Génesis 50 - Dios Iwene

José abe'do Jacobnö Canaán nijibe ödobö e'ewina jawa

¹ Ja̧danö, Joséma abe'do ö'wö baibajabetjö̧ iökwe jwiinö o̧'wo̧ tjo̧bekwö, budekwö abe'do ö'wö babibajo̧nö wo̧ba̧lö du̧batijetö.

² Ikenama webijetö wobinadönö te'ada̧ladönö titjatobö wotjököjaye.

³ Ja̧danö cuarenta möle baibanö jejenö otidijadötö, ö'wö babibajo̧nö. Ja̧danö egipto niji jojodöma setenta möle baibanö Jacobnö omukwata̧lö, budekwabinö ji̧jadötö.

⁴ Ja̧ tjubudekwabi̧ möle, setenta möle baibajena, Joséma abebijetö faraón öpjea ömöayedönö: —Ötjönö otiwanö kwedaduwitjö̧ma, biya̧ atebi̧ma yökawaduwo faraónnö.

⁵ Chabe'doma ajayinöma ötjönöma baikwö, yöba̧lö chujunobö weijatö: Ö'wö batibaja̧ ikena ötjönö e'ewö kwödajaduwo Canaán nijibe. Jobema, hiteo jojo Efrain niji i̧lȩdo̧nö, chömöledö wobadönö tjödinena kwödajaduwotjö, jö̧ba̧lö weijatö ötjönöma. Ja̧danö, ötjöma jo̧banö yöba̧lö chujunijatö, Jau jobeda chödajokwö, jö̧ba̧lö. Jo̧kwaobetjö̧ babema chi̧'yobö jo̧be, chabe'donö lödö. Chödaja̧ ikenama chȩwa̧jo̧cha, te'ada̧lökönö— jejenö abebijetö Joséma faraón ipjea ömöayedönö faraónö yötjawobö.

⁶ Ja̧danö, faraónma, José aebi̧ma a̧ja̧kwö jö̧ba̧lijetö Josénö, Jau, otiwa. Kwabe'donö yöba̧lö kwujuninadanö e'ewö lödaji, jö̧ba̧lö.

⁷ Jo̧kwaobetjö̧ Joséma Canaánbe 'yi̧jetö. Faraón ömöayedö, ba̧jekwadö Josékwö 'yi̧jadötö, faraón ipjea jojodöbi, ja̧danö, egipto niji jwiinö inesö la'aka luwedöbi.

⁸ Ja̧danö, Joséma öpöedönöbi, ö̧ja̧wo̧nöbi, ja̧danö, okobe deinö ömöledönöbi, ömöayedönöbi öbibö 'yi̧jetö. Jo̧kwaijayonö tji̧tji̧munö, tja̧jwi̧munö Gosén nijinö junibö 'yi̧jetö.

⁹ Ja̧danö, ju'wedöma ka̧ba̧yu̧dö tötji̧ kolukiyanö 'yi̧jadötö. Ja̧danö, ju'wedöma kabayunö wanö 'yi̧jadötö. Ba̧jekwadö 'yi̧jadötö Josékwö abe'donö lödö i̧'yobe.

¹⁰ 'Ya̧jadöma, Jordán ojwe ö'öbö, Atad mikwena, trigo ochiju tjebö lödö kwakwawena ichibijadötö. Jena ja̧nö labinö budekwabinö ji̧jadötö, Jacobnö omukwatö. Siete möle baledibanö budekwabijadötö.

¹¹ Jobe ju̧kwadö, Canaánnö ju̧kwadöma jobadö tjubudekwabobe edö yöba̧lakwawijadötö, edi bidö Egipto jojodö jwiinö tjo̧'wo tjö̧bekwö tjubudekwabi, jö̧ba̧lö. Jo̧kwaobetjö̧ jobe mikwijetö, Abel-mizraim, jö̧ba̧lö.

¹² Jejenö, Jacob i̧tji̧muma okobe jwiinö tjabe'do weina a̧ja̧kwijadötö.

¹³ Jo̧banö e'ewijadötö Canaán nijibe, jobeda tjödobö, Macpela i̧lȩdo̧ okwa. Ja̧ i̧lȩdo̧ma Mamré comunidad ö'öbö ji̧jetö. Ajayinöma Abrahamma emijetö ja̧ i̧lȩdo̧ma hiteo jojo Efronnötjö̧, ömöledönö ba̧kwȩlöjatebö lödawemi baibanö.

José öpöedönö yöa̧lina jawa, Söbebö lotakwödönö, jö̧ba̧lö

¹⁴ Ikenama Joséma Egiptobe ȩwa̧ji̧jetö öpöedökwö, ö̧ja̧wo̧kwö, ja̧danö, okobe deinö jo̧bakwö 'yi̧nadökwö

¹⁵ Ja̧danö, öpöedöma tjabe'do woiniawö̧ yebabijadötö, Babema dö̧ja̧wo̧ Joséma balekwa mikwa weakobe ökwödönö, jo̧banö ökwödö sulabenö ja̧dinobema, jö̧ba̧lö.

