Filipenses 3 - Dios Iwene

Isabenö Dios wei̧danö 'wiekwama, tjo̧'wo̧ luwo̧ jawada jö̧ba̧lö Pablo yöawina wene

¹ Chömöledö, böja kwialusöja wȩyudö katatakwa̧ abönö, baikwö yötawaduwakwö: Duluwo̧kwö dötewanö ja̧nö, kwo̧'wo̧duwi ösöwachibanö kwö̧jaduwo. Jejenö ba̧kwȩlö̧jatebö wȩyudajichobe chömöledö, ja̧danö jejenö wȩyukwama chöpöjödachibokobe chömöledö, isabenö ökwödönö pjaati̧ jö̧ba̧lö.

^2-3 Tjöbeba̧lakwawönö eda̧lö kwö̧jaduwo chömöledö, tjiteba'o 'wibekwa̧ladönöma. Jau chömöledö, jobadöma, 'Wibekwadödobetjö̧ Dios ömöledösa, jö̧ba̧lö yötja̧lijayonö Dios ömöledöböködö. Sulabenö ja̧badö jobadöma chömöledö. Ja̧danö, wanedö yötawa: Jobadöma sulabedö a̧wi̧li̧dödanö ichejekwadö tjö̧jobe. Ökwödö Jesúsnö ösödadöma, ökwödödasa Dios isabenö ömöledöma chömöledö, Dios O̧'wo̧ Luwo̧ ujulunö Diosnö dösödobetjö̧, ja̧danö Cristo Jesúskwö dötewanö ja̧nö do̧'wo̧ ösöwachibanö dö̧jobetjö̧. Jau chömöledö, ökwödö isabenö Dios ömöledöma, wame jawa diteba'o jawama do̧'wo̧ wana̧löködösa.

⁴ Jau chömöledö, ju'wedöma tjomukwatena, ja̧ wame jawa do̧'wo̧ döwana̧lobö jo̧be jö̧ba̧lö. Ja̧danö, isabenö ja̧ wame jawa mikwawitjö̧ma, ju'wedötjö bajalekwönönö ja̧ cho̧'wo̧ chöwana̧lo jö̧ta̧lena chömöledö. Baikwö labebö lobö yötawa:

⁵ Isabenö Dios omudawö ujuninawö̧ Israel jojodötjö jo̧sa chömöledö, ja̧danö Israel jojodötjö Benjamínsasotjö jo̧sa chömöledö. Ja̧danö, Moisés iwȩyudina laebi̧danö chojo'do jemaja̧ ikena jelemutjö wa̧pötakwa möle baledibajenama, chötade bajalesado̧ 'witekwijatö. Jau chömöledö, isabenö Dios omudawinawö̧tjö jo̧sa. Isabenö bakwainö Israel jojosa chömöledö, okobe deinö ötjötjö ajayinö ji̧nadöma, Hebreo jojodötjötjinobe. Ja̧danö, Dios weina Moisés iwȩyudina jawa otiwanö ja̧binasa chömöledö. Jau chömöledö, fariseo jojodöma ju'wedö Israel jojodötjö bajalekwönönö Moisés iwȩyudina ja̧badö, ¿jö̧tö? Ja̧danö, ötjöma fariseo jojodötjö ji̧nasa.

⁶ Ja̧danö, ja̧ Moisés iwȩyudina jawa jwaikwöda chösödobetjö̧, Jesúsnö ösödadönö chöpöjödijatö, ja̧danö usula tjemawinö ja̧tijatö chömöledö, jwaikwöda Moisés iwȩyudina jawa isakwö. Jau chömöledö, Moisés iwȩyudina jawama otiwanö ja̧binasa, ja̧danö okobe deinö ötjönö tjomukwato jö̧tja̧linobe, Pabloma wene jwibo̧, okobe jwiinö Moisés iwȩyudina ja̧bo̧ jö̧ba̧lö.

⁷ Jau chömöledö, ajayinöma ja̧ jawa cho̧'wo̧ chöwana̧lijatö, ja̧tjö otiwo̧sa jö̧ba̧lö, jo̧kwaijayonö cho̧'wo̧ chöwana̧lokobe babema chömöledö. Babema Cristonöda chösödo jö̧ba̧lö, ja̧ jawa chöpöjöda, mikwawökö ji̧ jö̧ba̧lö.

⁸ Jau chömöledö, ja̧ jawabi, okobe jwiinö ju'wi jawabi mikwawökö ji̧ jö̧ba̧lö, inesö mikwawi̧da chisakwobe chömöledö, jwaikwöda Chuluwo̧ Cristo Jesúsnö chöwaisobö chisakwobe babema chömöledö, ja̧da inesö mikwawi̧ jö̧ba̧lö. Wanedö yötawa: Sula'wo tjikwi̧danö ikwö lotinobedanö ichejekwa, mikwawökö ji̧ jö̧ba̧lö, Cristonöda chemo jö̧ba̧lö,

⁹ Cristokwöda bakobe dötewinö chö̧jo jö̧ba̧lö. Ja̧danö, babema Moisés iwȩyudina ja̧bö, ötjöda chujulunö sulabe jwibo̧ batiboböma chisakwokobe chömöledö, babe sulabe jwibo̧ chö̧ji̧ma, Cristonö chösodiökwe Dios sulabe jwibo̧ batibanö ja̧i̧da chömöledö. Jau chömöledö, ja̧ sulabe jwibo̧ chö̧ji̧ma, ötjö ja̧ti̧maökö, yöawi̧ chösödiökwe Dios ja̧i̧da chömöledö.

