Génesis 23 - Dios Iwene

Sara Wojina jawa

¹ Sarama, ciento veintisiete a̧yo juju ö'wö babibijotö,

² Canaán niji Hebrón comunidadtjö. Abrahamma ö'wö babibajajunö eda̧lö jobujunö tjödajejunö tebachijetö. Tebachajo̧ wojiökwe o̧'wo̧ tjo̧bekwö lekwe ö'wö babibajajunö eda̧lö budekwabijetö Abrahamma, chilekwowe, jö̧ba̧lö.

³ Ikenama ilekwonö budekwabinö ba̧jo̧ma a̧laibö ö'wö babibajajunö tjödajejutjö labebijetö. Labebö yemida jojodö, Hettjö tupadanö jojodö tjö̧jobekwö yöalakwawobö 'yi̧jetö. Ichibö jö̧ba̧lijetö jobadönöma:

⁴ —Ötjöma jelobetjö ichina ökwödökwö jo̧sa. Ja̧danö atebaduwakwö: Mikwanö kwiyaduwotjö niji, chilekwonö chödo— abebijetö Abrahamma.

⁵ Jejenö aebawö̧ Hettjö tupadanö jojodöma:

⁶ —Duluwo̧ a̧ja̧kwi, ökwönö, juluwo̧ la'aka luwo̧, jö̧ba̧lö, otiwanö dedökweja. Bemi, i̧lȩdo̧ jemitjö̧ o̧penönö otiwemi kwödojö kwilekwonöma. Ökwödötjö bakwo̧bi dea, i̧lȩdo̧ chiyökö jo̧banö, jö̧ba̧lo̧ma— atadijadötö.

^7-8 Jejenö tjatadiökwe Abraham a̧laibö öba bȩbachibö nijakwö uunö jö̧ba̧lijetö jobe ju̧kwadönö, Hettjö tupadanö jojodönö: —Chilekwonö bada lödawa kwedaduwemi otiwitjö̧ma akebaduwo Efrónnö, Zohár itji̧nö,

⁹ Macpela niji i̧lȩdo̧ iyotjö. Jo̧ba ö̧jemi ö'öbö i̧lȩdijuma jo̧be. Belöda ökwödö kweda̧laduwonö okobe jwiinö mikwawi̧ma chimidonöcha—jö̧ba̧lijetö Abrahamma.

¹⁰ Ja̧danö Efrón, Hettjö tupadanö jojoma jobe a̧ja̧kwa̧lö bi̧jetö, ömöledökwö. Jo̧bama okobe deinö jobe ja̧dö, comunidad teachakwawemi tebachadöbi tjeda̧lonö jö̧ba̧lijetö Abrahamnöma:

¹¹ —Chuluwo̧ a̧ja̧kwitjö. Mikwa jwiinö chiyakwö chu̧kwa nijibi, i̧lȩdo̧bi. Bena ja̧nö, chömöledö tjeda̧lonö yöta̧la, Chiyakwö, jö̧ba̧lö kwilekwonö kwödobö— jö̧ba̧lijetö.

¹² Abrahamma jobe ju̧kwadö tjöba a'onö öba bȩbachibijetö nijakwö uunö.

¹³ Ikenama Efrónnö jö̧ba̧lijetö, okobe deinö tja̧ja̧kwa̧lonö: —A̧ja̧kwitjö. Midöda chemobö jö̧ta̧la nijima. Ötjö chimidi̧ma emi jobeda chödo chilekwonö— jö̧ba̧lijetö.

¹⁴ Jejenö jö̧a̧liökwe Efrónma atadijetö:

¹⁵ —Chuluwo̧, ja̧ nijima cuatrocientos plata jawa ö̧pi̧bi̧ya mikwawobe. Ja̧ mikwawi̧ma ökwödödajayedönöma ja'yubeda. Ja̧ma iyitjö, jenada kwilekwonö kwödo— jö̧ba̧lijetö.

¹⁶ Jejenö jö̧a̧lökwe: —Jao kwatjö̧ma otiwa— jö̧ba̧lijetö Abrahamma. Ikenama plata jawa ö̧pi̧bi̧yama nönö ba̧jadijetö, tea iyadö nönö tjöba̧jadi̧danö. Efrón okobe deinö tjeda̧lonö mikwawi̧ yöa̧laja̧danö nönö ba̧ja̧dijetö Abrahamma.

¹⁷ Jejenö nönö iyö Abrahamma midö emijetö Efrón ö̧jemi Macpela niji. Ja̧ nijima Mamretjöma ja̧wo̧ laebobekwö ji̧jetö. Nijibi, i̧lȩdijubi okobe jwiinö towibiyabi, ö'öbö ichibenanö kabatö emijetö.

¹⁸ Jo̧kwaobetjö̧ okobe deinö Hettjö tupadanö jojodö, jena ja̧nö eda̧ladöma waisijadötö ja̧ nijima, Abraham u̧kwa niji baibajabe, jö̧ba̧lö.

¹⁹ Ikenama Abrahamma lödijetö ilekwonö Saranö ja̧ i̧lȩdo̧ okwa, Canaán nijinö.

²⁰ Jejenö Abrahamma midö emijetö Hettjö tupadanö jojodö tjitjebotjöma nijibi, i̧lȩdijubi iteda ömöledö tjowobiyakiju lödawemi baibanö.