Génesis 3 - Dios Iwene

Jojodö Dios weina tja̧ja̧kwinö̧kö̧ jawa

¹ Ja̧danö, Isabenö Jo̧ Dios tebonö ju̧kwadö otidinawö̧tjö o̧penönö waisinama a̧ko'da. Jo̧ba a̧ko'dama omöna yöa̧lakwawa waisina, jojodö jo̧ba omöna yöa̧li̧ tjösadakobetjö̧. Ju'wi möle jo̧bama abebö a̧ja̧kwijetö isujunö: —Diosma isabenö batjo okobe jwiinö towibiyanö wa̧ji̧ma kukwaduwoko jö̧ba̧lö ¿weinaji̧?— abebö a̧ja̧kwoko:

² —Weinokobe jejenöma. Batjo towibiyanö wa̧ji̧tjö dukwoböma otiwa. Weijatö— atadijotö isujuma a̧ko'danö—.

³ Jo̧kwaijayonö batjo ö'weje jowitjöma, kwanöbi kukwaduwoko, maböbi maköbaduwoko , jö̧ba̧lö, weijatö. Jowitjö kukwaduwitjö̧ma, maböbi maköbaduwitjö̧ma woköbaduwakwedöja, jö̧a̧lijatö Diosma— atadijotö isujuma. Jejenö jatadökwe:

⁴ — Isaö̧kö̧. Omöna yöbawö ujuninobe. Woköbaduwökakwedöja— jö̧ba̧lijetö ako̧'dama isujunö—.

⁵ Diosma öwaisa jowitjö kukwaduwitjöma otiwi̧bi sulabebi kwöwaisachibaduwakwedöja. Babema Diosda otiwi̧bi sulabebi̧ waiso̧ma. Jo̧kwaijayonö jowitjö kukwaduwitjöma ökwödöbi jejenö Dios öwaisi̧danö kwöwaisaduwakwedöja— jö̧ba̧lijetö a̧ko'dama.

⁶ Ja̧danö, isujuma jowinö wa̧ji̧ma jedemi kwakwawanöbi otiwijetö. Jowibi jedemi jwiinö otiwijetö. Waisakwawabi otiwioko ösödinö edijotö. Jo̧kwaioko jowinö wa̧ji̧ma 'döbebö kwijotö. Kwaja̧ju jilekwenö iyijotö. Ja̧danö, jo̧babi kwijetö.

⁷ Ikenama waisachibijadötö tja̧di̧ju jwibö tjö̧jajabema. Jo̧kwayiawö̧ higuera towi öjiyatjö tja̧do̧danö di̧'yakwabinö a̧du̧kwijadötö, tjötabakwawobetjö̧.

⁸ Ja̧ baledaja̧ yi̧benakwö jobadöma iso̧, isuju Isabenö Jo̧ Dios batjo ö'öbö ichobe ökwöi̧ a̧ja̧kwijadötö. Ichobe ökwöi̧ a̧ja̧kwö Isabenö Jo̧ Diostjöma döbibajö towibiya 'da̧de ju̧kwawijadötö.

⁹ Ikenama Isabenö Jo̧ Diosma iso̧nö jwöbijetö: —¿Dai kwö̧ja ökwöma?— jwöökwe:

¹⁰ —Chuju̧kwawajabe. Batjo ö'öbö kwichobe a̧ja̧kwö yetaibatö, cha̧do̧ jwibö chö̧jobetjö̧. Jo̧kwaobetjö̧ chujukwawatö— atadökwe:

¹¹ —¿Ti öba̧jadaja̧da ökwönöma kwa̧do̧ jwibö kwö̧ja jö̧ba̧löma? Kwukwoko jö̧ta̧linowitjö ¿kukwaji̧?— Isabenö Jo̧ Diosma abebö a̧ja̧kwökwe:

¹² —Isuju. Ötjökwö jö̧jobö kwiyinoko jowinö wa̧ji̧tjö 'döbebö jiyitjö̧ chukwatö— jö̧ba̧lijetö iso̧ma.

¹³ Jemi ikenama Isabenö Jo̧ Diosma abebö a̧ja̧kwijetö isujunö: —¿Tajawedö jejenö sulabenö omukwatö 'döbebö kwiyaja̧da?— abebö a̧ja̧kwoko: —A̧ko'da sulabenö chomukwatobö omöna yöa̧litjö̧ jowinö wa̧ji̧tjö 'döbebö chukwatö— yöbawijotö isujuma Isabenö Jo̧ Diosnöma.

