Génesis 46 - Dios Iwene

Israel Egiptobe i̧'yina jawa

¹ Ja̧danö, Israelma okobe deinö ömöledökwö, ömöayedökwö, a̧jwi̧mu̧kwö, ja̧danö okobe jwiinö u̧kwa tea e'ewö 'yi̧jetö Egiptobe. Ja'ö 'ya̧nö Beersebanö ichibö juwö iyijetö Diosnö ösödö, abe'do Isaac uluwo̧ Diosnöma.

² Ikenama yö̧te ja'ö Israelma a̧ja̧kwijetö jo̧banö Dios jwöi̧ma: —Jacob, Jacob— jwöbijetö. Jwöökwe atadijetö: —Bena chö̧ja— atadijetö.

³ Ikenama Diosma yöbawijetö: —Ötjöma Diossa, kwabe'do Isaac uluwo̧ Diossa. Yebabökönö 'ya̧wi Egiptobe, jobeda kwö̧jo. Jobetjöda ökwötjö tupadanö jojodönöma pjatatakwo̧sa tjö̧ba̧jekwachobö. Jo̧kwaobetjö̧ yekabi, Egiptobe 'ya̧wi̧.

⁴ Jacob, ökwökwö chi̧'yakwo̧sa Egiptobe. Ja̧danö, ju'wi möle ökwötjö tupadanö jojodönö kwitjebobe tjetatajakwo̧sa. Ökwöma Egiptonö woköbenama kwitji̧ Joséda ökwökwö ja̧nö kwöbajalebiyama umu'dudakobe— yöbawijetö Diosma Jacobnöma.

⁵ Ikenama Jacobma Beersebatjö laebobö a̧la̧ibijetö. I̧tji̧muma Jacobnö, jo̧bakwö ichajadönö öbibö 'yi̧jadötö Egiptobe, faraón iyinakiyanö ba̧nö a̧jibajadönöma.

⁶ Ja̧danö, Jacob, iteda ömöledö, tja̧jwi̧munö, Canaántjö tjeminawö̧nö öbibö, ja̧danö tju̧kwa tea e'ewö 'yi̧jadötö Egiptobe.

⁷ Jacobma okobe deinö ömöledökwö, i̧tji̧mu ömadö, ya̧dö, ja̧danö ö̧'dö̧dö ömadö, ya̧dö, 'yi̧jetö Egiptobe.

Jacob, i̧tji̧mu, ö'dö̧dö tjimibiya ba̧ji wȩyukwina

⁸ Böjama Jacob i̧tji̧mu, ö'dö̧dö tjimbiya ba̧ji wȩyukwöja. Ja̧danö jobadöma, Jacobtjö tupadanö jojodöma, Israel jojodö, jö̧ba̧lö mikwadö. Ja̧danö, Jacob Leatjö itji̧ abönö pöema Rubén.

Jacob, Leatjö i̧tji̧mu, Leatjö ö'dö̧dö tjimibiya ba̧ji wȩyukwina

⁹ Rubén i̧tji̧mu ömadöma bidö: Hanoc, Falú, Hezrón, Carmi.

¹⁰ Jacob ikena itji̧ma Simeón. Simeón i̧tji̧mu ömadöma bidö: Jemuel, Jamín, Ohad, Jaquín, Zohar, Saúl. Saúl ojo'doma Canaán jojosuju.

¹¹ Jacob ikena itji̧ma Leví. Leví itji̧mu ömadöma bidö: Gersón, Coat, Merari.

¹² Jacob ikena itji̧ma Judá. Judá itji̧mu ömadöma bidö: Er, Onán, Sela, Fares, Zara. Er, Onán wobijadötö Canaántjö̧. Ja̧danö, Fares i̧tji̧mu ömadöma bidö: Hezrón, Hamul.

¹³ Jacob ikena itji̧ma Isacar. Isacar i̧tji̧muma bidö: Tola, Fúa, Job, Simrón.

¹⁴ Jacob ikena itji̧ Zabulón. Zabulón i̧tji̧mu̧ma ömadöma bidö: Sered, Elón, Jahleel.

¹⁵ Jobadö Jacob i̧tji̧mu, Rubén, Simeón, Leví, Judá, Isacar, Zabulón Leatjö i̧tji̧muma, Padan-aramnö ja̧nö 'yaebinawö̧. Itjijunöbi 'yabebijetö Jacobma Leatjö, Dina mikwujunö. Ja̧danö okobe deinö Jacob, Leatjö itji̧mu, ö'dö̧dö treinta y tresnö.

Jacob, Lea jömöayuju Zilpatjö i̧tji̧mu, ö'dö̧dö tjimibiya ba̧ji wȩyukwina

¹⁶ Ja̧danö, Jacob ikena itji̧, Lea jömöayuju Zilpatjö Gad. Gad i̧tji̧mu ömadöma bidö: Zifión, Hagui, Ezbón, Suni, Eri, Arodi, Areli.

¹⁷ Jacob ikena itji̧ma Aser. Aser i̧tji̧mu ömadöma bidö: Imna, Isúa, Isúi, Bería. Jobadö tjöjawuju Sera mikwuju. Ja̧danö Bería i̧tji̧mu ömadöma bidö: Heber, Malquiel.

¹⁸ Jobadöma Jacob Zilpatjö itji̧mu̧, ö'dö̧dö. Zilpama Lea jabe'do Leanö iyinoko, mikwanö eminokoma. Jobujutjö, Jacob i̧tji̧mu, ö'dö̧dö okobe deinö dieciséisnö.

Jacob, Rachetjö i̧tji̧mu, ö̧'dö̧dö tjimibiya ba̧ji wȩyukwina

¹⁹ Jacob ikena i̧tji̧mu ömadöma, ilekwo Raqueltjö 'yaebinawöma bidö: José, Benjamín.

