Gálatas 3 - Dios Iwene

Moisés iwȩyudina ja̧böma kwö̧jibinaduwokobe jö̧ba̧lö Pablo yöawina wene

¹ Chömöledö Gálatas jojodö, tjo̧'wo̧ jwibadö ichejekwadöja. Ja̧danö wanedö yötawa: Mea botjajawö̧danö kwichejekwaduwobe chömöledö, omöna wene kwösödaduwobetjö̧. Jau chömöledö, öwaetjöda kwöba a'oduwitjö i̧sebö yötawijatö, Jesucristo towisa'onö midawö woina wenema, ¿jö̧tö? Jo̧kwaijayonö yayonö omöna wene ösödadöja chömöledö, tjo̧'wo̧ jwibadödanö.

² Biya̧da abebö cha̧ja̧kwaduwakwö chömöledö: Dios weina Moisés iwȩyudina ja̧köbaduwiökwe, ¿Diosma iteda O̧'wo̧ Luwo̧nö iyinaji̧? Ja̧maökö chömöledö, otiwa jawa wene a̧ja̧kwö kwösödaduwiökweda iteda O̧'wo̧ Luwo̧nö iyinobe, ¿jö̧tö?

³ Tjo̧'wo̧ jwibadödanö kwichejekwaduwobe chömöledö, baikwö yötawa: Dios O̧'wo̧ Luwo̧ ujulunö Dios ömöledö bakibinaduwobe, ¿jö̧tö? Jejenö Dios O̧'wo̧ Luwo̧ ujulunö Dios ömöledö bakibinaduwatjö̧ma, ¿babema ökwödöda kwujuluduwinö otiwadö bakibaduwenaji̧? Kwujuluduwinö otiwadöma babiböködöja chömöledö.

⁴ Ökwödönö baledina jawatjö kwöwaisachibinaduwökiji̧ chömöledö? Chedemi kwöwaisachibaduwo jö̧ka̧linaduwena.

⁵ Chömöledö, Diosma iteda O̧'wo̧ Luwo̧nö ökwödönö iyobe, ja̧danö kwö'da̧deduwitjö jojodö edajitjökö jawa otidobe, ¿jö̧tö? ¿Tajawedö jejenö ja̧obeda chömöledö? Dios weina Moisés iwȩyudina ja̧köbaduwiökwe ¿jejenö ja̧bo̧ji̧? Ja̧maökö chömöledö, Dios yöawi̧ a̧ja̧kwö kwösödaduwiökweda jejenö ja̧bo̧, ¿jö̧tö?

⁶ Jau chömöledö, Abrahamnö baledinadanö jo̧be, baikwö laebobe Dios iwene Abrahamnöma: Abrahamma Dios yöawi̧ ösödinobe, jweinö yöbawo̧ jö̧ba̧lö, ja̧danö jejenö ösödiökwe, Diosma jo̧banö yöawinobe sulabe jwibo̧ jö̧ba̧lö, laebobe Dios iwenema.

⁷ Jo̧kwajabetjö̧, Dios yöawi̧ ösödadöda isabenö Abraham i̧tji̧mu tupadanö jojodöma chömöledö.

⁸ Jau chömöledö, Dios iwenema damötjö tjiwȩyudinatjö laebobe judío jojodöböködöbi Dios yöawi̧ tjösödiökwe, Dios jobadönö: Bidöma sulabe jwibadö jö̧ba̧lö yöawakwa̧ma. Baikwö laebobe Dios iwene Abrahamnö otiwa jawa wene yöawinama: Ökwönötjö okobe deinö böjȩnö ju̧kwadönö pjatatocha, jö̧ba̧lö laebobe.

⁹ Jau chömöledö, Abrahamma Dios yöawi̧ ösödiökwe, Diosma jo̧banö pjaatinobe, ja̧danö ju'wedö okobe deinö jo̧ba ösödinadanö ösödadönöbi pjabato̧ Diosma.

¹⁰ Jo̧kwaijayonö Moisés iwȩyudina ja̧bö otiwadö batjibobö isakwadöma, Dios lȩebakwawö̧ tjuju̧kwobe chömöledö, Dios iwenema baikwö laebobetjö̧: Okobe jwiinö Dios weina Moisés iwȩyudina'yetjö laebi̧danö ja'yubebi junibökönö ja̧böködöma, Dios lȩebakwawö̧, jö̧ba̧lö laebobe.

