Filemón 1 - Dios Iwene

Dokwa jö̧ba̧lö Pablo iwȩyudina wene

¹ Ötjö böja kwialusöja webo̧ma Pablosa, Cristo Jesús wei̧ ja̧bö chö̧jobetjö̧ ka̧lena bo̧sa. Döjawo̧ Timoteokwö ja̧nö böja kwialusöja wȩyudö wetaduwakwö dösödökwe ökwödökwö bakobe otido̧ Filemón mikwo̧nöbi,

² dömöledösuju Apia mikwujunöbi, ökwödökwö Duluwo̧ yöawi̧ yöbawö otido̧ Arquipo mikwo̧nöbi, ju'wedö Jesúsnö ösödadötjö Filemón ejunö ba̧nö ko̧ko̧kwadönöbi.

³ Dabe'do Diosbi, Duluwo̧ Jesucristobi ökwödönö lȩlö̧jinö tjedobö chösöda, wene jwiinö kwö̧jaduwobö.

Ökwönö omukwatö Diosnö ösödö ateba jö̧ba̧lö Pablo Filemónnö yöawina wene

^4-5 Filemón, ökwönö otiwanö cha̧ja̧kwajabe, isabenö otiwanö Duluwo̧ Jesúsnö ösödö kwö̧ji̧bi, jo̧ba yöawi̧ ösödö kwö̧ji̧bi, ja̧danö isabenö okobe deinö dömöledö Jesúsnö ösödadönö ösödö kwö̧ji̧bi. Ja̧danö, jejenö cha̧ja̧kwobetjö̧ kabatökönö ökwönö omukwatö Diosnö atebenama, ökwönö ösödö atebobe, Isabenö otiwanö pjakatajabe, jö̧ba̧lö Diosnö atebobe.

⁶ Ja̧danö, ju'wibi ateba Dios ökwönö pjaatobö Filemón, bakobe Jesúsnö ösödö dö̧jonö, tupakwönönö Cristokwö dötewanö ja̧nö inesö otiwanö do̧'wo̧ luwo̧ jawa dujuna̧li̧ kwöwaisachibobö, Dios inesö otiwanö ökwödönö iyi̧ma.

⁷ Jau Filemón, isabenö Dios ömöledö tjo̧'wo̧ ösöwachibanö pjakatajabe, ja̧danö jejenö pjakatobetjö̧ ötjönöbi pjakatajabedanö ichejekwa, ötjöbi cho̧'wo̧ ösöwachibanö, ja̧danö ötjöbi cho̧'wo̧ luwo̧ ujuluwachibanö. Ja̧danö, jejenö pjakataja̧ omukwatö, Diosnö ösödö atebobe, balekwa mikwa ökwönöbi pjaatobö.

Onésimonö kwösödobö ateba jö̧ba̧lö Pablo aebina wene

⁸ Ja̧danö, ösödabikwawö kwö̧ji̧ chöwaisobetjö̧, ökwönö atebobö jö̧ta̧la Filemón, ötjönö pjakatobö. Isabenö Cristo webawo̧ batibanö Dios ötjönö 'da̧batö ujuninobetjö̧, kwuluwo̧danöbo̧sa, ja̧danö ökwönö abebökönö weböda ökwönö wetobö jȩna, ¿jö̧tö?

⁹ Jo̧kwaijayonö bakobe ösödabikwawö dö̧jobetjö̧ webökönö abeböda atebakwö. Baikwö atebakwö: Ötjö Pabloma ida̧ökö pöe ja̧nö, ja̧danö Cristo Jesúsnö chösödobetjö̧ ka̧lena ba̧nö,

¹⁰ atebakwö chitji̧danö chösödökwe Onésimonö. Jau Filemón, ka̧lena ba̧nö, Onésimo abe'dodanö batibijatö, ötjönötjö Jesúsnö ösödo̧ baibinobetjö̧, ja̧danö abe'dodanö ja̧nö atebakwö jo̧banö.

