Éxodo 8 - Dios Iwene

Isabenö Jo̧ domulataja lȩebi̧ jawa weinatjö dötölataja lȩebina jawa, jwo̧i̧dönö webö

¹ Ikenama Isabenö Jo̧ma Moisésnö webijetö: —Moisés, faraón ö̧bobekwö 'ya̧wi yökawo ötjö jo̧banö weti̧ma, baikwö: Isabenö Jo̧ma ökwönö baikwö weobe: Chömöledönö kabatakwawi ötjönö ösödö iyö tji̧'yo.

² Kakatakwawökötjö̧ma ¡ayö! ötjö chujulu i̧sebö lȩtebokwöcha, jwo̧i̧dönö webö kwitebonö okobe jwiinö batjibanö.

³ Nilo ojwetjöma jwo̧i̧döda tjuju̧kwakobe su̧'bȩ baibanö chömöledönö kakatakwawökötjö̧ma. Ja̧danö, jödötjö labekwö kweju okwa tjetjachakobe, kwö̧lȩko̧nöbi tebachö, ja̧danö ku̧kwa kamapjonö wa̧jö. Ja̧danö, kwömöayedö tjejunöbi, kwömöledö tjejunöbi tjetjachakobe jwoi̧döma. Ba̧i̧ toawakiju okwabi, pan yo̧awa'di̧ju okwabi tja̧jakobe jwo̧i̧döma.

⁴ Ja̧danö, jwo̧i̧döma ökwönöbi, kwömöledönöbi, kwömöayedönöbi tjö̧nöchawakobe. Jejenö jö̧ba̧lö yöawobe Isabenö Jo̧ma ökwönöma. Moisés, jejenö yökawo faraónnö— webijetö Isabenö Jo̧ma Moisésnöma.

⁵ Ja̧danö, Isabenö Jo̧ma Moisésnö webijetö: —Moises, Aarónnö weköbo otokwa'o do̧ba̧lö kabebö i̧sebo, okobe jwiinö Egiptonö ojwebiya wamenö i̧sebi̧danö baibanö, ojwebiyabi, pjei ödönöbi, o̧jwese'dijunöbi i̧sebidanö baibanö kabebö i̧sebo weköbonö. Jejenö i̧sebena jwo̧i̧döda okobe jwiinö ojwebiyatjö, pjei ödötjö, ojwese'dijutjö latjekwibakobe— webijetö Isabenö Jo̧ma.

⁶ Ja̧danö, Moisés Isabenö Jo̧ wei̧danö Aarónnö webijetö. Weökwema otokwa'o do̧ba̧lö kabebö i̧sebena jwo̧i̧döma ojwebiyatjö, pjei ödötjö, ojwese'dijutjö labekwibijadötö okobe jwiinö Egipto nijinö su̧'bȩ batjibanö.

⁷ Jo̧kwaijayonö maliba luwama idödada tjöwaisinö wetjajabetjö̧ bakwainö baledijetö, jwo̧i̧dönö ojwebiyatjö latjekwibinö.

⁸ Ikenama faraónma jwöbijetö Moisésnö, Aarónnö ichobö. Ichajadötjö Moisésnö webijetö: —Abebi Isabenö Jo̧nöma bidö jwo̧i̧dönö wei̧ kaatakwawo, ötjönöbi, chömöledönöbi. Jejenö kaatakwawena wetocha kwömöledönö jo̧banö juwö iyö tji̧'yobö— jö̧ba̧lijetö faraónma Moisésnöma.

⁹ Jejenö jö̧a̧lökwe: —Jao otiwa, ökwöda webitjö dianö atebojobö Isabenö Jo̧nöma ökwönöbi, kwömöayedönöbi okobe deinö kwömöledönöbi pjaatobö. Atebocha Isabenö Jo̧nö ökwödö kwö̧jaduwelö jwo̧i̧dö debi batjibanö weobö, ojwenöda tjuju̧kwinö. Dianö atebobö weköbatjö— aeböke:

¹⁰ Itekwayida— atadijetö faraónma Moisésnöma. Jo̧kwaobetjö̧ Moisés jö̧ba̧lijetö: —Weköbi̧danö baibakobe kwöwaisachibobö, Israel jojodö Tjuluwo̧ Dios, Isabenö Jo̧ma, bakwo̧da. Jelo̧ tjösödökwe jo̧badajayo̧ma deobe, jö̧ba̧lö.

