Génesis 17 - Dios Iwene

Dios iteda iwene Abramnö yöbawö ujunina jawa, ökwötjö tupadanö jojodö tjö̧ba̧jekwachakobe, jö̧ba̧lö

¹ Ja̧danö, Abramma noventa y nueve a̧yo bo̧ ö̧jena Diosma jo̧banö öwawachö yöbawijetö: —Ötjöma Jwiinö Juluwo̧ Diossa. Abram, ötjö weti̧ a̧ja̧kwö, ja̧danö, sulabenö ja̧bökönö kwö̧jo.

² Jejenö kwö̧jo Abram, ökwönö yöbawö junö chiwenedanö badekwachinö wetakobetjö̧. Jao Abram, ökwötjö tupadanö jojodöma jwiinö tjö̧ba̧jekwakobe, jö̧ba̧lö, yöbawö chujuni̧danö badekwachakobetjö̧ ötjö weti̧ a̧ja̧kwö, ja̧danö sulabenö ja̧bökönö kwö̧jo— yöbawijetö Isabenö Jo̧ Diosma Abramnöma.

³ Ja̧ yöawi̧ a̧ja̧kwö Abramma u̧yu̧kijunö bamatö öba bȩbachibijetö nijakwö uunö. Ja̧danö, Diosma yöbawijetö Abramnöma:

⁴ —Abram, ötjö yöbawö chujuni̧ chiwenema biya̧: Ökwötjö tupadanö jojodöma ba̧jekwadö tjuju̧kwakobe, bakwasokwena ju̧kwadöma okobe jwiinö böjȩnö tjitebotenia. Ja̧danö Abram, ökwöma jobadö tjuju̧kwakwedö abönö ji̧naja.

⁵ Abram babema balekwa kwimi chimidakwö. Babema Abram, jö̧ba̧lö, kwimikwokobe. Abraham, jö̧ba̧lö, kwimikwobe, böjȩnö ba̧jekwadö tjuju̧kwakwedö ajayinö ji̧na bakibanö pjatatobetjö̧.

⁶ Jao Abraham, ökwötjö tupadanö jojodönöma tjöba̧jekwachinö pjatatakwo̧sa. Jobadöma jelobebi jelobe tjuju̧kwakwedö, bakwasokwena ju̧kwadö. Jobadötjöma luwedö tjuju̧kwakobe, ökwötjö tupadanö jojodötjöma.

⁷ Abraham, ökwönö yöbawö chujuni̧danö isabenö badekwachakobe. Ja̧danö, bakwelöjatebö ja̧kobe, ökwötjö tupadanö jojodönöbi yöbawö chujunobetjö̧. Abraham, ötjöma ökwö Kwuluwo̧ Diossa. Ja̧danö, ökwötjö tupadanö jojodöbi Tjuluwo̧ Dioschakwo̧sa.

⁸ Abraham, bemi niji Canaán mikwemi, jelobetjö ichinadö kwö̧jaduwemima ökwönö, ökwötjö tupadanö jojodönöbi chiyakwo̧sa, ba̧kwȩlö̧jatebö ökwödö kwiteboduwi baibanö. Jao Abraham, ökwötjö tupadanö jojodöbi Tjuluwo̧ Dioschakwo̧sa — yöbawijetö Diosma Abrahamnöma.

Dios okobe deinö ömadönö, Abrahamnö, ömöledönö, ömöayedönö tjötade bajale sado̧ 'wibekwö lotjobö weina jawa

⁹ Jemi tupakwöbi yöbawijetö Diosma Abrahamnöma: —Ja̧danö Abraham, ötjö yöbawö chujuni̧danö badekwachakobetjö̧ ökwöbi, ökwötjö tupadanö jojodöbi ju'wi weti̧ kwa̧ja̧kwaduwobö jo̧be.

¹⁰ Baikwö kwa̧ja̧kwaduwobö weta: Ökwö, ja̧danö ökwö kwömöledö babe ju̧kwadönöbi, ja̧danö ökwötjö tupadanö jojodödönöbi okobe deinö ömadönöma tjötade bajale sado̧ 'wibekwö loköbaduwobö weta.

¹¹ Jao, okobe deinö ömadönöma ja̧ sado̧ 'wibekwö loköbaduwobö weta. Ja̧danö, ja̧ 'wibekwö loköbaduwi̧ma i̧sebakobe, Diosma ökwödönö iteda iwene yöbawö ujuninobe, jö̧ba̧lö— yöbawijetö Diosma—

¹² Bemi tupakwöma okobe deinö tjemu ömadönö tjeminawö̧nö, kwömöledötjöbi, kwömöayedö kwejutjö tjeminawö̧nöbi tjojo'do tjemaja̧ ikena jelemutjö wa̧pötakwa möle baledibajena ja̧ sa̧do̧ 'wibebö loköbaduwobö jo̧be. Ja̧danö jelobe jojodönö, kwömöledöböködönö, midö emö kwichejebinawö̧nöbi ja̧ sado̧ 'wibebö loköbaduwobö jo̧be.

