Gálatas 5 - Dios Iwene

Yemidanö Moisés iwȩyudina ömöayedödanö babiböma tjekachajaduwa jö̧ba̧lö Pablo yöawina wene

¹ Jau chömöledö, isabenö Moisés iwȩyudina ömöayedödanöböködösa ökwödöma, Moisés iwȩyudina ja̧bö dö̧jo jö̧ba̧lö, Cristoma Moisés iwȩyudina ömöayedödanö dö̧ji̧tjö dö̧jibinö ja̧inobetjö̧. Jo̧kwajabetjö̧ 'diinö kwö̧jaduwo, yemidanö Moisés iwȩyudina ömöayedödanö bakibaduwanö ja̧tjapji jö̧ba̧lö.

² A̧ja̧kwaduwitjö chömöledö, Ötjö Pabloma baikwö yötawaduwakwö: Dios jobadönö ösödo jö̧ba̧lö tjötade bajalesado̧ 'wiekwa ja̧badönöma, Cristo midawö woinama mikwawökena jobadönöma chömöledö.

³ Yemidanö baikwö labebö lobö yötawa chömöledö: Bakwo̧ Dios jo̧banö ösödo jö̧ba̧lö ötade bajalesado̧ 'wiekwa jawa ja̧itjö̧ma, sule ja̧damaökö chömöledö, ja̧ 'wiekwa jawabi, okobe jwiinö Dios weina Moisés iwȩyudina ja'yubebi junibökönö ja̧obö jȩna, ja̧tjö Dios jo̧banö ösödo jö̧ba̧lö.

⁴ Ja̧danö, ökwödö Moisés iwȩyudinatjö sulabe jwibadö bakibaduwobö isakwadöma, Cristotjö 'da̧bachibö kwi̧'yaduwobe, ja̧danö Dios mikwa jwiinö otiwa jawa iyi̧tjö 'da̧bachibö kwi̧'yaduwobe chömöledö.

⁵ Jo̧kwaijayonö ökwödöma, ju'wida do̧'wo̧ döwana̧lobe chömöledö. Dios yöawi̧ dösödiökwe, Dios O̧'wo̧ Luwo̧ ujulunö Diosma sulabe jwibadö badibanö ja̧akwo̧ jö̧ba̧lö do̧'wo̧ döwana̧lobe chömöledö.

⁶ Jau chömöledö, Cristo Jesúskwö dötewadö ja̧nö, Dios edemi dötade bajalesado̧ 'wibekwadö dö̧ji̧bi, 'wibekwöködö dö̧ji̧bi mikwawokobe chömöledö, ju'wida mikwawi̧ma. Jau chömöledö, Dios edemi jo̧ba yöawi̧ dösödi̧da mikwawi̧ma, ja̧danö dömöledö Jesúsnö ösödadönö ösödabikwawö ja̧nö di̧sebobe Dios yöawi̧ dösödi̧ma.

⁷ Ökwödöma otiwanö kwö̧jinaduwobe ajayinöma chömöledö, ¿taji waekwinada? ¿Tida ökwödönö suli̧ waedinama, isabenö wene kwöpöjödaduwo jö̧ba̧lö?

⁸ Ökwödönö jwöbina Diosma jejenö kwomukwataduwoböma ja̧inokobe chömöledö.

⁹ Baikwö wanedö yötawa chömöledö: Pan otidadöma sule ja'yubeda ye'yeachi̧ jawa tjanijayonö, okobe jwiinö pansa'be ye'yeachobe, ¿jö̧tö? Ja̧danö ökwödönö sulabenö yöbawo̧ yöawi̧ma, ökwödönö okobe deinö suli̧ öwaedobe chömöledö.

¹⁰ Jo̧kwaijayonö, ötjöma Duluwo̧nö cho̧'wo̧ wana̧lö chö̧jobe chömöledö, isabenö ökwödönö pjaatakwo̧ ötjö chomukwati̧danö ökwödöbi kwomukwataduwo jö̧ba̧lö, ja̧danö ökwödönö suli̧ waedö sulabenö yöbawo̧nö lȩebakwo̧ jö̧ba̧lö.

¹¹ Chömöledö, ju'wedöma ötjönö yötjawena, Pablobi yöbawo̧, tjötade bajalesado̧ 'wibekwadöda tjö̧jibakwedö jö̧ba̧lö. Jo̧kwaijayonö jejenö yöbawö̧kö̧sa chömöledö. Isabenö jejenö yötawitjö̧ma, judío jojodötjö usula chemawoko jö̧ta̧lena chömöledö. Ja̧danö, isabenö jejenö yötawitjö̧ma, Jesús towisa'onö midawö woina wene yötawi̧ma judío jojodö tjöpöjödoko jö̧tja̧lena.

¹² Baikwö chomukwatobe ökwödönö suli̧ tjöwaedotö jö̧ba̧lö 'wiekwa weba̧ladönöma chömöledö, jobadöma wainö idödada jwiinö 'witjekwo, tjöla'yapobi 'witjekwo jö̧ba̧lö.

¹³ Chömöledö, Diosma ökwödönö jwöinobe, Moisés iwȩyudinatjö kwö̧jibaduwinö, ¿jö̧tö? Jo̧kwaijayonö, Aaa, Moisés iwȩyudina ömöayedödanöböködö dö̧jobetjö̧, jwaikwöda dösödi̧ jawada ja̧bö dö̧jo jö̧ba̧löma kwomukwataduwa chömöledö, kwömöledöduwi Jesúsnö ösödadönö ösödabikwawö ja̧nö, tjömöayedödanö ja̧nö pjabatakwawö kwö̧jaduwo chömöledö.

