Hebreos 10 - Dios Iwene

Jesús iteda iyawina yöawina wene

¹ Isabenö chömöledö, böjȩtjö Diostjö jojodötjö ö'weje la'aka pjabato̧ iyi̧, ba̧kwöta o̧bakwena Dios wei̧ Moisés iwȩyudina a̧ja̧kwö iyi̧ma la'akatjöda pjaatinokobe jojodönö ba̧kwȩlö̧jatebö suli̧tjö dichawedö tjichibobö Dioskwö. Wanedö yötawaduwakwö chömöledö, jojodö tjo̧'wo̧ jawanö wanedöma: Jojo o̧'wo̧ jawama jojobö̧kö̧, ¿jö̧tö? Jojo ö̧ji̧ i̧sebijayonö o̧'wo̧ jawada jo̧be. Inesö jojobö̧kö̧. Chömöledö jejenö, jojo o̧'wo̧ jawama inesö jojobö̧kö̧ ji̧danö, jojodö Diosnö ajayinö tjiyinama inesö iyawa ji̧nökö. Ja̧ tjiyinama wanedöda wanekwachinobe ju'winö Diosnö iyakwa̧. Ja̧ ju'winö iyakwa̧ wanekwachinama Cristoda iyakwa̧. Isabenö chömöledö, Cristo iteda bakwötanöda iyawö dumusidi̧ imidawinobe ba̧kwȩlö̧jatebö ji̧nö, ökwödö, dusuli̧ma söbebö lobö.

² Chömöledö, ja̧ böjȩtjö Diostjö jojodötjö ö'weje la'aka pjabato̧ iyi̧ pjaatitjö̧ma jojodö suli̧tjö dichawedö batjibanö ¿yemidanöbi yemidanö iyobö jo̧beji̧? Yemidanöbi yemidanö iyobö jwiobe, chömöledö, ida̧ökö pjaatitjö̧ma. Jo̧kwaijayonö iyi̧ma okobe jwiinö pjaatokobetjö̧ yemidanöbi yemidanö iyiabina. Pjaatokobe jojodö suli̧tjö dichawedödanö Dios öba a'o tjö̧jobö, Tjo̧wi̧ dusuli̧ma dichö loajabe, jö̧ba̧lö. Jo̧kwaobetjö̧ yemidanöbi yemidanö iyiainobe. Chömöledö böjȩtjö Diostjö jojodötjö ö'weje pjabato̧ iyi̧ okobe jwiinö pjaatitjö̧ma, Dios öba a'o suli̧tjö dichawedöda tjö̧jobö, iyi̧ma katatoinena.

³ Jo̧kwaijayonö pjaatokobetjö̧ yemidanöbi yemidanö, bakwöta o̧bakwena Diostjö jojodötjö ö'weje la'aka pjabato̧ma iyiainobe jojodö tjusuli̧ midö. Ja̧danö bakwöta o̧bakwena jojodö tjomukwatobö jo̧be, ¡Ayö! Dios öba a'o ina sulabedöda dö̧jobetjö̧ yemidanöbi, yemidanö ö'weje la'aka pjabato̧ iyoböma jo̧be, jö̧ba̧lö.

⁴ Jo̧kwaobetjö̧ chömöledö döwaisobö jo̧be, Pakaya, chiwo tjökwösobuma pjaatinokobe jojodö tjusuli̧ söbebö loobö, jö̧ba̧lö. Jo̧kwaobetjö̧ jojodöma ina Dios öba a'o sulabedöda tjuju̧kwobetjö̧ yemidanöbi, yemidanö Diostjö jojodötjö ö'weje la'aka pjabato̧ma jojodö tjusuli̧ midö iyobö weinobe.

^5-6 Jo̧kwaobetjö̧ ju'wi iyawa pjaatoböma jo̧be, jojodö tjusuli̧ söbebö loobö iyawama. Chömöledö, ja̧ iyawama Cristoda, itedada iyawinama. Jo̧bama böjȩnö ichena Diosnö jö̧a̧linobe iteda iyawakwa̧, böjȩnö Diostjö jojodötjö ö'weje pjabatadö tjiyi̧ söbebö lobö iyawakwa̧ma. Baikwö laebobe Dios iwenetjö, Cristo iteda Abe'donöda jö̧a̧lina wene: Chabe'do ökwö kwösödi̧ma jojodö ökwönö tjiyi̧maökö, kwabö tjiyawö̧nöbi, ju'wi tjiyi̧bi. Isabenö kwo̧'wo̧ ösöwachibökönö jo̧ja jojodö tjiyi̧ edö, tjusuli̧ söbebö loköbobö tjiyi̧ma, juwö tjiyawö̧nöbi, ju'wi tjiyi̧bi. Jejenömaökö Chabe'do ökwö kwösödi̧ma. Ja̧ tjiyi̧danömaökö ju'wi iyawada ösödo̧ja. Ökwö kwösödi̧ iyawama ötjödasa. Ötjöda chiteba'okwöda chiyawobö ösödo̧ja, jojo bötjachö böjȩnö chö̧jobö weköbinökweda.

