Jesúsnöda kwomukwataduwo. Ökwödö me'dawachibö tjekachajaduwobö kwomukwataduwenama Jesúsnöda kwomukwataduwo, usula emawijayonö jwaikwöda me'dawachibökönö 'yi̧nanöda. Ja̧danö sulabedö, jo̧banö öpöjödadöma jwiinö tjöpöjödobetjö̧ labinö jwötjeba̧linobe. Yayonö Jesúsma jwaikwöda me'dawachibökönö i̧'yinobe. Chömöledö, ökwödönö labi̧ jawa baledenama jo̧ba me'dawachibökönö i̧'yinama kwomukwataduwo, ökwödöbi me'dawachibökönö kwo̧'wo̧ luwo̧duwi juluwachibanö kwi̧'yaduwobö. Ökwödönö labi̧ jawa baledijayonö me'dawachibökönö jwaikwöda kwi̧'yaduwo chömöledö, tjebachajökönö.

—Dios ile niebawö̧nö yöbawö kwabö lȩbebo̧ tjöda̧peachobö— jö̧ba̧lö, yöawina wene

⁴ Ja̧danö chömöledö, yötawaduwakwö. Ökwödöma Jesús usula emawi̧danö usula kwemawinaduwokobe. Chömöledö, Jesúsma Diosnö o̧'wo̧ wana̧lö ö̧jiawö̧ jo̧banö kwabö lotjinobe. Jo̧kwaijayonö ökwödö Diosnö kwo̧'wo̧ kwöwana̧laduwijayonö ina kwabö lotjinokobe. Jo̧kwaobetjö̧ kwomukwataduwoko, ¡Ayö, sula, usula emawakwawawe! jö̧ba̧lö. Chömöledö, labi̧ jawa ökwödönö baledena tupakwö kwi̧'yaduwo, kwo̧'wo̧ luwo̧duwinö juluwachibanö.

⁵ Ja̧danö ¿kwo̧'wo̧ jwiköbaduwiji̧ Dios iwenetjö laebi̧, labi̧ jawa baledakwawa pjabatö yöawi̧ma? Baikwö laebobe Dios iwenetjö, da'dömine Salomón iteda itji̧nö yöbawö öba̧ja̧dina wene: Chitji̧, labi̧ jawa ökwönö baledenama jweinö, yebabinö kwomukwato, Duluwo̧ Diosda labi̧ jawa ötjönö öba̧ja̧dobö webo̧, jö̧ba̧lö. Ja̧danö, Duluwo̧ Diosma ökwönö yöbawö kwabö lȩebena kwo̧'wo̧ tjo̧bekwökönö kwö̧jo, ba̧ja̧dö yöawobetjö̧.

⁶ Ja̧danö Kwuluwo̧ Diosma, jo̧bada ile niebawö̧nö yöbawö kwabö lȩbebo̧. Ja̧danö, Chi̧tji̧mu, jö̧ba̧lö, jwöebinawö̧nö yöbawö kwabö lȩbebo̧ Diosma. Jejenö laebobe Dios iwenetjö. Chömöledö ja̧ Salomón iteda itji̧nö yöawinama, Dios iteda i̧tji̧munö pjabatö yöawi̧danö ji̧. Ja̧ pjabatö yöawi̧ iwenema kwomukwataduwobö jo̧be chömöledö.

⁷ Ja̧danö chömöledö, Diosma ökwödö ile niebawö̧nö öba̧ja̧dobö jö̧a̧lobetjö̧ usula kwemawaduwobe. Jo̧kwaobetjö̧ kwo̧'wo̧ luwo̧duwinö me'dawachibökönö jwaikwöda kwi̧'yaduwobö jo̧be, usula kwemawaduwena. Jejenö 'ya̧nö da̧peachö kwöwaisachibaduwakobe. Chömöledö böjȩtjö dabe'donö wanedö yötawaduwakwö, dabe'do i̧tji̧munö yöbawö kwabö lȩebi̧ma: Isabenö, böjȩtjö dabe'doma i̧tji̧munö lȩebobö jo̧be. Ja̧danö, dabe'do yöbawö kwabö lȩebi̧danö Diosma ökwödö, iteda i̧tji̧munö yöbawö kwabö lȩbebo̧.