Cristonö chöwaisobö jwaikwöda isakwo̧sa jö̧ba̧lö Pablo yöawina wene

^10-11 Jwaikwöda Cristonö chöwaisobö chisakwobe chömöledö, ja̧danö jo̧ba ujulu chöwaisobö chisakwobe. Jau chömöledö, Cristoma isabenö juluwo̧obetjö̧, woawatjö tjeachajinobe, ¿jö̧tö? Ja̧ Cristo ujulu chöwaisobö chisakwobe. Jo̧kwajabetjö̧ chömöledö, wanedö yötawa: Jo̧bakwö bakobe usula chemawobö chisakwobe, ja̧danö jo̧ba woinama, jo̧bakwö bakobe batibobö chisakwobe, jo̧ba woawatjö tjeachajinadanö ötjöbi tjetachajobö.

¹² Chömöledö, Aaa, ida̧ökö otiwanö Cristonö waiso̧sa, jö̧ba̧löma chomukwatokobe, ja̧danö ida̧ökö bakwainö otiwo̧ babibinasa, jö̧ba̧löma chomukwatokobe. Jo̧kwaijayonö, ina chichibököjayonö, jo̧ba ökömanö luta̧lobedanö ichejekwa, jo̧banö chöwaiso jö̧ba̧lö. Jejenö jo̧banö chöwaiso jö̧ba̧lö, Cristo Jesúsma ötjönö do̧atinobe chömöledö, ja̧danö jo̧banö chöwaiso jö̧ba̧lö, jwaikwöda isakwö chö̧jobe.

¹³ Chömöledö, ida̧ökö ichibinasa jö̧ba̧löma chomukwatokobe, jo̧kwaijayonö baikwö omukwatö ja̧ti̧ma yötawa chömöledö: Ajayinö baledina jawa junibö, jwaikwöda chabönö jawada isakwö chö̧jobe.

¹⁴ Wanedö yötawa: Jweinö ö'öchakwawobedanö ichejekwa, ajayinö ichibo̧ jawa chemo jö̧ba̧lö, ja̧danö ja̧ chemobö jö̧ta̧li̧ma, Cristo Jesúsnö chöwaisobö chömöledö. Jau chömöledö, Cristo Jesúsnö chöwaiso jö̧ba̧lö, Diosma ötjönö jwöinobe, ja̧danö jejenö jo̧banö chöwaiso jö̧ba̧lö, isakwö chö̧jobe.

¹⁵ Okobe deinö do̧'wo̧ luwo̧nö da̧peachinadöma jejenö Cristonö döwaisobö disakwo chömöledö, ja̧danö, ökwödötjö ju'wedö ina jejenö kwisakwaduwobö kwomukwataduwökötjö̧ma, Diosma i̧sebakobe ökwödönö, Cristonö kwöwaisaduwobö isakwö kwö̧jaduwo, jö̧ba̧lö.

¹⁶ Ja̧danö chömöledö, baikwö yötawaduwakwö, ja̧bö dö̧jo jö̧ba̧lö döwaisachibinama, okobe deinö bakwo̧nökwena, ja̧ ida̧ökö döwaisachibina jawa ja̧bö dö̧jobö jo̧be.

Ökwödö Jesúsnö ösödadöma, böjȩ jojodöböködösa, mölejȩ jojodösa jö̧ba̧lö Pablo yöawina wene

¹⁷ Chömöledö, ökwödöma okobe deinö ötjö ja̧bö chö̧ji̧danö ja̧bö kwö̧jaduwo. Ja̧danö, ötjö ja̧bö chö̧ji̧danö ja̧badönöbi kwedaduwo, ökwödöbi jobadö ja̧tji̧danö ja̧bö kwö̧jaduwo jö̧ba̧lö.

¹⁸ Jo̧kwaijayonö, ökwödö ja̧bö dö̧ji̧danö ja̧böködönöma, jobadö ja̧tji̧danöma ja̧bökönaduwi chömöledö. Ökwödönö yöbawiachinadanö, yemidanö budekwö yötawaduwakwö chömöledö, ju'wedöma Cristo towisa'onö midawö woina wene öpöjojodö tjuju̧kwobe,

¹⁹ ja̧danö Dios ökwöla nöolanö lȩebakwawö̧ jobadöma chömöledö. Jobadöma jwaikwöda idöda tjösödi̧ jawada isakwadö, ja̧danö taba lö̧ji̧ jawa ösödadö, otiwa jö̧ba̧lö. Ja̧danö jwaikwöda böjȩ jawada omukwatadö jobadöma chömöledö.

²⁰ Jo̧kwaijayonö böjȩ jojodöböködösa ökwödöma, böjȩ jawada domukwato jö̧ba̧lö. Ökwödöma mölejȩ jojodösa chömöledö, ja̧danö dö̧jibinö pjabato̧ Duluwo̧ Jesucristo mölejȩbetjö ichakwa̧ te'ada̧lö dö̧jobe ökwödöma chömöledö.

²¹ Jo̧ba ichenama, diteba'o böjȩ jawasa'o balewachinö ja̧akobe chömöledö, iteda iteba'o otiwa'o juluwa'odanö ökwödöbi dujuna̧lakobetjö̧. Jau chömöledö, Duluwo̧ Jesucristoma okobe jwiinö juluwo̧, okobe deinöbi okobe jwiinöbi ujuluwo jö̧ba̧lö, ja̧danö ja̧ iteda ujulunö, döbalewachinö ja̧akwo̧.