²⁰ Ja̧danö José i̧tji̧mu, Egiptonö 'yaebinawö̧ma bidö: Manasés, Efraín. Jobadöma Potifera itjiju Asenat 'yajebinawö̧. Jabe'do Potiferama On comunidadnö ju̧kwadötjö idöda tjo̧'wo̧ tjöwa̧na̧lökwetjö tjö̧'da̧de pjabato̧.

²¹ Ja̧danö, Benjamín i̧tji̧mu ömadöma bidö: Bela, Bequer, Asbel, Gera, Naamán, Ehi, Ros, Mupim, Hupim, Ard.

²² Jobadö Raqueltjö Jacob itji̧mu̧ ö'dö̧dö, okobe deinö catorcenö.

Jacob, Raquel jömöayuju Bilhatjö̧ i̧tji̧mu, ö̧'dö̧dö tjimibiya ba̧ji wȩyukwina

²³ Jacob ikena itji̧ma, Raquel jömöayuju Bilhatjö, Dan. Ja̧danö Dan itji̧ma bite: Husim.

²⁴ Jacob ikena itji̧, Bilhatjö itji̧ma Neftalí. Neftalí i̧tji̧mu ömadöma bidö: Jahzeel, Guni, Jezer, Silem.

²⁵ Jobadö okobe deinö Jacob Bilhatjö i̧tji̧mu, ö̧'dö̧dö sietenö. Ja̧danö Bilhama Raquel jömöayuju, jabe'do Raquelnö iyinoko.

²⁶ Ja̧danö, okobe deinö Jacob i̧tji̧muda, ö'dö̧döda jo̧bakwö 'yi̧nadöma, sesenta y seisnö, i̧tji̧mu tji̧lekwamu ba̧ja̧dökönö.

²⁷ Ja̧danö, José i̧tji̧mu, ö'dö̧dö, Egiptonöda bötjachinadökwö okobe deinö Jacob yöne ömöledöma setentanöda, Egiptonö ju̧kwinadöma.

Jacob, iteda ömöledökwö Egiptonö tjichibina jawa

²⁸ Ja̧danö, Egiptobe 'ya̧jadöma tjichibakwa̧ yö̧neawachibena Jacobma webijetö itji̧ Judánö abönö i̧'yobö José ö̧jobekwö. Josénö abebö a̧ja̧kwobö, Gosén nijibe daida, jö̧ba̧lö, webijetö Jacobma Judánöma. Jemi ikenama Judáma ömöledö tjichobekwö tjeachaja̧ ikena Gosénbe 'yi̧jadötö Jacob, Jacobkwö ichajadöma. 'Ya̧jadö ichibijadötö Gosénbe.

²⁹ Joséma jelobe ja̧nö kolukanö a̧jibö 'yi̧jetö Gosénbe, abe'donö edö Jobe ichibö, Chabe'do, jö̧ba̧lö, abe'do ö̧jobekwö 'ya̧wibö jo̧banö wo̧ba̧lö budekwijetö Joséma, lekwe.

³⁰ Ikenama Jacobma itji̧nö Josénö jö̧ba̧lijetö: —Chitji̧ ökwönö otiwanö cheda, Chitji̧ma 'yaba̧lo̧, jö̧ba̧lö. Jo̧kwaobetjö̧ tjo̧wi̧, babema cho̧'wo ösöwanö wotakwo̧sa— jö̧ba̧lijetö Jacobma.

³¹ Ikenama Joséma öpöedönö, ja̧danö okobe deinö abe'do ömöledönö jö̧ba̧lijetö: —Chuluwo̧ faraón ö̧jobekwö chȩwa̧bija jo̧banö yöbawö, Chömöledö tjichajabe, chöpöedö, chabe'do, chabe'do ömöledö okobe deinö Canaánbetjö, jö̧ba̧lö.

³² Ja̧danö, yotawonöcha: Jobadö chömöledöma o̧bȩja̧dönö, chi̧wo̧dönö, pa̧ka̧yö̧nö te'ada̧ladö. Jobadöma tja̧jwi̧munö öbibö, ja̧danö, okobe jwiinö tjiteakwö tjichajabe. Jejenö yötawonöcha— jö̧ba̧lijetö Joséma ömöledönöma.

³³ Ina jö̧ba̧lijetö: —Jo̧kwaobetjö̧, yötawaduwakwö: La'aka luwo̧ faraónma ökwödönö jo̧ba öba a'otjö kwöjamataduwobö weakobe. Jobe kwöjamataduwena abebö a̧ja̧kwakobe, ¿Taji otikwa kwotidaduwobeda? jö̧ba̧lö.

³⁴ Jejenö ökwödönö abebö a̧ja̧kwena, baikwö kwatadaduwonö: Ökwödö kwömöayedöma tjemudayitjö babe baibanö da̧jwi̧mu o̧bȩja̧dönö, chi̧wo̧dönö, pa̧ka̧yö̧nö te'ada̧lö otidadösa, da'dödömine te'ada̧lö otidiatjinadanö. Jejenö kwatadaduwo. Jejenö yökawaduwitjö̧ma bemi Gosénnöda kwö̧jaduwobö weena, Egipto jojodö tjö̧jemi wainö. Chömöledö, jobadö Egipto jojodöma o̧bȩja̧dönö, chi̧wo̧dönö, pa̧ka̧yö̧nö te'ada̧ladönöma jwiinö tjöpöjödobe. Jo̧kwobetjö̧ wainö kwö̧ja̧duwitjö̧ma otiwena— jö̧ba̧lijetö Joséma ömöledönöma.