¹¹ Ja̧danö, jelobe baikwö laebobe Dios iwenema: Sule Dios yöawi̧ ösödö sulabe jwibadö babibadöda, ja̧kwawa tjujuna̧lakwedö, jö̧ba̧lö laebobe. Ja̧danö, jejenö laebobetjö̧ öwaetjöda döwaisobe, Dios öba a'otjö, bakwo̧bi Moisés iwȩyudina ja̧bö sulabe jwibo̧ baibökakwo̧ jö̧ba̧lö.

¹² Jau chömöledö Dios weina Moisés iwȩyudinatjöma, jojodö Dios yöawi̧ tjösödo jö̧tja̧li̧ wenema laebokobe, sule jojodö ja̧tjo jö̧tja̧li̧ weneda laebobe, baikwö ja̧baduwi jö̧ba̧lö. Baikwö laebobe Dios iwene: Okobe jwiinö Moisés iwȩyudina laebi̧ jawa ja'yubebi junibökönö ja̧bö tjö̧jitjö̧da ja̧tjö ja̧kwawa tjujuna̧lakwedö, jö̧ba̧lö laebobe.

¹³ Ja̧danö, Dios weina Moisés iwȩyudinatjö Dios lȩebi̧ma demo jö̧da̧linobe chömöledö, okobe jwiinö laebi̧danö ja̧dokobetjö̧. Jo̧kwaijayonö ökwödö Dios lȩebi̧tjö demo jö̧da̧linama, Cristonöda baibinobe. Dios lȩebi̧ma Cristonö baibinobe Dios iwene laebi̧danö. Baikwö laebobe Dios iwenema: Okobe deinö towinö la̧dönöma, Dios lȩebawö̧, jö̧ba̧lö laebobe.

¹⁴ Cristoma jejenö Dios lȩebi̧tjö eminobe, Cristo Jesúsnötjö Dios Abrahamnö yöbawö ujunina jawama judío jojodöböködönöbi baibakobetjö̧, ja̧danö, Dios yöawi̧ dösödiökwe, Dios yöbawö ujuninadanö Diosma iteda O̧'wo̧ Luwo̧nö ökwödönö iyakobetjö̧.

Dios weina jawabi, Dios Abrahamnö yöbawö ujunina jawabi Pablo labebö lobö yöawina wene

¹⁵ Chömöledö, wanedö yötawa jojodö tjö̧ji̧ jawama: Jojodö du̧ju̧tajama, bakobe omukwatö ja̧tjakwa̧ yöbawö junö tjiwȩyudena, baikwö ja̧dakwedösa, jö̧ba̧lö, ¿jö̧tö? Ja̧danö, jejenö wȩyudajadö, ja̧danö tjimibiya wȩyukwajadöma, jemi tupakwö tjiwȩyudinadanö ja̧bökönö söbebö lotjoböma jwiobe, ja̧danö tjiwȩyudina balewö lotjoböma jwiobe, ¿jö̧tö?

¹⁶ Dios Abrahamnö yöbawö ujuninabi ja̧danö chömöledö, söbebö loawama jwiobe. Diosma Abrahamnöbi, Abraham itji̧ tupadanö jojonöbi yöawinobe ja̧akwa̧ma. Aaa chömöledö, Dios Abrahamnö yöawinama kwi̧tji̧mu tupadanö jojodö jö̧ba̧löma laebokobe, kwitji̧ tupadanö jojo jö̧ba̧lö laebobe. Ja̧danö ja̧ kwitji̧ tupadanö jojo jö̧ba̧lö laebi̧ma, Cristonö badekwachobe chömöledö.

¹⁷ Baikwö labebö lobö yötawa chömöledö. Diosma iteda ja̧akwa̧ma Abrahamnö yöbawö ujuninobe, ja̧danö isabenö yötawaja̧danö ja̧tocha jö̧ba̧lö yöawinobe, ¿jö̧tö? Jemi ikenama, cuatrocientos treinta o̧biya baledibajenama, Dios wei̧ Moisés iwȩyudobö weinobe. Jo̧kwaijayonö, ja̧ ikena weinama, ajayi Abrahamnö yöbawö ujuninama söbebö looböma jwiobe chömöledö, Dios ajayinö yöawinadanö ja̧oko jö̧ba̧löma.

