Génesis 11 - Dios Iwene

Jojodö o̧do möeju tjotidina jawa

¹ Ja̧danö, jojodöma okobe deinö ina böjȩnö bakobe tjuju̧kwena tjiwenema bakwainöda yöba̧lö ju̧kwijadötö.

² Ja̧danö tjuju̧kwobetjö labebö ja̧wo̧ ichobekwö 'yi̧jadötö, Sinar nijibe. 'Ya̧jadöma Sinar niji ichibö ju̧kwijadötö, Sinar niji ba̧ba̧lawena.

³ Jobe ja̧nö yöba̧lakwawijadötö: —Bloke dotido letiyatjö. Ja̧danö, 'diiachibanö dujuwo ja̧ blokema— yöba̧lakwawijadötö. Ikenama jobadöma bloke otidijadötö. Bloketjöda otidijadötö, ju'wedö inawiyatjö otidiatjidanöma otidökönö. Ja̧danö isa'be wanaba̧lö otidijadötö, tö'awa'be, yȩa'be. Ja'bema letiyama wiwokwökö'be, ju'wedö letiyakwö wiwodö otidiatjidanö. Ja'be tö'awa'be yȩa'bema wa̧naba̧lö otidijadötö bloke wanabinö.

⁴ Ikenama yöba̧lakwawijadötö: —Duju̧kwemi comunidad dotido. Ja̧danö, comunidadnö o̧do möeju dotido mölejȩbe ichibanö. Jejenö dotiditjö̧ma okobe deinö böjȩnö ju̧kwadöma ökwödönö tjöwaisakobe, otiwanö tjotidinobe möejuma, jö̧ba̧lö. Ja̧danö, jejenö otidö ökwödöma bakwainö omukwatadö babibajadö benada otiwanö bakobe duju̧kwakobe. Jejenö dö̧jo böjȩ bakwemeachibanö wainökwena duju̧kwökakobetjö̧, ökwödötjö ju'wedö jelobe, ökwödötjö ju'wedö jelobebi— yöba̧lakwawijadötö.

⁵ Ikenama Isabenö Jo̧ma mölejȩbetjö ichijetö tjotidobe edö, tjuju̧kwemi comunidadbi, o̧do möejubi.

⁶ Ja̧danö, edö jö̧ba̧lijetö Isabenö Jo̧ma, itedada: —Bidöma bakobe ja̧nö, ja̧danö, tjiwenema bakwainö yöba̧lö ju̧kwadö. Jejenö bakobe ja̧nö, tjiwene bakwainö yöba̧lö idöda tjösödi̧ tjotidobö jo̧be, bemi comunidad, ja̧danö beju möejuma. Jejenö ju'wibi ju'wi, idöda tjösödi̧danö baibanö tjö̧jitjö̧ma, jobadö ja̧tjobö waiyi̧ma jwiena. Okobe jwiinö idöda tjösödi̧ tjotidobö jena— jö̧ba̧lijetö.

⁷ Jejenö jö̧ba̧lö ȩwa̧jo̧: —Jobekwö di̧'yo, tjiwene balewö lodo wainö tjiweneda yöba̧ladö batjibanö, bakwo̧ jelo̧ yöa̧li̧ma a̧ja̧kwökakobetjö̧— jö̧ba̧lijetö Isabenö Jo̧ma.

⁸ Jo̧kwaobetjö̧ Isabenö Jo̧ma jobadö tjiwene wainökwena yötja̧lobö ja̧bijetö. Jejenö ja̧obetjö̧ jobadö tjotidaja̧ma kabatakwawijadötö, tjiwene wainökwena yötja̧li̧ma tja̧ja̧kwokobetjö̧. Jejenö Isabenö Jo̧ma ja̧bijetö jobadönöma jelö labebö jelobe jelobekwö 'ya̧nö böjȩ ba̧kwemeachibanö tjuju̧kwobö.

⁹ Jobetjöma Isabenö Jo̧ma wainö tjiwenekwena yötja̧lobö ja̧inobetjö̧ ja̧ comunidadma Babel mikwijetö. Ja̧danö, Isabenö Jo̧ma wainö tjiwenekwena yötja̧lobö ja̧iawö̧ jelö labebö böjȩ ba̧kwemeachibanö tjuju̧kwobö 'yi̧jadötö jojodöma.

Semtjö tupadanö jojodö tjuju̧kwina jawa

¹⁰ Baikwö laebi̧ma Semtjö tupadanö jojodö tjuju̧kwina jawa. Ja̧danö, jwai balawa okwatina baledaja̧ bajalekwö dötölataja a̧yo baledibena, Sem, cien a̧yo bo̧ma itji̧nö Arfaxad mikwo̧nö 'yabebijetö.

