Gálatas 6 - Dios Iwene

Kwömöledö Jesúsnö ösödadönö pjabatakwawö kwö̧jaduwo jö̧ba̧lö Pablo yöawina wene

¹ Chömöledö, wanedö yötawa: Ökwödötjö bakwo̧ sulabenö ja̧bö meitjö̧ma, ökwödö Dios O̧'wo̧ Luwo̧ yöawi̧ a̧ja̧kwadöma jo̧banö dösölö̧jinö pjabatö kwa̧lapedaduwonö. Ja̧danö, jejenö kwa̧lapedaduwenama, omukwatönö kwö̧jaduwo, jo̧ba sulabenö ja̧i̧danö ökwödöbi ja̧köbaduwobö kwösödaduwapji jö̧ba̧lö.

^2-3 Ja̧danö, wanedö yötawa: Kwömöledöduwi tjo̧'wo̧ luwo̧nö ömöki̧ tje'ewi̧ma, pjabatö kwe'ewaduwo chömöledö, bidönötjö o̧penönö jo̧sa ötjöma, bidönö pjatatökö jö̧ba̧löma omukwatökönö. Jau chömöledö, bakwo̧ jo̧kwadabo̧ma, Aaa, ju'wedönötjö o̧penönö jo̧sa jö̧ba̧lö omukwatitjö̧ma, jweinöma omukwatökena, isabenö jo̧kwadabo̧obetjö̧, ¿jö̧tö? Jo̧kwajabetjö̧, o̧penönö jo̧sa jö̧ba̧lö omukwatökönö, Cristo wei̧ ja̧bö kwömöledöduwinö pjabatö kwö̧jaduwo chömöledö.

⁴ Baikwö ja̧köbaduwo chömöledö: Okobe deinö bakwo̧nökwena kwotidaduwi̧kwena kwedaduwo, otiwojobö, sulojobö jö̧ba̧lö. Ja̧danö otiwitjö̧ma, bakwo̧nökwena kwotidaduwi̧kwena ösödö yöka̧laduwo, chotidi̧ma otiwa jö̧ba̧lö, ju'wedö tjotidi̧ badedö edökönö.

⁵ Jau chömöledö, okobe deinö bakwo̧nökwena dotidawakwena dotidobö jo̧be.

⁶ Ja̧danö, bakwo̧ ökwödönö Dios iwene ba̧ja̧dö pjabato̧nöma, ökwödö otiwa jawa kwujuna̧laduwi̧tjö jo̧ba ökwödönö ba̧ja̧do̧nö pjakataduwo, usula emawö jwibö ö̧japji jö̧ba̧lö.

⁷ Chömöledö, omukwatökönaduwi, Aaa Diosnö odijayonö wene jwiena jö̧ba̧lö. Bakwo̧bi Diosnö ooböma jwia chömöledö. Baikwö wanedö yötawa batjo jawa chömöledö: Bakwo̧ ödebiya öditjö̧ma, iyakwa̧da pokwakobe, ja̧danö iyakwa̧da wa̧ji̧ emakwo̧, ¿jö̧tö?

⁸ Ja̧danö, bakwo̧ iteda sulabenö ösödi̧ jawa ja̧bö ö̧jitjö̧ma, sulabenö ösödi̧ jawa wa̧ji̧ emakobe, woawa jawa. Jo̧kwaijayonö bakwo̧ Dios O̧'wo̧ Luwo̧ ösödi̧ jawa ja̧bö ö̧jitjö̧ma, Dios O̧'wo̧ Luwo̧ ösödi̧ jawa wa̧ji̧ emakobe, ba̧kwȩlö̧jatebö ja̧kwawa jawa.

⁹ Jo̧kwajabetjö̧, otiwanö ja̧bö dö̧ji̧ma döpöjödachibaduwoko chömöledö, isabenö yötawaduwakwö, do̧'wo̧ 'dibachibö dite'ada̧litjö̧ma, isabenö dotidina wa̧ji̧ demakwedösa chömöledö.

¹⁰ Jo̧kwajabetjö̧, otiwanö ja̧dobö ji̧tjö̧ma, otiwanö ja̧bö dö̧jo okobe deinö jojodönö chömöledö, ja̧danö ju'wedönö otiwanö ja̧di̧tjö bajalekwönönö otiwanö ja̧bö dö̧jo dömöledö Jesúsnö ösödadönöma chömöledö.

Pablo Gálatas jojodönö iwȩyudina'yetjö bajaleapo jawa

¹¹ Edaduwi chömöledö, biya̧ nöalenö chiwȩyudi̧ma. Biya̧ma ötjöda chömamunö chiwȩyudobe ökwödönö.

¹² Ökwödönö kwötadeduwi bajale o̧di̧ju 'wibekwö loköbaduwobö weba̧ladöma, sule wame jawada omukwatö wetja̧lobe chömöledö, ökwödönö yötjawobö, Otiwanö wedi̧danö bidöma tjötade bajale o̧di̧ju 'wibekwö lotjajabe, jö̧ba̧lö. Ja̧danö, ju'wibi Cristo midawö woina wene yötjawenama, usula tjemawapji jö̧ba̧lö jejenö wetja̧lobe chömöledö.

¹³ Jau chömöledö, jobadö 'wibekwadöma Dios weina Moisés iwȩyudina jawa ja̧bö tjö̧jököjayonö, ökwödö Gálatas jojodönö 'wikekwaduwobö wetja̧lobe. Jau chömöledö, ökwödönö Aaa, bidö Gálatas jojodöma otiwanö wedi̧ ja̧bö 'witjekwajabe yötja̧lo jö̧ba̧lö, jejenö weba̧ladö.

¹⁴ Jo̧kwaijayonö ötjöma sule bakwöta jawada yöbawo̧sa, biya̧da otiwa, jö̧ba̧lö. Sule Duluwo̧ Jesucristo towisa'onö midawö woina weneda jejenö yöta̧lobe chömöledö, Biya̧ weneda jwiinö otiwa, jö̧ba̧lö. Ja̧danö, wanedö yötawa: Jesúsma towisa'onö midawö woinobetjö̧, ötjöma böjȩ jawa katatibinobedanö ichejekwa, ja̧danö balekwa mikwa böjȩ jawama ötjönö kaatibinobedanö ichejekwa.

¹⁵ Chömöledö, dötade bajalesado̧ 'wibekwadö dö̧ji̧bi, 'wibekwöködö dö̧ji̧bi ja'yubebi mikwawokobe chömöledö, ju'wida mikwawi̧ma, 'yabayedö dö̧ji̧da.

¹⁶ Okobe deinö yötawaja̧danö omukwatö ju̧kwadönö, Dios isabenö ömöledönöma, Dios jobadönö lȩlö̧jinö edobö chösöda, tjo̧'wo̧ luwo̧ ösöwachibanö.

¹⁷ Bajaleapo yötawi̧ma biya̧ chömöledö: Ötjönö wene ji̧nö jwöbeba̧ladöma katjatibobö jo̧be, Jesús ömöayo̧chobetjö̧. Jau chömöledö, ötjöma isabenö Jesús ömöayo̧sa, ja̧danö ötjönö kwakwatjina woachinama öwaetjöda i̧sebobe Jesús ömöayo̧ chö̧ji̧ma.

¹⁸ Duluwo̧ Jesucristoma kwo̧'wo̧ luwo̧duwinö lȩlö̧jinö edobö chösöda chömöledö, jejenö otiwa. Biya̧data