⁸ Chömöledö, Diosma iteda i̧tji̧munö labi̧ jawa webo̧, jobadönö tjöwaisachibinö öba̧ja̧dobö. Isabenö bakwo̧, Ötjöma Dios Itji̧sa, jö̧ba̧lo̧ma, labi̧ jawa öbaledökötjö̧ma, okobe deinö Dios i̧tji̧mu tjöbaledi̧danö, kwomukwataduwobö jo̧be, Jo̧bama Dios Itji̧bö̧kö̧ena, jö̧ba̧lö. Isabenö, jo̧bama abe'do debo̧danö jo̧, jo̧banö yöbawö kwabö lȩbebo̧ deobetjö̧.

⁹ Ja̧danö, jemi tupakwö yötawaduwakwö. Böjȩtjö dabe'doma ökwödönö kwabö lȩebobetjö̧ jo̧banö yebabinö omukwatö döwaisachibinobe, ¡Ayö! Chabe'donöma webö̧kö̧sa. Jo̧ba wei̧ cha̧ja̧kwobö jo̧be, chabe'doobetjö̧, jö̧ba̧lö. Ja̧danö chömöledö, döwaisa. Mölejȩbe jo̧ Dabe'doma böjȩtjö dabe'donötjö o̧penönö inesö jo̧ ¿jö̧tö? Jo̧kwaobetjö̧ böjȩtjö dabe'donö yebabinö domukwatobö jo̧betjö̧ mölejȩbe jo̧ Dabe'do Diosnöbi yebabinö domukwatobö jo̧be. Isabenö chömöledö, böjȩtjö dabe'donö yebabinö domukwati̧tjö o̧penönö yebabinö domukwatobö jo̧be mölejȩbe jo̧ Dabe'do Diosnö. Jo̧bama ökwödönö ba̧kwȩlö̧jatebö ja̧kwawa iyo̧obetjö̧ yebabinö domukwatobö jo̧be, Jo̧ba wei̧ma da̧ja̧kwobö jo̧be, jö̧ba̧lö.

¹⁰ Ja̧danö, böjȩtjö dabe'doma ökwödö damö badibena ökwödönö lȩebi̧ma kabatakwawo̧, lekwema lȩbebö̧kö̧. Jo̧kwaijayonö ina tjemudayida jo̧ba böjȩtjö dabe'doma ökwödönö yöbawö kwabö lȩebinobe. Ja̧danö, iteda omukwati̧ omukwatinobe, Chi̧tji̧munö yöbawö kwabö lȩtebobö jo̧be, jö̧ba̧lö. Ja̧danö, ju'wikwenama jelobekwö omukwatö, jweinömaökö yöbawö kwabö lȩebinobe ökwödönöma, böjȩtjö dabe'doma. Jo̧kwaijayonö jejenömaökö mölejȩbe jo̧ Dabebe'do Dios yöbawö kwabö lȩebi̧ma. Jo̧ba suli̧ jwibo̧ma, ökwödönö yöbawö kwabö lȩebenama ökwödönö pjaatoböda lȩebobe. Do̧'wo̧ luwo̧nö döda̧peachoböda yöbawö kwabö lȩebobe mölejȩbe jo̧ Dabe'do Diosma. Ja̧danö, iteda suli̧ jwibo̧danö suli̧ jwibadö badibobö ösödobetjö̧ ökwödönö yöbawö kwabö lȩbebo̧ Dabe'do Diosma, ökwödö iteda i̧tji̧munöma.

¹¹ Ja̧danö döwaisa chömöledö, kwabö lȩebajökwema usula emawö jo̧, o̧'wo̧ ösöwanöma jö̧könö. Jo̧bama o̧'wo̧ tjo̧bekwöda jo̧, ¡Ötjöwe! jö̧ba̧lö. Jo̧kwaijayonö, jemi tupakwöma omukwatobe, Isabenö, ja̧ ötjönö yöbawö kwabö lȩebi̧ma pjaatobe jweinö omukwatö chöda̧peachobö, jö̧ba̧lö. Jejenö omukwatö o̧'wo̧ luwo̧ okwanö wene jwiinö ö̧jobe.