¹⁶ Jejenö yetjabobetjö̧ webijadötö tjö̧möayo̧nö Josénö yöawobö, baikwö: —Duluwo̧, kwabe'do ö'wö baibakwa̧ abönö

¹⁷ ökwödönö weijatö, yökawaduwo kwö̧ja̧wo̧ Josénöma, jwiinö sulabenö ja̧köbaduwinama o̧'wo̧ sököbo, jö̧ba̧lö. Jo̧kwaobetjö̧ ökwönö adeba: Kwo̧'wo sököbo ökwödö jwiinö sulabenö ja̧dina ökwönöma. Ökwödö, kwabe'do uluwo̧ Dios ömöayedöma ökwönö adeba, kwo̧'wo sököbo sulabenö ja̧dinama, yemidanö kwomukwatoko, jö̧ba̧lö— jejenö José öpöedöma webijadötö tjö̧mö̧ayo̧nö José yöawobö. Ja̧danö, Joséma jobadö atjebi̧ a̧ja̧kwö o̧'wo̧ jwiinö tjo̧bekwibö budekwabijetö.

¹⁸ Ikenama öpöedöma José ö̧jobekwö 'ya̧wibö tjöba nijakwö bȩbachibijadötö, Ökwödöma ökwö weköbi̧da a̧ja̧kwö ja̧dösa, jö̧ba̧lö.

¹⁹ Jejenö yötja̧lökwe Joséma jö̧ba̧lijetö: —Chömöledö, yekabiduwa ötjönöma. Ötjöma Diosbö̧kö̧sa. Ja̧danö, ökwödönö lȩekwa yöbawö lȩtebobö jwibo̧sa.

²⁰ Isabenö ökwödöma kwo̧'wo̧duwi sulinö edö, ötjönö sulabenö baledobö kwomukwataduwinajayonö Diosma ja̧ sulabe baledi̧ma balewö lobö otiwanö baibanö pjaatinobe ötjönöma. Ja̧danö, Diosma ötjönö la'aka luwo̧ baibanö chö̧bobö ujuninobetjö̧ jojodönö, ba̧jekwadönö tjö̧jibinö pjatatobö weinobe.

²¹ Jo̧kwaobetjö̧ yötawaduwakwö: Yekabiduwa. Isabenö, ötjöda ökwödönö, ja̧danö, kwömöledöduwinö chite'dada̧lakwo̧ma— yöbawijetö Joséma öpöedönöma. Ikenama ösödinö yöba̧lijetö jobadönöma tjo̧'wo̧ ösöwanö tjö̧jobö.

^22-23 Ja̧danö, José, öpöedö, ö̧ja̧wo̧, tjömöledöbi jobe Egiptonö ju̧kwijadötö. Ja̧danö, Joséma jwiinö pöe ina 'yaba̧lö ö̧jobetjö̧ Itji̧ Efraín ö'dö̧dönöbi edijetö. Ja̧danö, ju'wedö tjemunö, Manasa itji̧ Makir mikwo̧ i̧tji̧munö Joséda bötjatijetö, iteda i̧tji̧mudanö batjibanö. Ja̧danö, Joséma, cientosdiez a̧yo bo̧ wobijetö.

²⁴ Woakwa̧ abönö yöbawijetö Joséma ömöledönö: —Chömöledö, ötjöma tjo̧wi̧ pöebo̧sa, wotakwa̧ma lekwokobe. Ja̧danö, yötawaduwakwö: Diosma isabenö pjaatakobe ökwödönöma, bena Egipto nijitjö̧ öbibö labebö. Ja̧danö Diosma jelobe öbibö e'ewakobe ökwödönöma, ajayinö da'dödöminenö, Okwötjö tupadanö jojodönö niji chiyocha, jö̧ba̧lö, yöawinobekwö. Jau chömöledö. Da'dödömine Abrahamnö, Isaacnö, dabe'do Jacobnö jejenö iteda iwene yöbawö ujuninobe Diosma, Ökwödötjö tupadanö jojodönö niji, idöda tjitebo baibanö chiyocha, jö̧ba̧lö—yöbawijetö Joséma ömöledönöma, woakwa̧ abönö.

²⁵ Ikenama baikwö webijetö jobadö ömöledönö, Israel i̧tji̧munöma, yöbawö tjujunobö: —Diosma Canaán nijikwö kwȩwa̧jaduwobö öbibö ichitjö̧ma ötjö chowobiyakoma kwe'ewaduwo, jobeda kwödaduwo , jö̧ba̧lö yöba̧lö tjujunobö webijetö.

²⁶ Ja̧danö, Joséma, cientosdiez ayo̧ bo̧ wobijetö. Ikenama wobinadönö teáda̧ladöma Josénö titjataja̧ ikena, José ömöledöma Josénö isapjonö anijadötö, Egipto nijibe tjo̧tjobö.