Hebreos 11 - Dios Iwene

Ajayinö Diosnö tjo̧'wo̧ wana̧lö ju̧kwinadönö yöawina wene

¹ Chömöledö, Diosnö tjo̧'wo̧ wana̧lö ja̧kwawa, jö̧ba̧löma ¿dakwö jö̧ba̧lö laebobeda? Baikwö labebö lobö yötawaduwakwö: Chömöledö, Diosnö do̧'wo̧ wana̧lö ja̧kwawa, jö̧ba̧löma, Dios yöbawö ujunina badekwachakwa̧ te'ada̧lö ja̧kwawa. Ja̧danö, yöbawö ujunina badekwachakwa̧ma ina dedököjayonö, Isabenö, Dios jö̧a̧li̧danö baledakobe, jö̧ba̧lö, te'ada̧ladösa. Jejenö jo̧be Diosnö do̧'wo̧ wana̧lö dö̧ji̧ma.

² Ja̧danö, damötjö ji̧nadötjö Diosnö ösödö ji̧nadöbi jejenö, Diosnö tjo̧'wo̧ wana̧lö tjuju̧kwinobe. Ja̧danö, jejenö tjo̧'wo̧ wana̧lö tjuju̧kwiökwe Diosma jobadönö ösödinobe, Bidöma ötjönö otiwanö ösödö ju̧kwadö, jö̧ba̧lö.

³ Chömöledö, Diosnö do̧'wo̧ döwana̧lobetjö̧ döwaisobe, Okobe jwiinö böjȩnö ju̧kwi̧bi, mölejȩnö ju̧kwi̧bi Dios jö̧a̧li̧tjöda baibinobe, jö̧ba̧lö. Ja̧danö böjȩnö ju̧kwi̧, mölejȩnö ju̧kwi̧, okobe jwiinö dedi̧ma ju'wi dedi̧ jawatjö baibinokobe. Okobe jwiinö dedi̧ma Dios jö̧a̧li̧tjöda baibinobe, dedökö jawatjöda. Jejenö döwaisa chömöledö, Diosnö do̧'wo̧ wana̧lö dö̧jobetjö̧.

⁴ Ja̧danö chömöledö, ba̧jekwadö damötjö ji̧nadöma Diosnö tjo̧'wo̧ wana̧lö tjuju̧kwinobe. Jobadötjö bakwo̧ ji̧nama, da'dömine Abel. Abelma, Diosnö o̧'wo̧ wana̧lö ö̧jinobetjö̧ otiwanö iyiainobe, Diosnö juwö iyö. Ja̧danö, jejenö iyiökwe Diosma jwiinö ösödinobe Abel iyi̧ma, öpöe Cain iyi̧tjö o̧penönö ösödö. Abelma Diosnö o̧'wo̧ wana̧lö iyiökwe Diosma otiwanö edinobe jo̧banö, Bitema chedemi suli̧ jwibo̧, jö̧ba̧lö. Ja̧danö babebi, Abelma deijayonö jo̧ba Diosnö o̧'wo̧ wana̧lö ö̧jinama ökwödönö i̧sebobe, Abelma Diosnö o̧'wo̧ wana̧lö iyiökwe Diosma jo̧banö ösödinobe, jö̧ba̧lö.

⁵ Ja̧danö, da'dömine Enocbi Diosnö o̧'wo̧ wana̧lö ji̧na. Jo̧bama Diosnö o̧'wo̧ wana̧lö ö̧jiökwe Diosma o̧'wo̧ ösöwanö edinobe jo̧banöma. Jo̧kwaobetjö̧ Diosma Enocnö mölejȩbe kaekwachajinö ja̧inobe, la'akatjöda böjȩtjö woökönö. Chömöledö, Enocma omöna debi̧ baibinobe böjȩtjöma, Dios mölejȩbe kaekwachajinö ja̧obetjö̧. Ja̧danö, ina böjȩnö ö̧jayi Diosma jo̧banö yöawinobe, Cho̧'wo̧ ösöwanö chedökwe, jö̧ba̧lö. Chömöledö, Enocma Diosnö o̧'wo̧ wana̧lö ö̧jiökwe Diosma jo̧banö o̧'wo̧ ösöwanö edö mölejȩbekwö kaekwachajinö ja̧inobe.