¹¹ Jwo̧i̧döma detjakobe ökwö kwö̧jelöma, ja̧danö kwömöayedö tjö̧jelöbi, kwömöledö tjö̧jelöbi. Nilo ojwe okwada batjibakobe— jö̧ba̧lijetö Moisésma faraónnöma.

¹² Ikenama Moisés, Aarón faraón ö̧jelö labebajadö Isabenö Jo̧nö budekwa̧lö abebijetö Moisésmma, okobe deinö jwo̧i̧dönö faraón itebonö detjinö weobö.

¹³ Jejenö aebiökwe Isabenö Jo̧ma Moisés aebi̧danö weajabetjö̧ okobe deinö jwo̧i̧döma wobijadötö. Tjejunö tebachajadöbi, apetunö ju̧kwadöbi, mejenö ju̧kwadöbi.

¹⁴ Egipto jojodöma jwo̧i̧dö wobawajadönöma ko̧ko̧dö lödijadötö okobe jwiinö Egiptotjöma. Jwiinö woijetö okobe jwiinö Egiptoma.

¹⁵ Jejenö Isabenö Jo̧ma jwo̧i̧dönö wotjobö weijayonö faraónma, tjo̧wi otiwa, jwo̧i̧döma wotjajabe, jö̧balö edena ina omajade 'diinö ji̧jetö. Ja̧danö, Isabenö Jo̧ yöa̧linadanö a̧ja̧kwijökötö Moisés, Aarón atjebi̧ma. Israel jojodönö latjebobö webijökötö.

Isabenö Jo̧ domulataja lȩebi̧ jawa weinatjö wa̧pötakwa lȩebina jawa, no̧jwö̧nö webö

¹⁶ Ikenama Isabenö Jo̧ma Moisésnö webijetö: —Aarónnö weköbo, otokwa'o do̧ba̧lö i̧sebö nijinö kwao. Kwaena nijiso̧pja̧ma no̧jwö̧da baibanö baledakobe, okobe jwiinö Egiptonö— webijetö Isabenö Jo̧ma Moisésnö.

¹⁷ Ja̧danö, Isabenö Jo̧ wei̧danö, Aarónma otokwa'o do̧ba̧lö i̧sebö nijinö kwabijetö. Kwaemi okobe jwiinö Egiptonö nijiso̧pja̧ma no̧jwö̧da babibijadötö. Jojodönöbi, tja̧jwi̧munöbi pja̧bijadötö no̧jwö̧ma tjowobö.

¹⁸ Ja̧danö, faraón ömöayedö maliba luwama idöda mea boawa tjöwaisinö Aarón nijiso̧pja̧ no̧jwö̧ batjibanö i̧sebö kwai̧danö bakwainö baledobö wetjijayonö waekwijadötö. Ja̧danö, no̧jwö̧ma jojodönö tja̧jwi̧munöbi pja̧bijadötö tjowobö.

¹⁹ Jo̧kwaiawö̧ maliba luwama jö̧ba̧lijadötö faraónnö, bejenö baledi̧ma Diosda wei̧, jö̧ba̧lö. Jo̧kwaijayonö faraónma ina omajade 'diinö ji̧jetö, Moisés, Aarón atjebi̧ öpöjödö.

Isabenö Jo̧ domulataja lȩebi̧ jawa weinatjö ö'wejemu lȩebina jawa, ma̧tu̧lȩdönö webö

²⁰ Ikenama Isabenö Jo̧ma webijetö Moisésnö: —Moisés, itekwai yȩayi wilubö kwi̧'yo Nilo ojwebe faraónnö te'ada̧lö, ojwebe ichenanö. Ichibo̧nö yöka̧lo: Isabenö Jo̧ma ökwönö weobe baikwö: Chömöledönö kabatakwawi jojodö deobekwö tji̧'yo ötjönö ösödö.

²¹ Ja̧danö, jobadönö kakatakwawökötjö̧ma ma̧tu̧lȩnö tjowobö wetocha kwitebobenöma, ba̧jekwadö pja̧tjinö. Ökwönöbi, kwömöayedönöbi, ja̧danö okobe deinö kwömöledönöbi owö tjichakobe ma̧tu̧lö̧ma. Ökwödö Egipto jojodö kwejuduwi okwa ma̧tu̧lȩma tjowobö tetjachakobe ba̧jȩkwadö. Niji kwö̧jataduwemibi ma̧tu̧lȩda ba̧jȩkwadö tjuju̧kwakobe.

