Gálatas 4 - Dios Iwene

¹ Yötawaja̧ma, baikwö labebö lobö yötawa: Bakwo̧ tjemuma, okobe jwiinö iteda abe'do itea emakwo̧, ja̧danö iteda abe'do itea luwo̧danö ichejekwobe tjemuma, ¿jö̧tö? Jo̧kwaijayonö, ina tjemu ö̧jayi, iteda abe'do iteama emokobe tjemuma, ja̧danö luwo̧ ö̧jijayonö, webö̧kö̧ jo̧bama, ju'wedöda jo̧banö wetjobe, ¿jö̧tö? Jau chömöledö, iteda okobe jwiinöbi okobe deinöbi tjuluwo̧ ö̧jijayonö, ina tjemu ö̧jayi tjömöayo̧danö ichejekwo̧.

² Ja̧danö, ina tjemu ö̧jayi, jo̧banö te'ada̧ladö tjuju̧kwobe, ja̧danö jo̧bama te'ada̧ladö tjömöayo̧danö ichejekwo̧, abe'do badedö ujunina möle badekwachenanö kabatö, ¿jö̧tö?

³ Ökwödöbi ja̧danö chömöledö. Baikwö wanedö yötawa: Tjemu ja'yuwo̧ wajwii̧danö, ajayinöma isabenö wene wajwibadö dö̧jinobe, ¿jö̧tö? Ja̧danö, ina isabenö wene wajwibadö dö̧jayi, böjȩ weawa jawa ja̧tjo jö̧ba̧ladö dö̧jijatö chömöledö.

⁴ Jo̧kwaijayonö, Dios badedö ujunina möle badekwachenama, Diosma iteda Itji̧nö weinobe. Jo̧bama jojosuju jitji̧ baibanö ichinobe, ja̧danö jo̧babi Moisés iwȩyudinadanö ja̧o jö̧a̧linobe.

⁵ Jejenö ichinobe, ökwödö Moisés iwȩyudinadanö ja̧do jö̧ba̧ladönö dö̧jibinö pjaato jö̧ba̧lö, ökwödöma Dios i̧tji̧mu badibakobetjö̧.

⁶ Ja̧danö, Dios i̧tji̧mu kwö̧jaduwobetjö̧, Diosma iteda Itji̧ O̧'wo̧ Luwo̧nö, do̧'wo̧ luwo̧nö ö̧jo jö̧ba̧lö weinobe. Jo̧ba Dios Itji̧ O̧'wo̧ Luwo̧ma, do̧'wo̧ luwo̧nö ja̧nö Chabe'dowe jwöobe Dabe'do Diosnö.

⁷ Jo̧kwajabetjö̧, babema tjömöayedöböködöja chömöledö, Dios i̧tji̧mubedöja. Ja̧danö, Dios i̧tji̧muköbaduwobetjö̧, okobe jwiinö iteda i̧tji̧munö iyakwa̧ma, ökwödöbi kwemaduwakwedöja chömöledö.

Ökwödönö nöinö cho̧'wo̧ tjo̧achobe jö̧ba̧lö Pablo yöawina wene

⁸ Chömöledö, ajayinöma ina Diosnö kwöwaisaduwakwa̧ abönö, isabenö diosböködö tjömöayedö kwö̧jinaduwobe, ¿jö̧tö?

⁹ Jo̧kwaijayonö babema ida̧ökö Diosnö kwöwaisaduwobe, Aaa, baikwö yötawa, Diosma ida̧ökö ökwödönö waiso̧ chömöledö, jo̧kwajabetjö̧ ¿tajawedö yemidanö suli̧ jawa, julu jwii̧ böjȩ weawa jawakwö tjekachajaduwobö kwösödaduwobeda chömöledö? ¿Tajawedö yemidanö ja̧ jawa ömöayedödanö bakibaduwobö kwösödaduwobeda?

¹⁰ Ökwödöma nöinö möle jawa omukwatadöja chömöledö, biya̧ möle baikwö ja̧do ja̧doko jö̧ba̧lö, ja̧danö bite jawo̧ baikwö ja̧do ja̧doko jö̧ba̧lö, ja̧danö o̧babi imiamebi baikwö ja̧do ja̧doko jö̧ba̧lö, ja̧danö biya̧ o̧ba baikwö ja̧do ja̧doko jö̧ba̧lö nöinö omukwatadöja, ja̧ jawa ja̧köbaduwobetjö̧ Dios ökwödönö ösödo jö̧ba̧lö.