¹² Jo̧kwaobetjö̧ chömöledö, Dios yöbawö kwabö lȩebi̧ma ökwödö kwöda̧peachaduwinö pjaatobetjö̧, kakatibaduwoko, ¡Ayö! Chime'dawachiba, katatiba, jö̧ba̧lö. Chömöledö ja̧ kwime'dawachibaduwitjö̧ juluwachibö kabatibökönö kwi̧'yaduwo kwo̧'wo̧ luwo̧duwinö.

¹³ Ja̧danö chömöledö, ökwödö jwaikwöda me'dawachibökönö kwi̧'yaduwi̧ma kwö̧ja̧wo̧döduwi me'dawadönö pjaatobe jobadö otiwanö tji̧'yobö. Wanedö yötawaduwakwö: Jwaikwöda kwi̧'yaduwi̧ma mana jweinö 'wibiabö i̧'yi̧danö ji̧. Ja̧danö, jwaikwöda juluwachibö kwi̧'yaduwena, mana jweinö 'wibiabö 'yo̧ i̧'yi̧danö, kwö̧ja̧wo̧döduwi me'dawadö, ji̧ka ji̧ka kwetjachobedanö kwebachadöma kwökömaduwinö jweinö 'ya̧dö, jama jweamanö. Jejenö me'dawadöma otiwanö kwökömaduwinö 'ya̧dö, mebökönö, tji̧bȩjwi̧yabi 'debawökönö. Ja̧ wanedö yötawi̧ma wanekwachobe, Ökwödöma juluwachibanö, jwaikwöda kwi̧'yaduwobö jo̧be, ju'wedö me'dawadöma ökwödönö edö jobadöbi tjo̧'wo̧ luwo̧nö juluwachibanö, jwaikwöda tji̧'yakobetjö̧.

—Tjöbeba̧lö̧jönö kwite'ada̧laduwo Dios ösödi̧danö ja̧bö— jö̧ba̧lö, yöawina wene

¹⁴ Chömöledö, ökwödöma kwö̧ja̧wo̧dökwö ösödabikwawö, wene jwiinö kwuju̧kwaduwobö kwisakwaduwo. Ja̧danö, Dios i̧tji̧mu bakibinaduwobetjö̧ sulabenö ja̧bökönö kwö̧jaduwobö kwisakwaduwo. Chömöledö, sulabenö ja̧bökönö ju̧kwadöma Duluwo̧kwö dötewinö ju̧kwadö. Isabenö chömöledö, sulabenö ja̧bö ju̧kwadöma Duluwo̧kwö dötewinö ju̧kwöködö.

¹⁵ Jejenö ja̧nö, ökwödödada kwite'ada̧laduwo ökwödötjö bakwo̧bi Diosnö sulabenö omukwatö kaatibapji jö̧ba̧lö, jo̧ba jwiinö otiwi̧ pjaati̧ma öpöjödö. Jejenö omukwatö jo̧ma labo̧, Diosnö o̧'wo̧ sulinö edö. Ja̧danö, ja̧ sulabenö edi̧ma jo̧ba okwatjöda laebobe, ö̧ja̧wo̧dönö yöawi̧danö yöbawö. Jejenö jo̧bama ö̧ja̧wo̧dönö jelobekwö öbibo̧, jobadöbi labidö batjibanö, jo̧ba sulabenö omukwati̧danö sulabenö tjomukwatobö. Chömöledö, ökwödödada tjöbeba̧lö̧jönö kwite'ada̧laduwo ökwödötjö bakwo̧ jejenö sulabenö omukwatapji jö̧ba̧lö, ju'wedönö jelobekwö tjomukwatobö öbibö.