⁷ Ja̧danö Chabe'do Dios, ökwönö yöta̧la, Ötjöma kwiwenenö yökawinökwe badekwacho̧sa. Böjȩnö chö̧ja, okobe jwiinö weköbi̧ cha̧ja̧kwobö. Jejenö laebobe Dios iwenetjö, Cristo iteda Abe'donö yöa̧lina, Ötjöma ötjödada chiyawakwo̧sa, ökwö weköbi̧ a̧ja̧kwö, jö̧ba̧lö.

⁸ Ja̧danö chömöledö, Cristo ja̧ yöa̧linama domukwataduwo. Ajayinö yöa̧linobe, Ökwö kwösödi̧ma jojodö ökwönö tjiyi̧maökö, kwabö tjiyökwenöbi, ju'wi tjiyi̧bi, jö̧ba̧lö. Jejenö tjiyobö weköbijayinö kwösödokobe, jö̧ba̧lö, yöa̧linobe.

⁹ Ikenama yöa̧linobe, Böjȩnö chö̧ja, okobe jwiinö weköbi̧ cha̧ja̧kwobö, jö̧ba̧lö. Jejenö laebobe Cristo yöa̧linama. Chömöledö, jejenö jö̧ba̧lö ökwödönö wajuwanö yöawobe, biya̧: Dios ajayinö yöbawö ujuninama 'yö̧könö 'yayi̧ balekwa yöbawö ujuni̧da 'yo̧be. Ja̧danö ju'wibi yöawobe, biya̧: Ju'wi balekwa iyawa badekwachakobe, balekwo̧ iyawinama. Chömöledö, jo̧ba balekwo̧ iyawinama Cristoda, Dios weinökwe midawö iyawobö.

¹⁰ Ja̧danö, jo̧ba balekwo̧ iyawina Cristoma Dios wei̧ a̧ja̧kwö jojodö tjusula tjumusidi̧ midawö itedada bakwötanöda iyawinobe. Jejenö imidawinobetjö̧ ökwödöma Dios öba a'o suli̧ jwibadöda ja̧dösa. Isabenö, Cristoma balekwo̧ iyawina, böjȩtjö Diostjö jojodötjö ö'weje pjabatadö tjotidena tebachinama, ökwödö Dios öba a'o suli̧ jwibadö dö̧jobö. Isabenö chömöledö, Cristoma Dios wei̧ a̧ja̧kwö, itedada bakwötanöda iyawö jojodö dusula dumusidi̧ imidawinobetjö̧, ökwödöma Dios öba a'otjö ba̧kwȩlö̧jatebö suli̧ jwibadö babibinadösa.

¹¹ Ja̧danö, böjȩtjö Diostjö jojodötjö ö'weje pjabatadö, Levítjö tupadanö jojodöma, Dios ajayinö yöbawö ujunina wei̧ a̧ja̧kwö, yemidanöbi yemidanö, bakwöta mölekwena bakwainö iyiatjinobe. Jo̧kwaijayonö, ja̧ tjiyi̧ma jojodönö okobe jwiinö pjaatinokobe tjusuli̧ söbebö loobö.

¹² Jo̧kwaijayonö, jejenömaökö Cristo iyawinama. Yemidanöbi yemidanö iyawinokobe. Bakwötanöda itedada iyawö woinobe jojodö tjusuli̧ tjumusidi̧ midawö. Ja̧danö, jo̧ba imidawinama ba̧kwȩlö̧jatebö jo̧bö imidawinobe. Ja̧danö, Cristo imidawinama ba̧kwȩlö̧jatebö ji̧nö pjabatö 'yo̧betjö̧, tjo̧wi̧, jo̧ba otidawa kaatinobe. Ja̧danö, otidawa kaatinobetjö̧ jo̧bama Dios ö̧bemi öwaisobekwöchobe öbamatinobe.

