Gálatas 2 - Dios Iwene

Ju'wedö Jesús webawedö Pablo yöawi̧ tjösödina wene

¹ Jemi ikenama, a̧li̧nösamutjö ö'wejemu jawa o̧biya baledibajenama, yemidanö Jerusalénbe chi̧'yijatö Bernabékwö, ja̧danö Titonöbi öbibö chi̧'yijatö.

² Diosma Jerusalénbe chi̧'yobö weitjö̧, jobe chi̧'yijatö. Jobema, Jesúsnö ösödadötjö luwedökwöda ko̧ko̧kwö, jobadönö labebö lobö yötawijatö judío jojodöböködönö otiwa jawa wene yötawi̧ma, biya̧ wene judío jojodöböködönö yötawobe jö̧ba̧lö. Jobadönö labebö lobö yötawijatö, ötjö yötawi̧danö bakweminö tjomukwatojobö jö̧ba̧lö, ja̧danö damötjö yöbawö chö̧jinabi, ja̧ möle yöbawö chö̧jinabi tjöpöjödapji jö̧ba̧lö, Pabloma sulabenö yöbawo̧ jö̧ba̧lö.

³ Ja̧danö, jobadöma yötawi̧danö bakweminö tjomukwatinobe chömöledö. Ja̧danö, bakweminö tjomukwatobetjö̧ ötjökwö kwebachina Titonö wetjinokobe, ötade bajalesado̧ 'wibekwö looböma. Titoma 'wibekwö̧kö̧ griego jojo ö̧jijayonö, jo̧banö wetjinokobe 'wibekwö loo jö̧ba̧löma.

⁴ Jau chömöledö, ajayinöma ju'wedö Jesúsnö ösödöködöma Jesúsnö ösödöködötjijayonö, Jesúsnö ösödadödanö ichejekwö ökwödö Jesúsnö ösödadö dö'da̧de tjichibinobe, Cristo Jesúsnö ösödadö dö̧ji̧, Cristo Jesús midawö woinobetjö̧ Moisés iwȩyudina jawatjö dö̧jibina tjedo jö̧ba̧lö. Jobadöma ökwödönö suli̧ tjöwaedotö jö̧ba̧lö, yemidanö Moisés iwȩyudina jawatjö ömöayedödanö badibanö ja̧tjotö jö̧ba̧lö tjichinobe chömöledö,

⁵ jo̧kwaijayonö jobadö wetji̧ma ja'yubebi da̧ja̧kwijökötö chömöledö. Jau chömöledö, wetji̧danöma ja̧bökönö otiwa jawa wene a̧'dȩlanö te'ada̧lö dö̧jijatö, isabenö weneda otiwa jawa wene balewö loawökö weneda kwa̧ja̧kwaduwakobetjö̧.

⁶ Jau chömöledö, otiwa jawa wene tjöbeba̧lö dö̧jo jö̧ba̧lö, otiwa jawa wene judío jojodöböködönö yötawi̧ wene Jerusaléntjö Jesúsnö ösödadö tjuluwedönö yötawinobe. Ja̧danö, Jesúsnö ösödadötjö inesö luwedö jojodö ötjabiwö̧ma ötjö chomukwati̧danö tjomukwatinobe, Aaa, baikwö yötawa chömöledö, luwedö tjö̧ji̧ma chomukwatökö, Diosma bakweminö jojodönö edo̧obetjö̧, jo̧kwaijayonö, jojodö tjedemi inesö luwedö tjö̧jobe, ja̧danö jobadöma ökwödö domukwati̧danö tjomukwatinobe chömöledö. Ja̧danö jobadöma, Aaa, ji̧kwawa wene yökawi̧ma ja'yubenö jwia jö̧ba̧löma yötja̧linokobe, ida̧ökö okobe jwiinö yötawobetjö̧.

⁷ Jau chömöledö, yötawi̧ öpöjödökönö tjösödinobe, baikwö omukwatö: Diosma Pedronö ujuninobe, judío jojodönö otiwa jawa wene yöbawo̧ baibanö, ja̧danö bakweminö Pedronö ujuninadanö, Diosma Pablonö ujuninobe judío jojodöböködönö yöbawo̧ baibanö, jö̧ba̧lö.

