Éxodo 7 - Dios Iwene

¹ Ja̧danö, Isabenö Jo̧ma Moisésnö yöba̧lijetö: —Moisés, ö'wiyawakwa̧lö̧jinö a̧ja̧kwitjö. Faraón ökwönö otiwanö edobö ja̧tocha, iteda o̧'wo̧ jawa öwa̧na̧lökwenö edi̧danö edöbö. Ja̧danö, kwöpöe Aarónma ötjö yötawi̧ yöbawo̧danö ökwö yöawi̧ma yöawakwo̧.

² Okobe jwiinö ökwönö yötawi̧ma Aarónnö yökawo. Ja̧danö, jo̧banö yökawi̧ma faraónnö yöa̧lakobe, Israel jojodönö kakatakwawo kwitebotjö latjebobö, jö̧ba̧lö.

³ Aarónma jejenö yöa̧lijayonö faraónma omajade 'diinö wetobetjö̧ öpöjödakobe. Jwiinö chujulu chi̧sebima, ju'wibi, ju'wi labi̧ jawa Egiptonö webö chi̧sebijayonö

⁴ a̧ja̧kwökakobe ökwödö yökawaduwi̧ma. Ikenama Egipto jojodönö chujulu i̧sebö usula tjemawinö lȩtebocha. Jejenö Egipto jojodönö lȩtebobetjö̧ jwiinö labi̧ jawa webö chömöledö Israel jojodöma okobe deinö, bakwasokwenanö jobetjö latjebobö pjatatakwo̧sa.

⁵ Ja̧danö, chujulu i̧sebö lȩtebiawö̧, ja̧danö, Israel jojodönö latjebobö pjatatiawö̧ Egipto jojodöma ötjönö tjöwaisachibakobe, Webo̧ma Isabenö Jo̧da, jö̧ba̧lö.

⁶ Ja̧danö Moisés, Aarón Isabenö Jo̧ wei̧danö a̧ja̧kwijadötö.

⁷ Ja̧ mölema Moisésma ochenta año bo̧, ja̧danö Aarónma ochenta y tres año bo̧ ji̧jadötö, faraónnö yötjalena.

Aarón otokwa'o nijakwö jaena a̧ko̧'da baibijayonö faraón öpöjödina wene

⁸ Ja̧danö, Isabenö Jo̧ma Moisésnö, Aarónnö jö̧ba̧lijetö:

⁹ —Faraónma ökwödönö aebakobe, juluwi̧ jawa i̧sebaduwi chöwaisachibobö, kwuluwo̧duwi Diosma isabenö ökwödönö weinajobö, jö̧ba̧lö. Ikenama Moisés, weköbo Aarónnö otokwa'o do̧batibö nijakwö jao faraón öbajale a'otjö, a̧ko'dada baibanö— webijetö Isabenö Jo̧ma.

¹⁰ Ikenama Moisés, Aarón, faraón ö̧bobekwö 'ya̧jadöma Isabenö Jo̧ wei̧danö a̧ja̧kwijadötö. Faraón, faraón ömöayedö tjöbajale a'o ja̧nö Aarónma otokwa'o nijakwö jaemi a̧ko'dada baibijetö.

¹¹ Jo̧kwaiökwe faraónma jwöbijetö ömöayedö mea boawa waisadönö, ja̧danö, malimunö tjichobö. Jobadöma bakwainö i̧sebijadötö idöda mea boawa tjöwaisi̧tjö̧.

¹² Jobadö bakwo̧nökwena tjotokwa'iju nijakwö jatjemi a̧ko̧'dö̧da babibijadötö. Jo̧kwijayonö Aarón otokwa'otjö a̧ko'da babibajo̧ma ju'wedö a̧ko̧'dö̧ babibajadönö ö̧ka̧tibijetö.

¹³ Faraónma ja̧ baledi̧ edijayonö Isabenö Jo̧ yöa̧linadanö omajade 'diinö ö̧jobetjö̧ a̧ja̧kwijökötö.

Isabenö Jo̧ Egipto jojodönö domulataja lȩebi̧ jawa weinatjö ajayinö lȩebina jawa, ojwiyo ku̧kwi̧nö baibanö

¹⁴ Jemi tupakwöma Isabenö Jo̧ma Moisésnö jö̧ba̧lijetö: —Moisés, faraónma omajade 'diobetjö̧ kaatakwawökakobe Israel jojodönöma, Egiptotjö latjebobö.

