Hebreos 1 - Dios Iwene

Hebreo jojodönö yöawinatjö ajayinö yöawina: —Dios Itji̧da yöawina a̧ja̧kwinadösa— jö̧ba̧lö

¹ Dokwa chömöledö. Ökwödöma kwöwaisaduwa, damötjöma Diosma iteda yöawi̧ yöbawadönö yöbawiabijetö, jojodönö yötjawobö. Yemidanö yemidanöbi, jelo̧nö jelo̧nöbi iteda yöawi̧ yöbawadönö yöbawiabijetö Diosma. Ja̧danö, jobadö, Dios yöawi̧ yöbawadöma ökwödö da'dödömine judío jojodönö Dios yöawi̧ yöbawiabijadötö. Ajayinöma jejenö ji̧aijetö, da'dödömine Dios yöawi̧ tja̧ja̧kwinama, ina Jesús ichapjii.

^2-3 Jau chömöledö, damötjö da'dödöminema Dios yöawi̧ yöbawadö yötjawi̧ a̧ja̧kwijadötö. Jo̧kwaijayonö ökwödö Dios yöawi̧ da̧ja̧kwi̧ma damötjö da'dödömine tja̧ja̧kwinatjö o̧penönö mikwawi̧ wene da̧ja̧kwijatö, Dios Itji̧da yöawina da̧ja̧kwobetjö̧. Ja̧ yöawina da̧ja̧kwinama jwiinö mikwawi̧ yöawina. Chömöledö, Diosma böjȩkwö webijetö iteda Itji̧nö, iteda yöawi̧ yöawobö jojodönö, Dios Itji̧ ö̧jinanö ju̧kwadönöma. Ja̧danö, ökwödöbi, jobadötjö tupadanö jojodöma, Dios Itji̧ yöawi̧ tja̧ja̧kwina da̧ja̧kwijatö. Ökwödöma jejenö Dios yöawi̧ a̧ja̧kwinadösa. Da'dödömine tja̧ja̧kwinadanömaökö, Dios Itji̧ yöawina weneda da̧ja̧kwijatö. Ja̧danö chömöledö, Dios Itji̧nö yötawaduwakwö. Dios Itji̧ma isabenö jwiinö inesö jo̧. Jo̧bama Dios 'da̧batö ujuninökwe, okobe jwiinö böjȩnö ju̧kwi̧bi, mölejȩnö ju̧kwi̧bi la'aka luwo̧ baibanö. Isabenö jo̧ba, okobe jwiinö la'aka luwo̧ baibanö Dios 'da̧batö ujuninökweda jojodönö otiwanö pjabatina, dusuli̧ma Dios söbebö loobö. Jejenö pjaataja̧ ikena böjȩtjö mölejȩbekwö kabekwajo̧ ichibö inesö ö̧bena bamatijetö, Jwiinö Juluwo̧ Dios ö̧bemi öwaisobekwöchobe. Isabenö chömöledö, Dios Itji̧, mölejȩnö inesö ö̧bena bo̧ma jwiinö inesö bo̧. Ja̧danö, ju'wibi yötawaduwakwö Dios Itji̧nö, Dios damötjö 'da̧batö ujuninökwe okobe jwiinö la'aka luwo̧ baibanö jo̧nöma. Okobe jwiinö böjȩnö ju̧kwi̧bi, mölejȩnö ju̧kwi̧bi Diosma iteda itji̧nötjö otidijetö. Ja̧danö, okobe jwiinö böjȩnö ju̧kwi̧ma Dios Itji̧ iteda ujulunö webo̧ ina ju̧kwo. Isabenö chömöledö, Dios Itji̧, okobe jwiinö otidina, okobe jwiinö ina ju̧kwobö webo̧ma jwiinö inesö jo̧. Ja̧danö chömöledö, jo̧ba Dios Itji̧ma jwiinö otiwo̧. Jo̧bama bakwainö Diosdanö jo̧. Dios jwiinö otiwi̧danö jo̧ba Dios Itji̧bi bakwainö jwiinö otiwo̧. Ja̧danö, Dios Itji̧ma Dios jwiinö otiwi̧danö bakwainö jo̧obetjö̧, okobe jwiinö Dios jwiinö otiwi̧ma jo̧batjöda salöinö idejati̧danö i̧sebinobe. Isabenö chömöledö, Dios Itji̧, Dios jwiinö otiwi̧danö otiwo̧ma ökwödönöma Dios otiwi̧ i̧sebo̧. Ja̧danö, ökwödö dö̧ji̧ma jo̧ba Dios jwiinö otiwo̧ Itji̧tjö, jwiinö inesö jo̧tjöda Dios yöawina a̧ja̧kwinadösa.