Dios lȩbebö yöawina jawa

¹⁴ Jejenö yöjawiökwe Isabenö Jo̧ma jö̧ba̧lijetö a̧ko'danö, lȩbebö: —Ökwöma sulabenö omukwatö isujunö omöna yöka̧lajabetjö̧ baikwö lȩtebakwö: Ökwöma usulaso̧ kwö̧jakwo̧ja. Ökwöda tebonö ju̧kwadötjö usulaso̧ kwö̧jakwo̧ja. Bemi tupakwöma 'yaka̧lemi baibanö nijinöda töbawöda kwekachakwo̧ja, niji so̧pja̧da kwanö— lȩbebö jö̧ba̧lijetö Isabenö Jo̧ Diosma—.

¹⁵ Ja̧danö, ökwöma isuju jöpöjojo kwö̧jakwo̧ja. Ja̧danö, isujuma kwöpöjojosuju jö̧jakwuju. Ba̧kwelö̧jatebö wene ja̧kobe ökwötjö tupadanö ju̧kwadökwö, isujutjö tupadanö jojodökwö. Kwöpöjojodöda tjuju̧kwakwedö. Ja̧danö, isujutjö tupadanö jojodötjö bakwo̧ma kwuunö öja̧takwo̧ja. Ja̧danö, jo̧ba ökesayunö yö̧köbakwo̧ja— lȩbebö jö̧ba̧lijetö Isabenö Jo̧ Diosma a̧ko'danöma.

¹⁶ Ikenama isujunö jö̧ba̧lijetö: —Kwi̧tji̧munö kwemenama jwiinö niinö usula kwemawakwujuja. Ja̧danö kwilekwenö webujudanö kwö̧jo jö̧ka̧lijayinö iteda ökwö kwuluwo̧ baibanö ö̧jakwo̧— jö̧ba̧lijetö Isabenö Jo̧ Diosma.

¹⁷ Ja̧danö, iso̧nö jö̧ba̧lijetö: —Kwilekwo jö̧ja̧li̧ wene ösödö kukwoko jö̧ta̧linowinö wa̧ji̧ kwukwajabetjö̧ nijima suli̧ baibanö lȩteba. Bemi tupakwöma 'yaka̧lemi baibanö juluwachiböda labinö kwotidajenada, ku̧kwama pokwiakwo̧ja.

¹⁸ Ja̧danö, nijitjö sȩi̧bi sula'wobi pokwakobe kwujunemima. Ja̧danö, tebonö jo̧kwada pokwi̧ma kukwakwo̧ja— jö̧ba̧lijetö—.

¹⁹ Juluwachibö otidö kwȩjȩlö̧ja̧sobu kwöbatjö labebö loköbenada ku̧kwama kukwakwo̧ja, yemidanö nijibe tjekachajena baibanö, nijitjö otikwo̧köbobetjö̧. Isabenö ökwöma nijitjö otikwo̧ja. Ja̧danö, yemidanö nijikwö tjekachajakwo̧ja— jö̧ba̧lijetö Diosma.

²⁰ Ikenama Adánma midijetö ilekwonö, Eva, jö̧ba̧lö, okobe deinö böjȩ ba̧kwemeachibanö ju̧kwadö la'aka tjojo'doobetjö̧

²¹ Ikenama Isabenö Jo̧ Diosma otidijetö tebo luwo̧ isȩdo̧tjö Adánbi ilekwobi tjökamisi baibanö. Otidajo̧ jobadönö 'dubatijetö.

Dios jojodönö a'dewö loina jawa

²² Ikenama Isabenö Jo̧ Diosma jö̧ba̧lijetö: —Iso̧, isuju waisachibakwawa towitjö tjukwajabetjö̧ otiwi̧bi sulabebi tjöwaisachibajabe, ökwödö döwaisi̧danö. Babema ja̧kwawa towi wa̧ji̧tjöbi tjukwitjö̧ma sulena, ba̧kwelöjatebö tjö̧jakwedö batjibanö. Jo̧kwaobetjö̧ jowitjö tjukwapji jö̧ba̧lö a'dewö lododönö, ba̧kwelö̧jatebö tjö̧jokobö— jö̧ba̧lijetö.

²³ Jo̧kwaobetjö̧ Edén batjotjö a'dewö lobijetö Isabenö Jo̧ Diosma jojonöma, nijitjö otidinökwenöma, ilekwokwö jelobe niji otidö ö̧jobö.

²⁴ Ikenama Edén batjotjö ja̧wo̧ laebobekwö junijetö Diosma du̧ju̧tajanö ángelesdönö, querubines mikwadönö. Ja̧danö, kwölöte salööte ja̧kwawa towi okobe jwiinö jalawö ji̧jetö, jojodö ja̧kwawa towi mana tetjachi̧ jwiinö tjöbeba̧lö.