¹³ Jobe ba̧nö Cristoma ite'ada̧lobe isabenö ichakwa̧ möle, öpöjojodönö Dios ujuluwi̧ möle ichakwa̧ma. Ja̧ möle ichena Diosma Cristo öpöjojodönö ujuluwakobe, tjujulu jwibadöda batjibakwedö, Cristo ömasapiyanö ja̧tö loi̧danö.

¹⁴ Isabenö chömöledö, Cristoma kaatinobe iteda otidawa, jojodö tjö̧jibinö okobe jwiinö pjabatö. Jo̧ba otidawatjö ja'yubebi ji̧binokobe chömöledö. Isabenö, iteda bakwötanöda okobe jwiinö midawö okobe jwiinö jojodö tjö̧jibinö pjaatinobe, Dios öba a'otjö suli̧ jwibadö batjibanö pjaatawö̧nöma. Ja̧danö, jobadö suli̧ jwibadö babibinadöma ba̧kwȩlö̧jatebö Dios öba a'o suli̧ jwibadöda tjö̧jakwedö.

¹⁵ Ja̧danö chömöledö, Dios O̧'wo̧ Luwo̧bi jejenö yöawinobe, Cristo wobö imidawinawö̧ma ba̧kwȩlö̧jatebö tjusuli̧ söbebö loawö̧da tjö̧jakwedö, jö̧ba̧lö. Baikwö laebobe Dios iwenetjö, Dios O̧'wo̧ Luwo̧ damötjö yöawina:

¹⁶ Ju'wi möle, ajayi yöbawö chujunina söbebö lobö, 'yayi̧ balekwa yöbawö junö yötawakwo̧sa chömöledönö. Ja̧danö, ja̧ 'yayi̧ balekwa yöbawö junö weti̧ma chömöledö tjomajade okwa a̧jakobe. Ja̧danö, jobadö tjomukwati̧ okwanöbi chiwȩyudi̧danö wȩyukwachakobe, ötjö 'yayi̧ balekwa yöbawö junö weti̧ma.

¹⁷ Ju'wibi: Ja̧ 'yayi̧ balekwa yöbawö junö chiwenetjö laebakobe, jobadö sulabenö ja̧tji̧ yemidanöma chomukwatökakwo̧sa, jobadö ötjö weti̧ a̧ja̧kwökönö tjö̧ji̧ma, jö̧ba̧lö. Jejenö yöawinobe Dios O̧'wo̧ Luwo̧ma.

¹⁸ Isabenö chömöledö, Diosma jojodö tjusuli̧ma söbebö loinobetjö̧ yemidanöbi yemidanö balekwa mikwa tjiyoböma jwiobe.

—Dioskwö yebabökönö dichibaduwo Jesús imidawina do̧'wo̧ wana̧lö, Isabenö do̧'wo̧ luwo̧ okwanö dichawedösa— jö̧ba̧lö, yöawina wene

¹⁹ Chö̧ja̧wo̧dö, Jesús iteda ökwösobu ebawinö wobö, itedada midawö iyawinobetjö̧, döwaisa, Tjo̧wi̧ Dioskwö yebabökönö ichibadösa, jö̧ba̧lö. Isabenö chö̧ja̧wo̧dö, Dioskwö dichibakwedösa, böjȩtjö eju okwasȩko̧, jwiinö inesösȩko̧ tedachi̧danö. Isabenö, Dioskwö dichibobö jo̧be, ökwödöda jo̧banö yöda̧li̧ma.

²⁰ Isabenö, ökwödöma Dioskwö dichibakwedösa Jesús jojoda bötjachinama, iteda iteba'o iyawö dusula dumusidi̧ imidawinobetjö̧. Jejenö mana 'yayama 'witji̧danö 'wiinobe Jesúsma, tjöekwa'wo, Diostjö jojodötjö tjöekwa'wo tupakwö teachakwawama. Chö̧ja̧wo̧dö, ökwödö Dios ö̧jobekwö tebachadösa. Tjo̧wi̧ Diostjö ökwödötjö tjöeba̧li̧ma jwiobe chö̧ja̧wo̧dö.

²¹ Ja̧danö Jesús, Diostjö jojodötjö ö'weje la'aka pjabato̧ma jobeda ö̧jobe, Dios inesö mölejȩbetjö eju okwa.