—Dios Itji̧ ángelesdönötjö o̧penönö inesö jo̧— jö̧ba̧lö, yöawina wene

^4-5 Isabenö chömöledö, Dios Itji̧ma jojodö tjusuli̧ söbebö loobö pjabato̧. Ja̧danö, jo̧bama mölejȩbenö inesö ö̧bena bo̧. Jo̧bama jwiinö inesö bo̧, yelösöda. Isabenö jo̧bama ángelesdönötjöbi o̧penönö jo̧. Jo̧bama mölejȩbe kabekwachajina, Dios ö̧bemi öwaisobekwöchobe iteda jwiinö inesö ö̧bena ö̧bobetjö̧ yötawaduwakwö chömöledö, Jo̧bama ángelesdönötjöbi o̧penönö jo̧. Ja̧danö, jo̧ba inesö ö̧bena bo̧nö Diosma öabobe, Chitji̧, jö̧ba̧lö. Chömöledö, Diosma la'akatjöda ángelesdötjö bakwo̧nöbi öabokobe, Chitji̧, jö̧ba̧löma. Jo̧kwaobetjö̧, ángelesdönömaökö, Itji̧nöda, Chitji̧, jö̧ba̧lö, öabobetjö̧ döwaisobö jo̧be, Dios Itji̧ma ángelesdönötjö o̧penönö jo̧, jö̧ba̧lö. Chömöledö jejenö wajuwanö i̧sebobe Dios iwenetjö. Baikwö laebobe Dios iwenetjö, damötjö Dios yöawi̧ yöbawo̧ iwȩyudina, Dios iteda Itji̧nö yöawinama: Chitji̧, babe möle yötawa, Ökwöma ötjö Chitji̧ja, jö̧ba̧lö. Ja̧danö, ökwö Kwabe'dosa ötjöma, jö̧ba̧lö, yötawa babe mölema. Jejenö laebobe Dios iwenetjö. Ju'wibi Dios yöawina laebobe Dios iwenetjö, Dios iteda Itji̧nö yöawina: Ju'wi möle Chitji̧nö yötawakobe, Ötjöma jo̧ba Abe'dosa, jö̧ba̧lö. Ja̧danö, jo̧bama ötjö Chitji̧, jö̧ba̧lö, yötawakobe. Jejenö laebobe Dios iwenetjö. Chömöledö, Diosma Itji̧nö öabobetjö̧, Chitji̧, jö̧ba̧lö, döwaisachibobö jo̧be, Dios Itji̧ma ángelesdönötjö o̧penönö inesö jo̧, jö̧ba̧lö.

Ángelesdönö yöawina wene

⁶ Ja̧danö chömöledö, ángelesdönö yötawaduwakwö. Ju'wi Dios yöawina laebobe iteda iwenetjö, Dios ángelesdönö yöawinama. Chömöledö Diosma ángelesdönö yöawinobe, Ángelesdöma ötjö Chitji̧ abönö pöenö tjösödakobe yemidanö böjȩkwö, balekwöjȩnö ichakwo̧nö, jö̧ba̧lö. Baikwö laebobe Dios iwenetjö: Chömöayedö ángelesdönö okobe deinö, Chitji̧ yemidanö ichakwo̧nö tjösödobö weta, Jwiinö inesö jo̧, jö̧ba̧lö. Jejenö laebobe Dios iwenetjö. Isabenö chömöledö, Diosma jejenö, Chömöayedö ángelesdönö okobe deinö Chitji̧nö tjösödobö weta, jö̧ba̧lö, yöawinobetjö̧ döwaisachibobö jo̧be, Dios Itji̧ma ángelesdönötjö o̧penönö inesö jo̧, jö̧ba̧lö.

⁷ Ja̧danö chömöledö ¿dakwö yöawobeda Diosma, ángelesdönö? Baikwö labebobe Dios iwenetjöma: Damötjö ángelesdönö chotidijatö chömöayedö batjibanö. Ja̧danö, jobadönö webo̧sa jelobe jelobebi tji̧'yobö, ötjö weti̧ a̧ja̧kwö 'ya̧jadönöma. Jwa̧lȩ'epjo jwa̧lȩ'ewi̧danö tji̧'yoböbi, ja̧danö, ökwöla ubi̧ juluwi̧danö tji̧'yoböbi webo̧sa, jobadö chömöayedö ángelesdönöma. Jejenö laebobe Dios iwenetjö, Dios iteda ömöayedö ángelesdönö yöawina.

Dios iteda itji̧nö yöawina wene

⁸ Ja̧danö, jejenö Diosma ömöayedö ángelesdönö yöawijayonö wainö yöawobe iteda Itji̧nöma. Baikwö laebobe Dios iteda Itji̧nö jö̧a̧lina: Isabenö ökwöma Diosja. Ja̧danö, ba̧kwȩlö̧jatebö jojodönö webö kwö̧jakwo̧ja. Isabenö jweinöda omukwatö webö kwö̧jakwo̧ja.