¹⁸ Baikwö yötawa, Dios iyi̧tjö emawa chömöledö: Ja̧ jawa demo jö̧ba̧lö Moisés iwȩyudinada mikwawitjö̧ma, Dios Abrahamnö yöbawö ujunina wenema mikwawoko jö̧a̧lena, Dios iyi̧tjö tjemoböma, ¿jö̧tö? Jo̧kwaijayonö Moisés iwȩyudinadanö ja̧badödamaökö Dios iyi̧tjö emadöma chömöledö. Jau chömöledö, Diosma iteda yöbawö junö Abrahamnö isabenö chiyocha jö̧a̧linobe, ja̧danö Abrahamnö, weti̧ ja̧köbitjö̧da chiyocha jö̧ba̧löma jö̧a̧linokobe.

¹⁹ Jo̧kwajabetjö̧, ¿tajawedö Dios wei̧ Moisés iwȩyudobö weinada chömöledö? Baikwö yötawa: Jojodö sulabenö ja̧tji̧ i̧sebotö jö̧ba̧lö Diosma Moisés iwȩyudobö weinobe. Ja̧danö, Moisés iwȩyudina ja̧tjobö ujuninobe, Abraham itji̧ tupadanö jojo ichibenanö kabatö, Dios bitenö pjatatocha jö̧a̧linökwema. Jau chömöledö, Diosma Moisés iwȩyudina iyenama, ángelesdönötjö iyinobe, ja̧danö ö'weje pjabato̧ Moisésnötjö jojodönö iyinobe.

²⁰ Jo̧kwaijayonö Dios Abrahamnö yöawenama, ötjöda chiyocha jö̧ba̧lö yöawinobetjö̧, ö'weje pjabato̧ deinö yöawinobe.

Moisés iwȩyudina jawa Pablo labebö lobö yöawina wene

²¹ Jejenö ji̧tjö̧ma, Dios weina Moisés iwȩyudinama, Dios yöbawö ujunina wenetjö ¿wainö laebiji̧? Wainö laebokobe chömöledö, baikwö yötawa: Biya̧tjö tjö̧jibakwedö jojodöma jö̧ba̧lö Diosma iteda wei̧ weinatjö̧ma, isabenö ja̧ wei̧tjö jojodö sulabe jwibadö batjibo jö̧tja̧linena chömöledö.

²² Jo̧kwaijayonö, Dios iwenema baikwö laebobe chömöledö: Okobe deinö böjȩ jojodöma sulabetjö ka̧lena tjö̧bobedanö ichejekwa. Ja̧danö jejenöobetjö̧, Diosma Jesucristonö ösödadönö chiyocha jö̧a̧linama, Jesucristonö tjösödobetjö̧ ösödadönö iyobe.

²³ Jesúsnö dösödakwa̧ möle baibakwa̧ abönöma, Dios weina Moisés iwȩyudinama ka̧lena tjö̧bemidanö ichejekwinobe, ja̧danö ka̧lena dö̧binobedanö ichejekwa, dösödakwo̧ma öwawachibenanö kabatö.

²⁴ Jau chömöledö, wanedö yötawa: Cristo ichibenanö kabatö, Moisés iwȩyudinama ökwödönö waisato̧danö ichejekwinobe, Cristo ichenama jo̧banö ösödö sulabe jwibadö badibakobetjö̧.

²⁵ Jo̧kwaijayonö babema, Jesúsnö dösödi̧ möle ida̧ökö badekwachinobetjö̧, jejenö ökwödönö waisato̧danö ji̧ma jwiobe chömöledö.

²⁶ Jau chömöledö, Cristo Jesúskwö bakobe dötewinö ja̧nö, okobe deinö Dios i̧tji̧mubedöja, Jesúsnö kwösödaduwobetjö̧.

²⁷ Baikwö yötawa chömöledö: Diosma ökwödönö bakobe Jesúskwö bakibaduwanö ja̧inobe, ¿jö̧tö? Ja̧danö, okobe deinö jejenö ja̧inawö̧ma, Jesús sulabe jwii̧ 'dukawinaduwobe ichejekwa chömöledö.

²⁸ Jo̧kwajabetjö̧, judío jojodöbi, judío jojodöböködöbi bakwayedöda babema, ja̧danö jojodö tjömöayedöbi, tjömöayedöböködöbi bakwayedöda babema, ja̧danö ömadöbi ya̧döbi bakwayedöda babema. Jau chömöledö, okobe deinö Cristo Jesúskwö bakobe dötewadö ja̧nö, bakwo̧dabedöja.

²⁹ Ja̧danö Cristobedö kwö̧jaduwitjö̧ma, Abraham i̧tji̧mu tupadanö jojodöbedöja, ja̧danö Dios chiyocha jö̧a̧linama kwemaduwakwedöja.