Filipenses 1 - Dios Iwene

Pablo Filipos jojodönö iwȩyudina'yetjö ajayi jawa

¹ Ötjö Pablobi, Timoteobi Cristo Jesús ömöayedösa, ja̧danö Timoteokwö ja̧nö böja kwialusöja wetaduwakwö, okobe deinö ökwödö Filipos comunidadtjö Dios ömöledö Cristo Jesúskwö dötewadönö, ja̧danö ökwödötjö Jesúsnö ösödadönö te'ada̧lakwawa luwedönöbi, pjaatakwawa luwedönöbi.

² Dabe'do Diosbi, Duluwo̧ Jesucristobi ökwödönö lȩlö̧jinö tjedobö dösöda, ja̧danö kwo̧'wo̧ luwo̧ ösöwachibanö pjatjatobö dösöda.

Diosnö atebobe ökwödönö jö̧ba̧lö Pablo yöawina wene

³ Chömöledö, ba̧kwȩlö̧jatebö ökwödönö chomukwatenama, Chuluwo̧ Diosnö ösödö atebobe, jwiinö otiwa jö̧ba̧lö.

^4-5 Jau chömöledö, ajayinö Jesúsnö kwösödinaduwelö baikwöma, ba̧kwȩlö̧jatebö otiwa jawa wene yötawobö otiwanö pjakatinaduwobe. Jo̧kwajabetjö̧, ba̧kwȩlö̧jatebö Diosnö atebenama, cho̧'wo̧ ösöwanö atebobe ökwödönö.

⁶ Jau chömöledö, Diosda ökwödönö otiwa jawa kwo̧'wo̧ luwo̧duwi jawa jamatö otidinama, ¿jö̧tö? Ja̧danö chöwaisa, jamatö otidina jawama, Diosma okobe jwiinö otidö kaatakobe jö̧ba̧lö. Ja̧danö, Jesucristo yemidanö ichakwa̧ möle baibenama ja̧ okobe jwiinö kwo̧'wo̧ luwo̧duwinö otidi̧ma kaatakwawakobe chömöledö.

⁷ Jejenö ökwödönö ösödö chomukwatobö jwea chömöledö, ökwödönö jwiinö chösödobetjö̧, ja̧danö Dios otiwa jawa iyi̧ bakobe emiadinobetjö̧. Jau chömöledö, ka̧lena chö̧benama bakobe Dios iyi̧tjö emiadinobe, ja̧danö biya̧da isabenö wene jö̧ba̧lö otiwa jawa wene tjöbeba̧lö chite'ada̧lenabi, bakobe Dios iyi̧tjö demobe chömöledö.

⁸ Jau chömöledö, isabenö ökwödönö chösödaduwakwö. Isabenö chösödi̧ edö waiso̧ma Diosda, Cristo Jesús ökwödönö ösödi̧danö chösödaduwakwö jö̧ba̧lö.

⁹ Diosnö atebobe ökwödönö chömöledö, kwömöledöduwinö kwösödabikwawaduwi̧ tupakwö nöachobö, ja̧danö isabenö waisakwawa kwöwaisaduwobö, ja̧danö waisanö edö kwomukwataduwobö atebobe ökwödönö.

^10-11 Jejenö atebobe chömöledö, isabenö otiwi̧ jawa kwösödaduwakobetjö̧. Jo̧kwajabetjö̧, iya̧da möle Cristo yemidanö ichakwa̧ möle badekwachenama, bakwainö sulabe jwiinö, ja̧danö wene jwiinö kwö̧jaduwakobe, ja̧danö Jesucristoma ökwödönö sulabe jwibadö bakibaduwanö ja̧inobetjö̧, otiwanö ja̧bö kwö̧jaduwakobe. Ja̧danö chömöledö, jejenö kwö̧jaduwobetjö̧, Diosnö otiwanö tjomukwatakobe, ja̧danö jo̧banö ösödö yötja̧lakobe chömöledö.

