Gálatas 1 - Dios Iwene

Pablo Gálatas jojodönö iwȩyudina'yetjö ajayi jawa

¹ Ötjöma Pablo mikwo̧sa, Jesús webawo̧sa. Ja̧ Jesús webawo̧ chö̧ji̧ma, jojodö wetjinokobe, ja̧danö Diosma jojodönö weinokobe, Jesús webawo̧ batibanö tjujuno jö̧ba̧löma. Jau chömöledö, Jesucristobi, Jesúsnö tjeachajinö ja̧bina Dabe'do Diosbi ötjönö 'da̧batö tjujuninobe, Jesús webawo̧ batibanö chö̧jo jö̧ba̧lö.

² Ötjöma ju'wedö ötjökwö ju̧kwadö dömöledö Jesúsnö ösödadökwö ja̧nö chiwȩyuda böja kwialusöja ökwödö Gálatas nijitjö ko̧ko̧kwö kwöba̧jaduwitenia Jesúsnö ösödadönö.

³ Dabe'do Diosbi, Duluwo̧ Jesucristobi ökwödönö lȩlö̧jinö tjedobö chösöda, kwo̧'wo̧ luwo̧duwi ösöwachibanö.

⁴ Böjȩ sulaböjȩtjö dö̧jibobö, jo̧ba Jesucristoma ökwödö dusula midawö woinobe, Dabe'do Dios ajayitjöda omukwatö ujuninadanö.

⁵ Ba̧kwȩlö̧jatebö kabatökönö Diosnö dösödobö jo̧be, jejenö dösödobö chösöda.

Ju'wi otiwa jawa wenema jwia, yödawina weneda jö̧ba̧lö Pablo yöawina wene

⁶ Chömöledö, ökwödönö omukwatö, ayö, Gálatas jojodöma ¿tajawedö juluwanö kabatibadöjö? jö̧ba̧lö chomukwatobe. Jau chömöledö, Cristoma mikwa jwiinö otiwanö pjaatinobetjö̧, Diosma ökwödönö jwöinobe, ¿jö̧tö? Jo̧kwaijayonö ökwödönö jwöbinanö juluwanö kabatibadöja, ju'wi wene otiwa jawa ötjabi̧ wene kwösödaduwobö.

⁷ Isabenö ju'wi wene otiwa jawa wenema jwiobe chömöledö, ökwödönö yödawina weneda. Jo̧kwaijayonö ju'wedöma ökwödönö suli̧ waedö, Cristo jawa wene otiwa jawa wene balewö lobö yötjawobe.

⁸ Ju'wi wene kwösödaduwa chömöledö. Baikwö yötawa, ökwödö Jesús webawedöma ajayinö yödawina wene balewö lobö wainö yödawitjö̧ma, a̧ja̧kwökönaduwi. Ja̧danö, mölejȩbetjö ichajo̧ ángelbi ajayinö yödawina wene balewö lobö wainö yöawitjö̧ma, a̧ja̧kwökönaduwi chömöledö. Jau chömöledö, ökwödö Jesús webawedötjöbi, ángelesdötjöbi bakwo̧ ajayinö yödawina wenetjö wainö yöawitjö̧ma, jejenö sulabenö yöbawo̧nö Dios lȩebobö jo̧be.

⁹ Belö ökwödönö yödawinadanö yemidanö yötawaduwakwö, otiwa jawa wene a̧ja̧kwö kwösödinaduwa wenetjö bakwo̧ balewö lobö wainö yöawitjö̧ma, Dios jo̧banö lȩebobö jo̧be.

¹⁰ ¿Dakwö kwomukwataduwa chömöledö? ¿Jojodöda yötawi̧ tjösödo jö̧ba̧lö chisakwobeji̧? Chisakwökö chömöledö, Diosda yötawi̧ ösödo jö̧ba̧lö isakwo̧sa. Ja̧danö, ¿jojodö ötjönö tjösödo jö̧ba̧lö chisakwobeji̧? Chisakwökö chömöledö, jejenö chisakwitjö̧ma, isabenö Cristo ömöayo̧ chö̧joko jö̧ta̧lena.

