Filipenses 2 - Dios Iwene

Otiwo̧sa jö̧ba̧lö omukwatökönö, Jesús omukwatinadanö omukwatö, kwömöledö Jesúsnö ösödadönö ösödabikwawö kwö̧jaduwo jö̧ba̧lö Pablo yöawina wene

¹ Chömöledö, Cristokwö dötewanö dö̧ji̧ma dujuluwachibanö pjaatobe, ¿jö̧tö? Ja̧danö, Cristo ökwödönö ösödi̧ma do̧'wo̧ ösöwachibanö pjaatobe, ¿jö̧tö? Ja̧danö, Dios O̧'wo̧ Luwo̧kwö bakobe dö̧jobe, ¿jö̧tö? Ja̧danö, dösölö̧jinö kwösödaduwobe kwömöledöduwi Jesúsnö ösödadönöma, ¿jö̧tö?

² Jejenö jo̧be chömöledö, jo̧kwajabetjö̧ cho̧'wo̧ ösöwachibanö pjabataduwi chömöledö. Jau chömöledö, ökwödöma bakwainö omukwatö, ja̧danö bakwainö ösödabikwawö ja̧nö, ja̧danö kwo̧'wo̧ luwo̧duwitjö bakobe bakwöta jawada omukwatö kwö̧jaduwitjö̧ma, cho̧'wo̧ ösöwachibakobe.

³ Ja̧danö, ja̧köbaduwi̧ma, ökwödöda kwemaduwotö jö̧ba̧löma kwisakwaduwoko, ja̧danö ökwödönö tjomukwatoböma, Aaa, bidöma otiwadö jö̧ba̧lö tjomukwatoböma kwisakwaduwoko chömöledö. Jau chömöledö, mikwawadösa jö̧ba̧löma kwomukwataduwoko, ju'wedönöda kwösödaduwo, ötjönötjö bajalekwönönö mikwawadö jö̧ba̧lö.

⁴ Ja̧danö, kwömöledöduwinö kwomukwataduwo, jobadönö pjakataduwobö. Jau chömöledö, sule ökwödöda jawama omukwatökönaduwi, ju'wedönöbi kwomukwataduwo, jobadönö pjakataduwobö.

⁵ Jau chömöledö, Cristo Jesús omukwatinadanö ju'wedönö pjakataduwobö kwomukwataduwo chömöledö. Baikwö jo̧ba omukwatina yötawa:

⁶ Cristoma itedainobetjö̧ la'akatjöda Diosdainobe, jo̧kwaijayonö Diosdanö ö̧ji̧ 'diinö do̧a̧loböma omukwatinokobe.

⁷ Jejenö do̧ba̧lökönö, iteda okobe jwiinö ujuna̧li̧ma junibö, usulaso̧ tjömöayo̧danö baibanö ja̧inobe, ja̧danö jojo baibanö öbötjachinobe.

⁸ Jo̧bama mikwawö̧kö̧ baibanö ja̧inobe, ja̧danö Dios wei̧da ja̧inobe, woenanö kabatö. Jau chömöledö, towisa'onö woawama jwiinö sulijayonö, ökwödönö pjaato jö̧ba̧lö, Cristoma öpöjödökönö mikwawö̧kö̧danö ja̧nö Dios wei̧ ja̧bö midawö woinobe.

⁹ Jejenö ja̧iniökwe, Diosma Cristonö otiwanö kabebö ujuninobe inesö la'aka luwo̧ baibanö, ja̧danö jo̧banö imi imidinobe, okobe jwiinö ju'wi imitjö bajalekwönönö otiwi̧ imima.

¹⁰ Ja̧danö jejenö inesö otiwi̧ imi imidinobetjö̧, Jesús imi a̧ja̧kwö okobe deinö mölejȩbe ju̧kwadöbi, böjȩnö ju̧kwadö ina 'yaba̧ladöbi, wobinadöbi

¹¹ bȩbachibö öwaetjöda yötjawakwedö, Jesucristoma inesö la'aka luwo̧ jö̧ba̧lö, ja̧danö jejenö yötjawi̧ma, öwaetjöda i̧sebakobe, Abe'do Diosma isabenö otiwanö ja̧bo̧ jö̧ba̧lö.