⁹ Ja̧danö, ökwöma jweinöda omukwatö kwö̧jinobe böjȩnö. Isabenö jejenö jweinö omukwatö ja̧kwawama ösödo̧ja. Jejenö laebobe Dios iwenetjö, iteda Itji̧nö jö̧a̧linama. Ina laebobe: Jo̧kwaijayonö böjȩnö ja̧nö, jweinö omukwatö kwö̧jonö ju'wedö jelobekwö omukwatö tjö̧jinobe. Jobadöma jweinö omukwatö ji̧nöködö, idöda sulabenö tjomukwati̧da omukwatö. Isabenö, ökwöma jojodö jejenö tjö̧ji̧ma jwiinö öpöjödo̧ja. Ja̧danö, jweinö omukwatö ja̧kwawada kwösödi̧tjö, jelobekwö omukwatö jö̧könö, ötjö, Kwuluwo̧ Diosma ökwönö 'da̧batö juno̧sa, la'aka luwo̧ baibanö webö kwö̧jobö. Cho̧'wo̧ jwiinö ösöwö, kwuunö o̧tesobu tobebö ökwönö 'da̧batö chujuna. Isabenö ökwönöda 'da̧batö chujuna la'aka luwo̧ baibanö, ángelesdönömaökö. Jejenö laebobe Dios iwenetjö, Dios iteda Itji̧nö jö̧a̧lina, ba̧kwȩlö̧jatebö webö ö̧jakwo̧nöma.

¹⁰ Ju'wibi jö̧a̧linobe Diosma iteda Itji̧nöma. Baikwö laebobe Dios iwenetjö: Chuluwo̧, ökwöma ajayinöma böjȩ kwotidinobe. Ja̧danö mölejȩbi kwotidinobe.

^11-12 Jo̧kwaijayonö böjȩbi, mölejȩbi kwotidinama ju'winö 'dö̧ibajakobe. Kamijido̧ damösado̧, kȩ'achajado̧ baibi̧danö böjȩbi, mölejȩbi baibakobe, 'dö̧ibajinö. Ja̧danö, kamijido̧ damösado̧ bibö 'yayado̧, balekwa̧do̧ 'dutjawi̧danö, böjȩbi mölejȩbi 'dö̧ibajenama 'yayöjȩ, balekwöjȩda baibakobe. Jo̧kwaijayonö ökwöma bakwo̧da ba̧kwȩlö̧jatebö, balewachökönö kwö̧jakwo̧ja, kwö̧ji̧ma la'akatjöda 'dö̧ibajökönö. Jejenö laebobe Dios iwenetjö, Dios iteda Itji̧nö jö̧a̧lina. Isabenö chömöledö, Dios iwene ökwödönö wajuwanö i̧sebobe, Dios Itji̧ma jwiinö inesö jo̧, ángelesdönötjöbi o̧penönö, jö̧ba̧lö.

¹³ Ju'wibi jö̧a̧linobe Diosma iteda Itji̧nöda, ángelesdönömaökö. Baikwö laebobe Dios iwenetjö: Chö̧bemi chöwaisobekwöchobe bamati. Jenada ba̧wi kwöpöjojodönö chujuluwenanö kabatö. Jau, chujuluwakobe jobadö kwöpöjojodönö, kwömasapiyanö ja̧tö loköbi̧danö, tjujulu jwibadö batjibakwedöda. Jejenö Dios iwenetjö laebi̧ma i̧sebobe, Dios Itji̧, Dios ö̧bemi öwaisobekwöchobe bo̧ma jwiinö inesö jo̧, jö̧ba̧lö. Jo̧kwaijayonö chömöledö Diosma la'akatjöda weinokobe ángelesdönö, Chö̧bemi chöwaisobekwöchobe bamati, jö̧ba̧lö.

—Ángelesdö jojodönö pjatjatobö weawö̧— jö̧ba̧lö, yöawina wene

¹⁴ Jejenö weinokobe jobadö isapjobedönöma Dios ömöayedödatjobetjö̧. Jobadöma Dios ömöayedö ja̧nö, jojodönö pjatjatobö Dios weawö̧. Isabenö, ángelesdöma jojodönö pjatjatobö weawö̧, Dios mikwa jwiinö tjö̧jibinö pjaati̧tjö tjemakwedönöma. Isabenö chömöledö, ángelesdöma Dios ömöayedöda, jojodönö pjatjatobö weawö̧. Jo̧kwaobetjö̧ chömöledö, döwaisachibanö wajuwanö i̧sebobe, Dios Itji̧ma ángelesdönötjöbi o̧penönö jwiinö inesö jo̧, jö̧ba̧lö.