⁶ Jo̧kwaijayonö Diosma ja'yubebi o̧'wo̧ ösöwanö edokobe jo̧banö tjo̧'wo̧ wana̧löködönöma. Chömöledö, Diosnö tjo̧'wo̧ wana̧lö tjö̧ji̧da, Enoc ö̧jinadanö, Dios iteda o̧'wo̧ ösöwanö edi̧ma. Jo̧kwaobetjö̧, Diosnö ichibo jö̧ba̧lo̧ma Diosnö ösödobö jo̧be, Isabenö Diosma jo̧, jö̧ba̧lö. Ja̧danö, Diosnö ichibo jö̧ba̧lo̧ma Diosnö ösödobö jo̧be, Diosma otiwa jawa iyakwo̧ itenöda ösödö ichibobö isakwo̧nöma, jö̧ba̧lö.

⁷ Ja̧danö, da'dömine Noébi Diosnö o̧'wo̧ wana̧lö ji̧na. Diosma jo̧banö yöawinobe jojodönö lȩbebö weakwa̧, wotjinö baibanö ojwe okwatinö baledakwa̧ma. Ja̧danö Noéma, ja̧ yöawi̧ma, jejenö okwatobe la'akatjöda edajiököjayonö Diosnö o̧'wo̧ wana̧lö ö̧jinobe. Ja̧danö, Noéma Diosnö yebabinö ja̧nö, jo̧banö o̧'wo̧ wana̧lö, Dios wei̧ a̧ja̧kwinobe, isowi otidobö wei̧ma. Jo̧kwaobetjö̧ Noéma, Diosnö o̧'wo̧ wana̧lö isowi nöowi otidinobe ömöledönö tjö̧jibinö pjaatobö. Ja̧danö jo̧ba Diosnö o̧'wo̧ wana̧lö isowi otidinama i̧sebinobe, Isabenö, böjȩnö ju̧kwadö Dios wei̧ a̧ja̧kwöködöma sulabedö, Dios lȩebakwawö̧, jö̧ba̧lö. Jo̧kwaijayonö Noéma Diosnö o̧'wo̧ wana̧liökwe Diosma, itenöda ösödadönö jö̧a̧li̧danö jö̧a̧linobe Noénö, Chedemi bitema suli̧ jwibo̧, jö̧ba̧lö.

⁸ Ja̧danö, Abrahambi Diosnö o̧'wo̧ wana̧lö ji̧na. Jo̧bama Diosnö o̧'wo̧ öwana̧lobetjö̧ Dios wei̧ a̧ja̧kwinobe, Jelobekwö 'ya̧wi, chiyakwemi jo̧bekwö, jö̧ba̧lö, wei̧ma. Abrahamma i̧'yobema wajwiijayonö, Diosnö o̧'wo̧ öwana̧lobetjö̧ i̧'yinobe.

⁹ Ja̧danö, Diosnö o̧'wo̧ öwana̧lobetjö̧ Abrahamma jobe Dios weajemi ichibö jobeda ö̧jinobe, ju'wedö tjitebonö, iteda itebomaökö. Jo̧ba jelobetjö 'yi̧nama jobe ju'wedö tjitebo nijima balewöda ö̧jinobe. Jobe ö̧jenama otiweju, 'diejunö ö̧jinokobe, iteda itebookobetjö̧. Sule chi̧wo̧dö tjöwö'yetjö otikwado̧ muchebö otidajejunöda ö̧jinobe, otiwökejunö, 'diökejunö. Ja̧danö itji̧ Isaacbi, ö'dö̧ Jacobbi jejenö tjö̧jinobe. Jobadöbi Dios yöbawö junö jö̧a̧linawö̧, Kwiteboduwi chiyocha, jö̧ba̧lö. Jo̧kwaijayonö jobadöbi ju'wedö tjitebonöda tjö̧jinobe chi̧wo̧dö tjöwö'yetjö otikwado̧da muchebö otidajejunöda, Abraham ö̧jinadanö.

¹⁰ Isabenö chömöledö, Abrahamma, itebotjö labebajo̧ma Diosnö o̧'wo̧ öwana̧lobetjö̧ ju'wedö tjitjebonöda ö̧jinobe, ju'wi möle Dios iyakwa̧ itebo, mölejȩbenö iteboma te'ada̧lö. Ja̧danö, ju'winö Abrahamnö itebo iyakwemima, Dios iteda ösödi̧danö otiwanö otikwemi, juluwemi, ba̧kwȩlö̧jatebö jo̧bö otikwemima.

