Génesis 4 - Dios Iwene

Adán Eva tji̧tji̧mu Caín, Abel tjö̧jina jawa

¹ Ikenama Adánma ilekwo Evakwö bakobe babibijetö. Ja̧danö, metu'wo ji̧jotö Evama. Metu'wo ja̧ju jitji̧nö emijotö. Jemajökwenö Caín midijotö, chitji̧nö chemajabe Isabenö Jo̧ pjaatobetjö̧, jö̧ba̧lö.

² Ja̧danö, jemi ikena Evama yemidanö metu'wo ji̧jotö. Metu'wo ja̧juma jelo̧ ji̧tji̧nö emijotö, Caín öjawo̧nö, Abel mikwo̧nö. Ja̧danö, jobadö damö batjibenama idö bakwo̧nökwena otidiabijadötö. Abelma o̧bȩja̧dönö bötjatö otidiabijetö, ja̧danö, Caínma batjo junö otidiabijetö.

³ Ju'winö baikwö baledijetö: Caínma öbatjotjö kwakwawa ichejebijetö Isabenö Jo̧nö ösödö iyobö.

⁴ Ja̧danö, Abelbi, Isabenö Jo̧nö ösödö iyobö ichejebijetö öbötjatinawö̧ ajayinö tji̧tji̧munö, jwiinö otiwadönö. Ja̧danö, Abelma ichejebajawö̧nö kwabö iyijetö Isabenö Jo̧nö, jobadö tjitebiyatjö jwiinö o̧tewi̧ tjitebiyama. Ja̧danö, Isabenö Jo̧ma otiwanö edijetö Abelnöbi, Abel iyajawö̧nöbi.

⁵ Jo̧kwaijayonö Caínnöma iyaja̧bi öbatjotjö kwakwawama ösödijökötö Isabenö Jo̧ma. Jo̧kwaiökwe Caínma Abelnö o̧'wo sulinö edijetö öba ölabikanö.

⁶ Jo̧kwaiökwe Isabenö Jo̧ Diosma jö̧ba̧lijetö Caínnö: —¿Tajawedö kwo̧'wo sulinö kweda kwöba ölabikanö?

⁷ Otiwanö omukwatö ötjö weti̧ a̧ja̧kwö kwiyitjö̧ma ökwönöbi otiwanö chedena. Jo̧kwaijayonö sulabenö omukwatö ötjö weti̧ a̧ja̧kwökönö kwö̧jitjö̧ma sulabema ökwönö juluwena. Jao, sulabema labo̧ ite'ada̧li̧danö wanekwachobe, jojonö ujuluwobö. Caín, sulabe wei̧ma kwujuluwo, ötjö weti̧da a̧ja̧kwö— jö̧ba̧lijetö Isabenö Jo̧ma Caínnöma.

Cain Abelnö kwabö loaja̧ ikena baledina jawa

⁸ Ju'wi möle Caínma öjawo̧nö, Mejebe kwedachajowe, jö̧ba̧lö öjawo̧kwö 'yi̧jetö mejebe. 'Ya̧jo̧, jobe ichibö Caínma öjawo̧ Abelnö meibö kwabö lobijetö.

⁹ Ikenama Isabenö Jo̧ma abebö a̧ja̧kwijetö Caínnö: —Caín ¿daida kwöjawo̧ Abelma? Jejenö abebö a̧ja̧kwökwe: —Wajwita. ¿Chöjawo̧nö te'ada̧lakwawa jojo baibanö chö̧jobeji̧ ötjöma?— atadijetö Caínma.

¹⁰ Ikenama Isabenö Jo̧ma abebö a̧ja̧kwijetö: —Caín ¿Tajawedö sulabenö ja̧köbaja̧da? Kwöjawo̧ ökwösobu ebawö nijinö 'dukwibajabe. 'Dukwibajobu chedemi jo̧ba jwöeba̧lobedanö nijitjö ökwöa ötjönöma, Lȩbebinö balekwa mikwa, jö̧ba̧lö̧— jö̧ba̧lijetö—.

¹¹ Caín, kwöja̧wo̧nö kwabö loköbajobetjö̧ ökwönö lȩtebakwö. Bena kwöjawo̧ ökwösobu nijinö 'dukwibajabetjö̧ bena kwitebo baibanö kwö̧jo jö̧ka̧lijayonö kwö̧joböma jwia.

¹² Bena niji junö kwotidobö jö̧ka̧lijayonö wa̧ji̧ökakwo̧ja. Jo̧kwaobetjö̧ jelobe jelobebi kwejunö kwö̧ji̧ jwiinö ö'öba̧liböda kwö̧jakwo̧ja— jö̧ba̧lijetö Isabenö Jo̧ma, Caínnö lȩbebö.

¹³ Jejenö jö̧a̧lökwe: —¡Ayö! Nöinö lȩkebökwesa! Ja̧ lȩkebi̧ma cho̧'wo̧ 'dibachibö chö̧jökenanö— jö̧ba̧lijetö Caínma—.

¹⁴ Chitebotjö, batjo otidö chö̧jelöma a'dewö loköbökwesa. Ja̧danö, kwöba a'o chö̧jökakwo̧sa. Chejunöbi chö̧ji̧ jwiinö ö'öba̧liböda chö̧jakwo̧sa. ¡Ayö yetabi! Jelo̧ ötjönö öbadekwajitjö̧ma kwabö loakwo̧sa—jö̧ba̧lijetö Caínma Isabenö Jo̧nö budekwö.