¹¹ Jo̧kwajabetjö̧ yetaibobe ökwödönö chömöledö, Aaa Gálatas jojodökwö chotidinama waekwinena jö̧ba̧lö.

¹² Budekwödanö yötawaduwakwö chömöledö, ötjödanö ökwödöbi bakibaduwo Moisés iwȩyudina omukwatökönö. Jau chömöledö, ötjöma ökwödö judío jojodöböködödanö ichejekwo̧ batibijatö chömöledö, ja̧ jawa omukwatökönö. Ökwödönö yötawinenama, ötjönö suli̧ kwöwaedinaduwokobe chömöledö.

¹³ Kwöwaisaduwa ökwödönö ajayinö yötawinama chömöledö, chiteba'onö chö'wöchobetjö̧ kwiteboduwibe chö̧jijatö, ja̧danö kwiteboduwi ja̧nö ökwödönö otiwa jawa wene yötawijatö, ¿jö̧tö?

¹⁴ Jau chömöledö, ökwödöma chö'wöchinama kwedinaduwobe, chiteba'o chö'wöchobetjö̧, sulabenö chichejekwijatö, ¿jö̧tö? Jo̧kwajabetjö̧ chiteba'otjö sulabo̧danö chichejekwobetjö̧, ötjönö kwedaduwoböma waiyijatö, ¿jö̧tö? Jo̧kwaijayonö Aaa, sulabo̧ jö̧ba̧löma kwöpöjödaduwijökötö ötjönöma chömöledö, ja̧danö öpöjödökönö, Dios weökwe ángelnö kwösödaduwo jö̧ka̧laduwi̧danö, ja̧danö Cristo Jesúsnö kwösödaduwo jö̧ka̧laduwi̧danö kwösödaduwijatö ötjönöma chömöledö.

¹⁵ ¿Taji waekwinada chömöledö? Ökwödökwö chö̧jenama, jwiinö kwo̧'wo̧ ösöwanö kwö̧jinaduwobe, ¿jö̧tö? Babema ¿tajawedö jejenö kwo̧'wo̧ ösöwanöma kwö̧jaduwokobeda? Ju'wibi yötawaduwakwö, ökwödönö isabenö chöwaisa chömöledö, baikwö: Jwiinö ötjönö kwösödinaduwobetjö̧, ötjönö pjakataduwobö kwösödinaduwobe. Jau chömöledö, jwiinö ötjönö kwösödinaduwobetjö̧, ökwödö kwöbajaleduwi kelekwö ötjönö kwiyaduwo jö̧ka̧linaduwena, jejenö ja̧bö ötjönö pjakataduwobö ji̧natjö̧ma.

¹⁶ ¿Babeja? ¿Kwöpöjojoduwi batibinaji̧? Isabenö wene ökwödönö yötawobetjö̧, ¿kwöpöjojoduwi batibinaji̧?

¹⁷ Ju'wedö sulabenö yöbawadöma isabenö ile nibebö tjedobe ökwödönö chömöledö, jo̧kwaijayonö ökwödönö pjatjatotö jö̧ba̧löma isakwöködö chömöledö. Jobadöma sule ötjötjö 'da̧bachibö kwö̧jaduwobö tjisakwobe chömöledö, jobadönöda kwösödaduwo jö̧ba̧lö.

¹⁸ Isabenö yötawaduwakwö chömöledö, isabenö jojodönö pjatjatotö jö̧ba̧lö ile nibebö tjomukwatitjö̧ma, otiwena. Ja̧danö, ökwödökwö chö̧jitjö̧böbi, detitjö̧böbi jejenö ile nibebö omukwatakwawama otiwena chömöledö, pjatjatotö jö̧ba̧lö tjomukwatobetjö̧.

¹⁹ ¡Ökwödö pebadö chi̧tji̧mudanöbedöwe! Wanedö yötawa chömöledö: Jitji̧nö jemakwuju jitji̧nö jemakwa̧ abönö usula jemawi̧danö, ötjöma ökwödönö omukwatö chi̧tji̧muwe jö̧ba̧lö yemidanö usula chemawobe chömöledö, Cristo omukwati̧danö omukwatadö bakibaduwenanö kabatö.

²⁰ ¡Ökwödökwö chö̧jowe chömöledö! Jau chömöledö, ökwödökwö chö̧jobö chösöda, dösölö̧jinö ökwödönö yöta̧lo jö̧ba̧lö. Isabenö ökwödönö cho̧'wo̧ tjo̧acha chömöledö, chömöledöma dakwö tjö̧jobejö jö̧ba̧lö.

