Éxodo 9 - Dios Iwene

Isabenö Jo̧ domulataja lȩebi̧ jawa weinatjö bakwamu lȩebina jawa, Egipto jojodö tja̧ji̧kwakwawedönö wotjobö webö

¹ Ja̧danö, ma̧tu̧lȩ debi batjibaja̧ ikena Isabenö Jo̧ma Moisésnö webijetö: —Moisés, faraón o̧bobekwö yemidanö 'yawi yökawo ötjö jo̧banö weti̧ma, baikwö: Isabenö Jo̧ma ökwönö baikwö weobe: Chömöledönö kabatakwawi ötjönö ösödö iyö tji̧'yo.

² Jobadönö ina latjebokobö kaatakwawökötjö̧ma

³ ¡ayö! ötjö chujulu i̧sebö lȩtebocha. Jejenö chujulu i̧sebö tja̧jwi̧mu̧nö pa̧ka̧yö̧nö, bu̧lu̧dönö, ka̧ba̧yu̧dönö, ka̧mȩyu̧nö o̧bȩja̧dönö jwiinö juluwi̧ jawa tjö'wöchinö baibanö wetocha wotjawobö.

⁴ Jo̧kwijayonö Egipto jojodö tja̧jwi̧munö wotjawijayonö Israel jojodö tja̧jwi̧munöma wainö chujunocha bakwo̧bi woökakobetjö̧ Israel jojodö tja̧jwi̧mu̧tjö̧. Moisés, jejenö faraónnö yökawo— jejenö webijetö Isabenö Jo̧ma Moisésnöma.

⁵ Ja̧danö, itekwayi jejenö baledobö wetocha, jö̧ba̧lö yöbawijetö Isabenö Jo̧ma Moisésnöma.

⁶ Ja̧danö ju'wi dewachö Isabenö Jo̧ weo jö̧a̧laja̧danö baledijetö. Egipto jojodö tja̧jwi̧mu̧ma ba̧jȩkwadö wobawijadötö. Jo̧kwaijayonö Israel jojodö tja̧jwi̧mu̧tjö̧ bakwo̧bi wobijökötö.

⁷ Ja̧danö, Egipto jojodö tja̧jwi̧mu ba̧jekwadö wotjawiökwe faraónma webijetö ömöayedönö Israel jojodö tjö̧jobekwö tjedajobö. Tjedemi ¡ayö! Israel jojodö tja̧jwi̧mu̧tjö bakwo̧bi wobijökötö. Ȩwa̧jö faraónnö yötjawijayonö ina omajade dibo̧nöda ji̧jetö, Israel jojodönö latjebobö webökönö.

Isabenö Jo̧ domulataja lȩebi̧ jawa weinatjö jelemutjö bakwöta jawa lȩebina jawa, Egipto jojodö tji̧sȩdonö tutiyubiya saduwaibanö webö

⁸ Jemi ikenama Isabenö Jo̧ma Aarónnö Moisésnö webijetö: —Letiyatjö otikwa'o juwawelö ökwöla so̧pja kwömamijuduwinö kwuyudebaduwo. Yudebajadö faraón ö̧bobekwö kwi̧'yaduwo. Jobe ja̧nö, faraón eda̧lonö Moisés, ökwöma jo̧pja̧ma möakwö kwikwo.

⁹ Jopja̧ möakwö kwikwena okobe jwiinö Egiptonö meakobe. Ja̧danö, jojodö tji̧sȩdo̧nö, tja̧jwi̧mu̧ tji̧sȩdo̧nö wamatajawö̧nöma tutiyubiyada saduwaibakobe, okobe jwiinö Egiptonö— webijetö Isabenö Jo̧ma Aarónnö, Moisésnö.

¹⁰ Jejenö weawö̧ Moisés, Aarón letiyatjö otikwa'o juwawelö ökwöla i̧so̧pja̧ yudeibö faraón ö̧bobekwö 'ya̧jadö jo̧pja̧ möakwö ikwijetö Moisésma, faraón eda̧lonö. Jo̧pja̧ tji̧sȩdo̧nö mebibö wamatajawö̧nöma tutiyubiyada saduwaibijetö, jojodönöbi, tja̧jwi̧mu̧nöbi.

¹¹ Ja̧danö, mea boawa waisadö tji̧yȩdo̧nöbi ju'wedö Egipto jojodödanö tutiyubiyada saduwaibijetö. Jo̧kwaobetjö̧ Moisés ö̧jobekwö idöda tjujulu i̧sebö tji̧'yo jö̧tja̧lijayonö 'yi̧jöködötö.

¹² Jejenö baledijayonö Isabenö Jo̧ma faraón omajade 'diinö weobetjö̧ a̧ja̧kwijökötö Aarón Moisés yötjawi̧ma. Isabenö Jo̧ Moisésnö, a̧ja̧kwökakobe, jö̧ba̧lö yöa̧linadanö a̧ja̧kwijökötö faraónma.