¹¹ Arfaxadnö 'yaebina jemi tupakwö quinientos a̧yo ji̧jetö Semma. Ja̧danö, i̧tji̧mu ju'wedönö ömadönöbi ya̧dönöbi 'yabebijetö.

¹² Ja̧danö, Arfaxadma treinta y cinco a̧yo bo̧ itji̧nö Sélah mikwo̧nö 'yabebijetö.

¹³ Sélahnö 'yaebina jemi tupakwö cuatrocientos tres a̧yo ji̧jetö Arfaxadma. Ja̧danö, i̧tji̧mu ju'wedönö ömadönöbi ya̧dönöbi 'yabebijetö.

¹⁴ Ja̧danö, Sélahma treinta a̧yo bo̧ itji̧nö Éber mikwo̧nö 'yabebijetö.

¹⁵ Ébernö 'yaebina jemi tupakwö cuatrocientos tres a̧yo ji̧jetö Sélahma. Ja̧danö, i̧tji̧mu ju'wedönö ömadönöbi ya̧dönöbi 'yabebijetö.

¹⁶ Ja̧danö, Éberma cuatrocientos treinta a̧yo bo̧ itji̧nö Péleg mikwo̧nö 'yabebijetö.

¹⁷ Pélegnö 'yaebina jemi tupakwö cuatrocientos treinta a̧yo ji̧jetö. Ja̧danö, i̧tji̧mu ju'wedönö ömadönöbi ya̧dönöbi 'yabebijetö.

¹⁸ Ja̧danö, Pélegma treinta a̧yo bo̧ itji̧nö Reú mikwo̧nö 'yabebijetö.

¹⁹ Reúnö 'yaebina jemi tupakwö doscientos nueve a̧yo ji̧jetö Pélegma. Ja̧danö, i̧tji̧mu ju'wedönö ömadönöbi ya̧dönöbi 'yabebijetö.

²⁰ Ja̧danö, Reúma treinta y dos a̧yo bo̧ itji̧nö Serug mikwo̧nö 'yabebijetö.

²¹ Serugnö 'yaebina jemi tupakwö doscientos siete a̧yo ji̧jetö Reúma. Ja̧danö, i̧tji̧mu ju'wedönö ömadönöbi ya̧dönöbi 'yabebijetö.

²² Ja̧danö, Serugma treinta a̧yo bo̧ itji̧nö Nahor mikwo̧nö 'yabebijetö.

²³ Nahornö 'yaebina jemi tupakwö doscientos a̧yo ji̧jetö. Ja̧danö, i̧tji̧mu ju'wedönö ömadönöbi ya̧dönöbi 'yabebijetö.

²⁴ Ja̧danö, Nahorma veintenueve a̧yo bo̧ itji̧nö Taré mikwo̧nö 'yabebijetö.

²⁵ Tarénö 'yaebina jemi tupakwö ciento diecinueve a̧yo ji̧jetö. Ja̧danö, i̧tji̧mu ju'wedönö ömadönöbi ya̧dönöbi 'yabebijetö.

²⁶ Ja̧danö, Taréma setenta a̧yo bemitjö̧ tupakwö 'yabebijetö i̧tji̧munö Abram, Nahor, Harán mikwadönö.

Tarétjö tupadanö jojodö tjuju̧kwina jawa

²⁷ Baikwö laebi̧ma Taré i̧tji̧mubi ö̧'dö̧döbi tjö̧jina jawa. Ja̧danö, Taréma i̧tji̧munö Abram, Nahor, Harán mikwadönö 'yabebijetö. Ja̧danö, Taré itji̧ Haránma itji̧nö Lot mikwo̧nö 'yabebijetö.

²⁸ Haránma wobijetö abe'do Taré ina 'yaayi. Ojo'do jo̧banö jeminemi, caldeo jojodö tjitebo Ur mikwelö wobijetö Haránma.

²⁹ Taré i̧tji̧mu Abrambi Nahorbi tjilekwokwenanö emijadötö. Abram ilekwoma Sarai mikwijotö. Ja̧danö, Nahor ilekwo Milcá mikwijotö. Milcáma Haránmine itjiju Isca mikwuju jöpöo.

³⁰ Ja̧danö, Abram ilekwo Saraima ji̧tju̧mu debijotö.

³¹ Ja̧danö, Taréma itji̧ Abramkwö, ö'dö̧ Lotkwö, ojoliju Saraikwö Urtjö labebö Canaán nijibe 'yi̧jadötö. Jo̧kwaijayonö ja'öda Harán nijinö ichibö ju̧kwijadötö.

³² Jelöda Taréma, doscientos cinco a̧yo bo̧ wobijetö, Harán nijitjö.