¹⁵ ¡A̧ja̧kwitjö! Itekwayi yȩayi kwotokwa'o a̧ko'da baibanö kwi̧seba'oma do̧ba̧lö kwi'yo Nilo ojwebe. Jödö ö'öbönö ja̧nö kwite'ada̧lo faraón ojwebe ichenanö.

¹⁶ Ichibo̧nö yöka̧lo: Isabenö Jo̧, hebreo jojodö tjuluwo̧ Diosma ötjönö weijatö jo̧ba wei̧ ökwönö yötawobö, Chömöledönö kakatakwawo jojodö deobekwö tji̧'yo ötjönö ösödö, jö̧ba̧lö. Jejenö ökwönö yötawijayonö ¡yelösöda! ökwöma kwa̧ja̧kwijökötö.

¹⁷ Jo̧kwaobetjö̧ Isabenö Jo̧ma baikwö yöawobe ökwönö: Babema chujulu chi̧sebiökwe kwöwaisachibakobe, Isabenö Jo̧ma jwiinö juluwo̧, jo̧bama yöa̧li̧danö webo̧, jö̧ba̧lö. Jejenö yöawobe ökwönö. ¡Edi! Ötjöma iteda ujulunö bödö Nilo ojwenö kwatocha chömamunö do̧ta̧la'o chotokwa'onö kwu̧kwi̧nö baibanö ojwema.

¹⁸ Kwatena ojwe okwa ju̧kwadö ba̧i̧ma wotjakobe, ja̧danö jödö ojwema sulabenö kwi̧chinö woakobe. Ja̧danö, Egipto jojodöma ja ojwiyotjö tjowoböma jwiakobe. Moisés, jejenö yökawo faraónnö— webijetö Isabenö Jo̧ma Moisésnöma.

¹⁹ Ina webijetö: —Faraónnö yöba̧lö kwö̧jonö Aarónnö weköbo kwotokwa'o do̧ba̧lö kabebö i̧sebo ojwe wamenö. Jejenö i̧sebenama, okobe jwiinö Egipto ojwebiyanö, pjei̧ ödöbiyanöbi, o̧jwese'dijunöbi, o̧pesobubiyanöbi i̧sebi̧danö baibakobe. Jejenö i̧sebo weköbo, okobe jwiinö Egipto ojwema kwu̧kwinöda baibanö ji̧nö. Aarón jejenö i̧sebena okobe jwiinö Egiptonö ojwebiyama kwu̧kwinöda baibakobe. Ojwiyoma balde'dijunö towitjö otikwa o'dijunö okwi̧bi, pa̧la̧ka'dijunö okwi̧bi, kwu̧kwinöda baibakobe Egipto nijinö— jö̧ba̧lijetö Isabenö Jo̧ma Moisésnöma.

²⁰ Jo̧kwaobetjö̧ Aarón, Moisés, Isabenö Jo̧ wei̧ a̧ja̧kwijadötö. Faraón, jo̧ba ömöayedö tjeda̧lonö Aarónma otokwa'o do̧ba̧lö kabebö kwabijetö Nilo ojwenö. Kwaemi ojwema kwu̧kwödöda baibijetö.

²¹ Jödö ojwe okwa ju̧kwadö ba̧i̧ma wobijadötö. Ja̧danö, jödöma sulabenö kwi̧chinö woiawö̧ Egipto jojodöma tjowobö jwiijetö ojwetjöma. Okobe jwiinö Egipto ojwiyoma kwu̧kwobuda baibijetö.

²² Ja̧danö, faraón ömöayedö mea boawa waisadöma bakwainö webijadötö ojwe kwu̧kwinö baibanö, idöda mea boawa tjöwaisinö. Ja̧danö, wetjaja̧danö baibijetö. Jobekwö balediökwe faraónma ina omajade 'diinö ji̧jetö, Aarón, Moisés atjebi̧ma öpöjödö. Isabenö Jo̧ ajayinö yöa̧linadanö öpöjödijetö faraónma Aarón Moisés atjebi̧ma.

²³ Ikenama, ejube ȩwa̧jo̧ faraónma ja'yubebi omukwatijökötö ja̧ baledaja̧ma.

²⁴ Ja̧danö, Egipto jojodöma Nilo ojwe ö'öbönö ojwese'diju sobijadötö, ja̧ e'dijutjöda tjowobö, ojwetjö tjowoböma jwiiawö̧.

²⁵ Ikenama, Isabenö Jo̧ Nilo ojwe lȩebaja̧ma jelemutjö dötölataja möle ji̧jetö.