¹⁶ Ja̧danö, ju'wi jawabi. Tjöbeba̧lö̧jönö kwite'ada̧laduwo ökwödötjö bakwo̧bi, bakwujubi, ilekwo̧bökujukwö, jilekwebö̧kö̧kwö tjalewapji jö̧ba̧lö. Ja̧danö, ju'wi jawabi. Tjöbeba̧lö̧jönö kwite'ada̧laduwo ökwödötjö bakwo̧ da'dömine Esau sulabenö omukwatinadanö omukwatapji jö̧ba̧lö. Chömöledö döwaisa. Esauma abönö pöenö otiwanö iyakwa̧ emibakwo̧ ji̧na, Dios weinadanö. Jo̧kwaijayonö jo̧bama abönö pöe otiwanö emibakwa̧ weinama öpöjödö, Dios iyakwa̧ma mikwawokobe, jö̧ba̧lö, ja̧ emibakwa̧ mikwanö iyinobe öjawo̧nö, kwakwawada bakwötanöda ukwobö emö.

¹⁷ Chömöledö kwöwaisaduwa, Esauma ja̧ ju'winö emibakwa̧ mikwanö iyina tupakwöma, ju'wi omukwatinobe. Ja̧danö, abe'donö budekwabinö aeba̧linobe abönö pöe Diosnö aebakwa̧ aebobö, jo̧banö pjaatobö. Yelösöda budekwabinö aeba̧linobe, Diosnö abebi ötjönöbi pjaatobö chabe'do, jö̧ba̧lö. Budekwabinö aeba̧lijayonö abe'do jo̧banö aebi̧, Diosnö pjaatobö aebi̧ma jwiinobe Esaúnöma. Chömöledö, tjöbeba̧lö̧jönö kwite'ada̧laduwo ökwödötjö bakwo̧ Esau sulabenö omukwatinadanö omukwatapji jö̧ba̧lö, Dios otiwanö iyi̧ma mikwawokobe, jö̧ba̧lö, böjȩ jawada isakwö.

—Dios 'yayi̧ balekwa yöbawö ujuni̧ badekwachinobetjö̧ Dios ö̧jobekwö dichibobö jo̧be— jö̧ba̧lö, yöawina wene

¹⁸ Chömöledö, böjȩnö ja̧nö Diosnö ösödö jwaikwöda kwi̧'yaduwobö jo̧be, kwömöledökwö wene jwiinö kwö̧jaduwobö isakwö, sulabenö ja̧bökönö. Jejenö Diosnö kwo̧'wo̧ luwo̧duwinö dötewinö kwö̧jaduwobe, jo̧ba ö̧jobekwö ichibö. Ja̧danö kwöwaisaduwa, damötjö da'dödömine, Moisés öibinawö̧ Dios ö̧jobekwö tjichibinama, ökwödö babe möle Dios ö̧jobekwö kwichibaduwi̧danömaökö. Jobadö Dios ö̧jobekwö tjichibinama, böjȩtjö mö'ösa'o, tjeda'o jo̧bekwöda tjichibinobe. Ja̧danö chömöledö, jobadö Dios ö̧jobekwö tjichibinama, yelösöda jwiinö labobekwö tjichibinobe. Jobema yȩböbi yȩinobe, ichibadöma yetjaibanö. Ja̧danö, mö'ösa'o tjichibaja'oma jwiinö labinö ubi̧danö ubö ji̧nobe. Ja̧danö, jwa̧lȩ'ewöbi labinö jwa̧lȩ'ewinobe jobema. Chömöledö, jobadö Moisés öibinawö̧ Dios ö̧jobekwö tjichibinama yelösöda labinobe.

¹⁹ Ja̧danö, ökwöi̧bi ökwöinobe ja'otjöma, trompeta labinö pjutji̧danö. Ja̧danö, iwenebi ökwöinobe, Dios iwenema. Ja̧danö, da'dödöminema ja̧ Dios iwene a̧ja̧kwö yelösöda yetjaibinobe. Yetjaibobetjö̧ budekwö wetjinobe Moisésnö, ¡Ayö! Diosnö abebi ökwödönö yöa̧loko, labinö yöa̧li̧ma, jö̧ba̧lö. Yedabi. Moisés, ökwöda Dios yöawi̧ kwa̧ja̧kwo, jemi tupakwö ökwödönö yökawo, jö̧ba̧lö, budekwö wetjinobe Moisésnö.