¹¹ Ja̧danö Abrahamma pöe, ilekwo Sara tjemu debujubi jö̧jijayonö Diosnö o̧'wo̧ wana̧lö ö̧jiökwe Abrahamnö pjaatinobe Diosma, itji̧nö 'yaebobö. Isabenö Abrahamma, Dios jö̧a̧li̧danö badekwachakobe, jö̧ba̧lö, ösödiökwe Diosma pjaatinobe jo̧banö, itji̧nö 'yaebobö.

¹² Jo̧kwaobetjö̧ Dios jö̧a̧li̧danö Abrahamtjö tupadanö jojodöma tjöba̧jekwachinobe. Yelösöda si̧li̧'i̧dö tjöba̧jekwi̧danö ba̧jekwadö Abrahamtjö tupadanö jojodöma. Ja̧danö, so̧bi̧ya̧pu̧so̧pja̧danö ba̧jekwadö Abrahamtjö tupadanö jojodöma. Jojo bakwo̧tjöda, jwiinö pöetjöda ba̧jekwadö tupadanö jojodöma, ba̧ja̧dakwawökenanö ba̧jekwadö. Isabenö, Abraham Diosnö o̧'wo̧ wana̧lö ö̧jobetjö̧ jo̧ba, jwiinö pöe, 'yaebobö ujulu jwibo̧tjöda ba̧jekwadö tupadanö jojodö tjöbötjachinobe.

¹³ Ja̧danö Abrahambi, iteda ömöledöbi, Diosnö tjo̧'wo̧ wana̧lö tjö̧jinobe, wotjenanö baibanö. Idöda tjiteboökena ju'wedö tjitebonö ja̧nö, Dios yöbawö ujunina iyemima ina tjeminokobe, idöda tjiteboma. Yayonö tjo̧'wo̧ ösöwanö tjuju̧kwinobe, Diosnö tjo̧'wo̧ wana̧lö, Ökwödö ba̧kwȩlö̧jatebö dö̧jakwemi ditebo, Dios iyakwemima, ju'wi möle iyakobe, jö̧ba̧lö. Chömöledö, jobadöma tjöwaisinobe, Böjȩnö ja̧nö Dios yöbawö ujunina iyakwemi demököma otiwa, jö̧ba̧lö. Ja̧danö tjöwaisinobe, Ökwödö ba̧kwȩlö̧jatebö ditebo dö̧jakwemima böjȩnömaökena, jö̧ba̧lö. Jobadöma jweinö omukwatö, Ökwödöma jelobeda jojodösa, ina ditebonöma ichiböködösa, jö̧ba̧lö, tjo̧'wo̧ ösöwanö tjuju̧kwinobe, Diosnö tjo̧'wo̧ wana̧lö.

¹⁴ Jo̧kwaobetjö̧ chömöledö, jobadö tjomukwatina ökwödönö wajuwanö i̧sebobe, jobadöma böjȩnö tjö̧ji̧ tjiteboma tjite'ada̧linokobe, Dios yöbawö ujunina badekwachoböma, jö̧ba̧lö. Böjȩnö tjö̧ji̧ tjitebo omukwatökönö, tjo̧'wo̧ ösöwanö ju'winö tjiteboakwemida tjite'ada̧linobe.

¹⁵ Isabenö, tjitebo tjomukwati̧ma, ajayi tjitebo, latjebachinobekwö yemidanö tjetjachajoböma tjomukwatinokobe. Tjetjachajobö ji̧jayonö tjo̧'wo̧ ösöwanö ja̧nö, ju'wi tjiteboda tjite'ada̧linobe, tjitebo baibakwemima.

¹⁶ Tjeachakwawa öpöjödö, jwaikwöda 'ya̧nö böjȩnö tjitebotjö o̧penönö otiwemi omukwatö tjite'ada̧linobe, tjitebo baibakwemi. Mölejȩbe Dioskwö tjö̧ji̧ tjitebo baibakwemima tjo̧'wo̧ ösöwanö ja̧nö omukwatö tjite'ada̧linobe. Jejenö omukwatö tjite'ada̧liökwe Diosma jwiinö o̧'wo̧ ösöwanö ö̧jinobe. Ja̧danö, o̧'wo̧ ösöwi̧ i̧sebö jobadö mölejȩbe tjitebo otidinobe, iteda ö̧jobe tjö̧jobö.