⁸ Jau chömöledö, Diosma Pedronötjö judío jojodönö pjaatinobe, ji̧kwawa wene tja̧ja̧kwobö, ¿jö̧tö? Ja̧danö, ötjönötjö Diosma judío jojodöböködönö pjaatinobe, jobadöbi ji̧kwa wene tja̧ja̧kwobö.

⁹ Jau chömöledö, Jacobobi, Pedrobi, Juanbi ötjönö tjöwaisinobe, Pablobi Jesús webawo̧ jö̧ba̧lö. Jau chömöledö, jobadöma Jesúsnö ösödadötjö inesö luwedödanö tjö̧jinobe, ja̧danö jobadöma edö tjöwaisinobe ötjönö, isabenö judío jojodöböködönö yöawo jö̧ba̧lö Dios otiwanö weinökwe Pabloma jö̧ba̧lö. Jejenö tjöwaisobetjö̧, jobadöma ötjönöbi Bernabénöbi dömamiju döwaisobekwöchobe jawaomiju detjatinobe, bakobe Dios wei̧ otidadösa jö̧ba̧lö. Ja̧danö, jobadö judío jojodönö yöbawö tjö̧jonö, ökwödöma judío jojodöböködönö yödawobö tjösödinobe.

¹⁰ Sule bakwöta jawada atjebinobe ökwödönöma chömöledö, balada jwibadö usula jojodönö omukwatö pjadatobö, ja̧danö jejenö atjebi̧ma chösödijatö, jwibadönö pjadatobö chösöda jö̧ba̧lö.

Pablo Pedronö lȩbebö yöawina wene

¹¹ Jo̧kwaijayonö, Pedroma Antioquíabe i̧'yenama, jo̧bama sulabenö ja̧inobe, ja̧danö sulabenö ja̧obetjö̧, Jesúsnö ösödadö tjöba a'otjö ja̧nö jo̧banö lȩtebijatö, sulabenö ja̧köba jö̧ba̧lö.

¹² Baikwö Pedro ja̧ina wene yötawa chömöledö. Ajayinöma, Pedroma Antioquíanö ja̧nö, Jesúsnö ösödadötjö judío jojodöböködökwö ba̧nö ukwinobe, bidöbi Dios ömöledö jö̧ba̧lö. Jemi ikenama, ju'wedö, judío jojodötjö Jacobo weinawö̧ma Antioquíabe tjichibinobe. Jobadö tjichibenama, Pedroma, Aaa, judío jojodöböködökwö ba̧nö chukwobe edö tjölabena jö̧ba̧lö, judío jojodöböködökwö kwakwawama kaatibinobe, judío jojodönö yeabobetjö̧.

¹³ Ju'wedö judío jojodötjö Jesúsnö ösödadöbi Pedro ja̧i̧danö ja̧tjinobe, jobadöbi ajayinöma otiwanö judío jojodöböködötjö Jesúsnö ösödadökwö otiwanö ba̧nö tjukwinajayonö, Pedro ja̧i̧ edö, jobadöbi katjatinobe, ja̧danö Bernabébi jobadö ja̧tji̧ edö, jo̧babi judío jojodöböködökwö kwakwawa kaatibinobe.

¹⁴ Jau chömöledö, judío jojodöböködökwö kwakwawa kabatibö, isabenö wene otiwa jawa wene laebi̧danö ja̧tjinokobe. Jo̧kwajabetjö̧ jejenö sulabenö ja̧tjobe edö, ötjöma okobe deinö Jesúsnö ösödadö tjöba a'otjö jamatö Pedronö lȩbebö yötawijatö, baikwö: —Pedro, ökwöma judío jojoköbijayonö, judío jojodö tjö̧ji̧ jawa kakatinobe, mikwawökö jö̧ba̧lö, ja̧danö judío jojodöböködö ja̧bö tjö̧ji̧danö kwö̧jobe, ¿jö̧tö? Jo̧kwajabetjö̧ ökwöma judío jojodö tjö̧ji̧ jawa mikwawökö ji̧ jö̧ba̧lö kakatibinatjö̧ma, ja̧ jawa judío jojodöböködönö weköboko, judío jojodö ja̧bö tjö̧ji̧danö ja̧bö tjö̧jo jö̧ba̧lö.