¹¹ Jo̧ba Onésimonö kwöwaisökwe Filemón, jo̧bama ökwöda midö kweminökwe kwömöayo̧obetjö̧. Isabenö ajayinöma kwömöayo̧ sulabo̧ ö̧jinobe Onésimoma, jo̧kwaijayonö sulabö̧kö̧ babema, isabenö ötjönöbi mikwawo̧ baibajabe, ja̧danö ökwönöbi mikwawo̧ baibajabe.

^12-14 Kwöwaisa Filemón ötjö chö̧ji̧ma, otiwa jawa wene yötawobetjö̧, ka̧lena ba̧nö usula emawo̧sa, ¿jö̧tö? Ja̧danö, ka̧lena chö̧bobetjö̧, ökwödöma ötjönö pjakataduwobö kwösödaduwobe, usula chemawi̧ ösöwachibanö, ¿jö̧tö? Jejenö ökwö pjakatobö jö̧ka̧linama, kwömöayo̧ Onésimoda otiwanö pjaatinobe ötjönö, Filemón, ja̧danö tupakwö ötjökwö ja̧nö pjaatobö chösödena. Jo̧kwaijayonö, jejenö chösödijayonö, chöwaisa, Onésimo bai ötjökwö ö̧ji̧ma ökwö weköbi̧ otidobetjö̧ bai ö̧jokobe, weköbi̧tjö döibajinobetjö̧ bai ö̧jobe jö̧ba̧lö. Isabenö ötjönö pjakatobö chösöda Filemón, ja̧danö kwömöayo̧ Onésimonötjö ötjönö pjakatobö kwösöditjö̧ma chösödena chömöledöso̧. Ja̧danö chöwaisa, ökwönö wetitjö̧ma: Onésimo ötjönö pjaatobö webi jö̧ba̧lö wetitjö̧ma, isabenö otiwanö weti̧ a̧ja̧kwö Onésimo ötjönö pjaatobö weköbena, jo̧kwaijayonö jejenö wetoböma chöpöjöda. Jau Filemón, isabenö pjakatobö chösöda, jo̧kwaijayonö sule ötjö wetökweda pjakatobömaökö, ökwöda pjakatobö kwösödobetjö̧ pjakatobö chösöda. Jejenö chomukwatobe Filemón, ja̧danö jejenö chomukwatobetjö̧, chitji̧danö jwiinö chösödökwe Onésimonö wetajabe, kwö̧jobekwö ȩwa̧jobö.

¹⁵ Jau Filemón, isabenö Onésimo ötjökwöda ö̧jobö chösödijayonö, chomukwatobe, Aaa, Dios ösödena, Onésimoma Filemónkwö ö̧jobö, jö̧ba̧lö. Ja̧danö jejenö omukwatö kwö̧jobekwö ȩwa̧jobö wetajabe. Jau Filemón, Dios Onésimo ötjökwö ö̧jobö weinama, ötjökwö lekwe ö̧joböma weinökena, sule ötjökwö ja̧nö Jesúsnö ösödobö weinena, jemi tupakwö Jesúsnö ösödo̧ ja̧nö ba̧kwȩlö̧jatebö ökwökwö ö̧jakobetjö̧.

¹⁶ Jo̧ba Onésimonö baikwö yöta̧la: Belö weköbi̧tjö döbibajö laebinenama, kwömöayo̧da ja̧nö döbibajö laebinobe, ¿jö̧tö? Jo̧kwaijayonö babe, yemidanö ȩwa̧jenama, sule kwömöayo̧dama jö̧kö̧ babema, ju'wibi dösödökwe döjawo̧ ö̧jobe babema. Jau Filemón, isabenö chöjawo̧ chösödökwe Onésimonöma, ja̧danö ja̧tjö bajalekwönönö isabenö mikwawo̧ ökwönö, böjȩtjö midö kweminökwe kwömöayo̧bi ö̧jobetjö̧, ja̧danö ju'wibi Duluwo̧kwö dötewanö ja̧nö kwöjawo̧bi ö̧jobetjö̧.