^17-19 Ja̧danö Abrahamma, Diosnö o̧'wo̧ öwana̧lobetjö̧ Dios wei̧ a̧ja̧kwinobe, jo̧dawo̧ itji̧ Isaacnö iyobö wei̧ma, u̧lume'a 'wibebö juwö. Diosma Abraham itenöda isabenö ösödö a̧ja̧kwojobö edobö jejenö weinobe. Ja̧danö döwaisa chömöledö. Ajayinöma Diosma Abrahamnö, Ökwö kwitji̧, Isaactjöda, ökwötjö tupadanö jojodö tjöbötjachakobe, jö̧ba̧lö, yöbawö ujuninobe. Jejenö yöbawö ujuninajayonö Diosma weinobe Abrahamnö, jo̧ba itji̧ Isaacnö iyobö. Ja̧danö, Abrahamma Diosnö o̧'wo̧ wana̧lö ö̧jobetjö̧, jo̧ba wei̧ a̧ja̧kwinobe, Diosma chitji̧ wobajaletjö tjeachajoböma juluwo̧, jö̧ba̧lö. Ja̧danö, itji̧nö juwö iyawemi wame wanajo̧ u̧lume'a 'wiebotö jö̧ba̧lö isa̧pi̧ i̧sebinobe Abrahamma. Jo̧kwaijayonö jejenö i̧sebena Diosma jwöinobe, Kabatakwawi, jö̧ba̧lö. Jejenö balediökwe Abrahamma omukwatinobe, Diosma chitji̧nö wobajaletjö tjeachajinö tjeatajabe, jö̧ba̧lö. Isabenö chömöledö, ja̧ baledinama i̧sebobe, Abrahamma Diosnö o̧'wo̧ wana̧lö ö̧jinobe, jö̧ba̧lö.

²⁰ Ja̧danö da'dömine Isaacma, Diosnö o̧'wo̧ wana̧lö ö̧jobetjö̧, i̧tji̧mu Jacobnö, Esaunö ju'winö baledakwa̧ wene yöawinobe, Diosma isabenö ökwönö pjaatakwo̧, jö̧ba̧lö.

²¹ Ja̧danö da'dömine Jacobma, Diosnö o̧'wo̧ wana̧lö ö̧jobetjö̧ jwiinö pöe, ida̧ökö woawa yöneawachenama, otokwa'onö ja̧nö Diosnö ösödö yöawinobe ö̧'dö̧dö José i̧tji̧munöma du̧ju̧tajanö bakwo̧nökwena, Diosma isabenö ökwönö pjaatakwo̧, jö̧ba̧lö.

²² Ja̧danö da'dömine Joséma, Diosnö o̧'wo̧ wana̧lö ö̧jobetjö̧ ida̧ökö woakwa̧ma yöneawachena ömöledö Israel jojodö ju'winö Egiptotjö latjebakwa̧ wene yöawinobe. Ja̧danö ömöledönö weinobe Egiptotjö latjebena iteda iwe'iju e'ewö tji̧'yobö Dios iyakwemi Canaánbe, jobeda tjo̧tjobö.

²³ Ja̧danö chömöledö, omukwataduwi da'dömine Moisés ojo'do, abe'do Diosnö tjo̧'wo̧ wana̧lö tjö̧jinama. Moisés ojo'dobi, abe'dobi Diosnö tjo̧'wo̧ wana̧lö tjö̧jobetjö̧ itji̧nö jemajökwenöma tojö lotjinobe, Egipto jojodö kwabö lotjapji jö̧ba̧lö. Chömöledö, tjitji̧nö edö, Isabenö bite ditji̧ma otiwo̧, wainö jo̧, jö̧ba̧lö, ja̧wo̧dö wa̧medukwanö tjöwawatinokobe. Diosnöda ösödö, la'aka luwo̧ wei̧ a̧ja̧kwökönö tjitji̧nö tjotojinobe, yebabökönö.