Dabe'do Dios jawa i̧sebö kwö̧jaduwo jö̧ba̧lö Pablo yöawina wene

¹² Jo̧kwajabetjö̧ ökwödönö yötawaja̧danö ja̧bö kwö̧jaduwo chösödawö̧ chömöledö. Isabenö belö ökwödökwö chö̧jayima, ötjö yötawi̧danö ja̧bö kwö̧jinaduwobe chömöledö, ja̧danö ja̧tjö bajalekwönönö babe jelobetjö wȩyudö yötawi̧ ja̧bö kwö̧jaduwo chömöledö. Ja̧danö, Diosnö otiwanö yebabinö ösödö, jwaikwöda Duluwo̧ Dios wei̧ ja̧bö kwö̧jaduwo, Dios kwö̧jibaduwinö ja̧ina kwi̧sebaduwakobetjö̧.

¹³ Jau chömöledö, Diosma ba̧kwȩlö̧jatebö ökwödönö otido̧, jo̧ba ösödi̧danö kwösödaduwakobetjö̧, ja̧danö jo̧ba ösödi̧danö ja̧köbaduwakobetjö̧.

¹⁴ Chömöledö, okobe jwiinö ja̧bö kwö̧jaduwi̧ma, kwo̧'wo̧ sulinö yöa̧lakwawa jwiinö, ja̧danö jwöjwöakwawa jwiinö ja̧bö kwö̧jaduwo,

¹⁵ ökwödöma wene jwiinö, ja̧danö sulabe jwiinö böjȩnö kwö̧jaduwakobetjö̧. Jau chömöledö, ökwödöma sulabedö tjö'da̧detjö, jwaikwöda sulabenö ja̧badö tjö'da̧detjö kwö̧jaduwijayonö, Dios i̧tji̧mu sulabe jwibadö kwö̧jaduwo. Jau chömöledö, wanedö yötawa, böjȩ jojodö tjö'da̧de ja̧nö, ökwödöma dejewa'yu̧ ubi̧danö kwidejataduwo,

¹⁶ jobadönö ja̧kwawa wene i̧sebödanö yöbawö. Jejenö ja̧bö kwö̧jaduwitjö̧ma, Cristo ichakwa̧ möle badekwachenama, yöbawö chotidina chösödakwo̧sa, isabenö 'diinö otidö chö̧jina mikwawinobe jö̧ba̧lö. Jau chömöledö, chotidina mikwawi̧ kwi̧sebaduwobetjö̧, jejenö chösödakwo̧sa.

¹⁷ Jau chömöledö, jwiinö cho̧'wo̧ ösöwanö chö̧jobe ökwödö kwö̧jaduwi̧ omukwatö. Ja̧danö, wanedö yötawa chömöledö: Dios yöawi̧ kwösödaduwi̧ma, Diosnö iyawadanö jo̧be, ja̧danö ökwödönö pjatatemi ö'wö batibitjö̧ma, ja̧ iyawa wame ötjö chökwösobu ebawobedanö ichejekwena. Jo̧kwaijayonö, ö'wö batibitjö̧böbi, Dios yöawi̧ kwösödaduwobetjö̧ chösödena, ja̧danö ökwödökwö cho̧'wo̧ ösöwanö chö̧jena.

¹⁸ Jau chömöledö, ökwödökwö jejenö cho̧'wo̧ ösöwanö chö̧jobe, ja̧danö ökwödöbi ötjökwö kwo̧'wo̧ ösöwanö kwö̧jaduwo chömöledö.

Timoteonö kwiteboduwi Filiposbe i̧'yobö wetocha jö̧ba̧lö Pablo yöawina wene

¹⁹ Chömöledö, Duluwo̧ Jesús ösöditjö̧ma, ja'yubeda lekwajabetjö Timoteonö wetobö chösöda, ökwödö kwiteboduwibe pjabatö i̧'yobö. Jejenö chomukwatobe, kwiteboduwibetjö ȩwa̧jenama, ökwödönö a̧ja̧kwö cho̧'wo̧ ösöwachibanö chö̧jakobetjö̧.

²⁰ Jo̧ba Timoteonöda wetobö jo̧be chömöledö, jelo̧ jo̧bajayo̧ wetakwo̧ deobetjö̧. Jau chömöledö, jo̧ba Timoteoda ötjödanö omukwato̧ma, ja̧danö ökwödönö chösödi̧danö jo̧babi ökwödönö ösödobe.