²² Jo̧kwaobetjö̧ Dios ö̧jobekwö tedachaduwo chömöledö, jo̧banö ösödö. Omukwataduwökönuwi, ¡Ayö! Ötjöma Dios öba a'otjö wene juna̧lo̧sa, jö̧ba̧lö. Dioskwö chichibobö jwibo̧sa, jö̧ba̧lö, omukwataduwökönuwi. Jejenö domukwatobö jwiobe chö̧ja̧wo̧dö. Tjo̧wi̧, ökwödöma ja̧ domukwati̧tjö dichö loinawö̧sa, Jesús ökwösobunö lilibö. Ja̧danö chö̧ja̧wo̧dö jwiinö salöobu ojwiyonö idichinawö̧sa, Dios öba a'otjö dewadöda badibinö. Jo̧kwaobetjö̧ Dios ö̧jobekwö tedachaduwo, okwa dichawedöda, Jesús imidawinanö jwiinö do̧'wo̧ wana̧lö.

—¿Dakwö dö̧jobö jo̧beda?— abebö a̧ja̧kwö yöawina wene

²³ Chö̧ja̧wo̧dö ökwödöma, Diosnö do̧'wo̧ wana̧lö ja̧dösa, jö̧ba̧lö yöda̧lobe. Ja̧danö, Dios jö̧a̧li̧danö isabenö badekwachakobe, jö̧ba̧lö, omukwatö ju̧kwadösa. Jejenö omukwatö jo̧banö do̧'wo̧ wana̧lö jwaikwöda di̧'yaduwo, jo̧ba jö̧a̧li̧danö badekwachakwa̧ te'ada̧lö. Isabenö, jwaikwöda do̧'wo̧ wana̧lö di̧'yobö jo̧be, Diosma isabenö jö̧a̧li̧danö ja̧bo̧obetjö̧.

²⁴ Ja̧danö chö̧ja̧wo̧dö, ökwödöma dömöledökwö ja̧nö domajadenö budekwabinö yödawakwawobö jo̧be, Dömöledönö ösödabikwawö dö̧jaduwo, bakwelajatebö pjabatö, jö̧ba̧lö.

²⁵ Ja̧danö, ökwödö Cristonö ösödadöma jo̧banö ösödö doko̧ko̧kwa̧lobö jo̧be chömöledö. Jejenö ko̧ko̧kwa̧lö dö̧ji̧ma kadatiboko. Ökwödötjö ju'wedöma tjo̧wi̧, katjatibinobe bakobe ökwödökwö ko̧ko̧kwa̧lökönö. Jejenö ko̧ko̧kwa̧lö dö̧ji̧ma kadatiboko. Ja̧danö, ko̧ko̧kwa̧lö ökwödöda yöbawö pjadatakwawobö jo̧be, Duluwo̧ Jesús yemidanö ichakwa̧ möle, ja̧danö Dios lȩebi̧ yöawakwa̧ mölema tjo̧wi̧ jwiinö lekwokobetjö̧.

²⁶ Chö̧ja̧wo̧dö döwaisa, Jesúsda midawö woinobe Dios ökwödö ju'wi mölekwena sulabenö ja̧di̧ma söbebö loobö, jö̧ba̧lö. Jo̧kwaijayonö ökwödötjö bakwo̧, Dios isabenö iwene waiso̧ma, Jesúsnö katatibo ötjö sulabenö chösödi̧da ja̧bö chö̧jo, jö̧ba̧lö, omukwatitjö̧ma ¿ju'wi Diosnö iyawa jo̧beji̧, jo̧ba sulabenö ja̧i̧ söbebö loobö? Jwiobe. Chömöledö ju'wi iyawa jwiobe sulabenö ja̧di̧ söbebö loobö iyawama. Jesús iteda iyawinada pjaatobe sulabenö ja̧di̧ söbebö loobö.

²⁷ Chömöledö, bakwo̧ Jesúsnö kabatibajo̧ sulabenö ja̧ena, ja̧ sulabenö ja̧i̧ma Diosma söbebö lookobe. Jo̧bama ju'wi möle Dios öba a'ö ja̧nö Dios labinö lȩbebö yöawi̧ a̧ja̧kwakwo̧, yelösöda. ¡Ayö! Diosma jwiinö ölabikobe jo̧banö, Jesúsnö kabatibö sulabenö ja̧bö jo̧nöma. Jo̧banö i̧sebakobe iteda jwiinö ölabi̧, ökwöla jwiinö tubi̧danö ölabi̧ma. Ja̧ Dios jwiinö ölabi̧ma jo̧ba öpöjojodönö juwö loakwola tubi̧danö ölabi̧. Chömöledö Dios jwiinö ölabi̧ma ¿ökwödönö i̧sekwobö dösödiji̧? Döpöjöda. Labobe yelösöda. Jo̧kwaobetjö̧ jweinö omukwatö Jesúsnö ösödö kwi̧'yaduwo, jo̧banö kabatibökönö.