²⁴ Ja̧danö chömöledö, Moisésbi Diosnö o̧'wo̧ wana̧lö ji̧na. Jo̧bama Egiptonö la'aka luwo̧ itjiju jitji̧danö öda̧peachinobe, inesö jo̧, Bitema la'aka luwo̧ ö'dö̧, jö̧tja̧lökwe. Jo̧kwaijayonö ida̧ökö pöe baibenama, Diosnö o̧'wo̧ wana̧lö ö̧jobetjö̧ Egiptonö, inesö jo̧danö ö̧ji̧ma öpöjödinobe, Ötjöma Egipto jojobö̧kö̧sa, la'aka luwo̧ ö'dö̧bö̧kö̧sa, jö̧ba̧lö.

²⁵ Ja̧danö, Egiptonö okobe jwiinö juna̧lo̧ ö̧ji̧, iteda sulabenö ösödi̧da ja̧bö ö̧ji̧ma kaatibinobe. Jejenö ö̧ji̧ma kaatibinobe, Babe chö̧ji̧, chösödi̧da ja̧bö chö̧ji̧ma böjȩda ja̧kwawa, ba̧kwȩlö̧jatebö mikwawökö, jö̧ba̧lö. Jejenö jö̧könö, Chömöledökwö chö̧jobö jö̧ta̧la, Dios ömöledökwö, jobadökwö usula emawö, jö̧ba̧lö, omukwatö ujuninobe.

²⁶ Jejenö omukwatö ujuninobe Moisésma, Dios jojodönö tjö̧jibinö pjabatö weakwo̧nö ite'ada̧lobetjö̧, Israel jojodötjö öbötjachakwo̧nöma. Ja̧danö, jejenö te'ada̧lö ja̧nö, Moisésma Dios ömöledökwö usula emawinobe. Jejenö ja̧nö omukwatinobe, Usula emawö chö̧jijayonö, usula emawö Dios ömöledökwö Dios weakwo̧nö te'ada̧lö chö̧ji̧ma ajayinö Egiptonö okobe jwiinö juna̧lö chö̧jinatjö o̧penönö mikwawobe, jö̧ba̧lö. Moisésma jejenö omukwatinobe iteda ö̧ji̧ möle jawa omukwatokobetjö̧. Moisésma ju'wi möle mölejȩbe ö̧jakwa̧ omukwatinobe, Dios jwiinö mikwawi̧ iyakwa̧ möle. Isabenö, Moisésma ja̧ möle te'ada̧lö Diosnö o̧'wo̧ wana̧lö ö̧jinobe.

²⁷ Ja̧danö Moisésma, Diosnö o̧'wo̧ öwana̧lobetjö̧ laebinobe Egiptotjö. Jobe la'aka luwo̧ma Moisésnö jwiinö ölabijayonö Moisésma Diosnö o̧'wo̧ wana̧lö yebabökönö laebinobe. Dios, edawökö Diosnöma edö tji̧'yi̧danö jwaikwöda i̧'yinobe Moisésma, tjebachajökönö.

²⁸ Ja̧danö Moisésma Diosnö o̧'wo̧ öwana̧lobetjö̧ ömöledö Israel jojodönö weinobe o̧bȩja̧dö kwatjajawö̧ tjökwösobu dutjebobö apjudebiya jawa ö'diyanöbi, möakwochobe jawanöbi, Dios weökwe ángelma abönö damö ömadönö kwabö lookobö. Ja̧danö Dios weökwe ángelma, tjejubiya mönö baledö Israel jojodö tji̧tji̧mu abönö damö ömadönöma kwabö loinokobetjö̧ ja̧ baledina omukwatö ju'wi imiamekwena Israel jojodöma pjiesta junö Diosnö tjösödobe.

²⁹ Ja̧danö, Israel jojodöma Diosnö tjo̧'wo̧ tjöwana̧lobetjö̧ o̧pesobu duwobu mikwobu petjibinobe, mana baibaja̧manö, Diosma ökwödönö pjabato̧, jö̧ba̧lö. Jo̧kwaijayonö Egipto jojodö, jobadönö lubadöma jobu petjibaja̧ma ö'wejenö batjibena mana baibaja̧mama jwiinö o̧pesobuda baibinobe, Egipto jojodö o̧tjawinö.

³⁰ Ja̧danö, Israel jojodöma Diosnö tjo̧'wo̧ tjöwana̧lobetjö̧ Jerico comunidad, tjöpöjojodö tjuju̧kwemima jelemutjö dötölataja möle baledibanö jalawibö tji̧'yinobe, Dios wei̧danö. Ja̧danö, jelemutjö dötölataja möle jalawibö katjatajena Jerico comunidad tjöekwemima jwiinö pjolachibö meinobe.