¹⁵ Ökwödöma judío jojodötjö döbötjachinajayonö, ja̧danö sulabedö judío jojodöböködö ötjabiwö̧ dö̧jököjayonö,

¹⁶ ökwödöma döwaisa Dios weina Moisés iwȩyudina ja̧böma sulabe jwibadö baibakwawokobe, sule Jesucristonö ösödöda sulabe jwibadö badibobö jo̧be jö̧ba̧lö döwaisobe, ¿jö̧tö? Ja̧danö ökwödöbi judío jojodöböködödanö bakweminö Cristo Jesúsnö dösödinobe, dö̧jibinö ja̧bo̧ jö̧ba̧lö. Jau, ökwödöma Moisés iwȩyudina ja̧böma sulabe jwibadö badibijökötö, bakwo̧bi Moisés iwȩyudina ja̧böma sulabe jwibo̧ baibokobetjö̧. Ökwödöma Cristonö dösödijatö, sulabe jwibadö badibo jö̧ba̧lö, jo̧kwajabetjö̧ judío jojodöböködönö weköboko judío jojodö ja̧tji̧danö ja̧tjo jö̧ba̧lö— lȩtebijatö Pedronöma.

Dios weina Moisés iwȩyudinama mikwawokobe otiwadö badibobö jö̧ba̧lö Pablo yöawina wene

¹⁷ Ökwödö Cristonö ösödadöma Cristonötjö sulabe jwibadö badibobö disakwobe, ¿jö̧tö? Jau chömöledö, Cristonö dösödiökwe Dios sulabe jwibadö badibanö ja̧obö disakwobe, ökwödö Cristonö ösödadöma. Jo̧kwajabetjö̧, ökwödö Cristonö ösödadöma Moisés iwȩyudina döpöjödobedanö ichejekwa ja̧ ja̧bö ji̧böködösa jö̧ba̧lö, ja̧danö Moisés iwȩyudina döpöjödobetjö̧, sulabedö ötjabiwö̧ judío jojodöböködödanö dichejekwobe, ¿jö̧tö? ¿Dakwö kwomukwataduwa chömöledö? Jejenö jo̧betjö̧, ¿Cristoma sulabenö ja̧dobö webo̧ji̧? Ja̧maökö chömöledö.

¹⁸ Baikwö yötawa: Ötjöma Cristonö ösödö, Moisés iwȩyudina söbebö lotinobedanö ichejekwa, biya̧tjö otiwo̧ babibö̧kö̧sa jö̧ba̧lö. Jo̧kwaijayonö, jejenö söbebö lotinobe okobema, Moisés iwȩyudinatjö otiwo̧ batibobö chisakwitjö̧ma, waekwena, ötjöda chi̧sebena, Moisés iwȩyudinama ja̧bö̧kö̧sa jö̧ba̧lö.

¹⁹ Jau chömöledö, Dios weina Moisés iwȩyudinama ida̧ökö ötjönö kwabö loinobedanö ichejekwa chömöledö, ja̧danö ida̧ökö wotinobetjö̧, tupakwö Moisés iwȩyudinama weokobe ötjönöma. Jejenö baibinobe, Diosnö ösödö chö̧jakobetjö̧.

²⁰ Jau chömöledö, Cristokwö bakobe towisa'onö la̧nö wotinajayonö, 'yaba̧lo̧ chö̧jobe. Jo̧kwaijayonö, babe chö̧ji̧ma, ötjöma ida̧ökö wotinobetjö̧ babe chö̧ji̧ma ötjö chö̧ji̧maökö chömöledö, Cristo ö̧ji̧da. Ja̧danö, babe chiteba'onö chö̧ji̧ma, Dios itji̧nö ösödö, ötjönö ile nibebö midawö wobinanö ösödö chö̧jobe.

²¹ Baikwö yötawa chömöledö: Diosma otiwanö iyinobe iteda wei̧ Moisés iwȩyudinama, ja̧danö ja̧ Dios iyinama chöpöjödökö chömöledö. Jo̧kwaijayonö, baikwö yötawa chömöledö: Moisés iwȩyudinatjö jojodö sulabe jwibadö batjibakwedö jö̧ba̧lö Dios iyinatjö̧ma, Cristo midawö woinama mikwawoko jö̧a̧linobe. Jo̧kwaijayonö jejenöma iyinokobe chömöledö.