²⁰ Yelösöda Dios wei̧ a̧ja̧kwö jwiinö yetjaibinobe, Bakwo̧ bi'o jo̧bekwö ichibö mabo̧nö, ja̧danö tja̧jwi̧ ichibo̧nöbi, inawiyanö kwikwawaduwo, ö'wöchenanö baibanö, jö̧ba̧lö, wei̧ma.

²¹ Ja̧danö Moisésbi, okobe jwiinö jemi baledi̧ma jwiinö labobetjö̧ yebabinö tjö̧awinobe.

²² Jejenö ji̧nobe da'dödömine Dios ö̧jobekwö tjichibinama. Ja̧danö, ja̧ baledina ökwödönö i̧sebobe Dios ajayinö yöbawö ujunina wei̧ jamatö 'yi̧na, Dios wei̧ Moisés iwȩyudinama. Jo̧kwaijayonö chömöledö, jejenö baledinokobe ökwödö, Jesúsnö ösödadönöma. Dios 'yayi̧ balekwa yöbawö ujuni̧ma jejenöma jamatö 'yi̧nokobe, ökwödö Dios ö̧jobekwö kwichibinaduwama. Ökwödö Dios ö̧jobekwö kwichibinaduwama, da'dödömine ja'o mö'ösa'o yebabinö tjichibinadanömaökö. Ökwödöma jele'o, Sión mikwa'o, ja̧danö mölejȩbe Jerusalén mikwa'o jo̧bekwö ichibinadöja, 'yaba̧lo̧ Dios ö̧jobe wanekwacha'o jo̧bekwö. Chömöledö jobe kwo̧'wo̧ luwo̧duwinö ichibö Dioskwö ju̧kwadöja. Ja̧danö, jobema ángelesdö ba̧jekwadö ko̧ko̧kwa̧lö, tjo̧'wo̧ ösöwö, Diosnö jwiinö ösödö tjö̧jobe.

²³ Ja̧danö, kwo̧'wo̧ luwo̧duwinö jobe ichibö ökwödöma ju'wedökwö bakobe ko̧ko̧kwa̧lö kwuju̧kwaduwi̧danö ju̧kwadöja, okobe deinö Jesúsnö ösödadö, ba̧kwȩlö̧jatebö ja̧kwawa wȩyukwa'yenö tjimibiya ba̧jadökwö. Ja̧danö jobekwö ichibö, Dioskwöbi ju̧kwadöja, okobe deinö jojodönö lȩekwa yöawakwo̧kwö. Ja̧danö jobe Dios ö̧jobekwö ichibö, ju'wedökwöbi ko̧ko̧kwa̧lö ja̧nö ju̧kwadöja, Diosnö tjo̧'wo̧ wana̧ladö wobinadökwö, tjo̧'wo̧ luwo̧nöda. Jobadönöma Dios jö̧a̧lawö̧, Suli̧ jwiinö babibinadö, jö̧ba̧lö.

²⁴ Ja̧danö, jobe ichibö kwuju̧kwaduwemima Jesúsbi ö̧jobe, ökwösobu ebawinö dumusidi̧ midawinama. Jo̧bama ökwösobu ebawinö imidawenama Dios 'yayi̧ balekwa yöbawö ujuni̧ma jamatö 'yi̧nobe, ökwödönö pjabatö. Chömöledö, Jesús ökwösobuma, Tjo̧wi̧ Diosma jojodö tjusuli̧ma söbebö loa, jö̧ba̧lö, otiwanö jwöeba̧lobedanö jwöeba̧linobe. Jo̧kwaijayonö damötjö Abel ökwösobu jwöeba̧linadanömaökö, Jesús ökwösobu jwöeba̧linama. Abel ökwösobu nijibe ebawajobuma Abel jwöobedanö jwöinobe Diosnöma, Balekwa mikwa lȩbebi, jö̧ba̧lö. Jo̧kwaijayonö Jesús ökwösobuma jejenömaökö. Otiwanö jwöeba̧lobedanö jwöeba̧linobe, Tjo̧wi̧ tjusuli̧ma söbebö loa, jö̧ba̧lö. Jejenö Jesús imidawinobetjö̧ Dios 'yayi̧ balekwa yöbawö ujuni̧ma jamatö 'yi̧nobe, ökwödö Dios ö̧jobekwö, suli̧ jwibadöda kwichibaduwinö.