Jwaikwöda Jesúsnö ösödö chö̧jobe jö̧ba̧lö Pablo yöawina wene

¹² Kwöwaisaduwobö jö̧ta̧la chömöledö, ka̧lena ba̧nö chö̧ji̧ma, isabenö pjaatobe ba̧jekwadö otiwa jawa wene tja̧ja̧kwo jö̧ba̧lö. Ja̧danö, ajayinö a̧ja̧kwinadötjö bajalekwönönö ba̧jekwadö jojodöma otiwa jawa wene tja̧ja̧kwobe babema.

¹³ Jo̧kwajabetjö̧ babema okobe deinö inesö la'aka luwo̧ ejutjö ju̧kwadö guardia jojodöbi, ju'wedöbi, okobe deinö tjöwaisobe, Cristo ömöayo̧chobetjö̧, ka̧lena chö̧bobe jö̧ba̧lö.

¹⁴ Ja̧danö ju'wibi, ötjöma ka̧lena chö̧bobetjö̧, ba̧jekwadö Jesúsnö ösödadöma tjujuluwachibobedanö ichejekwa Jesúsnö tjösödi̧ma, ja̧danö ajayitjö bajalekwönönö yebabökönö Dios iwene yöbawö tjö̧jobe.

¹⁵ Isabenö yöta̧la chömöledö, yöbawadötjö ju'wedöma ötjönö ö'wiawinö tjedobetjö̧, ja̧danö ötjönö tjölakwabikwawobö tjomukwatobetjö̧ Cristo midawö woina wene yötjawobe. Jo̧kwaijayonö ju'wedöma otiwanö ösödanö omukwatö yötjawobe.

¹⁶ Jobadö ötjönö ösödanö omukwatö Cristo midawö woina wene yöbawadöma, ötjönö ösödö yötjawobe. Jau chömöledö, jobadöma tjöwaisobe, Diosma Pablonö ujuninobe, otiwa jawa wene tjöbeba̧lö te'ada̧lo̧ baibanö jö̧ba̧lö, ja̧danö ötjökwö otidö pjatjatotö jö̧ba̧lö yötjawobe.

¹⁷ Jo̧kwaijayonö ötjönö öpöjödö yöbawadöma, Cristo midawö woina wene yötjawijayonö, sulabenö omukwatö, idöda tjemotö jö̧ba̧lö yötjawobe. Ja̧danö, ötjönö suli̧ tjöwaedotö jö̧ba̧lö Cristo midawö woina wene yötjawobe, Aaa, ökwödöda yödawitjö̧ma Pabloma o̧'wo̧ tjo̧achena, ja̧danö ka̧lena ba̧nö usula emawi̧tjö bajalekwönönö usula emawena, jö̧ba̧lö.

¹⁸ Jo̧kwaijayonö, sulabenö omukwatö yötjawijayonö cho̧'wo̧ ösöwanö chö̧jobe, jojodö Cristo midawö woina wene tja̧ja̧kwobe jö̧ba̧lö. Jau chömöledö, sulabenö omukwatö yötjawitjö̧bi, otiwanö omukwatö yötjawitjö̧bi, Cristonö yötjawobetjö̧ cho̧'wo̧ ösöwanö chö̧jobe. Jau chömöledö babebi, tupakwöbi cho̧'wo̧ ösöwanö chö̧jobe chömöledö.

¹⁹ Jejenö cho̧'wo̧ ösöwanö chö̧jobe chömöledö, chöwaisobetjö̧, ökwödö ötjönö Diosnö akebaduwobetjö̧, ja̧danö Jesucristo O̧'wo̧ Luwo̧ pjaatobetjö̧, Diosma ka̧lena chö̧bobetjö chö̧jibinö pjaatakwo̧ jö̧ba̧lö.

^20-21 Inesö jwaikwöda chösödi̧ma biya̧ chömöledö, la'akatjöda tabakwö chö̧jökena jö̧ba̧lö. Jau chömöledö, babebi, tupakwöbi ba̧kwȩlö̧jatebö yebabökönö chö̧jobö chösöda, ötjö ja̧bö chö̧ji̧ edinö jojodö otiwanö Cristonö tjomukwatobö. Jau chömöledö, ötjö böjȩnö chö̧ji̧ma, Cristo ösödi̧ ja̧totö jö̧ba̧lö chö̧jobe, ja̧danö ö'wö batibaja̧ ikenama, o̧penönö otiwakobe. Jo̧kwajabetjö̧ chö̧jitjö̧bi, wotitjö̧bi, bakweminö otiwanö Cristonö tjomukwatinö ja̧tobö chösöda.