³¹ Jemi ikenama Israel jojodöma jobe Jerico ju̧kwadö, Diosnö öpöjödadönö kwabawö lotjinobe. Jobe ju̧kwadötjö bakwujunöma kwabö lotjinokobe, Rahab mikwujunö. Jobujuma Diosnö ösöduju. Ja̧danö, jobujuma jiteba'o wei̧da ji̧nuju, Rahabma. Jobujunö jö̧jibinö pjabatö kwabö lotjinokobe ajayinö Israel jojodönö tjö̧jibinö pjajatinobetjö̧, abönö niji isakwö 'yi̧nadönö. Ja̧ mölema jobadö Israel jojodönöma jömöledö tjölabi̧danö jölabinokobe, jobadönö pjabatö. Diosnö jo̧'wo̧ wana̧lö pjajatinobetjö̧, Jericonö juluwajadöma jobujunö kwabö lotjinokobe.

³² Chömöledö, jejenö ju'wedöbi Diosnö tjo̧'wo̧ wana̧lö tjuju̧kwinobe. Ja̧danö, yelösöda nöinö yötawobö ji̧jayonö, yötawökena yöawakwawa ödöobetjö̧. Jo̧kwaijayonö ja'yubeda ina yötawaduwakwö. Ju'wedö Diosnö tjo̧'wo̧ wana̧lö ji̧nadöma bidö: Gedeón, Barac, Sansón, Jefté, David, Samuel, ju'wedö Dios yöawi̧ yöbawinadöbi.

³³ Chömöledö, jobadöbi, jobadödanö ju̧kwadöbi, Diosnö tjo̧'wo̧ tjöwana̧lobetjö̧ jelobe ju̧kwadö tjöpöjojodökwö 'böbabikwawö 'ya̧jadö tjujuluwinobe. Ja̧danö, jobadötjö ju'wedöma jweinöda webö tjuju̧kwinobe Diosnö tjo̧'wo̧ tjöwana̧lobetjö̧. Ja̧danö, jobadötjö ju'wedöma Dios yöbawö ujunina, Chiyocha, jö̧ba̧lö, iyi̧ma tjeminobe, Diosnö tjo̧'wo̧ tjöwana̧lobetjö̧. Ja̧danö, jobadötjö ju'wedöma di̧di̧ba̧dönö tjöbadekwajenabi debö tji̧'yinokobe, Diosnö tjo̧'wo̧ tjöwana̧lobetjö̧.

³⁴ Ja̧danö, jobadötjö ju'wedöma Diosnö tjo̧'wo̧ tjöwana̧lobetjö̧ ökwöla nöolanö töbebö lotjajayonö ja'yubebi tjubibinokobe, Diosnö tjo̧'wo̧ tjöwana̧lobetjö̧. Ja̧danö, jobadötjö ju'wedöma tjöpöjojodö tibatö lotjo jö̧tja̧lijayonö titjatinököwö̧, Diosnö tjo̧'wo̧ tjöwana̧lobetjö̧. Ja̧danö, jobadötjö ju'wedö me'dawachibadöma Diosnö tjo̧'wo̧ tjöwana̧lobetjö̧ tjujuluwachibanö pjaatinobe Diosma jobadönöma. Ja̧danö, jobadötjö ju'wedö juluwöködödanö ichejekwadöma tjöpöjojodö 'böbabikwawö ichajadöma 'dötjibajinö tjujuluwinobe, Diosnö tjo̧'wo̧ tjöwana̧lobetjö̧. Yelösöda chömöledö, ba̧jekwadö tjuju̧kwinobe Diosnö tjo̧'wo̧ wana̧lö ju̧kwinadöma.