²² Jo̧kwaijayonö ja̧ mölema ötjö chömöledö Egiptonö tjuju̧kwemi Gosén mikwemida detjakobe ma̧tu̧lȩma. Jemima wainö chujunocha Gosén nijinöma ma̧tu̧lȩma detjakobetjö̧. Jejenö chujunocha kwöwaisachibaduwobö, Isabenö Jo̧da böjȩ webo̧ma, okobe jwiinö nijinö.

²³ Ja̧danö, jejenö i̧sebö, Ökwö kwömöledönö lȩtebijayonö ötjö chömöledönö wainö chujunocha, ja̧ lȩtebi̧tjö tjö̧jibinö pjabatö. Faraón itekwayi ja̧ chujulu chi̧sebi baledobe kwedakobe. Moisés, jejenö yökawo faraónnö— webijetö Isabenö Jo̧ma Moisésnö.

²⁴ Ja̧danö, ja̧ dewachö yȩayi̧ Moisésma Isabenö Jo̧ yöawaja̧ faraónnö yöawijayonö öpöjödijetö. Jo̧kwaobetjö̧ Isabenö Jo̧ma iteda yöawi̧danö lȩbebö webijetö ma̧tu̧lȩnö. Ma̧tu̧lȩma ba̧jȩkwadö tjowobö köba̧lö tebachijadötö faraón ejunöbi, ömöayedö tjejunöbi. Ja̧danö okobe jwiinö Egiptoma jwiinö sulijetö ma̧tu̧lȩda batjibobetjö̧.

²⁵ Jejenö balediökwe faraónma jwöbijetö Aarónnö, Moisésnö tjichobö. Ichajadönö jö̧ba̧lijetö: —Jao otiwa, ökwödö Israel jojodöma kwuluwo̧duwi Diosnö juwö kwiyaduwo. Jo̧kwaijayonö chitebotjöda kwiyaduwo—

²⁶ jö̧a̧liökwe: —Belöda juwö diyitjö̧ma otiwökena— atadijetö Moisésma—. Egipto jojodöma Isabenö Jo̧nö, Duluwo̧ Diosnö juwö diyobe edö jwiinö tjölabena, ¡Sula! A̧ji̧kwakwawedötjö wainö junawedönö kwakwatjajawö̧nö̧ juwö̧ tjiyobe, jö̧ba̧lö. Jejenö omukwatö ökwödönö inawiya tjikwawena kwabö lotjobö—atadijetö Moisésma faraónnö—.

²⁷ Jo̧kwaobetjö, wa̧pötakwa möle kwebachö jojodö deobekwö di̧'yobö jo̧be, Isabenö Jo̧nö, Duluwo̧ Diosnö juwö iyö, jo̧ba weinadanö—

²⁸ atadökwe: —Jao kwatjö̧ma, jojodö deobekwö, Isabenö Jo̧nö, Kwuluwo̧duwi Diosnö juwö iyö kwi̧'yaduwobö katatakwawa. Jo̧kwaijayonö ödöma kwi̧'yaduwoko, chitebotjöda kwiyaduwo. Ja̧danö, Kwuluwo̧ Diosnö akebo ökwödönö pjaato— webijetö faraónma Moisésnöma.

²⁹ Jejenö weökwe: —¡Jao otiwa, a̧ja̧kwitjö! Bejutjö latebaja̧ ikena Isabenö Jo̧nö atebocha itekwayima ma̧tu̧lȩnö debi̧ batjibanö weobö. Ökwönöbi, kwömöayedönöbi kwömöledönöbi detjakobe ma̧tu̧lȩma. Jo̧kwaijayonö omönama yöba̧lökönuwi yemidanöma. Isabenö Jo̧nö juwö iyö di̧'yonöbi tjökeboko— jö̧ba̧lijetö Moisésma faraónnöma.

³⁰ Ja̧danö, Moisésma faraón ö̧jelö labebö abebijetö Isabenö Jo̧nö, ma̧tu̧lȩ debi̧ batjibanö weobö.

³¹ Aebökwe webijetö Isabenö Jo̧ma ma̧tu̧lȩ debi̧ batjibobö faraón, ömöayedö, okobe deinö ömöledö tjö̧jemima. Ba̧kwo̧bi deijetö matulema.

³² Jejenö weijayonö faraónma ina omajade 'diinö jo̧betjö̧ Israel jojodönö latjebobö webijökötö.