Isabenö Jo̧ domulataja lȩebi̧ jawa weinatjö jelemutjö dötölataja jawa lȩebina jawa, ojwiyo o̧bi̧danö tiyuwi̧ ö̧wi̧ya̧ mölejebetjö labinö tjoduwinö webö

¹³ Ikenama Isabenö Jo̧ma Moisésnö webijetö: —Itekwayi yȩayi wilubö faraón ö̧bobekwö 'ya̧nö yökawo ötjö weti̧ma, baikwö: Isabenö Jo̧ma ökwönö baikwö weobe: Chömöledönö kakatakwawo ötjönö ösödö iyö tji̧'yo, jö̧ba̧lö.

¹⁴ Jobadönö ina latjebokobö kakatakwawökötjö̧ma babema jwiinö lȩtebocha ökwönöma. Ja̧danö, kwömöayedönödamakö̧, kwömöledönödamakö̧ ökwönödabi jwiinö lȩtebocha kwöwaisachibobö, böjenöma Isabenö Jo̧dajayo̧ma deobe, jö̧ba̧lö— Jejenö yökawonö, Moisés. Ina yökawo:

¹⁵ Isabenö Jo̧ yöawobe ökwönö: Ötjöma ida̧ökö ökwödönö jwiinö kwö'wöchaduwi̧ma weto jö̧ta̧litjö̧ma wetochinobe, okobe deinö kwö'wöchaduwinö söbebö lobö.

¹⁶ Jo̧kwaijayonö 'yaka̧laduwinöda wetijatö chujulu chi̧sebi̧ma kwedaduwobö, ja̧danö böjenö ju̧kwadöma, okobe jwiinö böjenö tjöwaisachibakobetjö̧, Isabenö Jo̧ma jwiinö juluwo̧, jö̧ba̧lö.

¹⁷ Farónma, ökwöma ina ökwöda kwösödi̧da omukwatö labinö webo̧ja chömöledönöma, latjebobö öpöjödö.

¹⁸ ¡A̧ja̧kwitjö! Jejenö chömöledönö latjebobö kakatakwawokobetjö̧ itekwayi babedajayena mölejebetjö ojwiyo o̧bi̧danö tiyuwi̧ ö̧wi̧ya̧ Egiptonö jwiinö labinö tjoduwima wetocha. Jejenö itekwayi jwiinö labinö tiyuwi̧ inawi̧ya̧ tjoduwakwa̧danö la'akatjöda tjoduwinokobe. Egiptoma ajayinö tjö̧jinelö babe baibanö jejenö tjoduwi̧ma edaitjökö.

¹⁹ Jo̧kwaobetjö̧ faraón, okobe deinö jojodönö weköbo tja̧jwi̧mu̧nö öbibö tetjatobö o̧do okwa, ja̧danö okobe jwiinö apetube tjujunina jawa tjiteabi tetjatobö. Tiyuwi̧ ö̧wi̧ya̧ma tjoduwena okobe deinö tja̧jwi̧mu̧nö apetube ju̧kwadönö wotjinö, ja̧danö okobe jwiinö apetube tjujunina jawa söbebö loinö labinö tjoduwakobe. Jejenö yökawo faraónnö, Moisés— Jejenö webijetö Isabenö Jo̧ma Moisésnöma. Jejenö weökwe yöbawijetö, Isabenö Jo̧ weaja̧danö.

²⁰ Ja̧danö faraón ipjea ömöayedötjö ju'wedöma Moisés yöawi̧ a̧ja̧kwö yebabijadötö, bite yöawi̧ma Isabenö Jo̧ yöawi̧, jö̧ba̧lö. Da̧ja̧kwobö jo̧be, jö̧ba̧lö, yebabijadötö. Jo̧kwaobetjö̧ tetjachobö webijadötö tjömöayedönö, ja̧danö tja̧jwi̧munöbi öbibö tebatijadötö.

²¹ Jo̧kwaijayonö ju'wedöma Isabenö Jo̧ weaja̧danö a̧ja̧kwökönö tjömöayedönöbi tja̧jwi̧mu̧nöbi tebatijöködötö o̧do okwama, mejebeda junibö.

²² Ikenama Isabenö Jo̧ma Moisésnö webijetö: — Kwömamiju möakwö kabebö i̧sebi mölejebetjö ojwiyo o̧bi̧danö inawi̧ya̧ tiyuwi̧ öwi̧ya̧ tjoduwo okobe jwiinö Egiptonö, jojodönöbi tja̧jwi̧mu̧nöbi okobe jwiinö pokwi̧bi— webijetö.