²⁸ Chömöledö, domukwato damötjö, bakwo̧ Moisés wei̧ öpöjödö, Cha̧ja̧kwökö, jö̧ba̧lö, kabatibo̧nö baledina. Jo̧banö kwabö lotjobö weinobe dujutaja, wa̧medukwa yötjawena, Bitema a̧ja̧kwökö, jö̧ba̧lö. Le jwiinö edö jo̧ba a̧ja̧kwö̧kö̧nö kwabö lotjobö weinobe. Jo̧kwaobetjö̧ chömöledö, Moisés wei̧ a̧ja̧kwö̧kö̧nöbi kwabö lotjobö weinobema

²⁹ ¿dakwö baledoböda Dios Itji̧nö kabatibö, jo̧ba yöawi̧ a̧ja̧kwöködönö? Chömöledö, Dios jobadönö lȩebi̧ma Moisés wei̧ a̧ja̧kwöködönö lȩebinatjö o̧penönö labobe. Isabenö, jobadöma tjo̧'wo̧nö sulinö edadö Dios Itji̧nö. Ja̧danö, jobadöma Jesús ökwösobu ebawinö woina omukwatö, tjo̧'wo̧ sulinö edö, Jesús ökwösobuma mikwawokobu, jö̧ba̧lö, omukwatadö. Chömöledö, Cristoma itedada ökwösobunö imidawinobe Dios 'yayi̧ balekwa yöbawö ujunina jamatö 'yo̧bö, ökwödö Dioskwö dichibobö pjabatö. Ja̧danö, jobunöda dichawedödanö batjibinobe, Dios öba a'o suli̧ jwibadöda. Jejenöijayonö Dios Itji̧nö kabatibö ösödöködöma, Mikwawokobu, jö̧ba̧lö, omukwatadö. Ja̧danö, jejenö omukwatadöma, Dios O̧'wo̧ Luwo̧nöbi, Mikwawö̧kö̧, jö̧ba̧lö, sulabenö omukwatadö. Yelösöda Dios O̧'wo̧ Luwo̧nöbi, ökwödönö pjabato̧nö, jojodönö lȩlö̧jino edo̧nöma jwiinö tjöpöjödobe. ¡Ayö! Jobadöma yelösöda Dios jwiinö lȩebakwawö̧.

³⁰ Chömöledö döwaisa, Diosma jobadönö jwiinö lȩebakobe, jö̧ba̧lö. ¿Kwomukwataduwiji̧ Dios iteda lȩebakwa̧ yöawinama? Baikwö laebobe Dios iwenetjö: Otjödasa jojodönö lȩbebo̧ma. Jo̧kwaobetjö̧ ötjöma jojodö sulabenö ja̧tji̧ balekwa mikwa lȩtebakwo̧sa, jö̧ba̧lö laebobe. Ja̧danö baikwöbi laebobe Dios iwenetjö: Duluwo̧ Diosma iteda ömöledö tjö̧jina edö lȩbebö yöawakwo̧. Jejenö laebobe Dios iwenetjö.

³¹ ¡Ayö! 'Yaba̧lo̧ Dios lȩebakwa̧ma jwiinö labi̧ ja̧kobe. Dios lȩebawö̧nö omukwatö yebabidösa, ¡Ayö jobadöwe! jö̧ba̧lö.

—Jesúsnö ösödö me'dawachibökönö di̧'yobö jo̧be— jö̧ba̧lö, yöawina wene

³² Jo̧kwaobetjö̧ chömöledö ökwödönö pjabatö yötawaduwakwö. Omukwataduwi ajayinö Jesús kwö̧jibaduwinö pjaatina kwöwaisachibinaduwa, Jesúsma dö̧jibinö pjabato̧, jö̧ba̧lö. Jemi tupakwö yelösöda usula kwemawinaduwobe Jesúsnö kwösödaduwobetjö̧. Ja̧danö, jejenö ökwödönö baledijayonö me'dawachibökönö kwö̧jinaduwobe, Jesúsnö kabatibökönö, ajayinö kwö̧jinaduwanö tjebachajökönö.