¹⁵ Jejenö jö̧a̧lijayonö atadijetö Isabenö Jo̧ma: —Jejenömaö̧kö̧ Caín— atadijetö—. Jweinö yötawa: Jelo̧ ökwönö kwabö loitjö̧ma jo̧banö jwiinö balekwa mikwa lȩtebakwo̧sa. Isabenö, ökwönö lȩtebemitjö̧ jwiinö o̧penönö lȩtebena jo̧banöma, jelemutjö̧ dötölataja jawa baibanö— jö̧ba̧lijetö Isabenö Jo̧ma Caínnöma. Ikenama seyudanö wȩyudö lödijetö Caínnö, ju'wedö jo̧banö seyudanö wȩyudi̧ edinö tjöwaisakobetjö̧, bitenö kwabö lodokobö jo̧be, jö̧ba̧lö.

¹⁶ Ikenama Caínma Isabenö Jo̧ ö̧jajelöma labebö 'yi̧jetö Nod nijibe ö̧jobö. Nod nijima Edén batjotjöma ja̧wo̧ laebemi badeibö ji̧jetö.

Caíntjö tupadanö jojodö tjö̧jina jawa

¹⁷ Ju'wi möle Caínma ilekwonö emijetö. Ja̧danö, ilekwoma ju'wi möle metu'wo ji̧jotö. Metu'wo ja̧juma jitji̧nö emijotö, Henoc mikwo̧nö. Ja̧danö, Caínma comunidad otidijetö. Otidajemima itji̧ iminö, bakwainö midijetö, Henoc, jö̧ba̧lö.

¹⁸ Ja̧danö, jobetjö lekwinemi ikena Henocma itji̧nö 'yabebijetö, Irad mikwo̧nö. Ja̧danö, lekwinemi ikena Iradma itji̧nö 'yabebijetö, Mehujael mikwo̧nö. Ja̧danö, lekwinemi ikena Mehujaelma itji̧nö 'yabebijetö, Metusael mikwo̧nö. Ja̧danö lekwinemi ikena Metusaelma itji̧nö 'yabebijetö, Lamec mikwo̧nö.

¹⁹ Lamecma du̧ju̧tajanö i̧lȩkwa̧munö emijetö, Ada, Zila mikwadönö.

²⁰ Ja̧danö, Adama jitji̧nö emijotö, Jabal mikwo̧nö. Jo̧bama isa̧do̧tjö debatö o̧dodanö otikwejunö ju̧kwadötjö ajayinö ji̧na, ja̧danö, pa̧ka̧yö̧nö bötjatadötjö ajayinö ji̧na, Jabal mikwo̧ma.

²¹ Ja̧danö, Ada jelo̧ jitji̧ jeminökwema Jubal mikwijetö. Jubalma arpa pjebadötjö ajayinö ji̧na, ja̧danö, isa̧nu pjubadötjö ajayinö ji̧na Jubalma.

²² Ja̧danö Lamech jeluju ilekwo Zilama jitji̧nö emijotö Tubal-caín mikwo̧nö. Jo̧bama 'dobö jalinö sedatö otidiabijetö, 'dieba jawatjö otikwama. Jo̧ba öjawujuma Naama mikwijotö.

²³ Ju'wi möle Lámecma jö̧ba̧lijetö i̧lȩkwa̧munö Adanö, Zilanö: —A̧ja̧kwaduwitjö. Bakwo̧ ötjönö kwakwaitjö̧ma chökwösobu kwu̧kwinö, jo̧banö kwabö lotena. Ja̧danö, möayo̧bi ötjönö inia tjötinö kwakwaitjö̧ma kwabö lotena. Balekwa mikwanö kwabö lotena.

²⁴ Ja̧danö, Diosma Caínnö jöa̧linobe, jelo̧ Caínnö kwabö loitjö̧ma jwiinö balekwa mikwa lȩtebakwo̧sa, Caínnö lȩtebemitjö̧ jwiinö o̧penönö lȩbebö, jö̧ba̧lö. Chilekwamu yötawaduwakwö: Babebi, bakwo̧ ötjönö kwabö loitjö̧ma yelösöda Diosma balekwa mikwa jwiinö lȩebakwo̧ jo̧banöma. Isabenö, Diosma ötjönö kwabö lobo̧nöma Caínnö kwabö lobo̧nö lȩebinatjö̧ o̧penönö lȩebena— jö̧ba̧lijetö Lámecma ilekwamunö.

Eva jitji̧nö, jelo̧nö 'yajebina jawa

²⁵ Adánma yemidanö ilekwo Evakwö bakobe babibijetö. Ja̧danö, jobujuma metu'wo ja̧ju jitji̧nö emijotö. Emajökwenö midijotö Set, jö̧ba̧lö. Jo̧banö midö jö̧ba̧lijotö: —Diosda iyajokosa jelo̧ chitji̧nö. Chitji̧ abönö pöe Caínma kwabö loinobe ö̧ja̧wo̧nö, Abelnöma. Jo̧kwaijayonö Dios balekwo̧nö iyajokosa— jö̧ba̧lijotö Evama.

Set itji̧nö 'yaebina jawa

²⁶ Ja̧danö, Setma pöe baibena ilekwonö emijetö. Ja̧danö itji̧nö 'yabebijetö. Jo̧banö Enós, jöba̧lö midijetö. Ja̧danö, Enós öbötjachina tupakwö jojodöma ajayinö Isabenö Jo̧nö ösödö ko̧ko̧kwijadötö.