²³ Weökwe Moisésma otokwa'o do̧ba̧lö ömamiju kabebö i̧sebemi Isabenö Jo̧ma webijetö mölejebetjö böjekwö ojwiyo o̧bi̧danö inawi̧ya̧ tjoduwi̧nö. Ja̧danö böbabi webijetö Isabenö Jo̧ma, ja̧danö, böba nei̧bi webijetö bö̧jekwö labinö kwaawinö.

²⁴ Inawi̧ya̧ tiyuwi̧ ö̧wi̧ya̧ labinö tjoduwonö böbabi kwabawijetö, ja̧danö böbama nei̧bi kwabawijetö, kabatökönö. La'akatjöda baledaijö̧kö̧ jejenö tjoduwi̧ma Egipto nijinö ajayinö tjö̧jinemitjö̧ babe baibanö.

²⁵ Okobe jwiinö Egiptonö tjoduwijetö inawi̧ya̧ tiyuwi̧ ö̧wi̧ya̧ma. Mejebe ju̧kwadönöma jojodönöbi tja̧jwi̧mu̧nöbi labinö tjoduwijetö. Ja̧danö, okobe jwiinö mejenö pokwi̧nö tjoduwijetö woawinö, ja̧danö towibiyabi solachakwawinö labinö tjoduwijetö.

²⁶ Sule Israel jojodö tjuju̧kwemida, Gosén nijinöda tjoduwijökötö.

²⁷ Ikenama faraónma jwöbijetö Moisésnö Aarónnö tjichobö. Ichajadönö jö̧ba̧lijetö: —Babema yöta̧lakwö: Jweinö chomukwatokobe. Isabenö Jo̧ma jweinö omukwatö lȩebonö ötjö, chömöledö jelobekwö domukwatobe, Israel jojodönö latjebobö wedökö, jö̧ba̧lö.

²⁸ ¡Ayö, Isabenö Jo̧ ökwödönö lȩebi̧ma do̧'wo 'dibachibö dö̧jökenanö. Abebinö tjoduwi̧bi, böbanöbi weökönö. Kaatakwawena wetocha betjö lakebaduwobö, benada Egiptonö kwö̧jaduwokobö— jö̧ba̧lijetö faraónma.

²⁹ Jejenö jö̧a̧lökwe jöba̧lijetö Moisésma: —Jao kwatjö̧ma, bemi comunidadtjö atebena chömamiju mölejebekwö kabebö Isabenö Jo̧nö atebocha. Ikenama böba kwaawökönöbi, ja̧danö, inawi̧ya̧ tjoduwökönöbi baibakobe. Jejenö baibena kwöwaisachibakobe: Bö̧jenö baledi̧ma Isabenö Jo̧ Diosda wei̧, jojodö ösödö wetji̧makö, jö̧ba̧lö.

³⁰ Jo̧kwaijayonö ökwönö, kwipjea jojodö kwömöayedönöbi chöwaisa: ina yekaibaduwökökwe Isabenö Jo̧nö, ökwödö Dösödökwe Diosnöma.

³¹ Ja̧ mölema, jejenö labinö tjoduwobetjö̧ Egipto jojodö batjonö tjujunina lino mikwi̧, o̧bubiya o̧buawi bo̧inama okobe jwiinö wobö loijetö. Ja̧danö, ju'wi tjujuninabi, cebada mikwi̧ma ochobiya ju̧kwachinama okobe jwiinö wobö loijetö labinö tjuduwobetjö̧.

³² Jo̧kwaijayonö tjujuninatjö̧ ja'yubeda woijökötö, sule trigoda, cetenoda, i̧ya̧nö pokwobetjö̧.

³³ Ja̧danö, Moisés faraón ö̧jelö labebö jemi comunidadtjö labebijetö. Lababajo̧ ömamiju mölejebekwö kabebö i̧seba̧lö Isabenö Jo̧nö abebijetö böbanö, inawiyadanö ichejekwi̧ tjoduwi̧ weokobö. Jejenö aebemi böbabi, inawiyadanö ichekwi̧ tjoduwi̧bi jwiinö baibijetö. Ojwiyo o̧bi̧bi o̧bijökötö jobema.

³⁴ Ikenama faraónma jejenö ojwiyo o̧bökönö, böba kwaökönö, inawiyadanö ichekwi̧ tjoduwökönö baibajabe edö, tjo̧wi̧ baibajabe, jö̧ba̧lö yemidanö jelobekwö omukwatö öpöjödijetö. Jo̧babi, ipjea ömöayedöbi ina tjomajade 'diinö ji̧jadötö.

³⁵ Ja̧danö, faraónma omajade 'diinö ö̧jobetjö̧ webijökötö Israel jojodönö latjebobö. Isabenö Jo̧ Moisésnö yöawinadanö faraónma öpöjödijetö, Israel jojodönö latjebobö webökönö.