³³ Yelösöda usula kwemawinaduwobe chömöledö. Ju'wikwenama Jesúsnö öpöjödadöma ökwödönö jojodö tjö'da̧denö junö oböbi otjinobe. Ja̧danö, inia tjököbaduwinöbi ja̧tjinobe. Ja̧danö, ju'wikwenama kwömöledöduwinöbi inia tjötjinö ja̧tjinobe. Jejenö kwömöledöduwi inia tjötjobe edö jobadö usula tjemawi̧ma lȩlö̧jino kwedinaduwobe, ökwödöbi inia tjököbaduwobetjö̧. Jo̧kwaobetjö̧ kwömöledöduwi usula emawadökwö bakwaidödanö kwo̧'wo̧duwi̧ tjo̧bekwö kwö̧jinaduwobe.

³⁴ Ja̧danö, ju'wibi chömöledö. Kwömöledötjö ju'wedö, Jesúsnö ösödadönö ka̧lena ba̧kwaweju okwa tjödinobe. Ja̧danö, ka̧lena ba̧kwaweju okwa tjödiawö̧ kwo̧'wo̧duwi tjo̧bekwö kwö̧jinaduwobe, Ökwödöma jobadö tjö̧bi̧danö bakwainö ba̧dösa, jö̧ba̧lö. Isabenö, jobadö usula tjemawi̧ omukwatö kwo̧'wo̧duwi tjo̧bekwö kwö̧jinaduwobe. Ja̧danö chömöledö, ja̧ ajayinö möle, Jesúsnö kwösödinaduwobetjö̧ Jesúsnö öpöjödadötjö la'aka luwedöma kwiteaduwima tjeminobe. Jo̧kwaijayonö, ökwödöma me'dawachibökönö kwo̧'wo̧ luwo̧duwi ösöwanö kwö̧jinaduwobe, Ja̧ma wame jawa, jö̧ba̧lö. Dios ökwödönö iyi̧ma ja̧ wame jawatjö o̧penönö mikwawi̧, ba̧kwȩlö̧jatebö ji̧ jawa, jö̧ba̧lö, me'dawachibökönö kwö̧jinaduwobe. Isabenö chömöledö ökwödönö pjabatö yötawaduwakwö. Omukwataduwi ja̧ möle, ökwödö kwo̧'wo̧ luwo̧duwinö ösöwö kwö̧jinaduwama usula kwemawaduwijayonö.

³⁵ Jo̧kwaobetjö̧ chömöledö, jejenö kwö̧jinaduwi̧danö jemi tupakwöbi jwaikwöda kwi̧'yaduwo, Diosnö kabatibökönö. Diosnö kwo̧'wo̧duwi wana̧löda kwi̧'yaduwo, Dios jö̧a̧li̧danö isabenö baledakobe, jö̧ba̧lö. Isabenö chömöledö, ju'wi möle Dios otiwi̧ iyakwa̧ma kwemaduwakwedöja.

³⁶ Chömöledö, me'dawachibökönö kwi̧'yaduwobö jo̧be. Ja̧danö Jesúsnö kabatibökönö, Diosnö kwo̧'wo̧duwi wana̧lö tupakwö kwi̧'yaduwo, iteda wei̧ a̧ja̧kwö ja̧nö. Jejenöma Dios iyakwa̧, iteda yöbawö junö, Chiyocha, jö̧ba̧lö, iyakwa̧ma kwemaduwakwedöja.

³⁷ Chömöledö, baikwö laebobe Dios iwenetjö, Dios yöawina: Lekwökö baledena ichakwo̧ma ichakobe. Isabenö, te'ada̧lökönö ichakobe.

³⁸ Ja̧danö ötjö chömöledö, Bidöma suli̧ jwibadö, jö̧ba̧lö, jö̧ta̧lawö̧ma ötjö yötawi̧ ösödö ja̧dö. Jo̧kwaijayonö jobadötjö ju'wedöma tjebachajö tji̧'yitjö̧ma cho̧'wo̧ tjo̧inö edö chö̧jena. Jejenö laebobe Dios iwenetjö.

³⁹ Jo̧kwaijayonö chömöledö, yötawaduwakwö. Ökwödöma ajayinö dö̧jinama tjebachinöködösa, Dios lȩebakwawö̧da babibö. Ökwödöma Diosnö do̧'wo̧ wana̧ladösa. Ja̧danö, dö̧jibinö pjaatawö̧sa ökwödöma. Chömöledö biya̧ yötawi̧ma pjabatö yötawa.