²² Ina böjȩnö chö̧jitjö̧ma, ina yadakwö otiwanö chotidakobe chömöledö, jo̧kwaijayonö ja̧kwawatjöbi, woawatjöbi diya̧tjö chomudawakwajö jö̧ba̧löma wajwita chömöledö, dötölataja jawa chomukwatobetjö̧.

²³ Dötölataja jawa chomukwatobetjö̧, chomukwati̧ biya̧ chömöledö, baikwö yötawa: Inesö chösödi̧ma ö'wö babibö, mölejȩbe Cristokwö chö̧jobö chömöledö, ja̧da inesö otiwi̧ma.

²⁴ Jo̧kwaijayonö ökwödönö tupakwö pjatato jö̧ba̧lö, ina böjȩnö chö̧jobö otiwena jö̧ba̧lö chomukwatobe.

²⁵ Jau chömöledö, tupakwö ökwödönö pjatatobö otiwena, jo̧kwajabetjö̧ baikwö chöwaisa chömöledö, tupakwö Cristonö ösödö kwö̧jaduwi̧ kwöda̧peachaduwo jö̧ba̧lö, ja̧danö kwo̧'wo̧ luwo̧ ösöwachibanö kwö̧jaduwo jö̧ba̧lö, ina böjȩnö chö̧jakobe jö̧ba̧lö.

²⁶ Jejenö ina böjȩnö chö̧jakobe chömöledö, ökwödökwö yemidanö chö̧jenama, ökwödökwö chö̧jobetjö̧ tupakwö Cristo Jesúsnö otiwanö kwomukwataduwakobetjö̧.

Dios i̧tji̧mu otiwanö ja̧bö tjö̧ji̧danö ja̧bö kwö̧jaduwo jö̧ba̧lö Pablo yöawina wene

²⁷ Chömöledö, baikwö wetaduwakwö: Ba̧kwȩlö̧jatebö otiwa jawa wene ösödadö otiwanö ja̧bö tjö̧ji̧danö ja̧bö kwö̧jaduwo chömöledö, ökwödökwö chö̧jitjö̧bi, detitjö̧bi ökwödönö yötjawi̧ cha̧ja̧kwakobetjö̧: Filipos jojodöma bakwainö ösödö 'diinö pjolachibökönö ju̧kwadötö jö̧ba̧lö, ja̧danö biya̧da isabenö wene jö̧ba̧lö, bakwainö omukwatö bakobe otiwa jawa wene tjöbeba̧lö ju̧kwadötö jö̧ba̧lö cha̧ja̧kwakobetjö̧.

²⁸ Ja̧danö kwöpöjojodöduwinö yebabökönö ju̧kwaduwi chömöledö, ja̧danö jejenö yebabökönö kwö̧jaduwi̧ma kwöpöjojodönö i̧sebakobe, Dios jobadönö söbebö loakwa̧ma, ja̧danö Dios ökwödö kwö̧jibaduwinö ja̧akwa̧ wenebi jobadönö i̧sebakobe.

²⁹ Jau chömöledö, Diosma otiwa jawa ökwödönö iyinobe, Cristonö kwösödaduwo jö̧ba̧lö iyinobe, ¿jö̧tö? Jo̧kwaijayonö sule ja̧damaökö chömöledö, ju'wibi otiwa jawa ökwödönö iyinobe, Cristo jawa otidö kwö̧jaduwobetjö̧, usula kwemawaduwoböbi iyinobe.

³⁰ Jau chömöledö, ökwödökwö chö̧jayi kwedinaduwadanö, ja̧danö babe usula emawö chö̧ji̧ wene kwa̧ja̧kwaduwi̧danö, babema ökwödöbi usula emawö Cristo jawa wene te'ada̧lö otiwanö ölakwabikwawö kwö̧jaduwobe.