²¹ Ju'wedö okobe deinö Jesucristo jawa junibö, idöda jawada omukwatadö chömöledö,

²² jo̧kwaijayonö Timoteonö kwöwaisaduwökwe, bakwo̧ iteda abe'dokwö otidaji̧danö, Timoteoma bakobe ötjökwö otiwa jawa wene otidajibo̧ jö̧ba̧lö.

²³ Jo̧kwajabetjö̧, jo̧banö wetobö chösöda chömöledö, ja̧danö ka̧lena chö̧bobetjö latebojobö tupakwö chö̧bojobö chöwaisachibenama, juluwanö Timoteonö wetobö chomukwatobe.

²⁴ Ja̧danö, ju'wibi yötawaduwakwö chömöledö, ötjöbi jobe kwiteboduwibe chi̧'yena. Jau chömöledö, Duluwo̧nö cho̧'wo̧ chöwana̧lobe, ötjöbi jobe chi̧'yobö weakwo̧ jö̧ba̧lö.

Epafrodito mikwo̧ Filiposbe ȩwa̧jakwa̧ Pablo yöawina wene

²⁵ Ja̧danö, Timoteonö wetakwa̧ abönö chöjawo̧ Epafroditonö wetobö jo̧be chömöledö, belö Romatjö kwiteboduwibe ȩwa̧jo jö̧ba̧lö. Jo̧ba Epafroditoma bakobe ötjökwö otidajabe chömöledö, ja̧danö ötjökwö bakobe otiwa jawa wene tjöbeba̧lö usula emawajabe. Jau chömöledö, ötjönö pjaato jö̧ba̧lö weköbinaduwökwema, ötjönö pjabatö ö̧jinobe.

²⁶ Jo̧banö wetobö jö̧ta̧la chömöledö, nöinö ökwödönö edobö o̧'wo̧ tjo̧achobetjö̧. Jau chömöledö ökwödöma Epafrodito ö'wöchi̧ wene kwa̧ja̧kwinaduwobe, ja̧danö jejenö kwa̧ja̧kwaduwiökwe, Epafroditoma o̧'wo̧ tjo̧achobe, ja̧danö nöinö ökwödönö edobö ösödobe chömöledö, chömöledöma ötjönö tjo̧'wo̧ tjo̧achena jö̧ba̧lö.

²⁷ Isabenö kwa̧ja̧kwinaduwadanö ö'wöchinobe chömöledö, ja̧danö ö'wö baibo jö̧a̧linobe, nöinö ö'wöchobetjö̧. Jo̧kwaijayonö Diosma jo̧banö lȩlö̧jinö edö pjaatinobe chömöledö, ja̧danö ötjönöbi lȩlö̧jinö edö Epafroditonö pjaatinobe chömöledö, ö'wö baibitjö̧ ajayinö cho̧'wo̧ tjo̧achi̧tjö bajalekwönönö cho̧'wo̧ tjo̧achapji jö̧ba̧lö.

²⁸ Jo̧kwajabetjö̧ jo̧banö wetobö nöinö chösödajabe chömöledö, jo̧banö yemidanö kwedaduwenama, kwo̧'wo̧ ösöwachibanö kwö̧jaduwakobetjö̧, ja̧danö ötjö cho̧'wo̧ tjo̧achi̧ seachibakobetjö̧.

²⁹ Jo̧kwajabetjö̧, jo̧ba kwiteboduwibe ichibenama, kwo̧'wo̧duwi ösöwachibanö kwösödaduwonö, Duluwo̧nö ösödo̧ dömöledöso̧ jö̧ba̧lö. Ja̧danö jo̧banöbi, jo̧bajayedönöbi otiwanö kwomukwataduwodönö.

³⁰ Jau chömöledö, jo̧ba Epafroditoma, Cristo jawa otidobetjö̧, ö'wö baibo jö̧a̧linobe. Jau chömöledö, ökwödö Filipos jojodöma ötjönö pjakataduwobö jö̧ka̧linaduwijayonö, jelobe kwö̧jaduwobetjö̧, jo̧banöda weköbinaduwobe, kwimiduwinö ötjönö pjaato jö̧ba̧lö. Ja̧danö, ja̧ weköbaduwi̧ otidobetjö̧ ö'wö baibo jö̧a̧linobe, jo̧kwajabetjö̧ jo̧banö otiwanö kwomukwataduwonö chömöledö.