Pablo Jesús webawo̧ baibina wene

¹¹ Kwöwaisaduwobö yötawaduwakwö chömöledö, ötjö yötawina wene otiwa jawa wenema, jojodöda omukwatö yötjawina wenemaökö chömöledö.

¹² Jau chömöledö, yötawi̧ wenema jojodötjö cha̧ja̧kwijökötö, ja̧danö ja̧ wenema jojodö la'akatjöda tjöba̧ja̧dinokobe ötjönöma. Jesucristoda ja̧ wene yöbawö i̧sebinobe ötjönöma chömöledö.

¹³ Ökwödöma kwa̧ja̧kwinaduwobe chömöledö, damötjö chö̧jinama. Ina judío jojodö tjösödi̧danö ösödö chö̧jayi, jwiinö sulabenö ja̧tijatö Dios ömöledö Jesúsnö ösödadönö, usula tjemawinö. Ja̧danö lȩlö̧jinöma edökönö jobadönö söbebö lotobö chisakwijatö chömöledö.

¹⁴ Jau chömöledö, Jesúsnö chösödakwa̧ abönö, ju'wedö chö̧jinena ju̧kwadö judío jojodö tjöwaisachi̧tjö bajalekwönönö chöwaisachijatö judío jojodö tjösödi̧ jawama, ja̧danö ju'wedötjö bajalekwönönö jwaikwöda chösödijatö ökwödö judío jojodö da'dödö yötjawina jawama, yötjawinadanö ja̧bö chö̧jo jö̧ba̧lö.

¹⁵ Jo̧kwaijayonö, chojo'do ötjönö jemakwa̧ abönö, Diosma ötjönö 'da̧batö ujuninobe jo̧ba wei̧ ja̧to jö̧ba̧lö, ja̧danö lȩlö̧jinö edö ötjönö jwöinobe.

¹⁶ Ja̧danö, Dios ösödenama, iteda itji̧ Jesúsnö i̧sebinobe ötjönöma, judío jojodöböködönö Jesús jawa wene yötawo jö̧ba̧lö. Jejenö baibenama, jojodökwödama yöta̧lakwawijökötö, chotidakwa̧ chöwaiso jö̧ba̧löma,

¹⁷ Ja̧danö Jerusalénbe chi̧'yijökötö, ötjötjö ajayinö Jesús webawedö babibinadökwö yöta̧lakwawo jö̧ba̧löma. Jelobeda chi̧'yijatö, Arabiabe, ja̧danö jemi ikenama yemidanö Damascobe chȩwa̧jijatö.

¹⁸ Ja̧danö, wa̧pötakwa o̧biya baledibajenama, bajaliyanö Jerusalénbe chi̧'yijatö, Pedronö edö, ja̧danö jo̧bakwö chö̧jijatö a̧li̧nösamutjö bakwamu jawa möle.

¹⁹ Ja̧danö, jobe Pedronö edö chi̧'yenama, ju'wedö Jesús webawedönö chedijökötö, jobadötjö sule Pedronöda, Duluwo̧ Jesús yöne öjawo̧ Jacobonöda chedijatö.

²⁰ Biya̧ ökwödönö yötawaja̧ma, Dios öba a'otjö ja̧nö yötawaduwakwö, omöna yöta̧lökö chömöledö.

²¹ Ja̧danö, jemi ikenama Siria nijibebi, Cilicia nijibebi chi̧'yijatö.

²² Jenama Judea nijitjö ko̧ko̧kwö tjö̧baji̧tenia Cristonö ösödadöma ina ötjönö tjedinokobe chömöledö,

²³ a̧ja̧kwöda tjöwaisinobe ötjönöma. Baikwö tja̧ja̧kwinobe ötjönöma chömöledö: Ökwödönö usula demawinö ja̧binama, ajayinö Jesúsnö ösödakwawa söbebö loobö isakwinajayonö, babema ja̧ jawa weneda yöbawo̧ jö̧ba̧lö tja̧ja̧kwinobe.

²⁴ Ja̧danö, ötjönö a̧ja̧kwö, Diosnö tjösödinobe, otiwo̧ja jö̧ba̧lö.