²⁵ Chömöledö, Diosma böjȩnö mö'ösa'otjö weinobe Moisésnö, böjȩnö jo̧nöma, da'dödöminenö yöawobö. Ja̧danö Moisés jobadönö yöawinobe, Dios wei̧ da̧ja̧kwobö jo̧be, ökwödönö lȩebapji jö̧ba̧lö. Jo̧kwaijayonö jobadöma Moisés yöawi̧ma tja̧ja̧kwijayonö tja̧ja̧kwinokobe, Dios wei̧ma. Jo̧kwaobetjö̧ Diosma lȩebinobe jobadönöma. Yötawaduwakwö chömöledö. Dios wei̧ Moisés yöawina, böjȩnö mö'ösa'otjöda yöawinama Dios mölejȩbetjö wei̧ yöawinanötjö nijakwönönö mikwawobe ¿jö̧tö? Jo̧kwaobetjö chömöledö ¿ökwödöja? Diosma iteda Itji̧nöda mölejȩbetjö weinobe ökwödönö yöbawö. Diosma böjȩnö mö'ösa'otjö wei̧ a̧ja̧kwöködönö lȩebinadanö ¿lȩebökenaji̧ iteda itji̧ Jesús yöawi̧, Dios mölejȩbetjö wei̧ yöawi̧ a̧ja̧kwöködönöma? Yelösöda da'dödöminenö lȩebinatjö o̧penönö ökwödönöma lȩebena chömöledö, iteda Itji̧ yöawi̧ weina da̧ja̧kwaduwökötjö̧ma. Isabenö lȩebakwawö̧sa, Dios mölejȩbetjö wei̧ yöawi̧ma böjȩnö mö'ösa'otjö yöawi̧nötjö o̧penönö mikwawobetjö̧.

²⁶ Ja̧danö, damötjö Diosma iteda wei̧ yöawena ja̧'o mö'ösa'oma labinö tjö̧ebinobe. Jo̧kwaobetjö̧ chömöledö, ökwödö dö̧ji̧ma Diosma yöbawö ujuninobe, Yemidanö tjö̧ebobö wetakwo̧sa, jo̧kwaijayonö böjȩdamaökö, mölejȩbebi, jö̧ba̧lö.

²⁷ Chömöledö, ja̧ yöbawö ujuninama baikwö wanekwachobe: Böjȩnö ju̧kwi̧bi, mölejȩnö ju̧kwi̧bi, Dios otidinama, ju'winö jwiakobe. Ja̧ ju̧kwi̧ma ba̧kwȩlö̧jatebö ji̧ jawaokobetjö̧ söbebö loakobe, jwiinö baibanö. Ba̧kwȩlö̧jatebö ji̧ jawada ji̧bakobe, Dioskwö, iteda ba̧kwȩlö̧jatebö webö ö̧jobema. Ja̧danö chömöledö, jobekwö, Dios ba̧kwȩlö̧jatebö webö ö̧jobekwöda dichibakwedösa. Isabenö jobema, böjȩnö dö̧jeminötjö o̧penönö otiwemima.

²⁸ Jau chömöledö. Ökwödö dö̧jakwemi, Dios ökwödönö iyakwemima la'akatjöda söbebö loökakwemi. Jobe ba̧kwȩlö̧jatebö dö̧jakwedösa Dioskwö, iteda webö ö̧jemima. Jo̧kwaobetjö̧ chömöledö, Diosnö dösödaduwo, Isabenö otiwanö pjabato̧, jö̧ba̧lö. Ja̧danö, yebabinö omukwatö dösödaduwonö, ¡Ayö! ¡Diosma jwiinö juluwo̧! jö̧ba̧lö. Chömöledö, jo̧ba ösödi̧da ja̧bö dö̧joböma jo̧be.

²⁹ Isabenö, jejenö dö̧jobö jo̧be chömöledö, Dios ölabi̧ma jwiinö juluwi̧, ökwöla nöola labinö ubi̧danö juluwobetjö̧.