Saranöbi, Agarnöbi Pablo wanedö yöawina wene

²¹ Ökwödötjö Dios weina Moisés iwȩyudina ömöayedödanö batjibobö ösödadönö baikwö abebö cha̧ja̧kwobe: Moisés iwȩyudina jawa ¿isabenö kwöwaisaduwiji̧?

²² Baikwö laebobe chömöledö: Abrahamma i̧tji̧mu du̧ju̧tajanö itji̧kwinobe, ömöayuju bajibanö midö tjeminoko Agar mikwujutjö bakwo̧nö itji̧kwinobe, ja̧danö midö emawökuju Sara mikwujutjö bakwo̧nö itji̧kwinobe.

²³ Ja̧danö midö emawuju Agartjö itji̧kwinökwema, Dios chiyocha jö̧a̧lobetjö̧ itji̧kwinökökwe, jo̧kwaijayonö midö emawökuju Saratjö itji̧kwinökwema, Dios chiyocha jö̧a̧linobetjö̧ itji̧kwinobe chömöledö.

^24-25 Baikwö wanedö yötawa: Jobadö ya̧dö du̧ju̧tajama, Dios yöbawö ujunina wene dötölataja jawatjö tjöbadekwachobe. Jobadötjö Agar mikwujuma, Dios Sinaí mö'ösa'otjö webö ujunina wene badekwachuju. Jau chömöledö, Agar ji̧tji̧mubi tjömöayedö batjibanö jeminobetjö̧, Arabia nijitjö Sinaí mikwa'otjö Moisés iwȩyudina wene badekwachuju Agarma. Ja̧danö, jelobebi Agarnö badekwachobe, böjȩtjö Jerusalén comunidadbi jobujunö badekwachobe, Jerusalénnö ju̧kwadöma Moisés iwȩyudina ömöayedödanö tjuju̧kwobetjö̧.

²⁶ Jo̧kwaijayonö, jeluju midö emawökuju Sarama, mölejȩbetjö Jerusalén comunidad badekwachuju, jobe ju̧kwadöma ömöayedöböködö tjuju̧kwobetjö̧. Ja̧danö, jobuju midö emawökujuda ökwödö dojo'doma chömöledö.

²⁷ Jau chömöledö, baikwö laebobe Dios iwene: Ökwö tjemu debujuma, kwo̧'wo̧ ösöwachibanö kwö̧jo, ja̧danö kwo̧'wo̧ ösöwachibi̧ wene yöbawö jwököbo, ökwö la'akatjöda usula emawö kwitji̧nö eminökujuma. Isabenö jilekwe kaatibinokoma, jeluju jilekwe bu̧junötjö bajalekwönönö ba̧jekwadö ji̧tji̧munö jujuna̧lakwuju, jö̧ba̧lö laebobe.

²⁸ Chömöledö, Isaacma Dios chiyocha jö̧a̧linobetjö̧ öbötjachinobe, ¿jö̧tö? Ökwödöbi ja̧danö chömöledö, Dios chiyocha jö̧a̧linobetjö̧ kwöbötjachinaduwobe chömöledö.

²⁹ Ja̧danö, damötjö baledinadanö yemidanö baledobe chömöledö, baikwö yötawa: Dios chiyocha jö̧a̧linökökwe Ismaelma, Dios chiyocha jö̧a̧linökwe Isaacnö usula emawinö ja̧inobe, ¿jö̧tö? Ja̧danö, babebi ju'wedöma ökwödönö usula kwemawaduwinö ja̧tjobe chömöledö, damötjö baledinadanö.

³⁰ Jo̧kwaijayonö, ¿dakwö laebobeda Dios iwenema? ¿Kwomukwataduwiji̧? Baikwö laebobe Dios iwene chömöledö, Agarnöbi, jitji̧nöbi: Midö emawujunöbi, jitji̧nöbi a'dewö lobidönö, midö emawuju jitji̧ma, midö emawökuju jitji̧ emi̧danö abe'do itea emapji, jö̧ba̧lö laebobe.

³¹ Ja̧danö, baikwö wanedö yötawaduwakwö chömöledö: Ökwödöma midö emawuju ji̧tji̧muböködösa ökwödöma, midö emawökuju ji̧tji̧mubedösa ökwödöma chömöledö.