¹⁴ Jau chömöledö, okobe jwiinö Moisés iwȩyudina jawatjö la'aka baibanö Dios weinama baikwö laebobe: Ökwödada kwösödakwawi̧danö kwömöledönö kwösödo, jö̧ba̧lö laebobe.

¹⁵ Jo̧kwaijayonö, jejenö ösödabikwawökönö ja̧nö, wanedö yötawa: Kwömöledöduwinö yö̧yö̧bö, ja̧danö suli̧ waedö kwö̧jaduwitjö̧ma, kwö̧jaduwi̧ waekwena chömöledö. Jo̧kwajabetjö̧ te'ada̧lö kwö̧jaduwo chömöledö, bakwo̧nökwena söbebakwawö loköbaduwapji jö̧ba̧lö.

Dios O̧'wo̧ Luwo̧ ujulunö kwö̧jaduwo jö̧ba̧lö Pablo yöawina wene

¹⁶ Baikwö yötawaduwakwö chömöledö: Dios O̧'wo̧ Luwo̧ yöawi̧danö ja̧bö kwö̧jaduwo, sulabenö kwösödaduwi̧ jawa ja̧bökönö.

¹⁷ Jau chömöledö, ökwödö böjȩ jojodö dösödi̧ma, Dios O̧'wo̧ Luwo̧ma ösödi̧maökö, ja̧danö Dios O̧'wo̧ Luwo̧ ösödi̧ma, böjȩ jojodö dösödi̧maökö. Jo̧kwajabetjö̧, ökwödö Jesúsnö ösödadönö baikwö yötawa chömöledö: Ajayinö dösödina jawa ina dösödobetjö̧, domajadenö ölakwabikwawobedanö ji̧, ja̧ jawa do̧'wo̧ luwo̧nö ja̧nö Dios O̧'wo̧ Luwo̧ öpöjödobetjö̧. Jau chömöledö, ajayinö dösödi̧kwö Dios O̧'wo̧ Luwo̧ ölakwabikwawobedanö ichejekwa, sulabenö dösödi̧ jawa ja̧dapji jö̧ba̧lö.

¹⁸ Jo̧kwaijayonö, Dios O̧'wo̧ Luwo̧ ökwödönö öibi̧danö ja̧bö kwö̧jaduwitjö̧ma, Moisés iwȩyudina ja̧tjo jö̧ba̧ladö kwö̧jaduwokobe chömöledö.

¹⁹ Böjȩ jojodö tjösödi̧danö ja̧awama öwawobe, ¿jö̧tö? Ja̧ma biya̧: tji̧lȩkwa̧muböködökwö ja̧awabi, ja̧danö jwiinö sulabenö alewö ja̧danö 'da̧'da̧bakwawö ja̧awabi,

²⁰ ja̧danö o̧'wo̧ jawa ösödakwawabi, ja̧danö mea boawabi, ja̧danö jojodö tjöpöjojodö ja̧nö ölakwabikwawabi, ö'wiabinö edawabi, dameakwa̧lakwawabi, a̧'dȩlakwawabi, ja̧danö wainökwena 'da̧bachibö ju'wedö ju'wedökwö jwöjwöakwawabi,

²¹ ja̧danö tjo̧'wo̧ sulinö edawabi, ja̧danö 'dukwachinö owa̧lakwawabi, ja̧danö 'dukwachinö ja̧nö sulabenö alewakwawabi. Ja̧ jawama böjȩ jojodö sulabenö tjösödi̧danö ja̧awa chömöledö, ja̧danö belö ökwödönö lȩbebö yötawinadanö yemidanö yötawaduwakwö, jejenö ja̧badöma Dios webö ö̧jobe tjo̧'wo̧ ösöwanöma tjö̧jökakwedö.

²² Jo̧kwaijayonö Dios O̧'wo̧ Luwo̧ do̧'wo̧ luwo̧nö otidi̧ma wainö ji̧ chömöledö. Baikwö yötawa: Dios O̧'wo̧ Luwo̧ otidi̧ma chömöledö, biya̧: ösödabikwawi̧bi, tjo̧'wo̧ ösöwi̧bi, tjo̧'wo̧ luwo̧nö wene jwiinö ja̧kwawabi, tjo̧'wo̧ 'dibachibö ja̧kwawabi, jojodönö dösölö̧jinö ja̧danö otiwanö ja̧awabi, jö̧tja̧li̧danö ja̧awabi,

²³ jojodönö labinöma webökönö ja̧awabi, tjösödi̧da ja̧bökönö biya̧ma otiwanö ja̧awa jö̧ba̧lö tjöwaisi̧danö ja̧awabi. Ja̧ jawa i̧sekwö dö̧jo jö̧ba̧lo̧ do̧'wo̧ luwo̧nö otidobe Dios O̧'wo̧ Luwo̧ma. Jau chömöledö, jejenö ja̧bö ja̧kwawama otiwa, ja̧danö jojodönö weawama jwia jejenö ja̧köbaduwa jö̧ba̧löma chömöledö.

²⁴ Baikwö yötawa chömöledö: Cristo Jesús ömöledöma ajayinö tjösödina kabatibö, tjiteba'o wame luwo̧nöbi, jo̧ba sulabenö ösödi̧bi, towisa'onö bȩtjinobe ichejekwa, ö'wöchinö ja̧bö.

²⁵ Dios O̧'wo̧ Luwo̧ma ökwödönö ja̧kwawa iyinobe, ¿jö̧tö? Jo̧kwajabetjö̧ ju'wibi jo̧ba öibi̧danö ja̧dobö jo̧be chömöledö.

²⁶ Ja̧danö, otiwo̧sa jö̧ba̧löma domukwatoko chömöledö, ja̧danö dömöledönö dödameadabinöma ja̧doko, ja̧danö ö'wiabinöma dedaduwoko chömöledö.