³⁵ Ja̧danö, ju'wedöbi Diosnö tjo̧'wo̧ wana̧ladö tjuju̧kwinobe, ya̧dö. Jobadö ya̧döma, Dios wobajaletjö tjeatajinawö̧ tjömöledö. Ja̧danö ju'wedöbi, ömadöma Diosnö tjo̧'wo̧ wana̧lö tjuju̧kwinobe. Jobadöma inia tjötjinö ja̧tjobö tje'ewinawö̧. Yelösöda inia tjötjinö baledinobe jobadönöma. Ja̧danö, jobadönö wetjinobe Diosnö katjatibobö, Chöpöjödökwe, jö̧ba̧lö. Ja̧danö, jejenö katjatibitjö̧ma inia tjötjoko jö̧tja̧linena. Jo̧kwaijayonö jejenöma katjatibinokobe, ju'wi möle tjö̧jakwa̧ tjomukwatobetjö̧, yemidanö tjebachajö Dioskwö ba̧kwȩlö̧jatebö tjö̧jakwa̧ möle. Ja̧danö, Diosnöma chöpöjödökwe, jö̧ba̧lö, jö̧tja̧lokobetjö̧ inia tjötjinö baledinobe, wotjenanö baibanö.

³⁶ Ja̧danö ju'wedöbi tjuju̧kwinobe, Diosnö tjo̧'wo̧ wana̧ladöma. Jobadönö oböbi, kwakwaböbi kwakwatjinobe. Ja̧danö, di̧batö tjödinobe ka̧lena ba̧kwawejunö.

³⁷ Ja̧danö ju'wedönö, Diosnö tjo̧'wo̧ wana̧ladönöma inawiya tjikwawinobe. Ja̧danö, ju'wedö Diosnö tjo̧'wo̧ wana̧ladönöma bulabinö lotjinobe, ja'ösedönöbi. Ja̧danö, ju'wedö Diosnö tjo̧'wo̧ wana̧ladönöma kwölöte ödöötenö dodobö lotjinobe. Ja̧danö, ju'wedö Diosnö tjo̧'wo̧ wana̧ladöma yelösöda jwibinadö. Jobadöma usulasedöda kwetjachinobe obeja i̧sȩdo̧tjö, chiwo i̧sȩdo̧tjö otikwado̧da 'dubawö. Jejenö tjuju̧kwinobe usula emawö inia tjötjinö ja̧tjawö̧.

³⁸ Ja̧danö, jobadöma tjeju jwibadöda, mejenö mö'ösa'ijunö kwebachö i̧lȩdo̧nöbi, lajunöbi ji̧atjinobe, jwiinö usula emawö. Chömöledö yötawaduwakwö. Jejenö usulasedöda tjuju̧kwijayonö Diosma jobadönö edö, Jwiinö mikwawadö, jö̧ba̧lö, omukwatinobe. Isabenö chömöledö, jobadöma jwiinö mikwawadötjobetjö̧ böjȩ mikwawököjȩ jobadö tjitebo baibanö tjö̧joböma jwiobe. Tjiteboma mölejȩbeda.

³⁹ Chömöledö, bidö yötawawö̧ma Diosnö tjo̧'wo̧ wana̧lö tjö̧jiökwe Diosma o̧'wo̧ ösöwanö edinobe jobadönöma, Otiwanö ösödö ju̧kwadö, jö̧ba̧lö. Yayonö jo̧ba jwiinö otiwi̧ jawa, ba̧kwȩlö̧jatebö ji̧ jawa, yöbawö ujunina iyakwa̧ma ina badekwachinokobe jobadönöma. Jobadötjö bakwo̧bi deobe Dios jwiinö otiwi̧, ba̧kwȩlö̧jatebö ji̧ jawa iyi̧tjö eminama.

⁴⁰ Chömöledö, jobadöma ina tjite'ada̧lobe jo̧dawa'ye tjemobö öpöjödobetjö̧ Diosma, jwiinö otiwi̧ ba̧kwȩlö̧jatebö ji̧ jawa iyi̧tjö tjemoböma. Wainö omukwatinobe Diosma, jo̧dawa'ye jobadönöda iyakwa̧ badekwachökönö. Biya̧ Dios omukwatinama: Ökwödö jobadö damötjö Diosnö tjo̧'wo̧ wana̧lö ji̧nadökwö bakobe Dioskwö ja̧nö, iteda jwiinö otiwi̧ jawa, ba̧kwȩlö̧jatebö ji̧ jawa iyi̧ demobö omukwatinobe. Ja̧ möleda Dios yöbawö ujunina iyakwa̧ma badekwachakobe, jobadö damötjö Diosnö tjo̧'wo̧ wana̧linadönöbi, ökwödönöbi, bakobe badibena.