¹⁷ Isabenö jo̧banö kwösödobö jo̧be Filemón, baikwö yötawa: Ötjö Pablonö omukwatö, Pablokwö bakobe otido̧sa jö̧ba̧lö ötjönö kwösöditjö̧ma, jo̧banöbi kwösödo, bitema Pablodanö jo̧ jö̧ba̧lö.

¹⁸ Ja̧danö, ökwönö sulabenö ja̧inatjö̧böbi, ökwönö umusiditjö̧böbi, ötjö Pabloda chumusidi baibanö wȩyudö kwödo, ötjöda chimidobö.

¹⁹ Jau Filemón, ötjö Pabloma ötjö chömamunöda baikwö chiwȩyuda: Onésimo ökwönö umusiditjö̧ma ötjödada jo̧ba umusidi chimidocha jö̧ba̧lö. Kwöwaisa Filemón, ökwöda ötjö Pablonö kwumusido jö̧ka̧lena, ötjödasa ji̧kwa wene yöbawö ökwönö kwö̧jibobö pjabatinachobetjö̧, ¿jö̧tö? Jo̧kwaijayonö ökwöda ötjönö kwumusido jö̧ka̧lijayonö, yayonö yöta̧la, Onésimo ökwönö umusiditjö̧ma ötjöda chimidocha jö̧ba̧lö.

²⁰ Jau chöjawo̧ Filemón, bakobe Duluwo̧nö ösödadö dö̧jobetjö̧, ötjönö pjakatobö chösöda, baikwö yötawa: Atebaja̧danö chitji̧danö chösödökwe Onésimonö kwösöditjö̧ma, Cristokwö dötewanö ja̧nö jwiinö cho̧'wo̧ luwo̧ ösöwachibanö chö̧jakobe. Jo̧kwajabetjö̧ jejenö cho̧'wo̧ luwo̧ ösöwachibobö pjakatobö atebakwö.

²¹ Ökwönö chöwaisökweja Filemón, isabenö atebi̧danö otiwanö ja̧bo̧ja jö̧ba̧lö, ja̧danö jejenö chöwaisobetjö̧ ökwönö chiwȩyudajabe, isabenö Filemónma atebaja̧danö otiwanö ja̧akwo̧ jö̧ba̧lö, ja̧danö isabenö atebaja̧tjö bajalekwönönöbi otiwanö ja̧akwo̧ jö̧ba̧lö.

²² Ja̧danö, ja̧ atebaja̧ jawakwö, ju'wibi atebakwö Filemón, ötjö jobe chabakwȩko̧bi kwotidobö ateba. Jau Filemón, chöwaisa, ökwödöma ida̧ökö Diosnö abebadöja ötjönö. Ja̧danö jejenö akebaduwitjö̧, Diosnö cho̧'wo̧ chöwana̧lobe, isabenö akebaduwi̧danö ka̧lena chö̧bi̧tjö labebö, kwö̧jaduwobekwö tjetachajobö Dios weakobe jö̧ba̧lö. Ja̧danö, jejenö cho̧'wo̧ chöwana̧lobetjö̧, jobe chabakwȩko̧ kwotidobö atebakwö.

Pablo bajaleapo yöawina wene

²³ Epafras mikwo̧ma Cristo Jesús wei̧ otidobetjö̧ bakobe ötjökwö ka̧lena ö̧bobe baima, ja̧danö jo̧bama deawobedanö dokwa aebobe ökwödönö.

²⁴ Ja̧danö, ötjökwö otidadö Marcos mikwo̧bi, Aristarco mikwo̧bi, Demas mikwo̧bi, Lucas mikwo̧bi detjawobedanö dokwa atjebobe ökwödönö.

²⁵ Duluwo̧ Jesucristo kwo̧'wo̧ luwo̧duwinö lȩlö̧jinö edobö chösöda chömöledö. Biya̧data.