¹³ Okobe deinö tjemu ömadönö 'wibebö loköbaduwobö jo̧be. Ja̧ 'wibekwö loköbaduwi̧ma ökwödö kwitebiyaduwinö baikwö i̧sebakobe: Ökwödöma, ja̧danö ökwödötjö tupadanö jojodöma ötjö Dios omudawö chujunajawö̧ja. Ja̧danö i̧sebakobe, Ötjö Dios pjatatakwa̧ yöbawö chujunina chiwenedanö isabenö pjatatakwo̧sa, ökwönöbi, ökwötjö tupadanö jojodönöbi, ba̧kwelö̧jatebö.

¹⁴ Ja̧danö, bakwo̧ 'wibekwö loökötjö̧ma jo̧bama ökwödötjö a'dewö loköbo ötjö weti̧ma a̧ja̧kwokobetjö̧— yöbawijetö Diosma Abrahamnö.

¹⁵ Ju'wibi yöbawijetö Abrahamnöma: —Babema kwilekwonö balekwa jimi chimadajö. Sarai, jö̧ba̧lö, jimikwokobe. Babema Sara, jö̧ba̧lö, jimikwobe.

¹⁶ Ja̧danö, jobujunö dösölö̧jinö edö pjatatocha. Jobujutjö kwitji̧nö chiyakwo̧sa. Jaö, dösölö̧jinö edö pjatatocha jobujunöma, ba̧jekwadö böjȩnö jelobebi jelobe tjuju̧kwakwedö abönö jinuju bajibanö. Jobujutjö tupadanö jojodöma tjuluwedö batjibakobe— yöbawijetö Diosma Abrahamnöma.

¹⁷ Ikenama Abrahamma u̧yu̧kijunö bamatö öba bȩbachibijetö nijakwö uunö. Dios yöawaja̧ omukwatö, itedada omajadenö obijetö ¿Isabenö bakwo̧ma, cien a̧yo bo̧ma, itji̧nö 'yaebenaji̧? ¿Isabenö Sarama noventanö a̧yo bujuma jitji̧nö jemakwa̧ji̧? jö̧ba̧lö.

¹⁸ Ikenama Abraham abebijetö Diosnö: —Chitji̧ Ismaelnö dösölö̧jinö edö pjakato, yöbawö kwujuni̧ kwiwenema Ismaeltjöda badekwachobö. Jo̧batjöda ötjötjö tupadanö jojodö tjöbadekwacho— abebijetö Abrahamma.

¹⁹ Jejenö aebijayonö Diosma atadijetö Abrahamnöma: —Jo̧batjömaökö. Kwilekwo Sarama ökwö kwitji̧nö 'yajebakobe. Jo̧banöma Isaac, jö̧ba̧lö kwimido. Jo̧banöda yöbawö chujuni̧ chiwenema badekwachinö pjatatakwo̧sa. Ja̧danö jo̧batjö tupadanö jojodönöbi yöbawö chujunobetjö̧, ja̧ yöbawö chujuni̧ chiwenema ba̧kwȩlö̧jatebö ja̧kobe— jö̧ba̧lijetö Diosma.

²⁰ Ina jö̧ba̧lijetö: —Jo̧kwaijayonö Abraham, Ismaelnö akebi̧ma cha̧ja̧kwatö. Jo̧banö dösölö̧jinö edö pjatatakwo̧sa. Jo̧batjö tupadanö jojodönöma tjitebonö tjöba̧jekwachinö pjatatakwo̧sa. Ja̧danö, jo̧ba i̧tji̧muma, a̧li̧nösamutjö du̧ju̧tajanöbedöma, jojodö tjuluwedö batjibakobe. Ja̧danö jo̧batjö̧ tupadanö jojodöma tjitebonö tjöba̧jekwachinö, juluwadö batjibanö dösölö̧jinö edö pjatatakwo̧sa.

²¹ Jo̧kwaijayonö kwitji̧ Isaacnö, ja̧danö Isaactjö tupadanö jojodönöbi chiwene yöbawö chujunina badekwachinö dösölö̧jinö edö pjatatakwo̧sa. Abraham, yötawakwö, ju'wi o̧ba babedajayena Sarama jo̧banöma jemakobe— yöbawijetö Diosma Abrahamnöma.

²² Ikenama Diosma Abrahamnö yöba̧lö kabatö labebajijetö.

²³ Ja̧ mölema Abrahamma Ismaelnö, ömöayedönö ejutjö tjȩminawö̧nöbi, jelobe jojodönö midö eminawö̧nöbi okobe deinö ejunö ju̧kwadö ömadönö 'wibebö lobijetö tjötade bajale o̧dijuma, Dios weaja̧danö.

²⁴ Abrahamma noventa y nueve a̧yo bo̧ 'wibekwö lobijetö ötadesado̧ma.

²⁵ Ja̧danö itji̧ Ismaelnöma trece a̧yo bo̧nö ötadesa̧do̧ma 'wibebö lobijetö.

²⁶ Ja̧danö Abrahambi, itji̧bi, bakwöta möle bakwainö 'wibekwö lobijadötö.

²⁷ Ja̧danö okobe deinö Abraham ejunö ju̧kwadö ömadö, ömöayedö ejutjö tjȩminawö̧bi, jelobe jojodönö midö eminawö̧bi Abrahamkwö 'wibekwö lobijadötö.